Chapter 26

atha gatvā punaḥ skandhe vetālaṃ śiṃśapādrumāt |
sa trivikramasenas taṃ gṛhītvodacalan nṛpaḥ || 1 ||
[Analyze grammar]

āgacchantaṃ ca taṃ bhūyo vetālaḥ so 'bhyabhāṣata |
rājañ śṛṇu katham ekāṃ hṛdyāṃ te kathayāmy aham || 2 ||
[Analyze grammar]

asti vakrolakaṃ nāma puraṃ surapuropamam |
tasmin sūryaprabhākhyo 'bhūd rājā jambhārisaṃnibhaḥ || 3 ||
[Analyze grammar]

saukaryodyatayā mūrtyā dattānando vasuṃdharām |
imāṃ harir ivoddhṛtya yo babhāra ciraṃ bhuje || 4 ||
[Analyze grammar]

dhūmāsaṅge 'śrusaṃpātaḥ śṛṅgāre mārasaṃkathāḥ |
dvāḥstheṣu hemadaṇḍāś ca rāṣṭre yasyābhavan prabhoḥ || 5 ||
[Analyze grammar]

sarvasaṃpatsamṛddhasya tasyaikābhūd anirvṛtiḥ |
nodapadyata yat putro bahuṣv antaḥpureṣv api || 6 ||
[Analyze grammar]

etasmiṃś ca kathāsaṃdhau tāmraliptyāṃ mahāpuri |
babhūva dhanapālākhyo dhuryo dhanavatāṃ vanik || 7 ||
[Analyze grammar]

tasya cājāyataikaiva nāmnā dhanavatī sutā |
vidyādharī cyutā śāpāt saundaryeṇaiva sūcitā || 8 ||
[Analyze grammar]

tasyāṃ ca yauvanasthāyāṃ sa vaṇik pañcatāṃ yayau |
taddhanaṃ rājasānāthyād ākrāntam atha gotrajaiḥ || 9 ||
[Analyze grammar]

tato hiraṇyavatyākhyā vaṇijas tasya gehinī |
ādāya ratnabharaṇaṃ nijam aprakaṭasthitam || 10 ||
[Analyze grammar]

dhanavatyā tayā sākaṃ svaduhitrā niśāmukhe |
palāyya dāyādabhayād gṛhād guptaṃ viniryayau || 11 ||
[Analyze grammar]

dhvāntena bahir antaś ca sā duḥkhenāndhakāritā |
kṛcchrād bahiḥpuraṃ prāyāt sutāhastāvalambinī || 12 ||
[Analyze grammar]

tatra saṃtamase yāntī vidhiyogād alakṣitam |
aṃsenātāḍayac cauraṃ śūlāgrāropitasthitam || 13 ||
[Analyze grammar]

sa sajīvas tadaṃsāgraghaṭṭanādhikapīḍitaḥ |
āḥ kṣate kṣāram etan me kṣiptaṃ kenety abhāṣata || 14 ||
[Analyze grammar]

tatas tatraiva sā ko 'sīty apṛcchat taṃ vaṇigvadhūḥ |
pratyuvāca tataś cauraś cauro 'ham iha sūcitaḥ || 15 ||
[Analyze grammar]

śūle pāpasya cādyāpi notkrāmanti mamāsavaḥ |
tad ārye tvaṃ mama brūhi kāsikvaivaṃ prayāsi ca || 16 ||
[Analyze grammar]

tac chrutvā taṃ vaṇigbhāryā yāvat svodantam āha sā |
tāvat tilakitaṃ prācyā mukham udbhāsitendunā || 17 ||
[Analyze grammar]

tato dikṣu prakāśāsu sa cauras tāṃ vaṇiksutām |
dṛṣṭvā dhanavatīṃ kanyāṃ tanmātaram uvāca tām || 18 ||
[Analyze grammar]

śṛṇu me prārthanām ekāṃ sahasraṃ kāñcanasya te |
dadāmi tad imāṃ mahyaṃ svasutāṃ dehi kanyakām || 19 ||
[Analyze grammar]

kim etayā tavety ukto hasantyātha tayātra saḥ |
punaś cauro 'bravīn nāsti putro mama gatāyuṣaḥ || 20 ||
[Analyze grammar]

na cāputro 'śnate lokāṃs tad eṣā yaṃ madājñayā |
kutracij janayet putraṃ kṣetrajaḥ sa bhaven mama || 21 ||
[Analyze grammar]

ity etāṃ prārthaye tvaṃ tu tad vidhatsva mamepsitam |
tac chrutvā sā vaṇigyoṣil lobhāt tat pratyapadyata || 22 ||
[Analyze grammar]

