Chapter 45

vaiśaṃpāyana uvāca |
nāradasya vacaḥ śrutvā sasmitaṃ madhusūdanaḥ |
pratyuvāca śubhaṃ vākyaṃ vareṇyaḥ prabhurīśvaraḥ || 1 ||
[Analyze grammar]

trailokyasya hitārthāya yanmā vadasi nārada |
tasya samyakpravṛttasya śrūyatāmuttaraṃ vacaḥ || 2 ||
[Analyze grammar]

viditā dehino jātā mayaite bhuvi dānavāḥ |
yāṃ yāṃ tanuṃ samāsthāya daityaḥ puṣyati vigraham || 3 ||
[Analyze grammar]

jānāmi kaṃsaṃ saṃbhūtamugrasenasutaṃ bhuvi |
keśinaṃ cāpi jānāmi daityaṃ turagavigraham || 4 ||
[Analyze grammar]

hastinaṃ cotpalāpīḍaṃ mallau cāṇūramuṣṭikau |
ariṣṭaṃ caiva jānāmi daityaṃ vṛṣabharūpiṇam || 5 ||
[Analyze grammar]

vidito me kharaścaiva pralambaśca mahāsuraḥ |
sā ca me viditā vipra pūtanā duhitā baleḥ || 6 ||
[Analyze grammar]

kāliyaṃ cāpi jānāmi yamunāhradagocaram |
vainateyabhayādvipra sarpamajñātarūpiṇam || 7 ||
[Analyze grammar]

vidito me jarāsaṃdhaḥ sthito mūrdhni mahīkṣitām |
prāgjyotiṣapure cāpi narakaṃ sādhu tarkaye || 8 ||
[Analyze grammar]

mānuṣe pārthive loke mānuṣatvamupāgatam || 8 ||
[Analyze grammar]

bāṇaṃ ca śoṇitapure guhapratimatejasam || 8 ||
[Analyze grammar]

dṛptaṃ bāhusahasreṇa devairapi sudurjayam || 8 ||
[Analyze grammar]

śiśupālaṃ ca jānāmi tau haṃsaḍimakau tathā || 8 ||
[Analyze grammar]

jānāmi pauṇḍraṃ sālvaṃ ca taṃ kālayavanaṃ tathā || 8 ||
[Analyze grammar]

ekalavyaṃ ca jānāmi ye cānye duṣṭacāriṇaḥ || 8 ||
[Analyze grammar]

tān sarvānnihaniṣyāmi nātra kāryā vicāraṇā || 8 ||
[Analyze grammar]

mayyāsaktāṃ ca jānāmi bhāratīṃ mahatīṃ dhuram |
tacca sarvaṃ vijānāmi yathā sthāsyanti te nṛpāḥ || 9 ||
[Analyze grammar]

kṣayo bhuvi mayā dṛṣṭaḥ śakraloke ca satkriyā |
teṣāṃ puruṣadehānāmaparāvṛttivartinām || 10 ||
[Analyze grammar]

saṃpravekṣyāmyahaṃ yogamātmanaśca parasya ca |
saṃprāpya pārthivaṃ lokaṃ mānuṣatvamupāgataḥ || 11 ||
[Analyze grammar]

kaṃsādīṃścāpi tān sarvānvadhiṣyāmi mahāsurān |
tena tena vidhānena yena yaḥ śāntimeṣyati || 12 ||
[Analyze grammar]

anupraviśya yogena tāstā hi gatayo mama |
amīṣāmamarendrāṇāṃ hantavyā ripavo yudhi || 13 ||
[Analyze grammar]

jagatyarthe kṛto yo'yamaṃśotsargo mahātmabhiḥ |
suradevarṣigandharvairetaccānumataṃ mama || 14 ||
[Analyze grammar]

viniścayo hi prāgeva nāradāyaṃ kṛto mayā |
nivāsaṃ tu na me brahmā vidadhāti pitāmahaḥ || 15 ||
[Analyze grammar]

