Chapter 44

līlopākhyāne'gnidāhavarṇanaṃ nāma sargaḥ |
catuścatvāriṃśattamaḥ sargaḥ |
vasiṣṭhaḥ |
etasminnantare rājamahiṣī mattayauvanā |
tadviveśa gṛhaṃ lakṣmīriva paṅkajakoṭaram || 1 ||
[Analyze grammar]

ālolamālyavasanā cchinnahāralatākulā |
anuyātā vayasyābhirdāsībhirbhayavihvalā || 2 ||
[Analyze grammar]

candrānanāvadātāṅgī śvāsotkampipayodharā |
tārakākāradaśanā sthitā dyauriva rūpiṇī || 3 ||
[Analyze grammar]

atha tasyā vayasyaikā rājānaṃ taṃ vyajijñapat |
vṛtrasaṅgrāmasaṃrabhdamamarendramivāpsarāḥ || 4 ||
[Analyze grammar]

deva devī sahāsmābhiḥ palāyyāntaḥpurāntarāt |
śaraṇaṃ devamāyātā vātārteva latā drumam || 5 ||
[Analyze grammar]

rājadārā hṛtāḥ stenairbalavadbhirudāyudhaiḥ |
ūrmijālairmahābdhīnāṃ tīre drumalatā iva || 6 ||
[Analyze grammar]

antaḥpurādhipāḥ sarve piṣṭāśśatrubhiruddhataiḥ |
aśaṅkitābhipatitairvātairiva vanadrumāḥ || 7 ||
[Analyze grammar]

pūreṇāśaṅkamāyātaiḥ parairnaḥ puramāhṛtam |
rātrau varṣāsvivodgārairudakaplavavāribhiḥ || 8 ||
[Analyze grammar]

dhūmravarmabhirunnādairlelihānāgrahetibhiḥ |
vahnibhirnaḥ puraṃ vyāptaṃ parayodhaiśca bhūribhiḥ || 9 ||
[Analyze grammar]

parivāravilāsinyo devya āhṛtya mūrdhajaiḥ |
ākrandantyo balānnītāḥ kurarya iva dhīvaraiḥ || 10 ||
[Analyze grammar]

iti no yeyamāyātā śākhā prasaraśālinī |
āpattāmalamuddhartuṃ devasyaivāsti śaktitā || 11 ||
[Analyze grammar]

ityākarṇyāvalokyāsau devyau yuddhāya yāmyaham |
kṣamyatāṃ mama bhāryeyaṃ yuṣmatpādābjaṣaṭpadī || 12 ||
[Analyze grammar]

ityuktvā niryayau rājā kopākulitacetanaḥ |
mattebhanirbhinnavanaḥ kandarādiva keśarī || 13 ||
[Analyze grammar]

līlā līlāṃ dadarśātha svākārasadṛśākṛtim |
pratibimbamivāyātāmādarśe cārudarśanām || 14 ||
[Analyze grammar]

prabuddhalīlā |
kimidaṃ devi me brūhi kasmādiyamahaṃ sthitā |
yā sābhavamahaṃ pūrvaṃ kathaṃ seyamiha sthitā || 15 ||
[Analyze grammar]

mantriprabhṛtayaḥ paurā yodhāḥ sabalavāhanāḥ |
sarva eva ta eveme sthitāstatra tathaiva ye || 16 ||
[Analyze grammar]

tatrāpīdamayaṃ devi sarve kathamiha sthitāḥ |
bahirantaśca makura ivaite kiṃ pracetanāḥ || 17 ||
[Analyze grammar]

devī |
yathā jñaptirudetyantastathānubhavati kṣaṇāt |
citiścetyārthatāmeti cittaṃ cittārthatāmiva || 18 ||
[Analyze grammar]

yādṛgbhāvana evāntaścetanastanute smṛtim |
tādṛgarthajagadrūpastatraivodeti tatkṣaṇāt || 19 ||
[Analyze grammar]

na deśakāladīrghatvaṃ na vaicitryaṃ padārthajam |
bāhyamastyantaraṃ bhāti svapnārtho'tra nidarśanam || 20 ||
[Analyze grammar]

yadantaḥ svapnasaṅkalpapuravatkacanaṃ citeḥ |
tadetadbāhyanāmnaiva svābhyāsātsusphuṭaṃ sthitam || 21 ||
[Analyze grammar]

yādṛgbhāvo mṛto bhartā tava tasmiṃstadā pure |
tādṛgbhāvastamevārthaṃ tatraiva samupāgataḥ || 22 ||
[Analyze grammar]

anya eva hyamī bhṛtyāstebhyastatsadṛśā api |
sadrūpā eva caitasya svapnasaṅkalpasainyavat || 23 ||
[Analyze grammar]

avisaṃvādi sarvārtharūpaṃ yadanubhūyate |
tasya tāvadvada kathaṃ kīdṛśī vāpyasatyatā || 24 ||
[Analyze grammar]

athavottarakāle tu bhaṅguratvānna vastusat |
tadīdṛksarvamevedaṃ tatra kā nāstikādhikā || 25 ||
[Analyze grammar]

svapno jāgratyasadrūpaḥ svapne jāgradasadvapuḥ |
mṛtirjanmanyasadrūpā mṛtau janmāpyasanmayam || 26 ||
[Analyze grammar]

