Chapter 98

cidākāśamāhātmyaṃ nāma sargaḥ |
aṣṭanavatitamaḥ sargaḥ |
vasiṣṭhaḥ |
yataḥ kutaścidutpannaṃ cittaṃ yatkiñcideva hi |
nityamātmavimokṣāya yatate yatnato'nagha || 1 ||
[Analyze grammar]

asti nāmātivitatā śūnyā śāntāpi bhīṣaṇā |
araṇyānī nabho yasyāṃ lakṣyate koṇamātrakam || 2 ||
[Analyze grammar]

tasyāmeko hi puruṣaḥ sahasrakaralocanaḥ |
paryākulamatirbhīmaḥ saṃsthito vitatākṛtiḥ || 3 ||
[Analyze grammar]

sahasreṇa sa bāhūnāmādāya parighānbahūn |
praharatyātmanaḥ pṛṣṭhe svātmanaiva palāyate || 4 ||
[Analyze grammar]

dṛḍhaprahāraiḥ praharan svayamevātmanātmani |
pravidravati bhītātmā sa yojanaśatānyapi || 5 ||
[Analyze grammar]

krandanpalāyamāno'sau gatvā dūramitastataḥ |
śramavānvivaśākāro viśīrṇacaraṇāṅgakaḥ || 6 ||
[Analyze grammar]

patito'vaśa evāśu mahatyandho'ndhakūpake |
kṛṣṇarātritamobhīmanabhogambhīrakoṭare || 7 ||
[Analyze grammar]

tataḥ kālena mahatā so'ndhakūpātsamutthitaḥ |
punaḥ prahāraiḥ praharanvidravatyātmanātmanaḥ || 8 ||
[Analyze grammar]

punardūrataraṃ gatvā karañjavanagulmakam |
praviṣṭaḥ kaṇṭakavyāptaṃ śalabhaḥ pāvakaṃ yathā || 9 ||
[Analyze grammar]

tasmātkarañjagahanādviniṣkramya kṣaṇādiva |
svayaṃ prahāraiḥ praharanvidravatyātmanātmanaḥ || 10 ||
[Analyze grammar]

punardūrataraṃ gatvā tamevāndho'ndhakūpakam |
sa sampraviṣṭastvarayā viśīrṇāvayavākṛtiḥ || 11 ||
[Analyze grammar]

andhakūpātsamutthāya praviṣṭaḥ kadalīvanam |
punaḥ prahāraiḥ praharanvidravatyātmanātmanaḥ || 12 ||
[Analyze grammar]

punardūrataraṃ gatvā śaśāṅkakaraśītalam |
kadalīkānanaṃ kāntaṃ sampraviṣṭo hasanniva || 13 ||
[Analyze grammar]

kadalīṣaṇḍakāttasmādviniṣkramya punaḥ kṣaṇāt |
kadalīkānanācchubhraṃ karañjavanagulmakam || 14 ||
[Analyze grammar]

karañjakavanātkūpaṃ kūpād rambhāvanāntaram |
praviśya praharaṃścaiva svayamātmani saṃsthitaḥ || 15 ||
[Analyze grammar]

evaṃrūpanijācāraḥ so'valokyādarānmayā |
avaṣṭabhya balādeva muhūrtaṃ paribodhitaḥ || 16 ||
[Analyze grammar]

pṛṣṭaśca kastvaṃ kimidaṃ kenārthena karoṣi vā |
kiṃ nāmābhimataṃ te syātkiṃ mudhā parimuhyasi || 17 ||
[Analyze grammar]

iti pṛṣṭena kathitaṃ tena me raghunandana |
nāhaṃ kaścinna caivedaṃ mune kiñcitkaromyaham || 18 ||
[Analyze grammar]

tvayāyamavabhagno'smi tvaṃ me śatrurarindama |
tvayā dṛṣṭo'smi naṣṭo'smi duḥkhāya ca sukhāya ca || 19 ||
[Analyze grammar]

iti uktvā māmasāvaṅgānyālokya svāni tiṣṭhavān |
rurodārtaravaṃ dīno megho varṣannivāravī || 20 ||
[Analyze grammar]

kṣaṇamātreṇa tatrāsāv upasaṃhṛtya rodanam |
svānyaṅgāni samālokya jahāsendvaṃśuvatsitam || 21 ||
[Analyze grammar]

