Chapter 29

baḍisamādhivarṇanaṃ nāma sargaḥ |
ekonatriṃśaḥ sargaḥ |
vasiṣṭhaḥ |
atha varṣasahasreṇa divyenāsurasattamaḥ |
devadundubhinirghoṣairbubudhe bhagavānbaḍiḥ || 1 ||
[Analyze grammar]

baḍau prabuddhe tadbāḍhaṃ vireje nagaraṃ tadā |
vairiñca iva sūryaugha udite kamalākaraḥ || 2 ||
[Analyze grammar]

baḍiḥ prabuddha evāsau yāvannāyānti dānavāḥ |
tāvatsañcintayāmāsa samādhisadane kṣaṇam || 3 ||
[Analyze grammar]

aho nu ramyā padavī śītalā pāramārthikī |
ahamasyāṃ kṣaṇaṃ sthitvā parāṃ viśrāntimāgataḥ || 4 ||
[Analyze grammar]

tadenāmeva padavīmavalambya vasāmyaham |
bhavatīhopabhuktābhiḥ kiṃ me bāhyavibhūtibhiḥ || 5 ||
[Analyze grammar]

aindaveṣvapi bimbeṣu na tathānandavīcayaḥ |
toṣayanti yathāntarmāṃ saṃvidvibhavabhūmayaḥ || 6 ||
[Analyze grammar]

iti bhūyo'pi viśrāntyai kurvāṇaṃ galitaṃ manaḥ |
baḍimāvārayāmāsurdaityāścandramivāmbudāḥ || 7 ||
[Analyze grammar]

tānālokya punardadhyau tatpraṇāmākulekṣaṇaḥ |
taiḥ kulācalasaṅkāśaiḥ parivītavapustvidam || 8 ||
[Analyze grammar]

citaḥ kṣīṇavikalpasya kimupādeyamasti me |
mano yadabhipātitvād yātu tadrasatāmalam || 9 ||
[Analyze grammar]

mokṣamicchāmyahaṃ kasmādbaddhaḥ kenāsmi vai purā |
abaddho mokṣamicchāmi keyaṃ bālaviḍambanā || 10 ||
[Analyze grammar]

na bandho'sti na mokṣo'sti maurkhyaṃ me kṣayamāgatam |
kiṃ me dhyānavilāsena kiṃ vādhyānena me bhavet || 11 ||
[Analyze grammar]

na dhyānaṃ nāpi cādhyānaṃ na bhogānnāpyabhogitām |
abhivāñchāmi tiṣṭhāmi samameva gatajvaraḥ || 12 ||
[Analyze grammar]

na me vāñchā pare tattve na me vāñchā jagatsthitau |
na me dhyānadṛśā kāryaṃ na kāryaṃ vibhavena me || 13 ||
[Analyze grammar]

nāhaṃ mṛto na jīvāmi na sannāsannahaṃ samaḥ |
nedaṃ me naiva nānyanme namo mahyamahaṃ hyaham || 14 ||
[Analyze grammar]

idamastu jagadrājyaṃ tiṣṭhāmyatra svasaṃsthitaḥ |
naiva vāstu jagadrājyaṃ tiṣṭhāmyātmani śītalam || 15 ||
[Analyze grammar]

kiṃ me dhyānadṛśā kāryaṃ kiṃ rājyavibhavaśriyā |
yadāyāti tadāyātu nāhaṃ kiñcinna me kvacit || 16 ||
[Analyze grammar]

na kiñcidapi kartavyaṃ yadi nāma mayādhunā |
tatkasmānna karomīha kiñcitprakṛtakarma vai || 17 ||
[Analyze grammar]

iti nirṇīya pūrṇātmā baḍirbalavatāṃ varaḥ |
daityānālokayāmāsa padmānīva divākaraḥ || 18 ||
[Analyze grammar]

dṛṣṭipātavibhāgena sarveṣāṃ danujanmanām |
śiraḥpraṇāmāñjagrāha puṣpāmodānivānilaḥ || 19 ||
[Analyze grammar]

atha vairocanistatra dhyeyatyāgamayātmanā |
manasā sakalānyeva rājakāryāṇi sa vyadhāt || 20 ||
[Analyze grammar]

