Chapter 27

baḍyupadeśayogo nāma sargaḥ |
saptaviṃśaḥ sargaḥ |
vasiṣṭhaḥ |
surāsurasabhāpūjye tasminbhṛgusute gate |
manasā cintayāmāsa baḍirbalavatāṃ varaḥ || 1 ||
[Analyze grammar]

yuktamuktaṃ bhagavatā cidevedaṃ jagattrayam |
cidahaṃ cidime lokāścidāśā cidiyaṃ kriyā || 2 ||
[Analyze grammar]

sabāhyābhyantaraṃ sarvaṃ cideva paramārthataḥ |
asti cidvyatirekeṇa neha kiñcana kutracit || 3 ||
[Analyze grammar]

ayamāditya ityarko na citā cetyate yadi |
tadarkatamasorbhedaḥ ka ivehopalabhyate || 4 ||
[Analyze grammar]

iyaṃ bhūriti bhūreṣā citā yadi na cetyate |
bhūmeḥ kiṃ nāma bhūmitvaṃ tadbhavedbhavyatāṃ gatam || 5 ||
[Analyze grammar]

imā diśo diśa iti cetyante na citā yadi |
tatkiṃ nāma diśāṃ diktvaṃ śailānāṃ vāpi kādritā || 6 ||
[Analyze grammar]

idaṃ jagaditi jagaccitā yadi na cetyate |
tatkiṃ jagattvaṃ jagato nabhastvaṃ nabhaso'tha kim || 7 ||
[Analyze grammar]

kāyo'yaṃ parvatākāraścitā yadi na cetyate |
tatkiṃ nāma śarīratvaṃ śarīrasya śarīriṇām || 8 ||
[Analyze grammar]

cidindriyāṇi citkāyaścinmanaścittadeṣaṇā |
cidantaścidbahiścitkhaṃ cidbhāvaścidbhavasthitiḥ || 9 ||
[Analyze grammar]

cidevaikamahaṃ sarvaṃ sparśanaiṣaṇapūrvakam |
karomi mātrāsaṃsparśaṃ śarīreṇa na kiñcana || 10 ||
[Analyze grammar]

kimanena śarīreṇa kāṣṭhaloṣṭasamena me |
aśeṣajagadekātmā cidahaṃ cetanātmakaḥ || 11 ||
[Analyze grammar]

ahaṃ cidambare bhānāvahaṃ cidbhūtapañjare |
surāsureṣu cidahaṃ sthāvareṣu careṣu ca || 12 ||
[Analyze grammar]

cidastīha dvitīyā hi kalpanaiva na vidyate |
dvitvasyāsambhavāl loke kaśśatruḥ kaśca vā suhṛt || 13 ||
[Analyze grammar]

baḍināmnaśśarīrasya cchinne śirasi bhāsure |
citastatkiṃ bhavecchinnaṃ sarvalokāvapūraṇāt || 14 ||
[Analyze grammar]

citā sañcetito dveṣo dveṣo bhavati nānyathā |
tasmāddveṣādayaḥ sarve bhāvābhāvāścidātmakāḥ || 15 ||
[Analyze grammar]

na cito vyatirekeṇa pravicāryāpi kiñcana |
anyadāsādyate sphārādasmāttribhuvanodarāt || 16 ||
[Analyze grammar]

na dveṣo'sti na rāgo'sti na mano nāsya vṛttayaḥ |
cinmātrasyātiśuddhasya vikalpakalanā kutaḥ || 17 ||
[Analyze grammar]

cidahaṃ sarvago vyāpī nityānandamayātmakaḥ |
vikalpakalanātīto vikalpāṃśavivarjitaḥ || 18 ||
[Analyze grammar]

citaściditi yannāma nirnāmāyā na nāma tat |
śabdātmikaiṣā cicchaktiḥ parisphurati sarvagā || 19 ||
[Analyze grammar]

dṛśyadarśananirmuktaḥ kevalāmalamūrtimān |
nityodito nirābhāso draṣṭāsmi parameśvaraḥ || 20 ||
[Analyze grammar]

na kartāsmi na bhoktāsmi draṣṭaivāsmi nirāmayaḥ |
kalpanāvikalākārakālakāntakalāmayaḥ || 21 ||
[Analyze grammar]

ābhāsamātramudito nitya ābhāsyavarjitaḥ |
bhārūpaikasvarūpo'smi svarūpeṇa jayāmyaham || 22 ||
[Analyze grammar]

cetyarañjanariktāya vimuktāya mahātmane |
pratyakcetanarūpāya svarūpāya namo'stu me || 23 ||
[Analyze grammar]

citaye cetyamuktāya yuktyā yuktāya yogyayā |
sarvāvabhāsarūpāya mahyameva namo namaḥ || 24 ||
[Analyze grammar]

cetyanirmuktacidrūpaṃ viṣvagviśvāvapūrakam |
saṃśāntasarvasaṃvedyaṃ saṃvinmātramahaṃ tatam || 25 ||
[Analyze grammar]

ākāśavadananto'hamapyaṇoraṇurātataḥ |
nāsādayanti māmetāḥ sukhaduḥkhadaśādṛśaḥ || 26 ||
[Analyze grammar]

saṃvedanamasaṃvedyamacetyaṃ cetanaṃ tatam |
na śaktā māṃ paricchettum bhāvābhāvā jagadgatāḥ || 27 ||
[Analyze grammar]

atha vaite jagadbhāvāḥ paricchindantu māmimam |
yathābhimatamete hi matto na vyatirekiṇaḥ || 28 ||
[Analyze grammar]

yadi svabhāvabhūtena vastunā vastu mīyate |
hriyate dīyate vāpi tatkiṃ kasya kila kṣatam || 29 ||
[Analyze grammar]

sarvadā sarvamevāhaṃ sarvakṛtsarvasaṅgataḥ |
cetyamastyahamevaitanna kiñcidapi coditam || 30 ||
[Analyze grammar]

kiṃ saṅkalpavikalpābhyāṃ cidaciccāhamekabhāḥ |
saṅkṣobhayāmyahaṃ tāvacchāmyāmyātmani pāvane || 31 ||
[Analyze grammar]

iti sañcintayanneva baḍiḥ paramakovidaḥ |
akārārdhārdhamātrārthaṃ bhāvayandhyānamāsthitaḥ || 32 ||
[Analyze grammar]

saṃśāntasarvasaṅkalpaḥ praśāntakalanāgaṇaḥ |
niśśaṅkamatidūrāstacetyacintakacintanaḥ || 33 ||
[Analyze grammar]

dhyātṛdhyeyadhyānahīno nirmanāśśāntavāsanaḥ |
babhūvāvātadīpābho baḍiḥ prāptamahāpadaḥ || 34 ||
[Analyze grammar]

upaśāntamanāstatra ratnavātāyane baḍiḥ |
avasadbahukālaṃ sa samutkīrṇa ivopalāt || 35 ||
[Analyze grammar]

praśamitaiṣaṇayā paripūrṇayā mananadoṣadaśojjhitayoccayā |
baḍirarājata nirmalasattayā vighanamacchatayeva śarannabhaḥ || 36 ||
[Analyze grammar]