Chapter 85

mano'ṅkurotpattikathanaṃ nāma sargaḥ |
pañcāśītitamaḥ sargaḥ |
vasiṣṭhaḥ |
purā me brahmaṇā proktaṃ sargasaṅkathayānagha |
yadidaṃ tatpravakṣyāmi tvayi pṛcchati rāghava || 1 ||
[Analyze grammar]

purā mayā hi bhagavānpṛṣṭaḥ kamalasambhavaḥ |
ime kathamupāyānti brahman sargagaṇā iti || 2 ||
[Analyze grammar]

brahmā |
evaṃ hi mana evedamitthaṃ sphurati bhūtavat |
calairjalāśayaḥ sphārairvicitraiścakrakairiva || 3 ||
[Analyze grammar]

dinādau samprabuddhasya saṃsāraṃ sraṣṭumicchataḥ |
purākalpe hi kasmiṃścicchṛṇu kiṃ vṛttamaṅga me || 4 ||
[Analyze grammar]

kadācidakhilaṃ sargaṃ saṃhṛtya divasakṣaye |
eka evāhamekāgraḥ svasthaḥ svāmanayaṃ niśām || 5 ||
[Analyze grammar]

niśānte samprabuddhaḥ san sāndhyāṃ kṛtvā tathā vidhim |
prajā draṣṭuṃ dṛśaḥ sphāre vyomni yojitavānaham || 6 ||
[Analyze grammar]

yāvatpaśyāmi gaganaṃ na tamobhirna tejasā |
vyāptamatyantavitataṃ śūnyamantavivarjitam || 7 ||
[Analyze grammar]

sargaṃ saṅkalpayāmīmamiti niścitya tanmayā |
khamevekṣitumārabdhaṃ śuddhasūkṣmeṇa cetasā || 8 ||
[Analyze grammar]

athāhaṃ dṛṣṭavāṃstatra manasā vitate'mbare |
pṛthaksthitānmahārambhān sargān sthitinirargalān || 9 ||
[Analyze grammar]

paraspareṇa cādṛṣṭānbrahmaviṣṇvindrasaṃyutān |
sasurāsuragandharvakinnaroragamānavān || 10 ||
[Analyze grammar]

merumandarakailāsamahendramalayācalān |
sādridyūrvīnadīśāṃśca saṅkhyayā daśabhāsurān || 11 ||
[Analyze grammar]

teṣu tatpratibimbābhāḥ padmakośādhivāsinaḥ |
rājahaṃsarathārūḍhāḥ saṃsthitā daśapadmajāḥ || 12 ||
[Analyze grammar]

pṛthaksthiteṣu daśasu teṣūdyadbhūtapaṅktiṣu |
jvalajjvāleṣu dīrgheṣu jagatsūjjvaladīptiṣu || 13 ||
[Analyze grammar]

pravahanti mahānadyaḥ pradhvananti tathābdhayaḥ |
pratapantyuṣṇarucayaḥ prasphurantyambare'nilāḥ || 14 ||
[Analyze grammar]

divi krīḍanti vibudhā bhuvi krīḍanti mānavāḥ |
dānavā bhoginaścaiva pātāleṣu sukhaṃ sthitāḥ || 15 ||
[Analyze grammar]

kālacakrapariprotāṣṣaṭ chubhāḥ sakalartavaḥ |
yathākālaṃ phalapūrṇāṃ bhūṣayantyabhito mahīm || 16 ||
[Analyze grammar]

prauḍhiṃ śubhāśubhācārasthitayaḥ kakubhāṃ prati |
narakasvargaphaladāḥ sarvatra samupāgatāḥ || 17 ||
[Analyze grammar]

bhogamokṣaphalārthinyaḥ samastā bhūtajātayaḥ |
samīhitaṃ yathākālaṃ prayatante yathākramam || 18 ||
[Analyze grammar]

saptalokāstathā dvīpāḥ samudrā girayastathā |
avekṣamāṇāḥ kalpāntaṃ sphurantyurutarāravam || 19 ||
[Analyze grammar]