devāndvijān gurūṃścaiva pūjayāmāsa pūjayā |
sammānayāmāsa suhṛdbandhusāmantasajjanān || 21 ||
[Analyze grammar]

arthenāpūrayāmāsa bhṛtyānarthigaṇāṃstathā |
lalanā lālayāmāsa vicitravibhavārpaṇaiḥ || 22 ||
[Analyze grammar]

ityasāvavasattasmin rājye sakalaśāsane |
yajñaṃ prati babhūvātha matirasya kadācana || 23 ||
[Analyze grammar]

tarpitāśeṣabhuvanaṃ devarṣigaṇapūjitam |
saha śukrādibhirmukhyaiḥ sa cakāra mahāmakham || 24 ||
[Analyze grammar]

baḍirbhogabharasyārthī neti nirṇīya mādhavaḥ |
baḍerīpsitasiddhyarthaṃ siddhidastanmakhaṃ yayau || 25 ||
[Analyze grammar]

bhogaikakṛpaṇāyedaṃ jagajjaṅgalakhaṇḍakam |
dātuṃ yogyāya śakrāya vayojyeṣṭhāya kāryavit || 26 ||
[Analyze grammar]

kramamātracchalenātra vañcayitvā baḍiṃ hariḥ |
babandha pātālatale bhūgeha iva vānaram || 27 ||
[Analyze grammar]

adyāsau saṃsthito rāma punarindratvahetunā |
jīvanmuktavapuḥ svastho nityaṃ dhyānaniṣaṇṇadhīḥ || 28 ||
[Analyze grammar]

pātālakuhare tiṣṭhañjīvanmuktamatirbaḍiḥ |
āpadaṃ sampadaṃ dṛṣṭyā samayaiva sa paśyati || 29 ||
[Analyze grammar]

nāstameti na codeti tatprajñā sukhaduḥkhayoḥ |
samā sthiratarākārā citrasūryāvalī yathā || 30 ||
[Analyze grammar]

āvirbhāvatirobhāvasahasrāṇīha jīvatām |
tanmanaściramālokya bhogeṣu viratiṃ gatam || 31 ||
[Analyze grammar]

daśakoṭīśca varṣāṇāmanuśāsya jagattrayam |
ante viraktatāṃ prāptamupaśāntaṃ baḍermanaḥ || 32 ||
[Analyze grammar]

ūhāpohasahasrāṇi bhāvābhāvaśatāni ca |
baḍinā paridṛṣṭāni kva samāśvāsametvasau || 33 ||
[Analyze grammar]

bhogābhilāṣaṃ santyajya baḍiḥ sampūrṇamānasaḥ |
ātmārāmaḥ sthito nityamadya pātālakoṭare || 34 ||
[Analyze grammar]

punaretena baḍinā jagadindratayākhilam |
anuśāsyamidaṃ rāma bahūnvarṣagaṇāniha || 35 ||
[Analyze grammar]

na tasyendrapadaprāptyā tuṣṭiḥ samupajāyate |
na tasya svapadabhraṃśādudvega upajāyate || 36 ||
[Analyze grammar]

sa samaḥ sarvabhāveṣu sarvadaivoditāśayaḥ |
samprāptamāharan svastha ākāśa iva tiṣṭhati || 37 ||
[Analyze grammar]

baḍivijñānasamprāptireṣā te kathitā mayā |
etāṃ dṛṣṭimavaṣṭabhya tvamapyabhyudito bhava || 38 ||
[Analyze grammar]

baḍivatsvavivekena nityo'hamiti niścayāt |
padamāsādayādvandvaṃ pauruṣeṇaiva rāghava || 39 ||
[Analyze grammar]

dve cāṣṭau caiva varṣāṇāṃ koṭīrbhuktvā jagattrayam |
ante vairasyamāpanno baḍirapyasurottamaḥ || 40 ||
[Analyze grammar]

tasmādavaśyavairasyaṃ bhogapūgamarindama |
santyajya satatānandamavairasyapadaṃ vraja || 41 ||
[Analyze grammar]

imā dṛśyadṛśo rāma nānākāravikāradāḥ |
na kāścana tavātmīyā dūrācchailaśilā iva || 42 ||
[Analyze grammar]

