Chapter 28

yathābhūtārthayogopadeśo nāma sargaḥ |
aṣṭaviṃśaḥ sargaḥ |
vasiṣṭhaḥ |
naṣṭe dhane'tha dārādau śokasyāvasaro'tra kaḥ |
indrajāle kṣaṇāddṛṣṭe naṣṭe kā paridevanā || 1 ||
[Analyze grammar]

gandharvanagarasyārdhe bhūṣite dūṣite'tha vā |
avidyāṃśe sutādau vā kaḥ kramaḥ sukhaduḥkhayoḥ || 2 ||
[Analyze grammar]

prāpte dhane'tha dārādau harṣasyāvasaro hi kaḥ |
vṛddhāyāṃ mṛgatṛṣṇāyāṃ kimānando jalārthinaḥ || 3 ||
[Analyze grammar]

dhanadāreṣu vṛddheṣu duḥkhaṃ yuktaṃ na tuṣṭatā |
vṛddhāyāṃ mohamāyāyāṃ kaḥ samāśvāsavāniha || 4 ||
[Analyze grammar]

yaireva jāyate rāgo mūrkhasyādhikatāṃ gataiḥ |
taireva bhogaiḥ prājñasya virāga upajāyate || 5 ||
[Analyze grammar]

apāradarśino mūḍhā bhogairāyānti tuṣṭatām |
pārāvalokinastvetairvirāgaṃ yānti sādhavaḥ || 6 ||
[Analyze grammar]

ato rāghava tattvajño vyavahāreṣu saṃsṛteḥ |
naṣṭaṃ naṣṭamupekṣasva prāptaṃ prāptamupāhara || 7 ||
[Analyze grammar]

anāgatānāṃ bhogānāmavāñchanamakṛtrimam |
āgatānāṃ ca sambhoga iti paṇḍitalakṣaṇam || 8 ||
[Analyze grammar]

saṃsārasambhrame hyasmiṃśchannātmanyātatāyini |
tathā vihara sambuddho yathā nāyāsi mūḍhatām || 9 ||
[Analyze grammar]

saṃsārāḍambarasyāsya prapañcaracite krame |
samyaksamaṃ na paśyanti ye hatāste kubuddhayaḥ || 10 ||
[Analyze grammar]

yayā kayācid yuktyeha yasya dṛśyagatāratiḥ |
parimajjati tasyācchā na kvacinnirmalā matiḥ || 11 ||
[Analyze grammar]

yasyāsadidamityāsthā nivṛttā sarvavastuṣu |
kroḍīkaroti sarvajñaṃ nāvidyā tamavāstavī || 12 ||
[Analyze grammar]

ahaṃ jagaccaikamidaṃ sarvameveti yasya dhīḥ |
āsthānāsthe parityajya saṃsthitā sa na majjati || 13 ||
[Analyze grammar]

śuddhaṃ sadasatormadhyaṃ padaṃ buddhyāvalambya ca |
sabāhyābhyantaraṃ viśvaṃ mā gṛhāṇa vimuñca mā || 14 ||
[Analyze grammar]

atyantavitataḥ svacchaḥ sarvavān sarvavarjitaḥ |
vyomavattiṣṭha nīrāgaṃ rāma kāryakaro'pi san || 15 ||
[Analyze grammar]

yasya necchā na cānicchā jñasya karmaṇi tiṣṭhataḥ |
na tasya lipyate prajñā padmapattramivāmbubhiḥ || 16 ||
[Analyze grammar]

darśanasparśanādīni mā karotu karotu vā |
tavendriyagaṇo gauṇastvamaniccho bhavātmavān || 17 ||
[Analyze grammar]

mamedamityasadbhūte indriyārthe bhavanmanaḥ |
mā nimajjatvamagnaṃ sanmā karotu karotu vā || 18 ||
[Analyze grammar]

yadi te nendriyārthaśrīḥ svadate hṛdi rāghava |
tadasi jñātavijñānaḥ samuttīrṇo bhavārṇavāt || 19 ||
[Analyze grammar]

asvāditendriyārthasya satanoratanorapi |
anicchato'pi sampannā muktirarthavaśāttava || 20 ||
[Analyze grammar]

uccaiḥpadāya parayā prajñayā vāsanāgaṇāt |
puṣpādgandhamivodāraṃ ceto rāma pṛthakkuru || 21 ||
[Analyze grammar]

saṃsārāmbunidhāvasminvāsanāmbupariplute |
ye prajñānāvamārūḍhāste tīrṇā bruḍitāḥ pare || 22 ||
[Analyze grammar]

kṣuradhārāgraśitayā dhiyā paramadhīrayā |
pravicāryātmanastattvaṃ tattvaṃ svaṃ padamāviśa || 23 ||
[Analyze grammar]

yathā tattvavidaḥ prājñā jñānabṛṃhitacetasaḥ |
viharanti tathā rāma vihartavyaṃ na mūḍhavat || 24 ||
[Analyze grammar]

jīvanmuktā mahātmāno nityatṛptā mahāśayāḥ |
ācārairanugantavyā na bhogakṛpaṇāśśaṭhāḥ || 25 ||
[Analyze grammar]

na tyajanti na vāñchanti vyavahāraṃ jagadgatam |
sarvamevānuvartante parāvaravido janāḥ || 26 ||
[Analyze grammar]

prabhāvasyābhimānasya guṇānāṃ yaśasaśśriyaḥ |
na kvacitkṛpaṇā loke mahāntastattvadarśinaḥ || 27 ||
[Analyze grammar]

suśūnye'pi na khidyante devodyāne nasaṅginaḥ |
niyatiṃ ca na muñcanti mahānto bhāskarā iva || 28 ||
[Analyze grammar]

vigatecchā yathāprāptavyavahārānuvartinaḥ |
vicarantyasamunnaddhāḥ svasthā deharathasthitāḥ || 29 ||
[Analyze grammar]

tvamapi prāptavān rāma vivekamimamāgatam |
prajñābalena cānena jāne svastho'si sundara || 30 ||
[Analyze grammar]

spaṣṭāṃ dṛṣṭimavaṣṭabhya nirmāno gatamatsaraḥ |
viharāsminbhuvaḥ pīṭhe parāṃ siddhimavāpsyasi || 31 ||
[Analyze grammar]

svasthaḥ sarvehitatyāgī dūrālokitavāñchanaḥ |
parāṃ śītalatāmantarādāya viharānagha || 32 ||
[Analyze grammar]

vālmīkiḥ |
itthaṃ girā vimalayā vimalāśayasya rāmo muneḥ sa parimṛṣṭa ivābabhāse |
jñānāmṛtena madhureṇa virājatāntaḥ pūrṇaśśaśāṅka iva śītalatāṃ jagāma || 33 ||
[Analyze grammar]