Chapter 31

dehasattāvicāro nāma sargaḥ |
ekatriṃśaḥ sargaḥ |
vasiṣṭhaḥ |
etāṃ dṛṣṭimavaṣṭabhya naṣṭakaṣṭeṣṭaceṣṭitaḥ |
tiṣṭhāṣṭaguṇamaiśvaryamapyariṣṭamivotsṛjan || 1 ||
[Analyze grammar]

athemāmaparāṃ dṛṣṭiṃ mahāmohavināśinīm |
duṣprāpāmapi suprāpāmanapāyāmanāmayām || 2 ||
[Analyze grammar]

śṛṇu yā kathitā pūrvaṃ mama kailāsakandare |
saṃsāraduḥkhaśāntyarthaṃ devenārdhendumaulinā || 3 ||
[Analyze grammar]

astīndukarasambhārabhāsuraḥ pārago divaḥ |
kailāso nāma śailendro gaurīramaṇamandiram || 4 ||
[Analyze grammar]

gaṅgānirjharanirdhauto gaṇodgīrṇaguhāgṛhaḥ |
mandānilavalaccūtakadambavanabandhuraḥ || 5 ||
[Analyze grammar]

līlālolāmaragaṇaḥ kṛtakokakalāravaḥ |
kaumārabarhivalitakharjūravanapiñjaraḥ || 6 ||
[Analyze grammar]

tamālāntarhitāmbhodaḥ kadalītulitāmbudaḥ |
cañcarījālajaṭilaḥ kūjatkalakapiñjalaḥ || 7 ||
[Analyze grammar]

vidyādharodgītaguhaḥ kacatkanakakandaraḥ |
kāraṇḍavoḍḍāmaravāgasaṅkhyakusumāmbudaḥ || 8 ||
[Analyze grammar]

vimuktajaladodgāraḥ siddhacāraṇasevitaḥ |
candrāvacūladayitastrilokīlokavanditaḥ || 9 ||
[Analyze grammar]

satkalpapādapabhujaḥ suśikhāśṛṅgakandharaḥ |
ratnavidyotanayano vanāvalitanūruhaḥ || 10 ||
[Analyze grammar]

kācakandarakeśaśrīḥ svavanāvalanāṃśukaḥ |
pavanoddhūtakiñjalkajālāruṇatalāmbaraḥ || 11 ||
[Analyze grammar]

tatrāste bhagavāndevo haraścandrakalādharaḥ |
śūlapāṇistrinayano gaṇaughaparivāritaḥ || 12 ||
[Analyze grammar]

bhavānīhṛtadehārdhaḥ sarvalokaikakāraṇam |
kandarpadarpadalanaḥ kalākarakalādharaḥ || 13 ||
[Analyze grammar]

ṣaṇmukhānugatacchāyaḥ pramattavṛṣavāhanaḥ |
mattebhakṛttivasanaśśmaśānaramaṇālayaḥ || 14 ||
[Analyze grammar]

taṃ pūjayanmahādevaṃ tasminneva girau purā |
kadācidavasaṃ gaṅgātaṭe'haṃ racitāśramaḥ || 15 ||
[Analyze grammar]

tapo'rthaṃ tāpasācāre cirāya racitasthitiḥ |
yathākramasadācāraḥ puṇyasānusamāśrayaḥ || 16 ||
[Analyze grammar]

nivāsārthaṃ kṛtasnānaḥ kṛtanīladaloṭajaḥ |
bālavṛkṣakabaddhāsthaḥ saṃropitalatāvṛtiḥ || 17 ||
[Analyze grammar]

sañcitāgryavanaprāṇirupārjitakamaṇḍaluḥ |
puṣpārthaṃ syūtapuṭakaḥ sūmbhitasvākṣamālikaḥ || 18 ||
[Analyze grammar]

śiṣyasaṅghātavalitaḥ kṛtaśāstrārthasaṅgrahaḥ |
ānītapustakavyūhaḥ paripālitasanmṛgaḥ || 19 ||
[Analyze grammar]

evaṃguṇaviśiṣṭasya kailāsavanakuñjake |
tapaḥ pracarato rāma mama kālo'tyavartata || 20 ||
[Analyze grammar]

athaikadā kadācittu bahulasyāṣṭame dine |
gate śrāvaṇapakṣasya rātryardhe kṣayamāgate || 21 ||
[Analyze grammar]

dikṣu saṃśāntarūpāsu kāṣṭhamaunasthitāsviva |
khaḍgacchedyāndhakāreṣu kuñjeṣu gahaneṣu ca || 22 ||
[Analyze grammar]

avaśyāyalasanmuktāhāse sarati mārute |
ālavālopadhāneṣu mṛgeṣvāśramaśāyiṣu || 23 ||
[Analyze grammar]

amṛtāṃśukarasyandamātmanaḥ parivṛddhaye |
lihatsu śaśiraśmibhyaḥ pallaveṣvamṛtadravam || 24 ||
[Analyze grammar]

kumudvatīṣvoṣadhīṣu cakorīṣu latāsu ca |
pibantīṣvamṛtasyandaṃ karairākīrṇamaindavam || 25 ||
[Analyze grammar]

śailaviśrāntanīlābhrapallavasya visāriṇaḥ |
kṛttikāgucchake vyomatāpiñchasya tribhāgage || 26 ||
[Analyze grammar]

tāraughapratibimbena girau sphaṭikabhūmiṣu |
vikāsipuṣpaprakare dviguṇatvamupāgate || 27 ||
[Analyze grammar]

mayi pallavapalyaṅkagate muktehayā dhiyā |
cintayatyamalābhāsamātmatattvamaviplutam || 28 ||
[Analyze grammar]

dvitīyamaddehavati vyomni saptarṣimaṇḍale |
madarthamiva tāmeva diśamāpatatīva ca || 29 ||
[Analyze grammar]

tārakātritaye vyomno gṛhamūrdhani madhyage |
mṛgatraye kirātātte sadā bhramamivāgate || 30 ||
[Analyze grammar]

utphullakumudāmodadviguṇoddāmamanmathe |
cakravākagaṇe śailasarasīṣvanyatāṃ gate || 31 ||
[Analyze grammar]

śilāśikhopaviṣṭāsu śailotkīrṇāsvivābhitaḥ |
pibantīṣu cakorīṣu śītaṃ śaśikarāmṛtam || 32 ||
[Analyze grammar]

vahati madhuramārute vane'ntaśśaśikaraśīkaravarṣaṇaikaśīte |
dalacayacalanotthaśabdagīte kumudavadhūprathamābhisāriṇīva || 33 ||
[Analyze grammar]