Chapter 21

ālayalābho nāma sargaḥ |
ekaviṃśaḥ sargaḥ |
bhusuṇḍaḥ |
āsītkiñcitpurākalpe jagad yacciravismṛtam |
sanniveśenāmunaiva tad yadadyātidūragam || 1 ||
[Analyze grammar]

tadetadvṛttamabhyāsādvartamānena varṇitam |
mayā munīndra bodhāya prāgjagatsāmyadarśinā || 2 ||
[Analyze grammar]

adya me phalitaṃ puṇyaiścirakālopabṛṃhitaiḥ |
nirvighnamevaṃ paśyāmi yadbhavantaṃ mune tataḥ || 3 ||
[Analyze grammar]

idaṃ nīḍamimāśśākhā ayaṃ cāhamayaṃ drumaḥ |
adya pāvanatāṃ prāptānyetāni tava darśanāt || 4 ||
[Analyze grammar]

idamarghyamidaṃ pādyaṃ gṛhītvā vibhavārpitam |
nūnaṃ pāvanatāṃ nītvā śeṣeṇādiśa māṃ mune || 5 ||
[Analyze grammar]

vasiṣṭhaḥ |
ityuktvārghyaṃ ca pādyaṃ ca bhūyo dattavati svayam |
bhusuṇḍavihage tasminnidaṃ rāmāhamuktavān || 6 ||
[Analyze grammar]

bhrātaraste vihaṅgeśa tādṛksattvā mahādhiyaḥ |
iha kasmānna dṛśyante tvamevaiko hi dṛśyase || 7 ||
[Analyze grammar]

bhusuṇḍaḥ |
tiṣṭhatāmiha naḥ kālo mahānatigato mune |
yugānāṃ paṅktayaḥ kṣīṇā divasānāmivānagha || 8 ||
[Analyze grammar]

etāvatā ca kālena sarva eva mamānujāḥ |
tanūstṛṇamiva tyaktvā śive pariṇatāḥ pare || 9 ||
[Analyze grammar]

dīrghāyuṣo mahānto'pi santo'pi balino'pi ca |
sarva eva nigīryante kālenākalitātmanā || 10 ||
[Analyze grammar]

vasiṣṭhaḥ |
skandharūḍhārkaśaśiṣu vahatsvavirataṃ javāt |
vātaskandhātivāteṣu kaccittāta na khidyase || 11 ||
[Analyze grammar]

dagdhodayāstaśailendravanavyūhai raveḥ karaiḥ |
ciramatyantamāsannaiḥ kathaṃ tāta na khidyase || 12 ||
[Analyze grammar]

indoratha karaiśśītaiḥ pāṣāṇīkṛtavāribhiḥ |
āsannataratāṃ yātaiḥ kaccittāta na khidyase || 13 ||
[Analyze grammar]

ajasramiha viśrāntaiḥ kalpajīmūtamaṇḍalaiḥ |
paraśucchedyanīhāraiḥ kathaṃ tāta na khidyase || 14 ||
[Analyze grammar]

viṣamairjāgataiḥ kṣobhairuccaistarapadasthitaḥ |
kathaṃ na kṣobhamāyāti kalpavṛkṣo'yamunnataḥ || 15 ||
[Analyze grammar]

bhusuṇḍaḥ |
nirālambāspadā brahman sarvalokāvadhīritā |
tuccheyaṃ sarvabhūtānāṃ madhye vihagajīvikā || 16 ||
[Analyze grammar]

yadīdṛśeṣu dūreṣu nirjaneṣu vaneṣu ca |
kalpitāsyāḥ sthitirdhātrā śūnye vā vyomadhanvani || 17 ||
[Analyze grammar]

kathamasyāṃ prabho jātau jātasya kila jīvataḥ |
āśāpāśanibaddhasya vihagasya viśokatā || 18 ||
[Analyze grammar]

vayaṃ tu bhagavannityaṃ svātmasantoṣasaṃyutāḥ |
na kadācana nīrūpairmuhyāmo jāgatairbhramaiḥ || 19 ||
[Analyze grammar]

svabhāvamātrasantuṣṭāḥ kaṣṭairmuktā viceṣṭitaiḥ |
kṣipāmaḥ kevalaṃ kālamasminbrahmannijālaye || 20 ||
[Analyze grammar]

na jīvitānna maraṇātkurmo dehasya rodhanam |
yathā sthitena tiṣṭhāmastathaivāstaṅgatehitāḥ || 21 ||
[Analyze grammar]

