Chapter 35

prahlādopadeśayogo nāma sargaḥ |
pañcatriṃśaḥ sargaḥ |
prahlādaḥ |
omityākāritākāro vikāraparivarjitaḥ |
ātmaivāyaṃ idaṃ sarvaṃ yatkiñcijjagatīgatam || 1 ||
[Analyze grammar]

medo'sthimāṃsamajjāsṛgatīto'pyeṣa cetanaḥ |
antarastho'pi sūryādīnprakāśayati dīpakaḥ || 2 ||
[Analyze grammar]

uṣṇīkaroti dahanaṃ rasayatyamṛto rasaṃ |
indriyānubhavānbhuṅkte bhogāniva mahīpatiḥ || 3 ||
[Analyze grammar]

tiṣṭhannapi hi nāsīno gacchannapi na gacchati |
śānto'pi vyavahārasthaḥ kurvannapi na lipyate || 4 ||
[Analyze grammar]

pūrvamadya tathedānīmihāmutrobhayatra ca |
pihito'pihito'pyeṣa samaḥ sarvāsu vṛttiṣu || 5 ||
[Analyze grammar]

udbhavanyagbhavābhāvabhāvanābhiritastataḥ |
brahmāditṛṇaparyantaṃ jagadāvartayan sthitaḥ || 6 ||
[Analyze grammar]

nityaspandamayo nityamapi devātsadāgateḥ |
sthāṇorapyakriyo nityamākāśādapyalepakaḥ || 7 ||
[Analyze grammar]

manāṃsi kṣobhayatyeṣa pallavāniva mārutaḥ |
vāhayatyakṣapaṅktiṃ vā svāśvālīmiva sārathiḥ || 8 ||
[Analyze grammar]

atiduḥkhitavaddehagehe karmakaraḥ sadā |
samrāḍivātmani svāsthyasaṃsthito bhogabhugvibhuḥ || 9 ||
[Analyze grammar]

eṣa eva sadānveṣyaḥ stutyo dhyātavya eva ca |
jarāmaraṇasammohādanenottīrya gamyate || 10 ||
[Analyze grammar]

sulabhaścāyamatyantaṃ sujñeyaścāptabandhuvat |
śarīrapadmakuhare sarveṣāmeva ṣaṭpadaḥ || 11 ||
[Analyze grammar]

anākṛṣṭo'pyanāhūtaḥ svadehādeva labhyate |
manāgevopahūto'pi kṣaṇādbhavati sammukhaḥ || 12 ||
[Analyze grammar]

nāsya saṃsevyamānasya sarvasampattiśālinaḥ |
dhanānāmīśvarasyeva smayo garvo'tha vā bhavet || 13 ||
[Analyze grammar]

āmoda iva puṣpeṣu tailaṃ tilakaṇeṣviva |
rasajātiṣvivāsvādo devo deheṣu saṃsthitaḥ || 14 ||
[Analyze grammar]

avicāravaśādeṣa hṛdayastho'pi cetanaḥ |
na jñāyate cirāddṛṣṭa iṣṭabandhurivāgragaḥ || 15 ||
[Analyze grammar]

vicāraṇātparijñāte etasminparameśvare |
abhyudeti parānando labdhe priyajane yathā || 16 ||
[Analyze grammar]

asmindṛṣṭe pare bandhāv uddāmānandadāyini |
āyānti dṛṣṭayastāstā yābhirbandho vilīyate || 17 ||
[Analyze grammar]

truṭyanti sarvataḥ pāśāḥ kṣīyante sarvaśatravaḥ |
na kṛntanti manāṃsyāśā gṛhāṇīva durākhavaḥ || 18 ||
[Analyze grammar]

asmindṛṣṭe jagaddṛṣṭaṃ śrute'smin sakalaṃ śrutam |
spṛṣṭe cāsmiñjagatspṛṣṭaṃ sthite'smin saṃsthitaṃ jagat || 19 ||
[Analyze grammar]

eṣa jāgarti suptānāṃ praharatyavivekinām |
haratyāpadamārtānāṃ vitaratyamahātmanām || 20 ||
[Analyze grammar]

vicaratyeṣa lokeṣu dīpa eva jagatsthitau |
vilasatyeṣa bhogeṣu prasphuratyeṣa vastuṣu || 21 ||
[Analyze grammar]

