Chapter 49

cittāsattāsūcanaṃ nāma sargaḥ |
ekonapañcāśaḥ sargaḥ |
vasiṣṭhaḥ |
atremāmavabodhāya vismayotphullakāriṇīm |
apūrvāmeva saṅkṣepād rāma ramyāṃ kathāṃ śṛṇu || 1 ||
[Analyze grammar]

yojanānāṃ sahasrāṇi vipulaṃ vimalaṃ sphuṭam |
yugairapyajaradrūpamasti bilvaphalaṃ mahat || 2 ||
[Analyze grammar]

avināśarasādhāraṃ sudhāmadhurasāravat |
purāṇamapi bālendudalamārdavasundaram || 3 ||
[Analyze grammar]

vyūḍhasahyamahāmerumandarādritṛṇāvaleḥ |
mahākalpāntavātyāyā api vegairacālitam || 4 ||
[Analyze grammar]

yojanāyutakoṭīnāṃ koṭilakṣaśatairapi |
vaipulyenāparicchedyaṃ phalamādyaṃ jagatsthiteḥ || 5 ||
[Analyze grammar]

asya bilvaphalasyoccairbrahmāṇḍāni samīpataḥ |
haranti līlāṃ śaile'dho rājikākaṇapaddhateḥ || 6 ||
[Analyze grammar]

syandamānarasāpūrāṃ svādvīṃ rasacamatkṛtim |
yasyātiśete no kaścidapi rāghava ṣaḍrasaḥ || 7 ||
[Analyze grammar]

na kadācana pākena pātāntena sameti yat |
sadaiva pakvamapyaṅga jarasā yanna bādhyate || 8 ||
[Analyze grammar]

brahmaviṣṇvindrarudrādyā jaraḍhāḥ kecideva no |
yasyotpattiṃ vijānanti mūlaṃ vā vṛkṣameva vā || 9 ||
[Analyze grammar]

adṛṣṭāṅkuravṛkṣasya tvadṛṣṭakusumodgateḥ |
astambhamūlaśākhasya phalamevāvalokyate || 10 ||
[Analyze grammar]

ekapiṇḍaghanākāravyātatasthaulyaśālinaḥ |
yasyotpattivikārādipariṇāmo na dṛśyate || 11 ||
[Analyze grammar]

samastaphalasārasya phalasyāsya mahākṛteḥ |
majjāntarasti vitato nirvikāro rasāntaraḥ || 12 ||
[Analyze grammar]

śilāntariva nīrandhraḥ syandamānendubimbavat |
rasaṃ svasaṃvidāsvādyaṃ syandamāna ṛtāmṛtam || 13 ||
[Analyze grammar]

sekaḥ sakalasaukhyānāṃ śītalālokakārakaḥ |
śailābho'mṛtapiṇḍābho maṇḍa ātmaphalasthiteḥ || 14 ||
[Analyze grammar]

tasmātparamamajjā tu yāsau svādvī camatkṛtiḥ |
antarakṣubhitā nityamananyā śrīphalāṅgataḥ || 15 ||
[Analyze grammar]

svasanniveśavaicitryamananyatvaphalāṅgakam |
atyajantyā tayā tanvyā sthūlayāpyatibālayā || 16 ||
[Analyze grammar]

iyamasmīti kalanādasatsadanyatāmalam |
bhedādyasambhavadidaṃ svayamutpādya bhāvitam || 17 ||
[Analyze grammar]

ahaṅkalā samudayasamanantarameva sā |
valitākāśaśabdāṅgatrailokyaparamāṇubhiḥ || 18 ||
[Analyze grammar]

ityanukramato yātā sā saṃvicchaktirūpatām |
majjā prāksanniveśaṃ svaṃ tamevāpyasamujjhatī || 19 ||
[Analyze grammar]

saṃvicchaktyā tayā tatra tatastaralarūpayā |
nija eva pare rūpe dṛgitthaṃ samprasāritā || 20 ||
[Analyze grammar]

idaṃ vyomamahānantamiyaṃ kālamahākalā |
iyaṃ niyatirudyuktā kriyeyaṃ spandadharmiṇī || 21 ||
[Analyze grammar]

ayaṃ saṅkalpavistārastvayamāśābharabhramaḥ |
rāgadveṣasthitiriyaṃ heyopādeyadhīriyam || 22 ||
[Analyze grammar]

iyaṃ tvattā tviyaṃ mattā tatteyaṃ saṃsthitistviyam |
brahmāṇḍaugho'yamūrdhvasthastvayamagre'yamapyadhaḥ || 23 ||
[Analyze grammar]

ayaṃ puraḥ pārśvato'yaṃ paścādārāddavīyasi |
idaṃ bhūtaṃ vartamānaṃ bhaviṣyattvidamityapi || 24 ||
[Analyze grammar]

idamantassthitānalpakalpanāmbhoruhālayam |
brahmāṇḍamaṇḍapāpiṇḍakrīḍāmaṇḍapamaṇḍalam || 25 ||
[Analyze grammar]

anantakalanātattvaparipallavitā hareḥ |
hṛdabjakarṇikā ceyaṃ lokapadmākṣamālikā || 26 ||
[Analyze grammar]

iyaṃ kīrṇamahārudrakaṇāṅkuritakoṭarā |
dīrghādhvapadavī dhvāntadhvaṃsanehāprabhāvinī || 27 ||
[Analyze grammar]

ayaṃ meruḥ kakuppattrajagatpaṅkajakarṇikā |
sphuradindumadhūllāsalampaṭāmaraṣaṭpadā || 28 ||
[Analyze grammar]

iyamuddāmasaugandhyā svargaśrīpuṣpamañjarī |
jagajjaraḍhavṛkṣasya rajonarakamūlinaḥ || 29 ||
[Analyze grammar]

iyaṃ ca tārākiñjalkā brahmāṇḍakataṭasthitā |
apārāpāraparyantā vyomanīlasarojinī || 30 ||
[Analyze grammar]

iyaṃ kriyāsaridvātataraṅgataraṇāvalī |
sargāvartavivartasthā bhūribhūtaparamparā || 31 ||
[Analyze grammar]

iyaṃ tamobhramariṇī kṣaṇakalpādipallavā |
tejaḥkesariṇī kālanalinī vyomapaṅkajā || 32 ||
[Analyze grammar]

imā bhāvavikārāḍhyā jarāmṛtiviṣūcikāḥ |
vidyāvidyāvikārāḍhyā imāśśāstrārthadṛṣṭayaḥ || 33 ||
[Analyze grammar]

iti sā tasya bilvasya nijā majjācamatkṛtiḥ |
svakalpasanniveśāntarevaivaṃkṛtasaṃsthitiḥ || 34 ||
[Analyze grammar]

śāntā svasthā nirābādhā somyetaratayojjhitā |
kartṛtvamapyakartṛtvaṃ kṛtvā kṛtvaiva saṃsthitā || 35 ||
[Analyze grammar]

ekaikikaiva vividheva vibhāvyamānā naikātmikā na vividhā nanu saiva saiva |
satyāsthitā sakalaśāntisamaikarūpā sarvātmikātimahatī citireva śaktiḥ || 36 ||
[Analyze grammar]