Kathasaritsagara [sanskrit]
by C. H. Tawney | 2014 | 226,424 words | ISBN-13: 9789350501351
The Sanskrit edition of the Kathasaritsagara referencing the English translation and grammatical analysis. Written by Somadeva and dating from the 12th century, the Kathasaritsagara (or Katha-sarit-sagara) represents an epic legend narrating the adventures of Naravahanadatta as he strives to become the destined emperor of the Vidyadharas. Alternative titles: (Kathāsaritsāgara, कथासरित्सागर, Kathā-sarit-sāgara)
Chapter 2
tataḥ pūrvoktayā yuktyā vatsarājaṃ savallabham |
yaugandharāyaṇādyās te ninyur lāvāṇakaṃ prati || 1 ||
[Analyze grammar]
sa rājā prāpa taṃ deśaṃ sainyaghoṣeṇa mūrcchatā |
abhivāñchitasaṃsiddhiṃ vadantamiva mantriṇām || 2 ||
[Analyze grammar]
tatra prāptaṃ vidhitvā ca vatseśaṃ saparicchadam |
avaskandabhayāśaṅkī cakampe magadheśvaraḥ || 3 ||
[Analyze grammar]
yaugandharāyaṇopāntaṃ sadbuddhirvisasarja ca |
sa dūtaṃ so 'pi sanmantrī kāryajño 'bhinananda tam || 4 ||
[Analyze grammar]
vatseśvaro 'pi nivasaṃstasmindeśe davīyasīm |
ākheṭakārthamaṭavīmaṭati sma dine dine || 5 ||
[Analyze grammar]
ekasmindivase tasminrājanyākheṭakaṃ gate |
kartavyasaṃvidaṃ kṛtvā gopālakasamanvitaḥ || 6 ||
[Analyze grammar]
yaugandharāyaṇo dhīmānsarumaṇvadvasantakaḥ |
devyā vāsavadattāyā vijane nikaṭaṃ yayau || 7 ||
[Analyze grammar]
tatra tāṃ rājakārye 'tra sāhāyye tataduktibhiḥ |
prahvām abhyarthayām āsa bhrātrā pūrvaṃ prabodhitām || 8 ||
[Analyze grammar]
sānumene ca virahakleśadāyi tadāmanaḥ |
kiṃ nāma na sahante hi bhartṛbhaktāḥ kulāṅganāḥ || 9 ||
[Analyze grammar]
tatastāṃ brāhmaṇīrūpāṃ devīṃ yaugandharāyaṇaḥ |
sa cakāra kṛtī dattvā yogaṃ rūpavivartanam || 10 ||
[Analyze grammar]
vasantakaṃ ca kṛtavān kāṇaṃ baṭukarūpiṇam |
ātmanā ca tathaivābhūt sthavirabrāhmaṇākṛtiḥ || 11 ||
[Analyze grammar]
tathārūpāṃ gṛhītvātha tāṃ devīṃ sa mahāmatiḥ |
vasantakasakhaḥ svairaṃ pratasthe magadhān prati || 12 ||
[Analyze grammar]
tathā vāsavadattā sā svagṛhānnirgatā satī |
agāccittena bhartāraṃ panthānaṃ vapuṣā punaḥ || 13 ||
[Analyze grammar]
tanmandiramathādīpya dahanena rumaṇvatā |
hā hā vasantakayutā devī dagdhetyaghoṣyata || 14 ||
[Analyze grammar]
tathā ca dahanākrandau samaṃ tatrodatiṣṭhatām |
śanaiḥ śaśāma dahano na punaḥ kranditadhvaniḥ || 15 ||
[Analyze grammar]
yaugandharāyaṇaḥ so 'tha saha vāsavadattayā |
vasantakena ca prāpa magadhādhipateḥ puram || 16 ||
[Analyze grammar]
tatrodyānagatāṃ dṛṣṭvā samaṃ tābhyāmupāyayau |
padmāvatīṃ rājasutāṃ vāryamāṇo 'pi rakṣibhiḥ || 17 ||
[Analyze grammar]
padmāvatyāśca dṛṣṭaiva brāhmaṇīrūpadhāriṇim |
devīṃ vāsavadattāṃ tāṃ dṛśoḥ prītirajāyata || 18 ||
[Analyze grammar]
sā rakṣiṇo niṣidhyaiva tato yaugandharāyaṇam |
