Chapter 41

maheśvaravarṇanaṃ nāma sargaḥ |
ekacatvāriṃśaḥ sargaḥ |
īśvaraḥ |
ityādikāpi śabdānāmarthaśrīḥ satyarūpiṇī |
tasmin sarveśvare sarvasattāmaṇisamudgake || 1 ||
[Analyze grammar]

kā nāma vimalā bhāsastasminparamacinmaṇau |
na kacanti vicinvanti vicitrāṇi jaganti yāḥ || 2 ||
[Analyze grammar]

eṣā bījakaṇāntassthā citsattā svavapurmayam |
buddhvā mṛtkālavāryādi karotyaṅkuracodanam || 3 ||
[Analyze grammar]

phenāvartavivartāntarvartinī rasarūpiṇī |
kacitendriyasambandhe karoti spandamambhasām || 4 ||
[Analyze grammar]

eṣā kusumaguccheṣu gandharūpeṇa saṃsthitā |
kacantī ghrāṇarandhreṣu karoti pariphullanam || 5 ||
[Analyze grammar]

śilāṅgasthā śilāṅgatvaṃ nayantī satyatāpadam |
sargādhāradaśāṃ dhatte girīndrasthitilīlayā || 6 ||
[Analyze grammar]

pavanaspandakośātmarūpiṇī ca tvagindriyam |
saṃsādhayatyātmasutaṃ pitevātmaparājayāt || 7 ||
[Analyze grammar]

aśeṣasārasampiṇḍamapyātmānaṃ khasiddhaye |
bhāvayitvā nakiñcittvamiva khatvaṃ karotyalam || 8 ||
[Analyze grammar]

svasattāpratibimbābhamākāśamakurodare |
dhatte kalpanimeṣāṅkaṃ kālākhyamamalaṃ vapuḥ || 9 ||
[Analyze grammar]

āmahāpañcameśānapariṇāmamanāmayā |
idamitthamidaṃ neti niyatirbhavati svayam || 10 ||
[Analyze grammar]

sākṣiṇi sphāra ābhāse dhruve dīpa iva kriyāḥ |
satyetasminprakāśante jagaccitraparamparāḥ || 11 ||
[Analyze grammar]

paramākāśanagaranāṭyamaṇḍapabhūmiṣu |
svaśaktinṛttaṃ saṃsāraṃ paśyantī sākṣivatsthitā || 12 ||
[Analyze grammar]

vasiṣṭhaḥ |
śivasyāsya jagannātha śaktayastāḥ kathaṃ sthitāḥ |
sākṣitā kātha kiṃ tāsāṃ nṛttaṃ syātkiyadeva vā || 13 ||
[Analyze grammar]

īśvaraḥ |
svabhāvācalaśāntasya śivasya paramātmanaḥ |
somya cinmātrarūpasya sarvasyānākṛterapi || 14 ||
[Analyze grammar]

icchāsattā vyomasattā kālasattā tathaiva ca |
tathā niyatisattā ca mahāsattā ca suvrata || 15 ||
[Analyze grammar]

jñānaśaktiḥ kriyāśaktiḥ kartṛtākartṛtāpi ca |
ityādikānāṃ śaktīnāmanto nāsti śivātmani || 16 ||
[Analyze grammar]

vasiṣṭhaḥ |
śaktayaḥ kuta etāstā bahutvaṃ kathamāsu ca |
udayaśca kathaṃ deva bhedābhedaśca kīdṛśaḥ || 17 ||
[Analyze grammar]

īśvaraḥ |
śivasyānantarūpasya yaiṣā cinmātratātmanaḥ |
eṣā hi śaktirityuktā nāsmādbhinnā manāgapi || 18 ||
[Analyze grammar]

jñatvakartṛtvabhoktṛtvasākṣitvādivibhāvanāt |
śaktayo vividhaṃ rūpaṃ dhārayanti bahūdayam || 19 ||
[Analyze grammar]

śivaśaktyākhyayaiko'pi bahuvadbhāsate svataḥ |
sarvaśaktyātmanaikena śivenaiva śivātmasu |
artheṣvarthitayā satsu sākṣivatkalpitātmasu || 20 ||
[Analyze grammar]

etā jagati nṛtyanti brahmāṇḍe nṛttamaṇḍape |
kālena nartakeneva krameṇa pariśikṣitāḥ || 21 ||
[Analyze grammar]

yā sā paramparaitāsāmeṣā niyatirucyate |
kriyā prakṛtiricchā sā kāletyādikṛtābhidhā || 22 ||
[Analyze grammar]

āmahārudraparyantamidamitthamiti sthiteḥ |
ātṛṇaṃ padmajaspandaniyamānniyatiḥ smṛtā || 23 ||
[Analyze grammar]

niyatirnityamudvegavarjitā paramorjitā |
eṣā nṛtyati khe nityaṃ jagajjālakanāṭakam || 24 ||
[Analyze grammar]

nānārasavilāsāḍhyaṃ vivartābhinayānvitam |
kalpakṣaṇahatānekapuṣkarāvartaghargharam || 25 ||
[Analyze grammar]

sarvartukusumākīrṇadharāgolakamandiram |
bhūyo bhūyaḥ patadvarṣabhūrisvedajalotkaram || 26 ||
[Analyze grammar]

payodapallavālolanīlāmbarakṛtabhramam |
pūrṇasaṃśuṣkasaptābdhiratnāḍhyavalayākulam || 27 ||
[Analyze grammar]

yāmāpakṣmadinaprekṣākaṭākṣāśāritāmbaram |
majjanonmajjanavyagrakulādrikulaśekharam || 28 ||
[Analyze grammar]

bhramacchaśimaṇiprotagaṅgāmuktālatātrayam |
caturdaśavidhānantabhūtaromanatonnatam || 29 ||
[Analyze grammar]

sandṛṣṭādṛṣṭasandhyābhravilolakarapallavam |
anārataraṇallolalokālaṅkārakomalam || 30 ||
[Analyze grammar]

bhūribhūtalapātālanabhastalapadakramam |
magnonmagnaghanānīkatārāgharmakaṇotkaram || 31 ||
[Analyze grammar]

candrārkamaṇḍalaspandasmitasphuṭanabhomukham |
kampitānekabrahmāṇḍakavāṭakavitānakam || 32 ||
[Analyze grammar]

luṭhallokāntaravyūhadhvananmuktāṅkapallavam |
sukhaduḥkhadaśādoṣabhāvābhāvarasāntaram || 33 ||
[Analyze grammar]

asminvikāravalite niyatervilāse saṃsāranāmni ciranāṭakanāṭyasāre |
sākṣī sadoditavapuḥ parameśvaro'yamekaḥ sthito na ca tayā na ca tena bhinnaḥ || 34 ||
[Analyze grammar]