Chapter 19

pramāṇadṛṣṭāntanirṇayo nāma sargaḥ |
ekonaviṃśaḥ sargaḥ |
vasiṣṭhaḥ |
viśiṣṭāṃśasadharmatvamupamāneṣu gṛhyate |
ko bhedaḥ sarvasādṛśye tūpamānopameyayoḥ || 1 ||
[Analyze grammar]

dṛṣṭāntabuddhādekātmajñānaśāstrārthavedanāt |
mahāvākyārthasaṃvittyā śāntirnirvāṇamucyate || 2 ||
[Analyze grammar]

tasmāddṛṣṭāntadārṣṭāntavikalpollasitairalam |
yayā kayācid yuktyāśu mahāvākyārthamāśrayet || 3 ||
[Analyze grammar]

śāntiśśreyaḥ paraṃ viddhi tatprāptau yatnavānbhavet |
bhoktavya odanaḥ prāptaḥ kiṃ tatsiddhivikalpitaiḥ || 4 ||
[Analyze grammar]

akāraṇaṃ kāraṇibhirbodhārthamupamīyate |
upamānaistūpameyasadṛśairekadeśataḥ || 5 ||
[Analyze grammar]

sthātavyaṃ neha bhogeṣu vivekavikalātmanā |
upalodarasañjātaparipīnāndhabhekavat || 6 ||
[Analyze grammar]

dṛṣṭāntairyuktibhiryatnādvāñchitaṃ tyajatetarat |
vicāraṇavatā bhāvyaṃ śāntiśāstrārthaśālinā || 7 ||
[Analyze grammar]

śāstropaśamasaujanyaprajñātajjñasamāgamaiḥ |
antarāntarasampannadharmyārthopārjanakriyaḥ || 8 ||
[Analyze grammar]

tāvadvicārayetprājño yāvadviśrāntimātmani |
samprayātyapunarnāśāṃ śāntiṃ turyapadābhidhām || 9 ||
[Analyze grammar]

turyaviśrāntiyuktasya pratīrṇasya bhavārṇavāt |
jīvato'jīvataścaiva gṛhasthasyātha vā yateḥ || 10 ||
[Analyze grammar]

na kṛtenākṛtenārtho na śrutismṛtivibhramaiḥ |
nirmandara ivāmbhodhiḥ sa tiṣṭhati yathāsthitam || 11 ||
[Analyze grammar]

ekāṃśenopamānānāmupameyasadharmatā |
boddhavyā bodhyabodhāya na stheyaṃ codyacañcunā || 12 ||
[Analyze grammar]

yayā kayācid yuktyāśu boddhavyaṃ bodhyameva te |
muktaye tanna paśyanti vyākulāścodyacañcavaḥ || 13 ||
[Analyze grammar]

hṛdaye saṃvidākāśe viśrānte'nubhavātmani |
vastunyanarthaṃ yaḥ praṣṭā codyacañcuḥ sa ucyate || 14 ||
[Analyze grammar]

abhimānavikalpāṃśairajño jñaptiṃ vikalpayan |
bodhaṃ malinayatyantarmukhaṃ sarpa ivāmalam || 15 ||
[Analyze grammar]

sarvapramāṇasattānāṃ padamabdhirapāmiva |
pramāṇamekameveha pratyakṣaṃ rāma tacchṛṇu || 16 ||
[Analyze grammar]

sarvārthasāramadhyakṣaṃ vedanaṃ viduruttamāḥ |
nūnaṃ tatprati yatsiddhaṃ pratyakṣaṃ tadudāhṛtam || 17 ||
[Analyze grammar]

anubhūtervedanasya pratipatteryathāsthitam |
pratyakṣamiti nāmeha kṛtaṃ jīvaḥ sa eva ca || 18 ||
[Analyze grammar]

sa eva saṃvitsa punarahantāpratyayātmakaḥ |
sa yayodeti saṃvittyā sā padārtha iti smṛtā || 19 ||
[Analyze grammar]

sa saṅkalpavikalpādyaiḥ kṛtanānākramo bhramaiḥ |
jagattayā sphuratyambu taraṅgāditayā yathā || 20 ||
[Analyze grammar]

prāgakāraṇamevāśu sargādau sargalīlayā |
sphuritvā kāraṇībhūtaṃ pratyakṣaṃ svayamātmani || 21 ||
[Analyze grammar]

kāraṇatvaṃ vicāro'sya jīvasyāsadapi sthitam |
sadivāsyāṃ jagadrūpasampattau vyaktimāgatam || 22 ||
[Analyze grammar]

svayameva vicārastu sanañarthaṃ svakaṃ vapuḥ |
nāśayitvā karotyāśu pratyakṣaṃ paramaṃ padam || 23 ||
[Analyze grammar]

vicārayanvicāro'pi nātmānamadhigacchati |
yadā tadā nirullekhaṃ paramevāvaśiṣyate || 24 ||
[Analyze grammar]

manasyanīhite śānte tairbuddhīndriyakarmabhiḥ |
neha kaiścitkṛtairartho nākṛtairapyabhāvanāt || 25 ||
[Analyze grammar]

manasyanīhite śānte na pravartanta eva te |
karmendriyāṇi karmādāvasañcāritayantravat || 26 ||
[Analyze grammar]

manoyantrasya calane kāraṇaṃ vedanaṃ viduḥ |
prāṇālī dārumeṣasya rajjurantargatā yathā || 27 ||
[Analyze grammar]

rūpālokamanaskārapadārthādyākulaṃ jagat |
vidyate vedanasyāntarvāte'ntaḥ spandanaṃ yathā || 28 ||
[Analyze grammar]

sarvātmavedanaṃ śuddhaṃ yathodeti tadātmakam |
bhāti prasṛtadikkālabāhyāntārūpadehakam || 29 ||
[Analyze grammar]

draṣṭaiva dṛśyatābhāsaṃ svaṃ rūpaṃ dhārayan sthitaḥ |
svaṃ yathā tatra yad rūpaṃ pravibhāti tathaiva tat || 30 ||
[Analyze grammar]

sarvamātmā yathā tatra saṅkalpatvamivāgataḥ |
tiṣṭhatyāśu tathā tatra tadrūpa iva rājate || 31 ||
[Analyze grammar]

sarvātmakatayā draṣṭurdṛśyatvamiva yujyate |
draṣṭṛtvaṃ draṣṭrasadbhāve dṛśyasya tvasti nāsataḥ || 32 ||
[Analyze grammar]

akāraṇakamevāto brahmakalpamidaṃ sthitam |
pratyakṣameva nirmātṛ tasyāṃśāstvanupādhayaḥ || 33 ||
[Analyze grammar]

svayatnamātretararūpako yastaddaivaśabdārthamapāsya dūre |
śūreṇa sādho padamuttamaṃ tatsvapauruṣeṇaiva hi labhyate'ntaḥ || 34 ||
[Analyze grammar]

vicārayācāryaparamparāṇāṃ matena satyena sitena tāvat |
yāvadviśuddhāṃ svayameva buddhāmanantarūpāṃ paratāmupaiṣi || 35 ||
[Analyze grammar]