dhāvamānamihāmutra luṭhitaṃ lokavṛttiṣu |
saṃsthāpaya nibadhyaitanmano hṛdayakoṭare || 43 ||
[Analyze grammar]

cidādityo bhavāneva sarvatra jagati sthitaḥ |
kaḥ paraste ka ātmīyaḥ pariskhalasi kiṃ mudhā || 44 ||
[Analyze grammar]

tvamananto mahābāhustvamādyaḥ puruṣottamaḥ |
tvaṃ padārthaśatākāraiḥ parisphūrjasi cidvapuḥ || 45 ||
[Analyze grammar]

tvayi sarvamidaṃ protaṃ jagatsthāvarajaṅgamam |
bodhe nityodite śuddhe sūtre maṇigaṇo yathā || 46 ||
[Analyze grammar]

na jāyase na mriyase tvamajaḥ puruṣo virāṭ |
cicchuddho janmamaraṇabhrāntayo mā bhavantu te || 47 ||
[Analyze grammar]

samastajanmarogāṇāṃ pravicārya balābalam |
tṛṣṇāmutsṛjya bhogānāṃ bhoktaiva bhava kevalam || 48 ||
[Analyze grammar]

tvayi sthite jagannāthe cidāditye sadodite |
idamābhāsate sarvaṃ saṃsārasvapnamaṇḍalam || 49 ||
[Analyze grammar]

mā viṣādaṃ kṛthā vyarthaṃ sukhaduḥkhaiṣaṇā na te |
śuddhaścidasi sarvātmā sarvavastvavabhāsakaḥ || 50 ||
[Analyze grammar]

pūrvamiṣṭamaniṣṭaṃ tvamaniṣṭaṃ ceṣṭamityapi |
parikalpya tadabhyāsāttato'pi dve parityaja || 51 ||
[Analyze grammar]

iṣṭāniṣṭadṛśostyāge samatodeti śāśvatī |
tayā hṛdayavartinyā punarjanturna jāyate || 52 ||
[Analyze grammar]

yeṣu yeṣu pradeśeṣu mano majjati bālavat |
tebhyastebhyaḥ samuddhṛtya taddhi tattve niveśayet || 53 ||
[Analyze grammar]

evamabhyāgatābhyāsaṃ manomattamataṅgajam |
nibadhya sarvabhāvena paraṃ śreyo'dhigamyate || 54 ||
[Analyze grammar]

mā śaṭhairayathārthajñairmithyādṛṣṭihatāśayaiḥ |
dhūrtasaṅkalpavikrītairvimūḍhaiḥ samatāṃ gamaḥ || 55 ||
[Analyze grammar]

akiñcanātsvanirṇītau lambamānātparoktiṣu |
na maurkhyādadhiko loke kaścidastīha duḥkhadaḥ || 56 ||
[Analyze grammar]

tvametadavivekābhramuditaṃ hṛdayāmbare |
vivekapavanenāśu dūraṃ naya mahāmate || 57 ||
[Analyze grammar]

ātmanaiva prayatnena yāvadātmāvalokane |
na kṛto'nugrahastāvanna vicārodayo bhavet || 58 ||
[Analyze grammar]

vedavedāntaśāstrārthatarkadṛṣṭibhirapyayam |
nātmā prakaṭatāmeti yāvanna svamavekṣaṇam || 59 ||
[Analyze grammar]

tvamātmanyātmanā rāma prasāde samavasthitaḥ |
prāpto'si vitataṃ bodhaṃ madvacāṃsyavabudhyase || 60 ||
[Analyze grammar]

vikalpāṃśavihīnasya tvayaiṣā cidvivasvataḥ |
gṛhītā vitatā vyāptirmaduktā paramātmanaḥ || 61 ||
[Analyze grammar]

vilīnasarvasaṅkalpaśśāntasandehavibhramaḥ |
kṣīṇakautukanīhāro jāto'si vigatajvaraḥ || 62 ||
[Analyze grammar]

yadupagacchasi pāsi nihaṃsi vā pibasi valgasi cinmaya vardhase |
tadasi tena tavāstu mahāmune vigatabodhakalaṅkaviśaṅkitā || 63 ||
[Analyze grammar]