ānīya ca kuto 'py ambu pāṇau caurasya tasya sā |
eṣā sutā mayā tubhyaṃ kanyā dattety apātayat || 23 ||
[Analyze grammar]

so 'pi tadduhitur dattayathoktājño jagāda tām |
gacchāmuṣya vaṭasyādhaḥ khātvā svarṇaṃ gṛhāṇa tat || 24 ||
[Analyze grammar]

gatāsor dāhayitvā me dehaṃ yuktyā visṛjya ca |
asthīni tīrthe sasutā gaccher vakrolakaṃ puram || 25 ||
[Analyze grammar]

tatra sūryaprabhe rājñi saurājyasukhite jane |
nirupadravaniścintā sthāsyasi tvaṃ yathecchasi || 26 ||
[Analyze grammar]

ity uktvā tṛṣitaḥ pītvā tayaivopahṛtaṃ jalam |
śūlavyadhavyathotkrāntajīvaś cauro babhūva saḥ || 27 ||
[Analyze grammar]

tato gatvā vaṇikstrī sā svarṇaṃ vaṭataros talāt |
gṛhītvā sasutā guptam agād bhartṛsuhṛdgṛham || 28 ||
[Analyze grammar]

tatra sthitvā ca yuktyā tad dāhayitvā kalevaram |
caurasya tasya tīrthe 'sthikṣepādikam akārayat || 29 ||
[Analyze grammar]

anyedyuś cāttaguptārthā tato nirgatya sātmajā |
prayāntī kramaśaḥ prāpa sā tad vakrolakaṃ puram || 30 ||
[Analyze grammar]

tatraikaṃ vasudattākhyād gṛhaṃ krītvā vaṇigvarāt |
tasminn uvāsa sutayā dhanavatyā tayā saha || 31 ||
[Analyze grammar]

tadā ca tatropādhyāyo viṣṇusvāmīty abhūt pure |
manaḥsvāmīti tasyāsīc chiṣyo vipro 'tirūpavān || 32 ||
[Analyze grammar]

vidhyābhijanayukto 'pi sa yauvanavaśīkṛtaḥ |
tatra haṃsāvalīṃ nāma vāñchati sma vilāsinīm || 33 ||
[Analyze grammar]

sā ca sauvarṇadīnāraśatapañcakam agrahīt |
bhāṭiṃ tasya ca tan nābhūd vyaṣīdat tena so 'nvaham || 34 ||
[Analyze grammar]

ekadā ca tam adrākṣīt tādṛśaṃ sā vaṇiksutā |
kṣāmābhirāmavapuṣaṃ dhanavaty atra harmyataḥ || 35 ||
[Analyze grammar]

tadrūpahṛtacittā ca bhartuś caurasya tasya sā |
smṛtvānujñāṃ samīpasthāṃ yuktyāvocat svamātaram || 36 ||
[Analyze grammar]

amba viprasutasyāsya paśyaite rūpayauvane |
kīdṛśe bata viśvasya nayanāmṛtavarṣiṇī || 37 ||
[Analyze grammar]

etac chrutvaiva tasmiṃs tāṃ baddhabhāvām avetya ca |
tan mātā sā vaṇigbhāryā manasy evam acintayat || 38 ||
[Analyze grammar]

madduhitrānayā tāvad varaṇīyaḥ sutāptaye |
kaścid bhartrājñayā tasmād eṣa evārthyate na kim || 39 ||
[Analyze grammar]

ity ākalayya vyasṛjat tat saṃdiśya manīṣitam |
rahasyadhāriṇīṃ ceṭīṃ tam ānetuṃ sutākṛte || 40 ||
[Analyze grammar]

sā gatvā vijane nītvā ceṭī tasmai śaśaṃsa tat |
sa ca śrutvā dvijayuvā vyasanī tām abhāṣata || 41 ||
[Analyze grammar]

yadi haṃsāvalīhetor dīnāraśatapañcakam |
sauvarṇaṃ dīyate sahyaṃ tad ekām emi yāminīm || 42 ||
[Analyze grammar]

