Chapter 10

karmavicāro nāma sargaḥ |
daśamaḥ sargaḥ |
vasiṣṭhaḥ |
ataḥ pauruṣamāśritya śreyase nityabāndhavam |
ekāgraṃ kuru cittaṃ tvaṃ śṛṇu cedaṃ vaco mama || 1 ||
[Analyze grammar]

avāntarābhipātīni svārūḍhāni manoratham |
pauruṣeṇendriyāṇyāśu saṃyamya samatāṃ naya || 2 ||
[Analyze grammar]

ihāmutra ca siddhyarthaṃ puruṣārthaphalapradām |
mokṣopāyamayīṃ vakṣye saṃhitāṃ sārasammitām || 3 ||
[Analyze grammar]

apunargrahaṇāyāntastyaktvā saṃsāravāsanām |
sampūrṇau śamasantoṣāvādāyodārayā dhiyā || 4 ||
[Analyze grammar]

sapūrvāparavākyārthavicāraviṣayādṛtam |
manaḥ samarasaṃ kṛtvā sānusandhānamātmani || 5 ||
[Analyze grammar]

sukhaduḥkhakṣayakaraṃ mahānandaikasādhanam |
mokṣopāyamito rāma vakṣyamāṇaṃ imaṃ śṛṇu || 6 ||
[Analyze grammar]

imāṃ mokṣakathāṃ śrutvā saha sarvairvivekibhiḥ |
padaṃ yāsyasi nirduḥkhaṃ nāśo yatra na vidyate || 7 ||
[Analyze grammar]

idamuktaṃ purākalpe brahmaṇā parameṣṭhinā |
sarvaduḥkhakṣayakaraṃ paramāśvāsanaṃ dhiyaḥ || 8 ||
[Analyze grammar]

rāmaḥ |
kenoktaṃ kāraṇenedaṃ brahmanpūrvaṃ svayambhuvā |
kathaṃ ca bhavatā prāptametatkathaya me prabho || 9 ||
[Analyze grammar]

vasiṣṭhaḥ |
astyanantavilāsātmā sarvagaḥ sarvasaṃśrayaḥ |
cidākāśo'vināśātmā pradīpaḥ sarvavastuṣu || 10 ||
[Analyze grammar]

spandāspandasamākārāttato viṣṇurajāyata |
spandamānarasāpūrāttaraṅgaḥ sāgarādiva || 11 ||
[Analyze grammar]

sumerukarṇikāttasya digdalāddhṛdayāmbujāt |
tārakākesaravataḥ parameṣṭhī vyajāyata || 12 ||
[Analyze grammar]

vedavedārthadeveśamunimaṇḍalamālitam |
so'sṛjatsakalaṃ sargaṃ vikalpaughaṃ yathā manaḥ || 13 ||
[Analyze grammar]

jambudvīpasya koṇe'sminvarṣe bhāratanāmani |
sa sasarja janaṃ putrairādhivyādhipariplutam || 14 ||
[Analyze grammar]

bhāvābhāvaviṣaṇṇārthamutpātadhvaṃsatatparam |
sarge'sminbhūtajātīnāmāpyāyanakaraṃ param || 15 ||
[Analyze grammar]

janasya tasya duḥkhaṃ sa dṛṣṭvā sakalalokakṛt |
jagāma karuṇāmīśaḥ putraduḥkhād yathā pitā || 16 ||
[Analyze grammar]

ka eteṣāṃ hatāśānāṃ duḥkhasyānto hatāyuṣām |
syāditi kṣaṇamekāgraścintayāmāsa bhūtapaḥ || 17 ||
[Analyze grammar]

iti sañcintya bhagavān sasarja punarīśvaraḥ |
tapo dharmaṃ ca dānaṃ ca satyaṃ tīrthāni caiva ha || 18 ||
[Analyze grammar]

etatsṛṣṭvā punardevaścintayāmāsa bhūtakṛt |
puṃsāṃ nānena sarvasya duḥkhasyānta iti svayam || 19 ||
[Analyze grammar]

nirvāṇaṃ nāma paramaṃ sukhaṃ yena punarjanaḥ |
na jāyate na mriyate tajjñānādeva labhyate || 20 ||
[Analyze grammar]

saṃsārottaraṇe jantorupāyo jñānameva hi |
tapo dānaṃ tathā tīrthamaṇūpāyaḥ prakīrtitaḥ || 21 ||
[Analyze grammar]