ānāyayad rājakanyā brāhmaṇākṛtimantikam || 19 ||
[Analyze grammar]
papraccha ca mahābrahman kā te bālā bhavaty asau |
kim artham āgato 'sīti so 'pi tāṃ prayabhāṣata || 20 ||
[Analyze grammar]
ityamāvantikā nāma rājaputrī sutā mama |
asyāśca bhartā vyasanī tyaktvemāṃ kutracidgataḥ || 21 ||
[Analyze grammar]
tad etāṃ sthāpayāmy adya tava haste yaśasvini |
yāvattamānayāmyasyā gatvānviṣyācirātpatim || 22 ||
[Analyze grammar]
bhrātā kāṇabaṭuścāyamihaivāsyāḥ samīpagā |
tiṣṭhatvekākinībhāvaduḥkhaṃ yena na yātyasau || 23 ||
[Analyze grammar]
ityuktvā rājatanayāmaṅgīkṛtavacāstayā |
tāmāmantrya sa sanmantrī drutaṃ lāvāṇakaṃ yayau || 24 ||
[Analyze grammar]
tato vāsavadattāṃ tāṃ sthitāmāvantikākhyayā |
vasantakaṃ cānugataṃ taṃ kāṇabaṭurūpiṇam || 25 ||
[Analyze grammar]
sahādāya kṛtodārasatkārā snehaśālinī |
padmāvatī svabhavanaṃ viveśa bahukautukam || 26 ||
[Analyze grammar]
tatra vāsavadattā ca praviṣṭā citrabhittiṣu |
paśyantī rāmacarite sītāṃ sehe nijavyathām || 27 ||
[Analyze grammar]
ākṛtyā saukumāryeṇa śayanāsanasauṣṭhavaiḥ |
śarīrasaurabheṇāpi nīlotpalasugandhinā || 28 ||
[Analyze grammar]
tāmuttamāṃ viniścitya mahārhairātmanaḥ samaiḥ |
padmāvatī yathākāmam upacārair upācarat || 29 ||
[Analyze grammar]
acintayacca kāpyeṣā channā nūnamiha sthitā |
gūḍhā kiṃ draupadī nāsīdvirāṭavasatāviti || 30 ||
[Analyze grammar]
atha vāsavadattāsyāścakre devyāḥ prasaṅgataḥ |
amlānamālātilakau vatseśātpūrvaśikṣitau || 31 ||
[Analyze grammar]
tadbhūṣitāṃ ca dṛṣṭvā tāṃ mātā padmāvatīṃ rahaḥ |
papraccha mālātilakau kenemau nirmitāviti || 32 ||
[Analyze grammar]
ūce padmāvatī caināmatra manmandire sthitā |
kācidāvantikā nāma tayā kṛtamidaṃ mama || 33 ||
[Analyze grammar]
tacchrutvā sā babhāṣe tāṃ mātā putri na tarhi sā |
mānuṣī kāpi devī sā yasyā vijñānam īdṛśam || 34 ||
[Analyze grammar]
devatā munayaścāpi vañcanārthaṃ satāṃ gṛhe |
tiṣṭhantyeva tathā caitāmantra putri kathāṃ śṛṇu || 35 ||
[Analyze grammar]
babhūva kuntibhojākhyo rājā tasyāpi veśmani |
āgatya tasthau durvāsā vañcanaikaraso muniḥ || 36 ||
[Analyze grammar]
sa tasya paricaryārthaṃ rājā kuntīṃ nijāṃ sutām |
ādideśa muniṃ sāpi yatnenopacacāra tam || 37 ||
[Analyze grammar]
ekadā sa muniḥ kuntīṃ jijñāsuḥ sannabhāṣata |
paramānnaṃ paceḥ śīghraṃ snātvā yāvadupaimyaham || 38 ||
[Analyze grammar]
ityuktvā tvaritaṃ snātva sa carṣirbhoktumāyayau |
kuntī tadannapūrṇāṃ ca tasmai pātrīmaḍhaukayat || 39 ||
[Analyze grammar]
atitaptena cānnena jvalantīm iva tāṃ muniḥ |
mavā hastagrahāyogyāṃ kuntyā pṛṣthe dṛśaṃ dadau || 40 ||
[Analyze grammar]
sāpi pṛṣṭhena tāṃ pātrīṃ dadhau labdhāśayā muneḥ |
tataḥ sa bubhuje svecchaṃ kuntīpṛṣṭhaṃ tvadahyata || 41 ||
[Analyze grammar]