iti tenoktayā ceṭyā tayā gatvā tathaiva sā |
uktā vaṇikstrī tasmai tat taddhaste prāhiṇod dhanam || 43 ||
[Analyze grammar]

tad gṛhītvā manaḥsvāmī tatputryā vāsakaṃ yayau |
tasyāḥ sa tannisṛṣṭāyā dhanavatyaḥ saceṭikaḥ || 44 ||
[Analyze grammar]

tatra tāṃ vitatotkaṇṭhāṃ kāntāṃ bhūṣitabhūtalām |
sa cakora iva jyotsnāṃ dadarśa ca jaharṣa ca || 45 ||
[Analyze grammar]

tayā samaṃ ca nītvā tāṃ rātriṃ saṃbhogalīlayā |
nirgatya sa tato guptaṃ yayau prātar yathāgatam || 46 ||
[Analyze grammar]

sāpi tasmād dhanavatī sagarbhābhūd vaṇiksutā |
kāle ca suṣuve putraṃ lakṣaṇānumitāyatim || 47 ||
[Analyze grammar]

parituṣṭāṃ tadā tāṃ ca sutotpattyā samātṛkām |
ādideśa haraḥ svapne darśitasvavapur niśi || 48 ||
[Analyze grammar]

yuktaṃ hemasahasreṇa nītvā bālam uṣasy amum |
sūryaprabhanṛpasyeha mañcasthaṃ dvāri muñcatam || 49 ||
[Analyze grammar]

evaṃ syāt kṣemam ity uktā śūlinā sā vaṇiksutā |
tanmātā ca prabudhyaitaṃ svapnann anyonam ūcatuḥ || 50 ||
[Analyze grammar]

nītvā ca taṃ tatyajatur bhagavatpratyayāc chiśum |
rājñaḥ sūryaprabhasyāsya siṃhadvāre sahemakam || 51 ||
[Analyze grammar]

tāvac ca tam api svapne sutacintāturaṃ sadā |
tatra sūryaprabhaṃ bhūpam ādideśa vṛṣadhvajaḥ || 52 ||
[Analyze grammar]

uttiṣṭha rājan bālas te siṃhadvāre sakāñcanaḥ |
kenāpi sthāpito bhavyo mañcakasthaṃ gṛhāṇa tam || 53 ||
[Analyze grammar]

ity uktaḥ śaṃbhunā prātaḥ prabuddho 'pi tathaiva saḥ |
dvāḥsthaiḥ praviśya vijñapto niryayau nṛpatiḥ svayam || 54 ||
[Analyze grammar]

dṛṣṭvā ca siṃhadvāre taṃ bālaṃ sakanakotkaram |
rekhācchattradhvajādyaṅkapāṇipādaṃ śubhākṛtim || 55 ||
[Analyze grammar]

datto mamocitaḥ putraḥ śaṃbhunāyam iti bruvan |
svayaṃ gṛhītvā bāhubhyāṃ rājadhānīṃ viveśa saḥ || 56 ||
[Analyze grammar]

cakāra cotsavaṃ tāvad asaṃkhyātaṃ dadad vasu |
daridraśabdasyaikasya yāvad āsīn nirarthatā || 57 ||
[Analyze grammar]

nṛttavādyādibhir nītvā dvādaśāhaṃ tataḥ sa tam |
putraṃ candraprabhaṃ nāmnā cakre suryaprabho nṛpaḥ || 58 ||
[Analyze grammar]

vavṛdhe rājaputro 'tra so 'tha candraprabhaḥ kramāt |
vapuṣeva guṇaughenāpy āśritānandadāyinā || 59 ||
[Analyze grammar]