ātmanātmānamevāntaśśāntenānubhavanbhavī |
sthitaḥ sarveṣu deheṣu tiktatvaṃ mariceṣviva || 22 ||
[Analyze grammar]

cetanākalanārūpī sabāhyābhyantarāśritaḥ |
jagatpadārthasambhārasattāsāmānyamāsthitaḥ || 23 ||
[Analyze grammar]

eṣa śūnyatvamākāśe spanda eṣa sadāgatau |
prakāśaścaiṣa tejassu payasyeṣa rasaḥ paraḥ || 24 ||
[Analyze grammar]

kāṭhinyamavanāveṣa auṣṇyameṣa hutāśane |
śaityameṣa niśānāthe sattā caiṣa jagadgaṇe || 25 ||
[Analyze grammar]

maṣīpiṇḍe yathā kārṣṇyaṃ śauklyaṃ himakaṇe yathā |
yathā puṣpeṣu saugandhyaṃ dehe dehapatistathā || 26 ||
[Analyze grammar]

yathā sarvagatā sattā kālaḥ sarvagato yathā |
yathā sarvagataṃ vyoma vibhuḥ sarvagatastathā || 27 ||
[Analyze grammar]

prabhuśaktirmahīpasya sarvadeśagatā yathā |
rūpālokamanaskāramuktaṃ sattvaṃ tathātmanaḥ || 28 ||
[Analyze grammar]

nityaḥ so'yamahaṃ devo devānāmavabodhakaḥ |
svayamātmāsmi me nāsti kalanāvitkiletarā || 29 ||
[Analyze grammar]

reṇunevāṇunā vyomni padmapattra ivāmbhasā |
sambhrameṇeva pāṣāṇe sambandho mayi nainasā || 30 ||
[Analyze grammar]

sukhaduḥkhaśriyo dehe mā patantu patantu vā |
tumbakopari dhārāśca kā naḥ kṣatirupasthitā || 31 ||
[Analyze grammar]

dīpāṅgābhigato rajjvā nāloko badhyate yathā |
tathaivāyamabaddho'haṃ sarvabhāvagaṇātigaḥ || 32 ||
[Analyze grammar]

sambandhaḥ ko nu naḥ kāmairbhāvābhāvairathendriyaiḥ |
kena sambadhyate vyoma kena vā gṛhyate manaḥ || 33 ||
[Analyze grammar]

śarīre śatadhā yāte khaṇḍanā kā śarīriṇaḥ |
kumbhe rugṇe kṣate kṣīṇe kumbhākāśasya kā kṣatiḥ || 34 ||
[Analyze grammar]

piśācaka ivādṛśyo mano nāmoditaṃ mudhā |
jaḍe tasmin kṣate bodhātkā naḥ kṣatirupasthitā || 35 ||
[Analyze grammar]

sukhaduḥkhamayī yasya vāsanā tanmano mama |
abhavatpūrvamadyaikā sampannā nanu nirvṛtiḥ || 36 ||
[Analyze grammar]

anyo bhuṅkte'nya ādatte'pyanyasyānarthasaṅkaṭaḥ |
anyaḥ paśyatyaho maurkhyaṃ kasyeyaṃ khalu cakrikā || 37 ||
[Analyze grammar]

bhuṅkte prakṛtirādatte mano dehasya saṅkaṭaḥ |
draṣṭātmā maurkhyamastīha na kiñcitkeva me kṣatiḥ || 38 ||
[Analyze grammar]

na me bhogasthitau vāñchā na ca bhogavivarjane |
yadāyāti tadāyātu yatprayāti prayātu tat || 39 ||
[Analyze grammar]

sukheṣu mama nāpekṣā nopekṣā duḥkhavṛttiṣu |
sukhaduḥkhānyupāyāntu yāntu vāpyahameṣu kaḥ || 40 ||
[Analyze grammar]

vāsanā vividhā dehe tvastaṃ vodayameva vā |
prayāntu nāhametāsu na caitā mama kāścana || 41 ||
[Analyze grammar]

etāvantamahaṃ kālamajñānaripuṇoruṇā |
hṛtvā vivekasarvasvamekāntamavapothitaḥ || 42 ||
[Analyze grammar]

vaiṣṇavena prasādena svasamutthena cāruṇā |
idānīṃ svaṃ parijñāya mayaiṣa paripothitaḥ || 43 ||
[Analyze grammar]

ahaṅkārapiśāco'yaṃ śarīratarukoṭarāt |
parāvabodhamantreṇa mayedānīmapākṛtaḥ || 44 ||
[Analyze grammar]