dahyamānāpi gāḍhaṃ sā yattasthāvavikāriṇī |
tena tuṣṭo munirbhuktvā dadau tasyāstato varam || 42 ||
[Analyze grammar]
ityāsītsa munistatra tadeṣāvantikāpi te |
tadvadeva sthitā kāpi tattvamārādhayerimām || 43 ||
[Analyze grammar]
iti māturmukhācchrutvā padmāvatyanyarūpiṇīm |
tatra vāsavadattāṃ tāṃ sutarāṃ bahvamanyata || 44 ||
[Analyze grammar]
sāpi vāsavadattātra nijanāthavinākṛtā |
tasthau vidhuravicchāyā niśīthastheva padminī || 45 ||
[Analyze grammar]
vasantakavikārāśca te te bālocitā muhuḥ |
mukhe tasyā viyoginyāḥ smitasyāvasaraṃ daduḥ || 46 ||
[Analyze grammar]
atrāntare 'tidūrāsu bhrāntvākheṭakabhūmiṣu |
vatsarājaścirādāgātsāyaṃ lāvāṇakaṃ punaḥ || 47 ||
[Analyze grammar]
bhasmīkṛtamapaśyacca tatrāntaḥpuramagninā |
devīṃ dagdhāṃ ca śuśrāva mantribhyaḥ savasantakām || 48 ||
[Analyze grammar]
śrutvaiva cāpatadbhūmau mohena hṛtacetanaḥ |
tadduḥkhānubhavakleśamapākartumivecchatā || 49 ||
[Analyze grammar]
kṣaṇācca labdhasaṃjñaḥ sañjajvāla hṛdaye śucā |
āviṣṭa iva tatrasthadevīdāhekṣaṇāgninā || 50 ||
[Analyze grammar]
vilapann atha duḥkhārto dehatyāgaikasaṃmukhaḥ |
kṣaṇāntare sa nṛpatiḥ saṃsmṛtyaitadacintayat || 51 ||
[Analyze grammar]
vidyādharādhipaḥ putro devyāstasyā bhaviṣyati |
etanme nāradamunirvakti sma na ca tanmṛṣā || 52 ||
[Analyze grammar]
kaṃcitkālaṃ ca duḥkhaṃ me tenaiva muninoditam |
gopālakasya caitasya śokaḥ svalpa ivekṣyate || 53 ||
[Analyze grammar]
yaugandharāyaṇādīnāṃ na caiṣāmatiduḥkhitā |
dṛśyate tena jāne sā devī jīvetkathaṃcana || 54 ||
[Analyze grammar]
iyaṃ kimapi nītistu pratyuktā mantribhirbhavet |
ato mama bhavejjātu tayā devya samāgamaḥ || 55 ||
[Analyze grammar]
tatpaśyāmyatra paryantamityālocya sa bhūpatiḥ |
nidadhe hṛdaye dhairyaṃ bodhyamānaśca mantribhiḥ || 56 ||
[Analyze grammar]
gopālakaśca saṃdiśya tadyathāvastu tatkṣaṇam |
prajighāya tataścāraṃ dhṛtihetoralakṣitam || 57 ||
[Analyze grammar]
evaṃ gate svavṛttānte lāvāṇakagataistadā |
gatvā magadharājāya cāraiḥ sarvaṃ niveditam || 58 ||
[Analyze grammar]
sa tadbuddhvaiva kālajño vatsarājāya tāṃ sutām |
dātuṃ padmāvatīmaicchatpūrvaṃ tanmantrimārgitām || 59 ||
[Analyze grammar]
tato dūtamukhenainamarthaṃ vatseśvarāya saḥ |
yaugandharāyaṇāyāpi saṃdideśa yathepsitam || 60 ||
[Analyze grammar]
yaugandharāyaṇoktyā ca vatseśo 'ṅgīcakāra tat |
pracchāditaitadarthaṃ syāddevī jātviti cintayan || 61 ||
[Analyze grammar]
tato lagnaṃ viniścitya tūrṇaṃ yaugandharāyaṇaḥ |
tasmai magadharājāya pratidūtaṃ vyasarjayat || 62 ||
[Analyze grammar]
tvadicchāṅgīkṛtāsmābhistaditaḥ saptame dine |
padmāvatīvivāhāya vatseśo 'trāgamiṣyati || 63 ||
[Analyze grammar]
śīghraṃ vāsavadattāṃ ca yenāsau vismariṣyati |
iti cāsmai mahāmantrī saṃdideśa sa bhūbhṛte || 64 ||
[Analyze grammar]