śanair yuvā ca saṃjañje śauryaudāryaśrutādibhiḥ |
āvarjitaprakṛtikaḥ kṣmābhārodvahanakṣamaḥ || 60 ||
[Analyze grammar]

tādṛśaṃ ca tato dṛṣṭvā taṃ sa sūryaprabhaḥ pitā |
rājye 'bhiṣicyaiva kṛtī vṛddho vārāṇasīṃ yayau || 61 ||
[Analyze grammar]

pṛthvīṃ śāsati tasmiṃś ca tanaye nayaśālina |
sa rājā tatra tatyāja caraṃs tīvratapas tanum || 62 ||
[Analyze grammar]

buddhvā pitṛvipattiṃ tām anuśocya kṛtakriyaḥ |
so 'tha candraprabho rājā sacivān dhārmiko 'bravīt || 63 ||
[Analyze grammar]

tātasya tāvat kenāham anṛṇo bhavituṃ kṣamaḥ |
tathāpy ekāṃ svahastena dadāmy etasya niṣkṛtim || 64 ||
[Analyze grammar]

nītvā kṣipāmi gaṅgāyām asthīny asya yathāvidhi |
gatvā sarvapitṛhyaś ca gayāṃ piṇḍaṃ dadāmy aham || 65 ||
[Analyze grammar]

prasaṅgāt tīrthayātrāṃ ca karomy āpūrvasāgaram |
ity uktavantaṃ rājānaṃ mantriṇas taṃ vyajijñapan || 66 ||
[Analyze grammar]

na deva yujyate kartum etad rājñaḥ kathaṃcana |
na hi rājyaṃ bahuchidraṃ kṣaṇaṃ tiṣṭhaty arakṣitam || 67 ||
[Analyze grammar]

tad eṣā parahastena kāryā te pitrupakriyā |
svadharmapālanād anyā tīrthayātrā ca kā tava || 68 ||
[Analyze grammar]

bahvapāyaṃ kva pānthatvāṃ nityaguptāḥ kva pārthivāḥ |
iti mantrivacaḥ śrutvā rājā candraprabho 'bravīt || 69 ||
[Analyze grammar]

alaṃ vikalpaiḥ pitrarthe gantavyaṃ niścitaṃ mayā |
draṣṭavyāni ca tīrthāni yāvan me kṣamate vayaḥ || 70 ||
[Analyze grammar]

paścā ko vetti kiṃ bhāvi śarire kṣaṇanaśvare |
rājyaṃ cāgamanaṃ yāvad rakṣyaṃ yuṣmābhir eva me || 71 ||
[Analyze grammar]

śrutvaitaṃ niścayaṃ rājñas tūṣṇīm āsata mantriṇaḥ |
tataḥ prayaṇasaṃbhāraṃ sajjīcakre sa bhūpatiḥ || 72 ||
[Analyze grammar]

athāhni sa śubhe snāto hutāgniḥ pūjitadvijaḥ |
suyuktaṃ ratham āsthāya prayataḥ śāntaveṣabhṛt || 73 ||
[Analyze grammar]

sāmantān rajaputrāṃś ca paurāñ janapadān api |
nivartyānicchataḥ kṛcchrād āsīmāntānuyāyinaḥ || 74 ||
[Analyze grammar]

brāhmaṇair vāhanārūḍhaiḥ samaṃ sa sapurohitaḥ |
pratasthe sacivanyastarājyaś candraprabho nṛpaḥ || 75 ||
[Analyze grammar]

vicitraveṣabhāṣādivilokanavinoditaḥ |
paśyan nānāvidhān deśān kramāt prāpa ca jāhnavīm || 76 ||
[Analyze grammar]

dadarśa tā ca jantūnāṃ jalakallolapaṅktibhiḥ |
tridivārohasopānapaddhatiṃ sṛjatīm iva || 77 ||
[Analyze grammar]

himavatprabhavāṃ śaṃbhoḥ kṛtakrīḍākacagrahām |
bibhratīṃ cāmbikālīlāṃ devarṣigaṇavanditām || 78 ||
[Analyze grammar]

rathāvatīrṇas tasyāṃ ca kṛtasnāno yathāvidhi |
cikṣepāsthīni bhūpasya tasya sūryaprabhasya saḥ || 79 ||
[Analyze grammar]

dattadānaḥ kṛtaśrāddho rathārūḍhas tato 'pi ca |
prasthitaḥ kramaśaḥ prāpa prayāgam ṛṣisaṃstutam || 80 ||
[Analyze grammar]

yatrārcirādyadhūmādim āgrāv iva samāgatau |
gaṅgāyamunayor vāhau bhātaḥ sugataye nṛṇām || 81 ||
[Analyze grammar]

tatropoṣya kṛtasnānadānaśrāddhādisatkriyaḥ |
vārāṇasīṃ jagāmātha sa candraprabhabhūpatiḥ || 82 ||
[Analyze grammar]