vicāraviśarārutvādanubhūteśca sundari |
evaṃ na sannāsadidaṃ bhrāntimātraṃ vibhāsate || 27 ||
[Analyze grammar]

mahākalpāntasampattāvapyadyānyayuge'thavā |
na kadācana yannāśi tadbrahmaivāsti tajjagat || 28 ||
[Analyze grammar]

tasminmadhye kacantīmā bhrāntayaḥ sṛṣṭināmikāḥ |
vyomni keśoṇḍukānīva na kacanti tu vastutaḥ || 29 ||
[Analyze grammar]

yathā taraṅgā jaladhau tathemāḥ sṛṣṭayaḥ pare |
utpatyotpatya līyante rajāṃsīva mahānile || 30 ||
[Analyze grammar]

tasmādbhrāntimayābhāse mithyātvamahamātmake |
mṛgatṛṣṇājalaraye kevāsthā sargabhasmani || 31 ||
[Analyze grammar]

bhrāntayaśca na tatrānyāstāstā eva paraṃ padam |
ghane tamasi yakṣābhā tama eva na yakṣakāḥ || 32 ||
[Analyze grammar]

tasmājjanma mṛtirmoho vyomāhaṃ tvamidaṃ tatam |
sarvaṃ tacca mahākalpaśāntau yadavaśiṣyate || 33 ||
[Analyze grammar]

nātaḥ satyamidaṃ dṛṣṭaṃ na cāsatyaṃ kadācana |
dvayamevaitadatha vā brahma tatraiva sambhavat || 34 ||
[Analyze grammar]

ākāśaparamāṇvantardravyāderaṇuke'pi vā |
jīvāṇuryatra tatredaṃ jagadvetti nijaṃ vapuḥ || 35 ||
[Analyze grammar]

agnirauṣṇyaṃ yathā vetti nijabhāvakramoditam |
paśyatīdaṃ tathaivātmā svātmabhūtaṃ viśuddhacit || 36 ||
[Analyze grammar]

yathā sūryātape gehe bhramanti trasareṇavaḥ |
tatheme paramākāśe brahmāṇḍatrasareṇavaḥ || 37 ||
[Analyze grammar]

yathā vāyau sthitaḥ spanda āmodaśśaityamambare |
piṇḍagrahavinirmuktaṃ tathā viśvaṃ sthitam pare || 38 ||
[Analyze grammar]

bhāvābhāvagrahotsargasthūlasūkṣmacarācarāḥ |
vivarjitasyāvayavairbhāvā brahmaṇa īdṛśaiḥ || 39 ||
[Analyze grammar]

sākārasyeva bodhāya vijñeyā bhavatādhunā |
ananyāḥ svātmanaste syustaroravayavā iva || 40 ||
[Analyze grammar]

yathāsthitamidaṃ viśvaṃ nijabhāvakramoditam |
riktaṃ tadviśvaśabdārthairananyadbrahmaṇi sthitam || 41 ||
[Analyze grammar]

na tatsatyaṃ na cāsatyaṃ rajjvāṃ sarpabhramopamam |
mithyānubhūtitaḥ satyamasatyaṃ tatparīkṣaṇāt || 42 ||
[Analyze grammar]

paramaṃ kāraṇaṃ vittvājjīvatvamiva vettyalam |
atastadevānubhavañjīvatvaṃ vindate sphuṭam || 43 ||
[Analyze grammar]

satyaṃ bhavatyasatyaṃ vā khe'pi bhātamidaṃ jagat |
rañjayatyeva jīvāṇuṃ svotthābhiranubhūtibhiḥ || 44 ||
[Analyze grammar]

anubhūtaya etāstu kāścitpūrvānubhūtitaḥ |
apūrvānubhavāḥ kāścitsamāścaivāsamāśca tāḥ || 45 ||
[Analyze grammar]

kvacitkadācittā eva kvacideva samā api |
kacantyasatyāḥ satyābhā jīvākāśe'nubhūtayaḥ || 46 ||
[Analyze grammar]

tatkulāstatsamācārāstajjanmānastadīhitāḥ |
ta eva mantriṇaḥ paurāḥ pratibhāne bhavanti vaḥ || 47 ||
[Analyze grammar]

te caivātmanyalaṃ satyā deśakālehitaiḥ samāḥ |
sarvagātmasvarūpāyāḥ pratibhāyā iti sthitiḥ || 48 ||
[Analyze grammar]

yathā rājātmani vyomni pratibhodeti sanmayī |
tathānvagagragodeti satyaiva pratibhāsvare || 49 ||
[Analyze grammar]

tvacchīlā tvatsamācārā tvatkulā tvadvapuṣmayī |
iti līleyamābhāti pratibhā pratibimbajā || 50 ||
[Analyze grammar]

sarvage saṃvidādarśe pratibhā pratibimbati |
yādṛśī yatra sā tatra tathodeti nirantarā || 51 ||
[Analyze grammar]

jīvākāśasya yāntassthā pratibhā kacati svayam |
sā bahiḥ khe cidādarśapratibimbādiyaṃ sthitā || 52 ||
[Analyze grammar]

eṣā tvamambaramahaṃ bhuvanaṃ dharādi rājeti sarvamajameva vibhātamātram |
cidvyoma bilvajaṭharaṃ viduraṅga viddhi tvaṃ ceti śāntamalamāssva yathāsthiteha || 53 ||
[Analyze grammar]