yatra deśe yathā jāto yena veṣeṇa vā vasan |
tānahaṃ samare hanyāṃ tanme brūhi pitāmaha || 16 ||
[Analyze grammar]

brahmovāca |
nārāyaṇemaṃ siddhārthamupāyaṃ śṛṇu me vibho |
bhuvi yaste janayitā jananī ca bhaviṣyati || 17 ||
[Analyze grammar]

yatra vai tvaṃ mahābāho jātaḥ kulakaro bhuvi |
yādavānāṃ mahadvaṃśamakhilaṃ dhārayiṣyasi || 18 ||
[Analyze grammar]

tāṃścāsurān samutsādya vaṃśaṃ kṛtvātmano mahat |
sthāpayiṣyasi maryādāṃ nṛṇāṃ tanme niśāmaya || 19 ||
[Analyze grammar]

purā hi kaśyapo viṣṇo varuṇasya mahātmanaḥ |
jahāra yajñiyā gāvaḥ payodāśca mahāmakhe || 20 ||
[Analyze grammar]

aditiḥ surabhiścobhe dve bhārye kaśyapasya tu |
pradīyamānā gāstāstu naicchatāṃ varuṇasya vai || 21 ||
[Analyze grammar]

tato māṃ varuṇo'bhyetya praṇamya śirasānataḥ |
uvāca bhagavan gāvo guruṇā me hṛtā iti || 22 ||
[Analyze grammar]

kṛtakāryo hi gāstāstu nānujānāti me guruḥ |
anvavartata bhārye dve aditiṃ surabhiṃ tathā || 23 ||
[Analyze grammar]

mama tā hyakṣayā gāvo divyāḥ kāmadughā vibho |
caranti sagārān sarvān rakṣitāḥ svena tejasā || 24 ||
[Analyze grammar]

kastā dharṣayituṃ śakto mama gāḥ kaśyapādṛte |
akṣayaṃ yāḥ kṣarantyagraṃ payo devāmṛtopamam || 25 ||
[Analyze grammar]

prabhurvā vyutthito brahman gururvā yadi vetaraḥ |
tvayā niyamyāḥ sarve vai tvaṃ hi naḥ paramā gatiḥ || 26 ||
[Analyze grammar]

yadi prabhavatāṃ daṇḍo loke kāryamajānatām |
na vidyate lokaguro na syurvai lokasetavaḥ || 27 ||
[Analyze grammar]

yathā vāstu tathā vāstu kartavye bhagavānprabhuḥ |
mama gāvaḥ pratīyantāṃ tato gantāsmi sāgaram || 28 ||
[Analyze grammar]

yaste'tmā devatā gāvo yā gāvaḥ sa tvamavyayam |
lokānāṃ tvatpravṛttānāmekaṃ gobrāhmaṇaṃ smṛtam || 29 ||
[Analyze grammar]

trātavyāḥ prathamaṃ gāvastrātāstrāyanti tā dvijān |
gobrāhmaṇaparitrāṇātparitrātaṃ jagadbhavet || 30 ||
[Analyze grammar]

ityambupatinā prokto varuṇenāhamacyuta |
gavāṃ kāraṇatattvajñaḥ kaśyape śāpamutsṛjam || 31 ||
[Analyze grammar]

yenāṃśena hṛtā gāvaḥ kaśyapena mahātmanā |
sa tenāṃśena jagatīṃ gatvā gopatvameṣyati || 32 ||
[Analyze grammar]

yā ca sā surabhirnāma yāditiśca surāraṇiḥ |
te'pyubhe tasya vai bhārye saha tenaiva yāsyataḥ || 33 ||
[Analyze grammar]

tābhyāṃ saha sa gopatve kaśyapo bhuvi raṃsyate || 33 ||
[Analyze grammar]

tadasya kaśyapasyāṃśastejasā kaśyapopamaḥ |
vasudeva iti khyāto goṣu tiṣṭhati bhūtale || 34 ||
[Analyze grammar]

girirgovardhano nāma mathurāyāstvadūrataḥ |
tatrāsau goṣu nirataḥ kaṃsasya karadāyakaḥ || 35 ||
[Analyze grammar]

tasya bhāryādvayaṃ caiva aditiḥ surabhistathā |
devakī rohiṇī caiva vasudevasya dhīmataḥ || 36 ||
[Analyze grammar]

surabhī rohiṇī devī cāditirdevakī tvabhūt || 36 ||
[Analyze grammar]

tatrāvatara lokānāṃ bhavāya madhusūdana |
jayāśīrvacanaistvete vardhayanti divaukasaḥ || 37 ||
[Analyze grammar]