eta mokṣaṃ prayāteti vadantām iva dūrataḥ |
vātākṣiptasamutkṣiptaiḥ surasadmadhvajāṃśukaiḥ || 83 ||
[Analyze grammar]

tasyāṃ dināny upoṣya trīṇy abhyarcyātha vṛṣadhvajam |
bhogair nijocitais tais taiḥ prayayau sa gayāṃ prati || 84 ||
[Analyze grammar]

tataḥ phalaughanamitair mañjuguñjadvihaṃgamaiḥ |
pade pade sapraṇāmaṃ stūyamāna ivāṅghripaiḥ || 85 ||
[Analyze grammar]

vikṣiptavanyakusumair arcyamāna ivānilaiḥ |
nānāraṇyāny atikramya puṇyaṃ prāpa gayāśiraḥ || 86 ||
[Analyze grammar]

vidhāya tatra ca śrāddhaṃ vidhivad bhūridakṣiṇam |
candraprabhaḥ sa rājātra dharmāraṇyam upeyivān || 87 ||
[Analyze grammar]

gayākūpe 'sya dadataḥ pituḥ piṇḍaṃ tadantarāt |
samuttasthus tam ādātuṃ trayo mānuṣapāṇayaḥ || 88 ||
[Analyze grammar]

tad dṛṣṭvaiva sa vibhrāntaḥ kim etad iti pārthavaḥ |
kasmin haste kṣipe piṇḍam ity apṛcchan nijān dvijān || 89 ||
[Analyze grammar]

te tam ūcur ayaṃ tāvad ekaś caurasya niścatam |
hasto lohamayaḥ śaṅkur yasmin devaiṣa dṛśyate || 90 ||
[Analyze grammar]

dvitīyo brāhmaṇasyāyaṃ karo dhṛtapavitrakaḥ |
rājñaḥ pāṇis tṛtīyo 'yaṃ sāṅgulīyaḥ sulakṣaṇaḥ || 91 ||
[Analyze grammar]

tan na vidmaḥ kva piṇḍo 'yaṃ nikṣepyaḥ kim idaṃ bhavet |
ity uktas tair dvijaiḥ so 'tra rājā lebhe na niścayam || 92 ||
[Analyze grammar]

ity ākhyāya kathāścaryaṃ vetālo 'ṃsasthitas tadā |
sa trivikramasenaṃ taṃ jagāda nṛpatiṃ punaḥ || 93 ||
[Analyze grammar]

tat kasya haste deyaḥ syāt sa piṇḍa iti vaktu me |
bhavāṃs tāvat sa evātra prāktanaḥ samayaś ca te || 94 ||
[Analyze grammar]

iti vetālataḥ śrutvā muktamaunaḥ sa bhūpatiḥ |
taṃ trivikramaseno 'tra dharmajñaḥ pratyabhāṣata || 95 ||
[Analyze grammar]

caurasya haste dātavyaḥ sa piṇḍaḥ kṣetrajo yataḥ |
candraprabaḥ sa nṛpatiḥ putras tasyaiva nānyayoḥ || 96 ||
[Analyze grammar]

viprasya janakasyāpi sa hi putro na budhyate |
vikrīto hi dhanenātmā tām ekāṃ tena yāminīm || 97 ||
[Analyze grammar]

rājñaḥ sūraprabasyāpi saṃskārādānavardhanaiḥ |
bhavet sa putro na syāc cet svadhanaṃ tasya tatkṛte || 98 ||
[Analyze grammar]

śiśos tasya hi śīrṣānte mañcasthasyaiva hema yat |
nyastam āsīt tad evāsya mūlyaṃ saṃvardhanādike || 99 ||
[Analyze grammar]

tasmād dhastodakaprāptā tanmātā yasya yena sā |
ajñā tajjanane dattā yasya tan nikhilaṃ dhanam || 100 ||
[Analyze grammar]

tasya sa kṣetrajaḥ putraś caurasyaiva mahīpatiḥ |
piṇḍas tasyaiva haste ca deyas teneti me matiḥ || 101 ||
[Analyze grammar]

ity uktavato nṛpates tasyāṃsāt svapadam eva vetālaḥ |
prayayau sa ca trivikramaseno rājā tam anvayād bhūyaḥ || 102 ||
[Analyze grammar]