Chapter 31

prahlādaviśrāntau hiraṇyakaśipuvadho nāma sargaḥ |
ekatriṃśaḥ sargaḥ |
vasiṣṭhaḥ |
atha duḥkhaparītātmā hariṇā hatadānave |
prahlādaścintayāmāsa maunī pātālakoṭare || 1 ||
[Analyze grammar]

ko'nvasmākamupāyaḥ syād ya evehāsurāṅkuraḥ |
tīkṣṇāgro jāyate taṃ taṃ bhuṅkte śākhāmṛgo hariḥ || 2 ||
[Analyze grammar]

na kadācana pātāle daityā dordaṇḍaśālinaḥ |
sthirā babhūvurudbhinnāḥ padmā iva himācale || 3 ||
[Analyze grammar]

utpatyotpatya naśyanti bhāsurākāraghargharāḥ |
kṣaṇaprasphuritārambhāstaraṅgā iva vāridheḥ || 4 ||
[Analyze grammar]

sabāhyābhyantaraṃ kaṣṭaṃ samagrālokahāriṇaḥ |
ripavaḥ prauḍhimāyātā apūrvatimirabhramāḥ || 5 ||
[Analyze grammar]

tamaḥprapūrṇahṛdayāḥ saṅkucatpattrasampadaḥ |
suhṛdaḥ khedamāyātā niśīva kamalākarāḥ || 6 ||
[Analyze grammar]

tātasya malinavyūhapādapīṭhāpamārjakaiḥ |
surairviṣaya ākrānto mṛgairiva mahāvanam || 7 ||
[Analyze grammar]

nirudyamā gataśrīkā dīnāḥ prakaṭitāśayāḥ |
bāndhavā na virājante padmāḥ pluṣṭadalā iva || 8 ||
[Analyze grammar]

sphurantyasuravīrāṇāṃ gṛheṣvaviratānilaiḥ |
dhūsarā bhasmanīhārā dhūpadhūmabharā iva || 9 ||
[Analyze grammar]

hṛtadvārakavāṭāsu daityāntaḥpurabhittiṣu |
prabhā marakatasyeva jātā navayavāṅkurāḥ || 10 ||
[Analyze grammar]

trilokīnābhinalinīmattebhā dānavā api |
devavaddainyamāyātāḥ kimasādhyamaho vidheḥ || 11 ||
[Analyze grammar]

manākcalati parṇe'pi dṛṣṭāribhayabhīravaḥ |
vadhvastrasyanti vidhvastā mṛgyo grāmagatā iva || 12 ||
[Analyze grammar]

asurīkarṇapūrārthaṃ phullaratnagulucchakāḥ |
narasiṃhakarālūnāḥ sthāṇutāmāgatā drumāḥ || 13 ||
[Analyze grammar]

divyāmbaralatāpattrā ratnastabakadanturāḥ |
punarāropitāstatra nandane kalpapādapāḥ || 14 ||
[Analyze grammar]

purehāmarabandīnāṃ daityairālokitaṃ mukham |
adya tvasurabandīnāṃ surairālokyate mukham || 15 ||
[Analyze grammar]

manye dānamahānadyaḥ surebhakaṭabhittiṣu |
pravṛttāstā bhaviṣyanti śailasānuṣvivāpagāḥ || 16 ||
[Analyze grammar]

asmākamibhagaṇḍeṣu dāvadāhavibhūtayaḥ |
lasanti maruṣaṇḍeṣu saṃśuṣkeṣviva dhūlayaḥ || 17 ||
[Analyze grammar]

vikāsisitamandāramakarandāruṇānilāḥ |
tā meruśikharasthalyo daityadurlabhatāṃ gatāḥ || 18 ||
[Analyze grammar]

suragandharvasundaryo dānavāntaḥpuroṣitāḥ |
punarmerau sthitiṃ yātā mañjarya iva pādape || 19 ||
[Analyze grammar]

kaṣṭaṃ tātapurandhrīṇāṃ śuṣkāmburuhanīrasāḥ |
vilāsāḥ suranārībhirhasyante hāsyalīlayā || 20 ||
[Analyze grammar]

pūrvaṃ yaireva mattātaścāmarairupavījitaḥ |
sahasranayanaḥ svarge kaṣṭaṃ taireva vījyate || 21 ||
[Analyze grammar]

iyamasmākamanyāpadāgatā dainyadāyinī |
tasyaikasya prasādena duṣpauruṣavato hareḥ || 22 ||
[Analyze grammar]

taddorvanaghanacchāyālabdhaviśrāntayaḥ surāḥ |
na kadācana tapyante himādreriva sānavaḥ || 23 ||
[Analyze grammar]

