Chapter 14

nirvāṇaprakaraṇaṃ nāma sargaḥ |
caturdaśaḥ sargaḥ |
rāmaḥ |
satāmapyasatāmeva bālayakṣapiśācavat |
dāmavyālakaṭādīnāṃ duḥkhasyāntaḥ kathaṃ bhavet || 1 || vasiṣṭhaḥ |
dāmavyālakaṭārthaṃ taistadaiva yamakiṅkaraiḥ |
prārthitena yamenoktamidaṃ śṛṇu raghūdvaha || 2 ||
[Analyze grammar]

yadā viyogameṣyanti śroṣyanti ca nijāṃ kathām |
dāmādayastadā muktā bhaviṣyantītyasaṃśayam || 3 ||
[Analyze grammar]

rāmaḥ |
svavṛttāntamimaṃ kutra kadā kathaya te katham |
śroṣyanti bhagavan kena varṇyamānaṃ kathākramam || 4 ||
[Analyze grammar]

vasiṣṭhaḥ |
kaśmīreṣu mahāpadmasarasītīrapalvale |
bhūyo bhūyo'nubhūyaite matsyayoniparamparām || 5 ||
[Analyze grammar]

ālānitāśayā lolāḥ kālena layamāgatāḥ |
tatraiva padmasarasi te bhaviṣyanti sārasāḥ || 6 ||
[Analyze grammar]

tatra kalhāramālāsu sarojapaṭalīṣu ca |
śevālavaravallīṣu taraṅgavalanāsu ca || 7 ||
[Analyze grammar]

lalatkumudadolāsu nīlotpalalatāsu ca |
śīkaraughābhralekhāsu śītalāvartavṛttiṣu || 8 ||
[Analyze grammar]

sarassārasasambhogānbhuktvā bhuvanabhūṣaṇāḥ |
vihṛtya suciraṃ kālamalamāgataśuddhayaḥ || 9 ||
[Analyze grammar]

te viyuktā bhaviṣyanti muktaye labdhayuktayaḥ |
rajassattvatamāṃsīva bhedaprāptyā yadṛcchayā || 10 ||
[Analyze grammar]

kaśmīramaṇḍalasyāntarnagaraṃ nagaśobhitam |
nāmnādhiṣṭhānamityetacchrīmattatra bhaviṣyati || 11 ||
[Analyze grammar]

pradyumnaśikharaṃ nāma tasya madhye bhaviṣyati |
śṛṅgaṃ laghu sarojasya kośacakramivodare || 12 ||
[Analyze grammar]

tasminmūrdhni girergehaṃ ko'pi rājā kariṣyati |
abhraṅkaṣamahāsālaṃ śṛṅge śṛṅgamivāparam || 13 ||
[Analyze grammar]

gṛhasyeśānakoṇādriśirobhittivraṇodare |
tasyāniśamaviśrāntavātoddhūtatṛṇāṅkite || 14 ||
[Analyze grammar]

ālaye dānavo vyālaḥ kalaviṅko bhaviṣyati |
prathamālpaśrutacchāttra ivārtharahitāraṭiḥ || 15 ||
[Analyze grammar]

tasminneva tadā kāle tatra rājā bhaviṣyati |
śrīyaśaskaradevākhyaś svarge śakra ivāparaḥ || 16 ||
[Analyze grammar]

dānavo dāmanāmāntarmaṣakastasya sadmani |
bhaviṣyati bṛhatstambhapṛṣṭhacchidre mṛdudhvaniḥ || 17 ||
[Analyze grammar]

adhiṣṭhānābhidhe tasminnevogranagare tadā |
ratnāvalīvihārākhyo vihāro'pi bhaviṣyati || 18 ||
[Analyze grammar]

tasmiṃstadbhūmipāmātyo narasiṃha iti śrutaḥ |
karāmalakavaddṛṣṭabandhamokṣo bhaviṣyati || 19 ||
[Analyze grammar]

bhaviṣyati gṛhe tasya krīḍanakrakaraḥ khagaḥ |
kaṭo māyāsuro nāma kṛtahiñjīrapañjaraḥ || 20 ||
[Analyze grammar]

