Chapter 46

jaganmithyātvapratipādanaṃ nāma sargaḥ |
ṣaṭcatvāriṃśaḥ sargaḥ |
vasiṣṭhaḥ |
tataḥ sa jīvo bhagavandṛṣṭavāndehasambhramam |
ādisarge nabhassaṃsthaḥ kāmavasthāmupaiti hi || 1 ||
[Analyze grammar]

īśvaraḥ |
parasmātparame vyomni pūrvoktakramavadvapuḥ |
jīvaḥ paśyati sampannamasatsvapnanaro yathā || 2 ||
[Analyze grammar]

sarvagatvāccidghanasya kāryaṃ svapnanaro'pi hi |
yathā karotyāśu tathā jīvasyāpi śarīradṛk || 3 ||
[Analyze grammar]

sanātano'hamavyaktaḥ pumānityabhidhāstataḥ |
karotyātmani tenāsau prathamaḥ kathitaḥ pumān || 4 ||
[Analyze grammar]

evaṃ sa sarge kasmiṃścitprathamo'rthaḥ sadāśivaḥ |
kasmiṃścidviṣṇurityukto nābhyutpannapitāmahaḥ || 5 ||
[Analyze grammar]

pitāmahaḥ sa kasmiṃścitkasmiṃścidapi cetaraḥ |
sa ca saṅkalpapuruṣaḥ saṅkalpānmūrtimān sthitaḥ || 6 ||
[Analyze grammar]

puṣṭaḥ prathamasaṅkalpastāṃ manomūrtimāsthitaḥ |
yad yathā kalpayatyāśu tattathānubhavatyalam || 7 ||
[Analyze grammar]

tattvasadrūpamakhilaṃ śūnye vetālako yathā |
bhramadṛṣṭyā tu sadrūpamityahantājagadgatiḥ || 8 ||
[Analyze grammar]

sraṣṭādipuruṣastvevaṃ svayaṃ sampadyate hi yaḥ |
sa nimeṣaṃ prati vyomni samudetyatha līyate || 9 ||
[Analyze grammar]

nimeṣa eva kalpaughamahākalpaparamparāḥ |
pratibhāsaviparyāsamātreṇānubhavatyalam || 10 ||
[Analyze grammar]

paramāṇau paramāṇau vyomni vyomni kṣaṇe kṣaṇe |
sargakalpamahākalpabhāvābhāvā bhavanti hi || 11 ||
[Analyze grammar]

dṛśyante kecidanyo'nyaṃ sādharmyaṃ vāsanāśataiḥ |
mithaḥ kecinna dṛśyante kecitpaśyanti netaram || 12 ||
[Analyze grammar]

kecinnānyena dṛśyante dṛṣṭenāpyasadātmanā |
sargāḥ sargeṇa sarvatra sambhavanti na te śive || 13 ||
[Analyze grammar]

bhavanti parame vyomni vyomarūpā iti svayam |
svayaṃ ca sadasadrūpā līyante svapnaśailavat || 14 ||
[Analyze grammar]

sargairna deśa ākrānto na ca kālo na kartṛtā |
na caite satsvarūpā vā na kalpaṃ naiva ca kṣaṇam || 15 ||
[Analyze grammar]

na cedaṃ jāyate kiñcinna ca kiñcana naśyati |
svacamatkārarūpeṇa ciccamatkurute citi || 16 ||
[Analyze grammar]

svapnapattananirmāṇapātotpatanavajjagat |
na deśakālākramaṇaṃ karoti manasāmapi || 17 ||
[Analyze grammar]

yathā saṅkalpaśailena deśakālādyanantakam |
ākrāntamapi nākrāntaṃ tathaiva jagatāsatā || 18 ||
[Analyze grammar]

sampadyate yathādyo'sau puruṣaḥ sargakārakaḥ |
anenaiva krameṇeha kīṭaḥ sampadyate kṣaṇāt || 19 ||
[Analyze grammar]

tasthuṣāmevameveha jātayo hi caturvidhāḥ |
rudrādyāstaruparyantāḥ sampadyante kṣaṇaṃ prati || 20 ||
[Analyze grammar]

paramāparamāḥ santi tathā kecidaṇūpamāḥ |
eṣa eva kramasteṣāṃ sati cāsati sargake || 21 ||
[Analyze grammar]

asyāḥ saṃsāramāyāyā evambhūtārthabhāvanāt |
bhedopaśāntāvabhyāsādbhavatyupaśamaśśivaḥ || 22 ||
[Analyze grammar]

nimeṣaśatabhāgārdhamātrameva parā citiḥ |
svarūpataścel luṭhitā tadeṣodetyavasthitiḥ || 23 ||
[Analyze grammar]

sā jñarūpā śilākośa iva cetsvātmani sthitā |
tadanādyavabhāsātmabrahmaśabdena gīyate || 24 ||
[Analyze grammar]

asminprauḍhiṃ gate sarge mahāciccetanaṃ navam |
saṅgamāgatya digdeśakālāṃśaparamāṇunā || 25 ||
[Analyze grammar]

jīvatāmāgatā bhūtatanmātravalanākramāt |
bhavatyagamṛgīvīrutkīṭadevāsurādikam || 26 ||
[Analyze grammar]

yasminnitye tate tantau dṛḍhe sragiva tiṣṭhati |
sadasadgrathitaṃ viśvaṃ viśvāṅge viśvakarmaṇi || 27 ||
[Analyze grammar]

na taddūre na nikaṭe nordhve nādho na te na me |
na pūrvaṃ nādya na prātarna sannāsanna madhyagam || 28 ||
[Analyze grammar]

anubhavakalanādṛte'sya mātā bhavati na sarvavikalpaneṣu satsu |
phaladuruvibhavā pramāṇamālā sthitimupayāti na vāriṇīva vahniḥ || 29 ||
[Analyze grammar]

yathāpṛṣṭaṃ mune proktaṃ tvayi kalyāṇamastu te |
deśaṃ prayāmo'bhimatamāgacchottiṣṭha pārvati || 30 ||
[Analyze grammar]

ityuktvā nīlakaṇṭho'sau tyaktapuṣpāñjalau mayi |
tatāra parivāreṇa samamambarakoṭaram || 31 ||
[Analyze grammar]

tasmin gate tribhuvanādhipatāv umeśe sthitvā kṣaṇaṃ tadanu saṃsmṛtipūrvameva |
aṅgīkṛtaṃ navapavitratayā mayātmadarbhāsanaṃ śramavateva mahāśrutaṃ tat || 32 ||
[Analyze grammar]