tattāvadduḥkhamokṣārthaṃ janasyāsya mahātmanaḥ |
pratyagraṃ taraṇopāyamāśu prakaṭayāmyaham || 22 ||
[Analyze grammar]

iti sañcintya bhagavānbrahmā kamalasaṃsthitaḥ |
manasā parisaṅkalpya māmutpāditavānimam || 23 ||
[Analyze grammar]

kuto'pyutpanna evāśu tato'haṃ samupasthitaḥ |
pitustasya puraśśīghramūrmerūrmirivānagha || 24 ||
[Analyze grammar]

kamaṇḍaludharo nāthaḥ sakamaṇḍalunā mayā |
sākṣamālaḥ sākṣamālaṃ sa praṇamyābhivāditaḥ || 25 ||
[Analyze grammar]

ehi putreti māmuktvā sa svābjasyottare dale |
śukle'bhra iva śītāṃśuṃ yojayāmāsa pāṇinā || 26 ||
[Analyze grammar]

mṛgakṛttiparīdhāno mṛgakṛttinijāmbaram |
māmuvāca pitā brahmā sa haṃsaḥ sārasaṃ yathā || 27 ||
[Analyze grammar]

muhūrtamātraṃ te putra ceto vānaracañcalam |
ajñānamabhyāviśatu śaśaśśaśadharaṃ yathā || 28 ||
[Analyze grammar]

iti tenāśu śaptaḥ sanvicārasamanantaram |
ahaṃ vismṛtavān sarvaṃ svarūpamamalaṃ dvijaḥ || 29 ||
[Analyze grammar]

athāhaṃ dīnatāṃ yātaḥ sthitaḥ sambuddhayā dhiyā |
duḥkhaśokābhisantapto jāto jana ivādhamaḥ || 30 ||
[Analyze grammar]

kaṣṭaṃ saṃsāranāmāyaṃ doṣaḥ kathamivāgataḥ |
iti cintitavānantastūṣṇīmeva vyavasthitaḥ || 31 ||
[Analyze grammar]

athābhyadhātsa māṃ tātaḥ putra kiṃ duḥkhavānasi |
duḥkhopaghātaṃ māṃ pṛccha sukhī nityaṃ bhaviṣyasi || 32 ||
[Analyze grammar]

tataḥ pṛṣṭaḥ sa bhagavānmayā sakalalokakṛt |
haimapadmadalasthena saṃsāravyādhibheṣajam || 33 ||
[Analyze grammar]

kathaṃ nāma mahadduḥkhamayaṃ saṃsāra āgataḥ |
kathaṃ ca kṣīyate jantoriti pṛṣṭena tena me || 34 ||
[Analyze grammar]

tajjñānaṃ subahu proktaṃ yajjñātvā pāvanaṃ param |
ahaṃ piturapi prāyaḥ kilādhika iva sthitaḥ || 35 ||
[Analyze grammar]

tato viditavedyaṃ māṃ nijaprakṛtimāsthitam |
sa uvāca jagatkartā vaktā sakalakāraṇam || 36 ||
[Analyze grammar]

śāpenājñapadaṃ nītvā pṛcchakastvaṃ mayā kṛtaḥ |
putrāsya jñānasārasya samastajanasiddhaye || 37 ||
[Analyze grammar]

idānīṃ śāntaśāpastvaṃ paraṃ bodhamupāgataḥ |
saṃsthito'hamivaikātmā kanakaṃ kanakādiva || 38 ||
[Analyze grammar]

gacchedānīṃ mahīpīṭhe jambudvīpāntarasthitam |
sādho bhāratavarṣaṃ tvaṃ lokānugrahahetunā || 39 ||
[Analyze grammar]

tatra kriyākāṇḍaparāstvayā putra mahādhiyaḥ |
upadeśyāḥ kriyākāṇḍakrameṇa kramaśālinaḥ || 40 ||
[Analyze grammar]

viraktacittāśca tathā mahāprajñā virāgiṇaḥ |
upadeśyāstvayā sādho jñānenānandadāyinā || 41 ||
[Analyze grammar]

iti tena niyukto'haṃ pitrā kamalayoninā |
iha rāghava tiṣṭhāmi yāvadbhūtaparamparā || 42 ||
[Analyze grammar]

kartavyamasti mama neha hi kiñcideva sthātavyamityabhimanā bhuvi saṃsthito'smi |
saṃśāntayā satatasuptadhiyeva vṛttyā kāryaṃ karomi na ca kiñcidahaṃ karomi || 43 ||
[Analyze grammar]