pratidūtaḥ sa gatvā ca yathāsaṃdiṣṭamabhyaghāt |
tato magadharājāya sa cāpyabhinananda tam || 65 ||
[Analyze grammar]
tataḥ sa duhitṛsnehanijecchāvibhavocitam |
vivāhotsavasaṃbhāraṃ cakāra magadheśvaraḥ || 66 ||
[Analyze grammar]
sā cābhīṣṭavaraśrutyā mudaṃ padmāvatī yayau |
prāpa vāsavadattā ca tadvārtākarṇanācchucam || 67 ||
[Analyze grammar]
sā vārtā karṇamāgatya tasyā vaivarṇyadāyinī |
pracchannavāsavairūpyasāhāyakamivākarot || 68 ||
[Analyze grammar]
itthaṃ mitrīkṛtaḥ śatrurna ca bhartānyathā tvayi |
vasantakoktirityasyāḥ sakhīva vidadhe dhṛtim || 69 ||
[Analyze grammar]
athāsannavivāhāyāḥ padmāvatyā manasvinī |
amlānamālātilakau divyau bhūyaścakāra sā || 70 ||
[Analyze grammar]
tato vatseśvarastatra saṃprāpte saptame 'hani |
sasainyo mantribhiḥ sākaṃ pariṇetuṃ kilāyayau || 71 ||
[Analyze grammar]
manasāpi tadudyogaṃ virahī sa kathaṃ spṛśet |
devīṃ labheya tāmevamityāśā na bhavedyadi || 72 ||
[Analyze grammar]
pratyudyayau ca taṃ sadyaḥ sānando magadheśvaraḥ |
prajānetrotsavaṃ candramudayasthamivāmbudhiḥ || 73 ||
[Analyze grammar]
viveśātha sa vatseśo magadhādhipateḥ puram |
samantātpauralokasya mānasaṃ ca mahotsavaḥ || 74 ||
[Analyze grammar]
virahakṣāmavapuṣaṃ manaḥsaṃmohadāyinam |
dadṛśustatra nāryastaṃ ratihīnamiva smaram || 75 ||
[Analyze grammar]
praviśya magadheśasya vatseśo 'pyatha mandiram |
sanāthaṃ pativatnībhiḥ kautukāgāramāyayau || 76 ||
[Analyze grammar]
tatra padmāvatīmantardadarśa kṛtakautukām |
sa rājā pūrṇavaktrendujitapūrṇendumaṇḍalām || 77 ||
[Analyze grammar]
tasyāśca mālātilakau divyāvālokya tau nijau |
etau kuto 'syā ityevaṃ vimamarśa sa bhūpatiḥ || 78 ||
[Analyze grammar]
tataḥ sa vedīm āruhya tasyā jagrāha yatkaram |
tad evārambhatāṃ prāpa tasya pṛthvyāḥ karagrahe || 79 ||
[Analyze grammar]
priyavāsavadatto 'yamidaṃ śaknoti nekṣitum |
itīva vedīdhūmo 'sya vāṣpeṇa pidadhe dṛśau || 80 ||
[Analyze grammar]
agnipradakṣiṇe tāmraṃ tadā padmāvatīmukham |
vijñātabhartrabhiprāyaṃ kopākulamivābabhau || 81 ||
[Analyze grammar]
mumoca sa kṛtodvāhaḥ karādvatseśvaro vadhūm |
na tu vāsavadattāṃ tāṃ tatyāja hṛdayātkṣaṇam || 82 ||
[Analyze grammar]
tatas tathā dadau tasmai ratnāni magadhādhipaḥ |
nirdugdharatnarikteva pṛthivī bubudhe yathā || 83 ||
[Analyze grammar]
sākṣīkṛtya ca tatkālamagniṃ yaugandharāyaṇaḥ |
adrohapratyayaṃ rājño magadheśamakārayat || 84 ||
[Analyze grammar]
pradattavastrābharaṇaḥ pragītavaracāraṇaḥ |
pranṛttavaranārīkaḥ prasasāra mahotsavaḥ || 85 ||
[Analyze grammar]
udayāpekṣiṇī patyuḥ suptevālakṣitasthitā |
tadā vāsavadattābhūddivā kāntirivaindavī || 86 ||
[Analyze grammar]
antaḥpuramupāyāte rājñi vatseśvare tataḥ |
devīsaṃdarśanāśaṅkī kṛtī yaugandharāyaṇaḥ || 87 ||
[Analyze grammar]