ālokitā lokadaśā dṛṣṭā dṛṣṭāntadṛṣṭayaḥ |
nūnaṃ santyaktamasmākaṃ manasā cañcalaṃ vapuḥ || 22 ||
[Analyze grammar]

anāratanijāloke nityaṃ cāparitāpini |
kalpāgasyopari sadā vedmi kālakalāgatim || 23 ||
[Analyze grammar]

ratnagucchaprakāśāḍhye brahman kalpalatāgṛhe |
prāṇāpānapravāheṇa vedmi kālamakhaṇḍitam || 24 ||
[Analyze grammar]

avijñātadivārātre'pyasminnuccaiśśiloccaye |
jānāmi nijayā buddhyā lokakālakramasthitim || 25 ||
[Analyze grammar]

sārāsāraparicchedi bodhādviśrāntimāgatam |
nirastacāpalaṃ śāntaṃ jātameva mune manaḥ || 26 ||
[Analyze grammar]

saṃsāravyavahārotthairāśāpāśairasanmayaiḥ |
udgālairiva bhūkāko na vaivaśyaṃ vrajāmyaham || 27 ||
[Analyze grammar]

paropaśamadharmiṇyā vayamālokaśītayā |
paśyanto jāgatīṃ māyāṃ dhiyā dhairyamupāgatāḥ || 28 ||
[Analyze grammar]

bhīmāsvapi mahābuddhe daśāsvacalabuddhayaḥ |
bibhimo nopalākārāḥ samprāptāsu yathākramam || 29 ||
[Analyze grammar]

iyamārambhasubhagā taralā jāgatī sthitiḥ |
bhūyo bhūyaḥ parāmṛṣṭā neha kiñcana sanmayam || 30 ||
[Analyze grammar]

sarvāṇyeva prayāntyeva samāyānti ca vā na vā |
bhagavanbhūtajālāni bhayamasmākamatra kim || 31 ||
[Analyze grammar]

bhūtajālataraṅgiṇyā viśantyāḥ kālasāgaram |
vayaṃ saṃsārasaritastaṭasthā apyanākulāḥ || 32 ||
[Analyze grammar]

nojjhāmo na ca gṛhṇīmastiṣṭhāmo naiva ca sthitāḥ |
mṛdavo'pi bhṛśaṃ krūrā vayamasmindrume sthitāḥ || 33 ||
[Analyze grammar]

vītaśokabhayāyāsaistvādṛśaiḥ puruṣottamaiḥ |
tuṣṭairanugṛhītāḥ smaḥ saṃsthitā vigatajvarāḥ || 34 ||
[Analyze grammar]

netaścetaśca paryastaṃ lulitaṃ na ca vṛttiṣu |
nāparāmṛṣṭatattvārthamasmākaṃ bhagavanmanaḥ || 35 ||
[Analyze grammar]

nirvikāre gatakṣobhe svātmanyupaśamaṃ gate |
ataraṅgāḥ prapūrṇāḥ smaḥ parvaṇīva mahābdhayaḥ || 36 ||
[Analyze grammar]

bhavadāgamanādbrahmannidānīṃ muditāśayāḥ |
phalitāśeṣasaṅkalpāḥ paramāṃ pūrṇatāṃ gatāḥ || 37 ||
[Analyze grammar]

rasāyanamayī śītā paramānandadāyinī |
nānandayati kaṃ nāma sādhusaṅgaticandrikā || 38 ||
[Analyze grammar]

satsaṅgamānandarasaḥ kenāyamupamīyate |
mandaroddhūtasarvāmbuḥ kṣīrodo yena kharvyate || 39 ||
[Analyze grammar]

nātaḥ parataraṃ kiñcinmanye kuśalamātmanaḥ |
santo yadanugamyante santyaktasakalaiṣaṇam || 40 ||
[Analyze grammar]

āpātamātraramyebhyo bhogebhyaḥ kimavāpyate |
satsaṅgacintāmaṇitaḥ sarvaṃ sāramavāpyate || 41 ||
[Analyze grammar]

snigdhagambhīramasṛṇamadhurodāradhīravāk |
trailokyapadmakośe'smiṃstvamekaṣṣaṭpadāyase || 42 ||
[Analyze grammar]

adhigataparamātmano'pi manye bhavadavalokanaśāntaduṣkṛtasya |
mama saphalamihādya janma sādho sakalabhayāpaharo hi sādhusaṅgaḥ || 43 ||
[Analyze grammar]