śauriśauryograśikharasaṃśrayeṇāśritaśriyaḥ |
asmān samupatapyanti munīñchākhāmṛgā iva || 24 ||
[Analyze grammar]

tenāsurapurandhrīṇāṃ nityamaṇḍanamaṅgale |
mukhapadme'rpitaṃ bāṣpamabjinīnāṃ himaṃ yathā || 25 ||
[Analyze grammar]

śīrṇabhinnaluṭhadbhittirjagajjarjaramaṇḍapaḥ |
ayaṃ nīlamaṇistambhaistadbhujaireva dhāryate || 26 ||
[Analyze grammar]

sa dhartā surasainyasya majjato vipadarṇave |
kṣīrododaramagnasya mandarasyeva kacchapaḥ || 27 ||
[Analyze grammar]

ete tātādayaḥ sarve tenaivāsurasattamāḥ |
pātitāḥ kṣubdhakalpāntavāteneva kulācalāḥ || 28 ||
[Analyze grammar]

sa eṣa evaṃ saṃhārakarmakṣamabhujāvaliḥ |
surasārthasuhṛcchrīmānviṣamo madhusūdanaḥ || 29 ||
[Analyze grammar]

daityadordaṇḍaparaśostasya vīryeṇa vīryavān |
dānavānbādhate śakro bālakāniva markaṭaḥ || 30 ||
[Analyze grammar]

durjayaḥ puṇḍarīkākṣaḥ pravimuktāyudho'pi san |
nāsau śastrāstravicchedairvajrasāro vidīryate || 31 ||
[Analyze grammar]

abhyastā bahavastena mithaḥpreritaparvatāḥ |
bhīmāḥ samarasaṃrambhāḥ samamasmatpitāmahaiḥ || 32 ||
[Analyze grammar]

tāsu tāsvatighorāsu vitatāsvasurājiṣu |
yo na bhīta idānīṃ sa bhayameṣyati kā kathā || 33 ||
[Analyze grammar]

upāyamekamevemaṃ harerākramaṇe sphuṭam |
manye tadvyatirekeṇa vidyate na pratikriyā || 34 ||
[Analyze grammar]

sarvātmanā sarvadhiyā sarvasaṃrambharaṃhasā |
sa eva śaraṇaṃ devo gatirastīha nānyathā || 35 ||
[Analyze grammar]

na tasmādadhikaḥ kaścidasti lokatrayāntare |
pralayasthitisargāṇāṃ hariḥ kāraṇatāṃ gataḥ || 36 ||
[Analyze grammar]

tasmānnimeṣādārabhya nārāyaṇamajaṃ sadā |
samprapanno'smi sarvatra nārāyaṇamayo hyaham || 37 ||
[Analyze grammar]

namo nārāyaṇāyeti mantraḥ sarvārthasādhakaḥ |
nāpaiti mama hṛtkośādākāśādiva mārutaḥ || 38 ||
[Analyze grammar]

harirāśā harirvyoma harirurvī harirjagat |
ayaṃ harirameyātmā jāto harimayo hyaham || 39 ||
[Analyze grammar]

aviṣṇuḥ pūjayanviṣṇuṃ na pūjāphalabhāgbhavet |
viṣṇurbhūtvā yajedviṣṇumayaṃ viṣṇurahaṃ sthitaḥ || 40 ||
[Analyze grammar]

anantamidamākāśamāpūrya vinatāsutaḥ |
kanakāṅgo mamāṅgānāmayamāsanatāṃ gataḥ || 41 ||
[Analyze grammar]

karaśākhaikaviśrāntasarvahetivihaṅgamāḥ |
nakhāṃśumañjarīkīrṇā mahāmarakatadrumāḥ || 42 ||
[Analyze grammar]

ime te mṛdumandāradāmadṛbdhāṃsamaṇḍalāḥ |
mandarāghṛṣṭakeyūrāścatvāro mama bāhavaḥ || 43 ||
[Analyze grammar]

calacchaśikarāpūracārucāmaradhāriṇī |
iyaṃ me pārśvagā lakṣmīḥ kṣīrodajaṭharotthitā || 44 ||
[Analyze grammar]