nirahaṅkārayakṣo'yaṃ maccharīramahādrumaḥ |
puṇyatāmalamāyātaḥ praphulta iva rājate || 45 ||
[Analyze grammar]

praśāntamohadāridryo durāśādoṣasaṅkṣaye |
vivekadhanasambhārātsthito'smi parameśvaraḥ || 46 ||
[Analyze grammar]

jñātaṃ jñātavyamakhilaṃ dṛṣṭā draṣṭavyadṛṣṭayaḥ |
tatprāptamadhunā yena na prāpyamiha śiṣyate || 47 ||
[Analyze grammar]

diṣṭyā dūrojjhitānarthāmapetaviṣayoragām |
saṃśāntamohanīhārāṃ śāntāśāmṛgatṛṣṇikām || 48 ||
[Analyze grammar]

rajorahitasarvāśāṃ śītalopaśamadrumām |
prāpto'smi vitatāṃ bhūmimunnatāṃ pāramārthikīm || 49 ||
[Analyze grammar]

stutyā praṇatyā vijñaptyā śamena niyamena ca |
labdho'yaṃ bhagavānātmā dṛṣṭaścādhigataḥ sphuṭam || 50 ||
[Analyze grammar]

ahaṅkārapadātītaścirātsaṃsmṛtimāgataḥ |
svabhāvo bhagavānātmā viṣṇurbrahma sanātanam || 51 ||
[Analyze grammar]

indriyoragagarteṣu maraṇaśvabhrabhūmiṣu |
tṛṣṇākarañjakuñjeṣu kāmakolāhaleṣu ca || 52 ||
[Analyze grammar]

vāsanāvanajāleṣu janmakūpāntareṣu ca |
duḥkhadāvāgnidāheṣu duṣkṛtāṅgārabhāriṣu || 53 ||
[Analyze grammar]

pātotpātadaśālakṣairmajjanonmajjanabhramaiḥ |
āvirbhāvatirobhāvairāśāpāśaviveṣṭanaiḥ || 54 ||
[Analyze grammar]

ahaṃ ciramahaṅkāradviṣā samavapothitaḥ |
niśāyāmalpadhairyātmā piśāceneva jaṅgale || 55 ||
[Analyze grammar]

svayameva tvayedānīṃ kriyāśaktyā svayaiva hi |
śaurivāgvyapadeśena vivekaśrīrvibodhitā || 56 ||
[Analyze grammar]

prabuddhe bhavatīśāne tamahaṅkārarākṣasam |
na paśyāmi vibho dīpe jvalite timiraṃ yathā || 57 ||
[Analyze grammar]

tasyāhaṅkārayakṣasya manovivaravāsinaḥ |
dīpasyeva praśāntasya na vedmi gatimīśvara || 58 ||
[Analyze grammar]

dṛṣṭa eva tvayīśāne palāyanaparāyaṇaḥ |
sampanno madahambhāvaścauraḥ sūryodaye yathā || 59 ||
[Analyze grammar]

asadabhyutthite tasminnahaṅkārapiśācake |
śānte tiṣṭhāmyatisvastho nirgonāsa iva drumaḥ || 60 ||
[Analyze grammar]

śāmyāmi parinirvāmi jāgarmyasmi prabodhavān |
taskareṇāvamukto'smi nirvṛto'smi cirādayam || 61 ||
[Analyze grammar]

śaityamabhyāgato'smyantaśśāntāśāmṛgatṛṣṇikaḥ |
prāvṛḍambubharasnātaśśāntadāva ivācalaḥ || 62 ||
[Analyze grammar]

pramārjite'hamityasminpade sārthe vicārataḥ |
ko mohaḥ kāni duḥkhāni kāḥ kadāśāḥ ka ātapaḥ || 63 ||
[Analyze grammar]

narakasvargamokṣādibhramāḥ satyāmahaṅkṛtau |
bhittāveva pravartante citrehā na nabhastale || 64 ||
[Analyze grammar]

ahaṅkārakalāpīne citte sāracamatkṛtiḥ |
na rājate'ṃśuke mlāne yathā kuṅkumarañjanā || 65 ||
[Analyze grammar]

nirahaṅkārajalade tṛṣṇāsāravivarjite |
bhāti cittaśaradvyomni svacchatā kāntiśālinī || 66 ||
[Analyze grammar]

nirahaṅkārapaṅkāya samprasannāntarāya ca |
mahyamānandasarase tubhyamātmannamo namaḥ || 67 ||
[Analyze grammar]

gatāhaṅkārameghāya śāntāśādāvavahnaye |
mahyamānandaśailāya viśrāntāya namo namaḥ || 68 ||
[Analyze grammar]