sa nṛsiṃho nṛpāmātyaśślokairviracitāmimām |
dāmavyālakaṭādīnāṃ kathayiṣyati saṅkathām || 21 ||
[Analyze grammar]

sa kaṭaḥ krakaraśśrutvā tāṃ kathāṃ saṃsmṛtātmabhūḥ |
śāntamithyāhamaṃśo'ntaḥ paraṃ nirvāṇameṣyati || 22 ||
[Analyze grammar]

pradyumnaśikharaprāntavāstavyaḥ kalaviṅkakaḥ |
tathaitya svakathāṃ śrutvā paraṃ nirvāṇameṣyati || 23 ||
[Analyze grammar]

rājamandiradārvantarvraṇavāstavyatāṃ gataḥ |
maṣako'pi prasaṅgena śrutvā śāntimupaiṣyati || 24 ||
[Analyze grammar]

pradyumnaśṛṅgāccaṭako maṣako rājamandirāt |
vihārātkrakaraśceti mokṣameṣyanti rāghava || 25 ||
[Analyze grammar]

eṣa te kathitaḥ sarvo dāmavyālakaṭakramaḥ |
māyeyameva saṃsārī śūnyaivātyantabhāsurā || 26 ||
[Analyze grammar]

bhramayatyaparijñātā mṛgatṛṣṇāmbudhīriva |
saṃśāmyati parijñātā mṛgatṛṣṇāmbudhīriva || 27 ||
[Analyze grammar]

mahato'pi padādevaṃ rāmājñānavaśādadhaḥ |
patanti mohitā mūḍhā dāmavyālakaṭā iva || 28 ||
[Analyze grammar]

kva bhrūkṣepaviniṣpiṣṭamerumandarasahyatā |
kva rājagṛhadārvantarvraṇe maṣakarūpatā || 29 ||
[Analyze grammar]

kva capeṭacchaṭāmātrapātitārkendubimbatā |
kva pradyumnagirau gehabhittivraṇavihaṅgatā || 30 ||
[Analyze grammar]

kva puṣpalīlayālolakaratolitamerutā |
kvārṣyaśṛṅge nṛsiṃhasya gṛhe krakarapotatā || 31 ||
[Analyze grammar]

cidākāśo hi mithyaiva rajasā rañjitaprabhaḥ |
svarūpamatyajanneva virūpamiva budhyate || 32 ||
[Analyze grammar]

svayaiva vāsanābhrāntyā satyayevāpyasatyayā |
mṛgatṛṣṇāmbubuddhyeva yāti janturavāntaram || 33 ||
[Analyze grammar]

taranti te bhavāmbhodhiṃ svapravāhadhiyaiva ye |
śāstreṇāsadidaṃ dṛśyamiti nirvāsanaṃ sthitāḥ || 34 ||
[Analyze grammar]

tārāravavikārīṇi śuṣkatarkamatāni ye |
yānti śvabhrajalānyāśu nāśubhaṃ nāśayanti te || 35 ||
[Analyze grammar]

svānubhūtiprasiddhena mārgeṇāgamagāminā |
na vināśo bhavatyaṅga gacchatāṃ patatāmiva || 36 ||
[Analyze grammar]

idaṃ me syādidaṃ me syāditi buddhimatāṃ matiḥ |
svena daurbhāgyadainyena na bhasmāpyupatiṣṭhate || 37 ||
[Analyze grammar]

vetti nityamudārātmā trailokyamapi yastṛṇam |
taṃ tyajantyāpadaḥ sarvā rasateva jarattṛṇam || 38 ||
[Analyze grammar]

parisphurati yasyāntarnityaṃ sattvacamatkṛtiḥ |
brāhmamaṇḍamivākhaṇḍaṃ lokeśāḥ pālayanti tam || 39 ||
[Analyze grammar]

apyāpadi durantāyāṃ naiva rantavyamakrame |
rāhurapyakrameṇaiva pibannapyamṛtaṃ mṛtaḥ || 40 ||
[Analyze grammar]

sacchāstrasādhusamparkamarkamugraprakāśadam |
ye śrayanti na te yānti mohāndhyasya punarvaśam || 41 ||
[Analyze grammar]