kvacid rātritvamāyātaṃ kvacitsthiratayā sthitam |
sthitaṃ parvatakuñjeṣu tamastejolavadrutam || 20 ||
[Analyze grammar]

nabhonīlotpalasyāntarbhramadabhramadhuvratam |
prasphurattārakājālaṃ kesarāpūratāṃ gatam || 21 ||
[Analyze grammar]

kalpāntaghananīhāro merukuñjeṣu saṃsthitaḥ |
śalmaleramalaṃ tūlamaṣṭhīlākoṭareṣviva || 22 ||
[Analyze grammar]

lokālokādriraśanāṃ raṇadarṇavaghurghurām |
tamaḥkhaṇḍendranīlāḍhyāṃ nijaratnavirājitām || 23 ||
[Analyze grammar]

dadhānā vasudhā bhūtaravakākalighuṅghumām |
saṃsthitā bhuvanābhoge svāntaḥpura ivāṅganā || 24 ||
[Analyze grammar]

gaurāhaḥpaṅktimadhyastharajanīrājirājitāḥ |
padmotpalasraja iva lakṣyante vatsaraśriyaḥ || 25 ||
[Analyze grammar]

bahugarbhavibhāgasthabhūtalokāḥ pṛthakpṛthak |
tejo'ruṇā vilokyante dāḍimānīva ṣaṇḍake || 26 ||
[Analyze grammar]

tripravāhā tripathagā kṛtvordhvādhogamāgamā |
jagadyajñopavītābhā sphurantīndukalāmalā || 27 ||
[Analyze grammar]

itaścetaśca gacchanti śīryante prodbhavanti ca |
diglatāsu taḍitpuṣpā vātānte meghapallavāḥ || 28 ||
[Analyze grammar]

gandharvanagarodyānavimānāvalimālitā |
samudrabhūminabhasāṃ padavī pravirājate || 29 ||
[Analyze grammar]

lokāntareṣu saṅghena devāsuranaroragāḥ |
udumbareṣu maṣakā iva ghuṅghumitāḥ sthitāḥ || 30 ||
[Analyze grammar]

yugakalpakṣaṇalavakalākāṣṭākalaṅkitaḥ |
kālo vahatyakalitaḥ sarvanāśapratīkṣakaḥ || 31 ||
[Analyze grammar]

evamālokya śuddhena pareṇa svena tejasā |
bhṛśaṃ vismayamāpannaḥ kimetatkathamityaham || 32 ||
[Analyze grammar]

kathaṃ māṃsamayenākṣṇā yanna paśyāmi kiñcana |
tanmāyājālamatulaṃ paśyāmi manasāmbare || 33 ||
[Analyze grammar]

athālokya ciraṃ kālaṃ manasaivāhamambarāt |
arkaṃ tasmājjagajjālādekamānīya pṛṣṭavān || 34 ||
[Analyze grammar]

āgaccha devadeveśa bho bhāskara mahādyute |
svāgataṃ te'stviti proktaṃ mayāsau kathito'pyatha || 35 ||
[Analyze grammar]

kastvaṃ kathamidaṃ jātaṃ jagadekaṃ jaganti vā |
yadi jānāsi bhagavaṃstadetatkathayānagha || 36 ||
[Analyze grammar]

ityukto māmasāvarkaḥ samparijñātavānatha |
namaskṛtyābhyuvācedamanindyapadayā girā || 37 ||
[Analyze grammar]

bhānuḥ |
asya dṛśyapiśācasya nityaṃ kāraṇatāmapi |
gataḥ kasmānna jānīṣe kiṃ māmīśvara pṛcchasi || 38 ||
[Analyze grammar]

atha madvākyasandarbhe līlā cettava sarvaga |
acintitātsamutpannaṃ tacchṛṇu tvaṃ vadāmyaham || 39 ||
[Analyze grammar]

sadasaditi kalābhirātataṃ sadbhramabharabhedavimohadāyinībhiḥ |
pravitataracanābhirīśvarātma pravilasatīha mano mahanmahātman || 40 ||
[Analyze grammar]