Chapter 95

brahmaṇaḥ sarvaṃ samutpadyata iti pratipādanaṃ nāma sargaḥ |
pañcanavatitamaḥ sargaḥ |
vasiṣṭhaḥ |
abhinnau karmakartārau samameva parātpadāt |
svayaṃ prakaṭatāṃ yātau puṣpāmodau taroriva || 1 ||
[Analyze grammar]

sarvasaṅkalpanāmukte jīvā brahmaṇi nirmale |
sphuranti vitate vyomni nīlimna iva candrakāḥ || 2 ||
[Analyze grammar]

aprabuddhajanācāro yatra rāghava dṛśyate |
tatra brahmaṇa utpannā jīvā ityuktayaḥ sthitāḥ || 3 ||
[Analyze grammar]

samprabuddhajanācāre vaktumevaṃ na śobhanam |
yadbrahmaṇa idaṃ jātaṃ na jātaṃ veti rāghava || 4 ||
[Analyze grammar]

kācidvā kalanā yāvanna nītā rāghava prathām |
upadeśyopadeśaśrīstāval loke na śobhate || 5 ||
[Analyze grammar]

ato bhedadaśāṃ dīnāmaṅgīkṛtyopadiśyate |
brahmedamete jīvāśca veti vācāmayaṃ bhramaḥ || 6 ||
[Analyze grammar]

iti dṛṣṭyā nirāsaṅgādbrahmaṇo jāyate jagat |
tajjaṃ tadeva tattvaṃ tu gataṃ duravabodhataḥ || 7 ||
[Analyze grammar]

merumandarasaṅkāśā bahavo jīvarāśayaḥ |
utpatyotpatya saṃlīnāstasminneva pare pade || 8 ||
[Analyze grammar]

anādyantāḥ sphurantyanye jāyamānāḥ sahasraśaḥ |
nānākakubnikuñjeṣu pādapeṣviva pallavāḥ || 9 ||
[Analyze grammar]

jīvaughāścodbhaviṣyanti madhāviva navāṅkurāḥ |
tatraiva layameṣyanti grīṣme madhulatā iva || 10 ||
[Analyze grammar]

tiṣṭhantyajasraṃ kāleṣu ta evānye ca bhūriśaḥ |
jāyante'tha pralīyante parasmiñjīvarājayaḥ || 11 ||
[Analyze grammar]

puṣpāmodāvivābhinnau pumān karma ca rāghava |
parameśātsamāyātau tatraiva viśataśśanaiḥ || 12 ||
[Analyze grammar]

itthamete jagatyasmindaityoraganarāmarāḥ |
udbhavanyagbhavābhāvaiḥ prasphuranti punaḥ punaḥ || 13 ||
[Analyze grammar]

heturviharaṇe teṣāmātmavismaraṇādṛte |
na kaścil lakṣyate sādho janmādhvaphalado'paraḥ || 14 ||
[Analyze grammar]

rāmaḥ |
avisaṃvāditārthaṃ sad yatpramāṇikadṛṣṭibhiḥ |
vītarāgairvinirṇītaṃ tacchāstramiti kathyate || 15 ||
[Analyze grammar]

mahāsattvaguṇopetā ye dhīrāḥ samadṛṣṭayaḥ |
yannideśāḥ phalopetāḥ sādhavasta udāhṛtāḥ || 16 ||
[Analyze grammar]

iyaṃ tu dṛṣṭiḥ sakalā siddhaye sarvakarmaṇām |
sādhuvṛttatayā śāstraṃ sarvadaivānuvartate || 17 ||
[Analyze grammar]

sādhusaṃvyavahārasthaṃ śāstraṃ yo nānuvartate |
bahiṣkurvanti taṃ sarve sa ca duḥkhe nimajjati || 18 ||
[Analyze grammar]

iha loke ca vede ca śrutiritthaṃ sadā prabho |
yathā karma ca kartā ca paryāyeṇeha saṅgate || 19 ||
[Analyze grammar]

karmaṇā kriyate kartā kartrā karma pramīyate |
bījāṅkuravadāmnāyo loke vedokta eṣa saḥ || 20 ||
[Analyze grammar]

karmaṇo jāyate janturbījādiva navāṅkuraḥ |
jantoḥ prajāyate karma punarbījamivāṅkurāt || 21 ||
[Analyze grammar]

yayā vāsanayā karma dīyate bhavapañjare |
tadvāsanānurūpeṇa phalaṃ samanubhūyate || 22 ||
[Analyze grammar]

evaṃ sthite kathaṃ nāma janmabījena karmaṇā |
vinotpattistvayā proktā bhūtānāṃ brahmaṇaḥ padāt || 23 ||
[Analyze grammar]

pakṣeṇānena bhagavanbhavatā janmakarmaṇoḥ |
tiraskṛtā jagajjātāpyavinābhāvitaitayoḥ || 24 ||
[Analyze grammar]

karmaṇyakāraṇe brahmañjanmādiṣu phaleṣu tu |
karmaṇāṃ phalamastīti tvayā loke pramārjitam || 25 ||
[Analyze grammar]

sañjāte saṅkare loke karmasvaphaladāyiṣu |
mātsye nyāye vilasati nāśa evāvaśiṣyate || 26 ||
[Analyze grammar]

