Chapter 11

dāmavyālakaṭopākhyāne punaryuddhavarṇanaṃ nāma sargaḥ |
ekādaśaḥ sargaḥ |
vasiṣṭhaḥ |
evamprāyākulārambhairasurairasuhāribhiḥ |
mahāsāhasasaṃrabdhairārabdhamaraṇai raṇaiḥ || 1 || māyayātha vivādena sandhinā vigraheṇa ca |
palāyanena dhairyeṇa cchadmanopāyanena ca || 2 ||
[Analyze grammar]

kārpaṇyenāstrayuddhena svāntardhānaiśca bhūriśaḥ |
kṛtaḥ sa samaro devaistriṃśadvarṣāṇi pañca ca || 3 ||
[Analyze grammar]

varṣāṇi divasānmāsāndaśāṣṭau pañca sapta ca |
varṣāṇi peturvṛkṣāgnihetyambvaśanibhūbhṛtām || 4 ||
[Analyze grammar]

etāvatā tu kālena dṛḍhābhyāsādahaṅkṛteḥ |
dāmādayo'hamityāsthāṃ jagṛhurgrastacetasaḥ || 5 ||
[Analyze grammar]

naikaṭyātiśayād yadvaddarpaṇaṃ bimbavadbhavet |
abhyāsātiśayāttadvatte'pyahaṅkāritāṃ gatāḥ || 6 ||
[Analyze grammar]

yadvaddūrataraṃ vastu nādarśe pratibimbate |
padārthavāsanā tadvadanabhyāsānna jāyate || 7 ||
[Analyze grammar]

yadā dāmādayo jātā jātāhaṅkāravāsanāḥ |
tadā me jīvitaṃ me'rtha iti dainyamupāgaman || 8 ||
[Analyze grammar]

bhayavāsanayā grastā mohavāsanayā hatāḥ |
āśāpāśanibaddhāste tataḥ kṛpaṇatāṃ gatāḥ || 9 ||
[Analyze grammar]

mudhaiva hyanahaṅkārairmamatvamupakalpitam |
rajjvāṃ bhujaṅgatvamiva dāmavyālakaṭaistataḥ || 10 ||
[Analyze grammar]

āpādamastakaṃ dehalateyaṃ bhavatu sthirā |
mameti tṛṣṇākṛpaṇā dīnatāṃ te samāyayuḥ || 11 ||
[Analyze grammar]

sthiro bhavatu me dehaḥ sukhāyāstu dhanaṃ mama |
iti baddhadhiyāṃ teṣāṃ dhairyamantardhimāyayau || 12 ||
[Analyze grammar]

avāsanatvādvapuṣāmanāsthatvātsuradviṣām |
yābhūtprahāraparatā mārjitaivāśu sābhavat || 13 ||
[Analyze grammar]

kathaṃ sthirā jagatyasminbhavema iti cintayā |
vedhitā dīnatāṃ jagmuḥ padmā iva nirambhasaḥ || 14 ||
[Analyze grammar]

teṣāṃ tvarthānnapāneṣu svāhaṅkṛtimatāṃ ratiḥ |
babhūva bhavabhāvasthā bhīṣaṇā bhavabhāginī || 15 ||
[Analyze grammar]

atha tasmin raṇe bhītyā sāpekṣatvamupāyayuḥ |
mattebhagaṇasaṃrabdhā vane hariṇakā iva || 16 ||
[Analyze grammar]

mariṣyāmo mariṣyāma iti cintāhatāśayāḥ |
mandaṃ mandaṃ kila bhremuḥ kupitairāvaṇe raṇe || 17 ||
[Analyze grammar]

śarīraikārthināṃ teṣāṃ bhītānāṃ maraṇādati |
alpasattvatayā mūrdhni kṛtamāpatpradaṃ padam || 18 ||
[Analyze grammar]

atha pramlānasattvāste hantumagragataṃ bhaṭam |
na śekurindhanakṣīṇā havirdagdhumivāgnayaḥ || 19 ||
[Analyze grammar]

vibudhānāṃ praharatāṃ sudasyutvamupāgatāḥ |
kṣatavikṣatasarvāṅgāstasthuḥ sāmānyavadbhaṭāḥ || 20 ||
[Analyze grammar]

bahunātra kimuktena maraṇādbhītacetasaḥ |
daityā deveṣu valgatsu dudruvuḥ samarājirāt || 21 ||
[Analyze grammar]

teṣu dravatsu sarveṣu sarvato dānavādriṣu |
dāmavyālakaṭākhyeṣu vikhyāteṣvasurālaye || 22 ||
[Analyze grammar]

taddaityasainyamapatatkhādvidrutamitastataḥ |
kalpāntapavanādhūtaṃ tārājālamivābhitaḥ || 23 ||
[Analyze grammar]

amarācalakuñjeṣu śikharāṇāṃ śilāsu ca |
taṭeṣu vārirāśīnāṃ payodapaṭaleṣu ca || 24 ||
[Analyze grammar]

sāgarāvartagarteṣu śvabhreṣvatha saritsu ca |
jaṅgaleṣu diganteṣu jvalatsu vipineṣu ca || 25 ||
[Analyze grammar]

tadraṇotsannakośeṣu grāmeṣu nagareṣu ca |
aṭavīṣūgrayakṣāsu maruṣūdyaddavāgniṣu || 26 ||
[Analyze grammar]

lokālokācalānteṣu parvateṣu hradeṣu ca |
andhradramiḍakāśmīrapārasīkapureṣu ca || 27 ||
[Analyze grammar]

nānāmbhodhitaraṅgāsu gaṅgājalaghaṭāsu ca |
dvīpāntareṣu dūreṣu jambūṣaṇḍalatāsu ca || 28 ||
[Analyze grammar]

sarvataḥ parvatākārāḥ patitāste surārayaḥ |
visphoṭitāṅgacaraṇā vibhinnakarabāhavaḥ || 29 ||
[Analyze grammar]

śākhālagnāntratantrīkā muktaraktavahacchaṭāḥ |
vyastāṅgakhuramūrdhāno niṣkrāntakupitekṣaṇāḥ || 30 ||
[Analyze grammar]

svāyudhāvalanāvegacchinnakaṅkaṭahetayaḥ |
dūrāpātaviparyastapatannānāvidhāṃśukāḥ || 31 ||
[Analyze grammar]

kaṇṭhalagnaśirastrāṇakhaṭatkārograbhītayaḥ |
śilāśitaśikhāprotadehabhāgāvalambinaḥ || 32 ||
[Analyze grammar]

śalmalyagradṛḍhāpātaprotakaṅkaṭaśaṅkavaḥ |
suśilāphalakāsphālaśatadhāśīrṇamastakāḥ || 33 ||
[Analyze grammar]

sarva eva sakalāsu saśastrāḥ pātamātrasamanantarameva |
dikṣu nāśamagamannasurendrāḥ pāṃsavo'mbudhigatāḥ payasīva || 34 ||
[Analyze grammar]