mantrabhedamayādevaṃ magadheśvaramabhyadhāt |
adyaiva nāha vatseśaḥ prayāti tvadgṛhāditi || 88 ||
[Analyze grammar]
tathetyaṅgīkṛtaṃ tena tamevārthaṃ tadaiva saḥ |
vyajijñapad vatsarājaṃ so 'pi tacchraddadhe tathā || 89 ||
[Analyze grammar]
athoccacāla vatseśo bhuktapītaparicchadaḥ |
mantribhiḥ samamādāya vadhūṃ padmāvatīṃ tataḥ || 90 ||
[Analyze grammar]
padmāvatyā visṛṣṭaṃ ca sukhamāruhya vāhanam |
tayaiva ca samādiṣṭaistanmahattarakaiḥ saha || 91 ||
[Analyze grammar]
āgādvāsavadattāpi guptaṃ sainyasya pṛṣṭhataḥ |
kṛtarūpavivartaṃ taṃ puraskṛtya vasantakam || 92 ||
[Analyze grammar]
kramāllāvāṇakaṃ prāpya vatseśo vasatiṃ nijām |
praviveśa samaṃ vadhvā devīcittastu kevalaḥ || 93 ||
[Analyze grammar]
etya vāsavadattāpi sā gopālakamandiram |
viveśātha niśīthe ca paristhāpya mahattarān || 94 ||
[Analyze grammar]
tatra gopālakaṃ dṛṣṭvā bhrātaraṃ darśitādaram |
kaṇṭhe jagrāha rudatī bāṣpavyākulalocanam || 95 ||
[Analyze grammar]
tatkṣaṇe sthitasaṃvicca tatra yaugandharāyaṇaḥ |
āyayau sarumaṇvatkas tayā devyā kṛtādaraḥ || 96 ||
[Analyze grammar]
so 'syāḥ protsāhaviśleṣaduḥkhaṃ yāvadvyapohati |
tāvatpadmāvatīpārśvaṃ prayayuste mahattarāḥ || 97 ||
[Analyze grammar]
āgatāvantikā devi kimapyasmānvihāya tu |
praviṣṭā rājaputrasya gṛhaṃ gopālakasya sā || 98 ||
[Analyze grammar]
iti padmāvatī sā tairvijñaptā svamahattaraiḥ |
vatseśvarāgre sāśaṅkā tanevaṃ pratyabhāṣata || 99 ||
[Analyze grammar]
gacchatāvantikāṃ brūtha nikṣepastvaṃ hi me sthitā |
tadatra kiṃ te yatrāhaṃ tattraivāgamyatāmiti || 100 ||
[Analyze grammar]
tacchrutvā teṣu yāteṣu rājā padmāvatīṃ rahaḥ |
papraccha mālātilakau kenemau te kṛtāviti || 101 ||
[Analyze grammar]
sāvocadatha madgehe nyastā vipreṇa kenacit |
āvantikābhidhā yaiṣā tasyāḥ śilpamidaṃ mahat || 102 ||
[Analyze grammar]
tacchrutvaiva cavatseśo gopālagṛhamāyayau |
nūnaṃ vāsavadattā sā bhavedatreti cintayan || 103 ||
[Analyze grammar]
praviveśa ca gatvā taddvārasthitamahattaram |
antasthadevīgopālamantridvayavasantakam || 104 ||
[Analyze grammar]
tatra vāsavadattāṃ tāṃ dadarśa proṣitāgatām |
upaplavavinirmuktāṃ mūrtiṃ cāndramasīmiva || 105 ||
[Analyze grammar]
papātātha mahīpṛṣṭhe sa śokaviṣavihvalaḥ |
kampo vāsavadattāyā hṛdaye tūdapadyata || 106 ||
[Analyze grammar]
tataḥ sāpyapatadbhūmau gātrairvirahapāṇḍuraiḥ |
vilalāpa ca nindantī tadācaritamātmanaḥ || 107 ||
[Analyze grammar]
atha tau daṃpatī śokadīnau rurudatustathā |
yaugandharāyaṇo 'pyāsīdvāṣpadhautamukho yathā || 108 ||
[Analyze grammar]
tathāvidhaṃ ca tacchrutvā kāle kolāhalaṃ tadā |
padmāvatyapi tatraiva sākulā tamupāyayau || 109 ||
[Analyze grammar]
kramād avagatārthā ca rājavāsavadattayoḥ |
tulyāvasthaiva sāpyāsītsnigdhamugdhā hi satstriyaḥ || 110 ||