kiṃ tatkṛtaṃ bhavatyevaṃ bhagavanbrūhi tattvataḥ |
etaṃ me saṃśayaṃ sphāraṃ chinddhi vedavidāṃ vara || 27 ||
[Analyze grammar]

vasiṣṭhaḥ |
sādhu rāghava pṛṣṭo'smi tvayā praśnamimaṃ śubham |
śṛṇu vakṣyāmi te yena bhṛśaṃ jñānodayo bhavet || 28 ||
[Analyze grammar]

manaso yaḥ samunmeṣaḥ kalākalanarūpataḥ |
etattatkarmaṇāṃ bījaṃ phalamasyaiva vidyate || 29 ||
[Analyze grammar]

yadeva hi manastattvamutthitaṃ brahmaṇaḥ padāt |
tadeva karma jantūnāṃ jīvo dehatayā sthitaḥ || 30 ||
[Analyze grammar]

kusumāmodayorbhedo na yathā bhinnayoriha |
tathaiva karmamanasorbhedo nāstyapi bhinnayoḥ || 31 ||
[Analyze grammar]

kriyāspando jagatyasmin karmeti kathito budhaiḥ |
pūrvaṃ tasya manodehaḥ karmātaścittameva hi || 32 ||
[Analyze grammar]

na sa śailo na tadvyoma na sā diṅ na triviṣṭapam |
asti yatra phalaṃ nāsti kṛtānāmātmakarmaṇām || 33 ||
[Analyze grammar]

aihikaṃ prāktanaṃ vāpi karma yad racitaṃ sphuṭam |
pauruṣo'sau paro yatno na kadācana niṣphalaḥ || 34 ||
[Analyze grammar]

brahmaṇaḥ protthitaṃ cittaṃ karma viddhīha netarat |
tadeva janatābījaṃ viddhi rāghava netarat || 35 ||
[Analyze grammar]

deśāddeśāntaraprāpteranusandhānahetutaḥ |
pūrvaṃ hi kāraṇaṃ cetaḥ karma cittamato viduḥ || 36 ||
[Analyze grammar]

akṣubdhasāgaraprakhyādbrahmaṇaḥ spandadharmiṇī |
yā cidāhurataścittaṃ janatājīvatāṃ gatam || 37 ||
[Analyze grammar]

manaḥ karma mano jīvaḥ kāyastenaiva tanyate |
ataḥ karma ca kartā ca na bhinnau tilatailavat || 38 ||
[Analyze grammar]

kartṛkarmātmakāvarthāvabhinnau nityameva hi |
abodhādbhedamāyātau kalpyamānau mudhaiva hi || 39 ||
[Analyze grammar]

dve karmamanasī rāma mūrkhāṇāṃ na tu dhīmatām |
samudrāmbu taraṅgāmbu bālānāmiva bhedadhīḥ || 40 ||
[Analyze grammar]

paryāyaśabdāvetau hi viddhi tvaṃ cittakarmaṇī |
paryāyaśabdatāṃ tyaktvā sthite duravabodhataḥ || 41 ||
[Analyze grammar]

manaḥ karmātmakaṃ pūrvaṃ parasmātsampravartate |
āmodātmeva kusumaṃ vividhākṛti pādapāt || 42 ||
[Analyze grammar]

kartṛkarmābhidhānīha cetāṃsyavirataṃ padāt |
parasmātsampravartante taraṅgā iva sāgarāt || 43 ||
[Analyze grammar]

uddhṛtānyeva tasmiṃstu jīvasañjñāni tāni tu |
sphuritvā pravilīyante taraṅgā iva sāgare || 44 ||
[Analyze grammar]

manasā kriyate karma yad yattatsaphalaṃ bhavet |
manasyeva na kāyotthaṃ kartā karma manastataḥ || 45 ||
[Analyze grammar]

ālokalāñchitābhoge makure rājate sukham |
brahmatattvaparāmṛṣṭe kartṛtvaṃ manasi sphuṭam || 46 ||
[Analyze grammar]

guṇo guṇini śauklyādiḥ paṭādau saṃsthito yathā |
tathā manasi kartṛtvaṃ jīvanāmni vyavasthitam || 47 ||
[Analyze grammar]

yathā śaityādirahitastuṣāro nopalabhyate |
tathā karma vinā cittaṃ na kiñcidupalabhyate || 48 ||
[Analyze grammar]

kṛṣṇatāsaṅkṣaye yadvatkṣīyate kajjalaṃ svayam |
spandātmakarmavigame tadvatprakṣīyate manaḥ || 49 ||
[Analyze grammar]

karmanāśo manonāśo manonāśo hyakarmatā |
muktasyaiva bhavatyeṣa nāmuktasya kadācana || 50 ||
[Analyze grammar]

vahnyauṣṇyayoriva sadā śliṣṭayościttakarmaṇoḥ |
dvayorekatarābhāve dvayameva vilīyate || 51 ||
[Analyze grammar]

cittaṃ sadā spandavilāsametatspandaikarūpaṃ nanu karma viddhi |
karmātha cittaṃ kila dharmadharmi padaṃ gate rāma paraspareṇa || 52 ||
[Analyze grammar]