athāṭṭahāsaparyante sa pumānpurato mama |
krameṇa tāni tatyāja svānyaṅgāni samantataḥ || 22 ||
[Analyze grammar]

prathamaṃ patitaṃ tasya śiraḥ paramadāruṇam |
tataste bāhavaḥ paścādvakṣastadanu codaram || 23 ||
[Analyze grammar]

atha kṣaṇena sa pumāṃstānyaṅgāni ca sambhramaḥ |
sarvamantardhimāyātaṃ svapno bodhavato yathā || 24 ||
[Analyze grammar]

vicārya niyateśśaktiṃ tato gantumupasthitaḥ |
dṛṣṭavānahamekānte punaranyaṃ tathā naram || 25 ||
[Analyze grammar]

so'pi prahārānparitaḥ prayacchan svayamātmani |
bāhubhiḥ pīvarākāraiḥ svayameva palāyate || 26 ||
[Analyze grammar]

kūpe patati kūpāttu samutthāyābhidhāvati |
punaḥ patati kuñje'ntaḥ punarārtaḥ palāyate || 27 ||
[Analyze grammar]

punaḥ praviśati svacchaṃ kṣaṇaṃ śiśirakānanam |
ruṣṭaḥ punaḥ punastuṣṭaḥ punaḥ praharati svayam || 28 ||
[Analyze grammar]

evamprāyanijācāraściramālokya sasmayam |
sa mayā samavaṣṭabhya paripṛṣṭastathaiva hi || 29 ||
[Analyze grammar]

tenaivātha krameṇāsau ruditvā samprahasya ca |
aṅgairviśīrṇatāmetya yayāvalamalakṣyatām || 30 ||
[Analyze grammar]

vicārya niyateśśaktiṃ tato gantumupasthitaḥ |
dṛṣṭavānahamekānte punaranyaṃ tathā naram || 31 ||
[Analyze grammar]

praharaṃstadvadevāsau svayameva palāyate |
palāyamānaḥ patito mahatyandho'ndhakūpake || 32 ||
[Analyze grammar]

tatrāhaṃ suciraṃ kālamavasaṃ tatpratīkṣakaḥ |
yāvatsa sucireṇāpi kūpādabhyutthitaśśaṭhaḥ || 33 ||
[Analyze grammar]

athāhamudyato gantuṃ dṛṣṭavānpuruṣaṃ punaḥ |
tādṛśaṃ tādṛśācāraṃ prayatantaṃ tathaiva ca || 34 ||
[Analyze grammar]

avaṣṭabhya tathaivāśu tasya proktaṃ punarmayā |
tathaivotpalapatrākṣa nāsau tadavabuddhavān || 35 ||
[Analyze grammar]

kevalaṃ māmasau mūḍho naiva jānāmi kiñcana |
āḥ pāpa durdvijetyuktvā svavyāpārapāro yayau || 36 ||
[Analyze grammar]

atha tasminmahāraṇye tathā viharatā mayā |
bahavastādṛśā dṛṣṭāḥ puruṣā doṣakāriṇaḥ || 37 ||
[Analyze grammar]

matpṛṣṭāḥ kecidāyānti svapnasambhramavacchamam |
maduktaṃ nābhinandanti kecicchvavirutaṃ yathā || 38 ||
[Analyze grammar]

vinipatyāndhakūpebhyaḥ kecinna protthitāḥ punaḥ |
kadalīṣaṇḍakātkeciccireṇāpi na nirgatāḥ || 39 ||
[Analyze grammar]

kecidantarhitāḥ sphāre karañjavanakuñjake |
na kvacitsthitimāyānti kecidbhramaparāyaṇāḥ || 40 ||
[Analyze grammar]

evaṃvidhā sā vitatā raghūdvaha mahāṭavī |
adyāpi vidyate yasyāmitthaṃ te puruṣāḥ sthitāḥ || 41 ||
[Analyze grammar]

sā ca dṛṣṭāṭavī rāma tvayeha vyavahāriṇā |
bālyāttu buddhitattvasya na tvaṃ smarasi rāghava || 42 ||
[Analyze grammar]

sā bhīṣaṇā vividhasaṅkaṭasaṅkaṭāṅgī ghorāṭavī ghanatamogahanā ca lokaiḥ |
āgatya nirvṛtimabuddhihatairna tajjñairāsevyate kusumagulmakavāṭikeva || 43 ||
[Analyze grammar]