[Analyze grammar]
kiṃ jīvitena me kāryaṃ bhartṛduḥkhapradāyinā |
iti vāsavadattā ca jagāda rudatī muhuḥ || 111 ||
[Analyze grammar]
magadheśasutālābhāttava sāmrājyakāṅkṣiṇā |
kṛtametanmayā deva devyā doṣo na kaścana || 112 ||
[Analyze grammar]
iyaṃ tvasyāḥ sapatnyeva pravāse śīlasākṣiṇī |
ityuvācātha vatseśaṃ dhīro yaugandharāyaṇaḥ || 113 ||
[Analyze grammar]
ahamatra viśāmyagnāvasyāḥ śuddhiprakāśane |
iti padmāvatī tatra jagādāmatsarāśayā || 114 ||
[Analyze grammar]
ahamevāparādhyāmi yatkṛte sumahānayam |
soḍho devyāpi hi kleśa iti rājāpyabhāṣata || 115 ||
[Analyze grammar]
agnipraveśaḥ kāryo me rājño hṛdayaśuddhaye |
iti vāsavadattā ca babhāṣe baddhaniścayā || 116 ||
[Analyze grammar]
tataḥ sa kṛtināṃ dhuryo dhīmānyaugandharāyaṇaḥ |
ācamya prāṅmukhaḥ śuddha iti vācamudairayat || 117 ||
[Analyze grammar]
yadyahaṃ hitakṛdrājño devī śuddhimatī yadi |
brūta bho lokapālāstanna ceddehaṃ tyajāmyaham || 118 ||
[Analyze grammar]
ityuktvā virate tasmindivyā vāgudabhūdiyam |
dhanyastvaṃ nṛpate yasya mantrī yaugandharāyaṇaḥ || 119 ||
[Analyze grammar]
yasya vāsavadattā ca bhāryā prāgjanmadevatā |
na doṣaḥ kaścid etasyā ity uktvā vāg upāramat || 120 ||
[Analyze grammar]
ākarṇya tanmukharitākhiladigvibhāgamāmandranūtanaghanāghanagarjitaśri |
utkaṃdharāśca suciraṃ vihatābhitāpāḥ sarve 'pi te sphuṭaviḍambitanīlakaṇṭhāḥ || 121 ||
[Analyze grammar]
gopālakasahito 'pi ca rājā yaugandharāyaṇācaritam |
stauti sma vatsarājo mene pṛthvīṃ ca hastagatām || 122 ||
[Analyze grammar]
dadhad atha nṛpatiḥ sa mūrtimatyau nikaṭagate ratinirvṛtī ivobhe |
anudinasahavāsasānurāge nijadayite paramutsavaṃ babhāra || 123 ||
[Analyze grammar]
Other editions:
Also see the following editions of the Sanskrit text or (alternative) English translations of the Kathasaritsagara Chapter 2
The Ocean of Story
by C.H. Tawney (2014)
Being C.H. Tawney's Translation of Somadeva's Katha Sarit Sagara (Kathasaritsagara): (Ten Volumes)
Buy now!
Kathasaritsagar
by Kedarnath Sharma Saraswat (2005)
The Only Edition with the Sanskrit Text and its Hindi Translation (An Old and Rare Book) Set of 3 Vol.
Buy now!
Kathasaritsagara of Somadeva Bhatta (Sanskrit Text Only)
by Vasudeva Laksmana Sastri (2013)
Katha Sarit Sagar in Marathi
by H. A Bhave (1995)
Set of 5 Volumes; Published by Varada Books, Pune. 2256 pages (Throughout B/W Illustrations).
Buy now!
Katha Sarit Sagara (Tamil)
by S. V. Ganapati (எஸ். வி. கணபதி) (2014)
[கதா சரித் சாகரம்] Published by Alliance Publications.
Buy now!
Galpa Shono
by Abhijit Chattopadhyay (2014)
[গল্প শোনো] Galpa Shono: Bengali Translation of 'Suno Kahani From Katha Sarit Sagar'; 9788126015436; Published by Sahitya Akademi, Delhi.
Buy now!