Chapter 38

vasiṣṭhadāśūrasamāgamo nāma sargaḥ |
aṣṭātriṃśaḥ sargaḥ |
vasiṣṭhaḥ |
nāstīdamiti nirṇīya sarvatastyaja rañjanām |
yannāsti tatprati kila kaivāstheha vicāriṇām || 1 ||
[Analyze grammar]

dṛśyamānamathedaṃ cedasti tattava kiṃ gatam |
tiṣṭhatvātmani badhnāsi tvaṃ kilātra kimātmatām || 2 ||
[Analyze grammar]

atha cedasti nāstīdamiti niścayavānasi |
tathāpi bhāvanāsaṅgaḥ kathaṃ yuktaścalācale || 3 ||
[Analyze grammar]

nedamasti jagad rāma na ca nāsti mahāmate |
kevalaṃ svotthamevetthamābhānamidamīdṛśam || 4 ||
[Analyze grammar]

nedaṃ kartṛkṛtaṃ kiñcinna cākartṛkṛtakramam |
svayamābhāsate cedaṃ kartrakartṛpadaṃ gatam || 5 ||
[Analyze grammar]

akartṛkaṃ jagajjālaṃ bhavatvatha sakartṛkam |
mā tvametena sambandhaṃ bhāvayānagha cetasi || 6 ||
[Analyze grammar]

sarvendriyavihīnātmā karteha sa jaḍopamaḥ |
akartreva tadā manye kākatālīyavajjagat || 7 ||
[Analyze grammar]

kākatālīyayogena jātaṃ yatkiñcideva yat |
tasminbhāvānusandhānaṃ bālo badhnāti netaraḥ || 8 ||
[Analyze grammar]

na kadācididaṃ śāntaṃ jagad rāma na ca kṣayi |
ajasraṃ dṛśyamānatvādbhāvitvācca punaḥ punaḥ || 9 ||
[Analyze grammar]

na kadācididaṃ cāsti jagad rāma na cākṣayi |
ajasraṃ kṣīyamāṇatvānnāśitvāccānumānataḥ || 10 ||
[Analyze grammar]

sarvendriyapadātīto yadā karteha vijvaraḥ |
kurvāṇaḥ sa tadā khedaṃ na kadācana gacchati || 11 ||
[Analyze grammar]

teneyaṃ niyatiḥ prauḍhā bhāvābhāvadaśāmayī |
īdṛśyeva sthirā dīrghā cittotthāpi na naśyati || 12 ||
[Analyze grammar]

aparyantasya kālasya kaścidaṃśaśśaracchatam |
tāvanmātramahāyuryaḥ kimāsthāṃ so'nudhāvati || 13 ||
[Analyze grammar]

sthirāścejjāgatā bhāvāstattadāsthā na śobhate |
kathamanyo'nyasaṃśleṣo jaḍacetanayoḥ kila || 14 ||
[Analyze grammar]

asthirāścejjagadbhāvāstadapyāsthā na śobhate |
payaḥphenāsthirāsyānte duḥkhameṣā dadāti te || 15 ||
[Analyze grammar]

āsthābandho mahābāho jagadbhāvatvadātmanoḥ |
na sthirāsthirayoḥ phenaśailayoriva rājate || 16 ||
[Analyze grammar]

sarvakartāpyakarteva karotyātmā na kiñcana |
tiṣṭhatyalamudāsīna ālokaṃ prati dīpavat || 17 ||
[Analyze grammar]

kurvanna kiñcitkurute dinakāryamivāṃśumān |
gacchanna gacchati svasthaḥ svāspadastho raviryathā || 18 ||
[Analyze grammar]

yataḥ kutaścidevedaṃ sampannamiva lakṣyate |
arjunānilavadvāripūrāvartavadātatam || 19 ||
[Analyze grammar]

iti cedbhavatā rāma naipuṇyenāvadhāritam |
pramāṇapariśuddhena cetasā ca vicāritam || 20 ||
[Analyze grammar]

tadāti bhāvanā sādho padārthaṃ prati nārhati |
alātacakre svapne ca bhrame vā keva bhāvanā || 21 ||
[Analyze grammar]

akasmādāgato jantuḥ sauhārdasya na bhājanam |
bhramabhūtaṃ jagajjālamāsthāyāśca na bhājanam || 22 ||
[Analyze grammar]

uṣṇendau śītale bhānau mṛgatṛṣṇājale tathā |
yathā na bhāvayasyāsthāmevaṃ mā bhāvaya sthitau || 23 ||
[Analyze grammar]

saṅkalpapuruṣaṃ svapnajanaṃ dvīndutvavibhramam |
yathā paśyasi paśya tvaṃ bhāvajātamidaṃ tathā || 24 ||
[Analyze grammar]

antarāsthāṃ parityajya bhāvaśrībhāvanāmayīm |
yo'si so'si jagatyasmiṃl līlayā viharānagha || 25 ||
[Analyze grammar]