ātmānamātmanā hi tvamavatārya mahītalam |
devakīṃ rohiṇīṃ caiva garbhābhyāṃ paritoṣaya || 38 ||
[Analyze grammar]

tatra tvaṃ śiśurevādau gopālakṛtalakṣaṇaḥ |
vardhayasva mahābāho purā traivikrame yathā || 39 ||
[Analyze grammar]

chādayitvātmanātmānaṃ māyayā yogarūpayā |
gopakanyāsahasrāṇi ramayaṃścara medinīm || 40 ||
[Analyze grammar]

gāśca te rakṣato viṣṇo vanāni paridhāvataḥ |
vanamālāparikṣiptaṃ dhanyā drakṣyanti te vapuḥ || 41 ||
[Analyze grammar]

pītāmbaradharaṃ caiva nīlakuñcitamūrdhajam || 41 ||
[Analyze grammar]

vanamālākṛtoraskaṃ mayūravyajanākulam || 41 ||
[Analyze grammar]

viṣṇo padmapalāśākṣa gopālavasatiṃ gate |
bāle tvayi mahābāho loko bālatvameṣyati || 42 ||
[Analyze grammar]

tvadbhaktāḥ puṇḍarīkākṣa tava cittavaśānugāḥ |
goṣu gopā bhaviṣyanti sahāyāḥ satataṃ tava |
vane cārayato gāstu goṣṭhāṃśca paridhāvataḥ |
majjato yamunāyāṃ ca ratimāpsyanti te tvayi || 43 ||
[Analyze grammar]

jīvitaṃ vasudevasya bhaviṣyati sujīvitam |
yastvayā tāta ityuktaḥ putra ityeva vakṣyati || 44 ||
[Analyze grammar]

sa hi dhanyataro loke yasya tvaṃ putratāṃ gataḥ || 44 ||
[Analyze grammar]

sa hi puṇyakṛtāṃ śreṣṭho yastvāṃ putreti kīrtayet || 44 ||
[Analyze grammar]

ye namasyanti deva tvāṃ gopālakṛtalakṣaṇam || 44 ||
[Analyze grammar]

te hi puṇyakṛtāṃ śreṣṭhāḥ praṇamyāḥ sarvajantubhiḥ || 44 ||
[Analyze grammar]

atha vā kasya putratvaṃ gaccheranyatra kaśyapāt |
kā ca dhārayituṃ śaktā viṣṇo tvāmaditiṃ vinā || 45 ||
[Analyze grammar]

yogenātmasamutthena tvaṃ gaccha vijayāya vai |
vayamapyālayaṃ svaṃ gacchāmo madhusūdana || 46 ||
[Analyze grammar]

ityuktvā devadeveśaṃ brahmā lokapitāmahaḥ || 46 ||
[Analyze grammar]

jagāma sa prabhurgehaṃ devāścāpi yathāgatam || 46 ||
[Analyze grammar]

sa devānabhyanujñāya vivikte tridivālaye |
jagāma viṣṇuḥ svaṃ deśaṃ kṣīrodasyottarāṃ diśam || 47 ||
[Analyze grammar]

tatraiva pārvatī nāma guhā meroḥ sudurgamā |
tribhistasyaiva vikrāntairnityaṃ parvasu pūjitā || 48 ||
[Analyze grammar]

purāṇaṃ tatra vinyasya dehaṃ harirudāradhīḥ |
ātmānaṃ yojayāmāsa vasudevagṛhe prabhuḥ || 49 ||
[Analyze grammar]