śāntendriyogragrāhāya kṣīṇacittaurvavahnaye |
ānandāmbudhaye tubhyaṃ mahyamātmannamo namaḥ || 69 ||
[Analyze grammar]

praphultānandapadmāya śāntacintāmahormaye |
mahyamunmānasāyātmaṃstubhyamantarnamo namaḥ || 70 ||
[Analyze grammar]

saṃvidābhāsapakṣāya padmakoṭaravāsine |
sarvamānasahaṃsāya svātmane'ntarnamo namaḥ || 71 ||
[Analyze grammar]

kalākalitarūpāya niṣkalāyāmitātmane |
sadoditātipūrṇātmaśaśine te namo namaḥ || 72 ||
[Analyze grammar]

sadoditāya śītāya mahāhṛddhvāntahāriṇe |
sarvagāyāpyadṛśyāya citsūryāya namo namaḥ || 73 ||
[Analyze grammar]

asnehasnehadīprāya vartyatikrāntavartine |
svabhāvādhāradhīrāya ciddīpāya namo namaḥ || 74 ||
[Analyze grammar]

mananānalasantaptaṃ śītena manasā manaḥ |
chinnamantarmayā taptamayaseva balādayaḥ || 75 ||
[Analyze grammar]

indriyairindriyaṃ chittvā chittvā ca manasā manaḥ |
ahaṅkṛtimahaṅkṛtyā chittvā śeṣo jayāmyaham || 76 ||
[Analyze grammar]

bhāvena bhāvamāmṛdya cchittvā tṛṣṇāmatṛṣṇayā |
niṣpiṣya prajñayāprajñāṃ jñe'jñaḥ saṃyojito mayā || 77 ||
[Analyze grammar]

manasā manasi cchinne nirahaṅkāratāṃ gate |
bhāvena galite bhāve svasthastiṣṭhāmi kevalaḥ || 78 ||
[Analyze grammar]

nirbhāvaṃ nirahaṅkāramamanaskamanīhitam |
kevalaspandaśuddhātma yantraṃ tiṣṭhati me vapuḥ || 79 ||
[Analyze grammar]

helānukalpitānantaviśvaikavyavasāyinī |
paramopaśamopetā jāteyaṃ mama nirvṛtiḥ || 80 ||
[Analyze grammar]

praśāntamohavetālo gatāhaṅkārarākṣasaḥ |
kadāśārūpikāmukto jāto'smi vigatajvaraḥ || 81 ||
[Analyze grammar]

tṛṣṇārajjugaṇaṃ chittvā maccharīrakapañjarāt |
na jāne kva gatoḍḍīya durahaṅkṛtipakṣiṇī || 82 ||
[Analyze grammar]

uddhūlite ghanājñānakulāye kāyapādapāt |
na jāne gata uḍḍīya kvāhambhāvavihaṅgamaḥ || 83 ||
[Analyze grammar]

durāśādīrghadaurātmyā dhūsarā bhogabhasmanā |
bhayabhogihatā diṣṭyā vayasyā vāsanā mṛtā || 84 ||
[Analyze grammar]

etāvantamahaṃ kālaṃ ko'bhūvaṃ cittamīdṛśam |
yenāhameva mithyaiva dṛḍhāhaṅkāratāṃ gataḥ || 85 ||
[Analyze grammar]

adyāhamasmi jāto'yamahamadya mahāmatiḥ |
ahaṅkāramahābhreṇa yaḥ kṛṣṇenālamujjhitaḥ || 86 ||
[Analyze grammar]

dṛṣṭo'yamātmā bhagavānantaścādhigato mayā |
ālabdhaścānubhūto'ṅge sānubhūtirniyojitaḥ || 87 ||
[Analyze grammar]

gatāspadaṃ gatamananaṃ gataiṣaṇaṃ tiraskṛtaṃ nipuṇamahaṅkṛtibhrame |
nirīhitaṃ vyapagatarāgarañjanaṃ vikautukaṃ praśamamidaṃ gataṃ manaḥ || 88 ||
[Analyze grammar]

duruttarāḥ samaviṣamā mahāpadaḥ sudussahāḥ prabhavanadīrghadoṣadāḥ |
gatāḥ kṣayaṃ samadhigato maheśvaraścidavyayo vyapagatacittamantare || 89 ||
[Analyze grammar]