avaśyā vaśyamāyānti yānti sarvāpadaḥ kṣayam |
avaśyaṃ bhavati śreyaḥ kreyaṃ yasya guṇairyaśaḥ || 42 ||
[Analyze grammar]

yeṣāṃ guṇeṣvasantoṣo'rāgo yeṣāṃ śrutaṃ prati |
satyavyasanino ye ca te narāḥ paśavo'pare || 43 ||
[Analyze grammar]

yaśaścandrikayā yeṣāṃ bhāsitaṃ janahṛnnabhaḥ |
teṣāṃ kṣīrasamudrāṇāṃ nūnaṃ mūrtau sthito hariḥ || 44 ||
[Analyze grammar]

bhuktaṃ bhoktavyamakhilaṃ dṛṣṭā draṣṭavyadṛṣṭayaḥ |
kimanyadbhavabhaṅgāya bhūyobhogeṣvalubdhatā || 45 ||
[Analyze grammar]

yathākramaṃ yathāśāstraṃ yathācāraṃ yathāsthiti |
sthīyatāṃ mucyatāmantarbhogagārdhyamavāstavam || 46 ||
[Analyze grammar]

saṃstavaḥ kriyatāṃ kīrtyā guṇairgaganagāmibhiḥ |
trāyante mṛtyunopetaṃ na kadācana bhogakāḥ || 47 ||
[Analyze grammar]

gāyanti siddhasundaryo yeṣāmindusitaṃ yaśaḥ |
gītibhirgaganābhoge te jīvanti mṛtāḥ pare || 48 ||
[Analyze grammar]

paramaṃ pauruṣaṃ yatnamāsthāyādāya sūdyamam |
yathāśāstramanudvegamācārātko na siddhibhāk || 49 ||
[Analyze grammar]

yathāśāstraṃ viharatā tvarā kāryā na siddhiṣu |
cirakālaparā pakvā siddhiḥ puṣṭatarā bhavet || 50 ||
[Analyze grammar]

vītaśokabhayāyāsamagardhamapayantraṇam |
vyavahāro yathāśāstraṃ kriyatāṃ mā vinaśyatām || 51 ||
[Analyze grammar]

jīvo jīrṇāndhakūpeṣu bhaveṣvantardhimāgataḥ |
bhavatāṃ bhūribhaṅgānāmadhunoddhriyatāmataḥ || 52 ||
[Analyze grammar]

itaḥ prabhṛti mā bhūyo gamyatāmadharādadhaḥ |
idaṃ nirdhāryatāṃ śāstramastramāpannivāraṇe || 53 ||
[Analyze grammar]

raṇe rabhasanirlūnavāraṇe prāṇamujjhatām |
kimarthamātrayā kāryamāryāśśāstramavekṣyatām || 54 ||
[Analyze grammar]

idaṃ bimbamidaṃ nimbamiti matyā vicāryatām |
svayā parapreraṇayā yāta mā paśavo yathā || 55 ||
[Analyze grammar]

daurbhāgyadāyinī dīnā śubhahīnāvicāraṇā |
ghanadīrghamahānidrā tyajyatāṃ samprabudhyatām || 56 ||
[Analyze grammar]

suptaṃ mā sthīyatāṃ vṛddhamandakacchapavacchanaiḥ |
utthānamaṅgīkriyatāṃ jarāmaraṇaśāntaye || 57 ||
[Analyze grammar]

anarthāyārthasampattirbhogaugho bhavarogadaḥ |
āpade sampadaḥ sarvāḥ sarvatrānādaro jayaḥ || 58 ||
[Analyze grammar]

lokatantrānusāreṇa vicārādvyavahāriṇām |
śāstrācārāviruddhena karmaṇā śarma sidhyati || 59 ||
[Analyze grammar]

svācāracārucaritasya viviktavṛtteḥ saṃsāraduḥkhalavasaukhyadaśāsvagṛdhnoḥ |
āyuryaśāṃsi ca guṇāśca sahaiva lakṣmyā phullanti mādhavalatā iva satphalāya || 60 ||
[Analyze grammar]