helāvilabdhabhuvanā trailokyatarumañjarī |
iyaṃ me pārśvagā kīrtirdhavalāmalahāsinī || 45 ||
[Analyze grammar]

anārataṃ jagajjālanavanirmāṇakāriṇī |
iyaṃ me pārśvagā māyā svendrajālavilāsinī || 46 ||
[Analyze grammar]

iyaṃ sā helayākrāntatrailokyataruṣaṇḍikā |
jayā sphurati me pārśve latā kalpataroriva || 47 ||
[Analyze grammar]

imau me nityaśītoṣṇau devau śītāṃśubhāskarau |
prakaṭīkṛtasaṃsārau mukhamadhye vilocane || 48 ||
[Analyze grammar]

mameyamutpalaśyāmā pīnāmbhodharasundarī |
śyāmīkṛtakakupcakrā dehadīptirvisāriṇī || 49 ||
[Analyze grammar]

ayaṃ mama kare śaṅkhaḥ pāñcajanyaḥ sphuraddhvaniḥ |
mūrtaṃ khamiva śabdātma kṣīroda iva saṃsthitaḥ || 50 ||
[Analyze grammar]

ayaṃ me karṇikākośanilīnabrahmaṣaṭpadaḥ |
padmaḥ karatale śrīmān svanābhikuharodbhavaḥ || 51 ||
[Analyze grammar]

iyaṃ me ratnacitrāṅgī sumeruśikharopamā |
hemāṅgadā gadā gurvī daityadānavamardinī || 52 ||
[Analyze grammar]

ayaṃ me bhāsurākāraḥ sukhadṛśyaḥ sudarśanaḥ |
jvālājaṭilaparyantaparipāṭaladiktaṭaḥ || 53 ||
[Analyze grammar]

ayaṃ me ketumadvahnisundaro jvalito'sitaḥ |
kuṭhāro daityavṛkṣāṇāṃ nandayannandakaḥ sthitaḥ || 54 ||
[Analyze grammar]

idaṃ maccharadhārāṇāṃ puṣkarāvartako ghanaḥ |
śārṅgaṃ dhanurahīndrābhamindrakārmukasundaram || 55 ||
[Analyze grammar]

imānyahamanantāni jaganti jaṭhare ciram |
bibharmi jātanaṣṭāni vartamānānyanekaśaḥ || 56 ||
[Analyze grammar]

imau mahī me caraṇāvidaṃ me gaganaṃ śiraḥ |
idaṃ vapurme trijagadimā me kukṣayo diśaḥ || 57 ||
[Analyze grammar]

sākṣādayamahaṃ viṣṇurnīlameghodaradyutiḥ |
suparṇaparvatārūḍhaśśaṅkhacakragadādharaḥ || 58 ||
[Analyze grammar]

ete mattaḥ palāyante samagrā duṣṭacetasaḥ |
tārṇāstaralasañcārāḥ pavanādiva rāśayaḥ || 59 ||
[Analyze grammar]

ayamindīvaraśyāmaḥ pītavāsā gadādharaḥ |
lakṣmīvān garuḍārūḍhaḥ svayamevāhamacyutaḥ || 60 ||
[Analyze grammar]

ko māmeti viruddhātmā trailokyadahanakṣamam |
svanāśāya marutkṣubdhaṃ kalpāgniṃ śalabho yathā || 61 ||
[Analyze grammar]

ime te taijasīṃ dṛṣṭiṃ mamāgrasthāḥ surāsurāḥ |
na śaknuvanti saṃsodḥuṃ cakṣurmandāḥ prabhāmiva || 62 ||
[Analyze grammar]

ime māmīśvaraṃ viṣṇuṃ brahmendrāgniharādayaḥ |
stuvantyanantayā vācā bahuvaktrasamutthayā || 63 ||
[Analyze grammar]

ayaṃ vijṛmbhitaiśvaryo jāto'hamajitākṛtiḥ |
sarvadvandvapadātīto mahimnā parameṇa hi || 64 ||
[Analyze grammar]

tribhuvanabhavanodaraikamūrti prasabhavibhinnasamastaduṣṭasattvam |
ghanagiritṛṇakānanāntarasthaṃ sakalabhayāpaharaṃ vapuḥ praṇaumi || 65 ||
[Analyze grammar]