akartṛtvapadasthasya kartṛtvamapi kurvataḥ |
sarvabhāvāntarasthasya sarvātītasya cātmanaḥ || 26 ||
[Analyze grammar]

iyaṃ sannidhimātreṇa niyatiḥ pravijṛmbhate |
dīpasannidhimātreṇa niriccheva prakāśatā || 27 ||
[Analyze grammar]

abhrasannidhimātreṇa kuṭajāni yathā svayam |
ātmasannidhimātreṇa trijaganti tathā svayam || 28 ||
[Analyze grammar]

sarvecchārahite bhānau yathā vyomani tiṣṭhati |
jāyate vyavahāraśrīḥ sati deve tathā kriyā || 29 ||
[Analyze grammar]

niricche saṃsthite ratne yathālokaḥ pravartate |
sattāmātreṇa devena tathaivāyaṃ jagadgaṇaḥ || 30 ||
[Analyze grammar]

ata ātmani kartṛtvamakartṛtvaṃ ca saṃsthitam |
niricchatvādakartāsau kartā sannidhimātrataḥ || 31 ||
[Analyze grammar]

sarvendriyābhyatītatvātkartā bhoktā na bhūtapaḥ |
indriyāntargatatvāttu kartā bhoktā sa eva hi || 32 ||
[Analyze grammar]

dve evātmani vidyete kartṛtākartṛte'nagha |
yayaiva paśyasi śreyastāmāśritya sthiro bhava || 33 ||
[Analyze grammar]

sarvatrāhamakarteti dṛḍhabhāvanayānayā |
pravāhāpatitaṃ kāryaṃ kurvannapi na lipyase || 34 ||
[Analyze grammar]

sarvatrāhamakarteti saṃvidā bhogakāmanā |
yāti nīrasatāṃ jantorapravṛtteḥ svacetasaḥ || 35 ||
[Analyze grammar]

yatrāhaṃ kiñcideveha na karomīti niścayaḥ |
bhogaughakāmanāṃ tatra kaḥ karotu jahātu vā || 36 ||
[Analyze grammar]

tasmānnityamakartāhamiti bhāvanayeddhayā |
paramāmṛtanāmnī sā samataivāvaśiṣyate || 37 ||
[Analyze grammar]

atha sarvaṃ karomīti mahākartṛtayānayā |
yadīcchasi sthitiṃ rāma tattāmapyuttamāṃ viduḥ || 38 ||
[Analyze grammar]

ahaṃ yatra karomīmaṃ samagraṃ jāgataṃ bhramam |
rāgadveṣakramastatra kuto'nyasyātyasambhavāt || 39 ||
[Analyze grammar]

yadanyena śarīraṃ me dagdhamanyena lālitam |
sa madārambha evātaḥ kaḥ khedollāsayoḥ kramaḥ || 40 ||
[Analyze grammar]

matsukhāsukhavistāre jagajjālakṣayodaye |
ahaṃ karteti matvāntaḥ kaḥ khedollāsayoḥ kramaḥ || 41 ||
[Analyze grammar]

khedollāsavilāse tu svātmakartṛtayaikayā |
svayameva layaṃ yāte samataivāvaśiṣyate || 42 ||
[Analyze grammar]

samatā sarvabhāveṣu yāsau satyā parā sthitiḥ |
tasyāmavasthitaṃ cittaṃ na bhūyo duḥkhamāpnuyāt || 43 ||
[Analyze grammar]

atha vā sarvakartṛtvamakartṛtvaṃ ca rāghava |
sarvaṃ tyaktvā manaḥ pītvā yo'si so'si sthiro bhava || 44 ||
[Analyze grammar]

ayaṃ so'hamayaṃ nāhaṃ karomīdamidaṃ na tu |
iti bhāvānusandhānamayī dṛṣṭirna tuṣṭaye || 45 ||
[Analyze grammar]

sā kālasūtrapadavī sā mahāvīcivāgurā |
sāsipattravanaśreṇī yā deho'hamiti sthitiḥ || 46 ||
[Analyze grammar]

sā tyājyā sarvayatnena sarvanāśe'pyupasthite |
spraṣṭavyā sā na bhavyena saśvamāṃseva pukkasī || 47 ||
[Analyze grammar]

tayā sudūrojjhitayā dṛṣṭau pāṭalalekhayā |
udeti paramā dṛṣṭirjyotsneva vigatāmbudā || 48 ||
[Analyze grammar]

kartā nāsmi na cāyamasmi sa iti jñātvaivamantaḥ sphuṭaṃ kartaivāsmi samagramasmi taditi jñātvātha vā niścayam |
ko'pyevāsmi na kaścidevamiti vā nirṇīya sarvottamaṃ tiṣṭha tvaṃ svapade sthitāḥ padavido yatrottamāḥ sādhavaḥ || 49 ||
[Analyze grammar]