Chapter 23

ityākhyāya kathitau ca mithaḥ pravrajitau gatau |
drutapravahaṇārūḍho gomukhaśca parāgataḥ || 1 ||
[Analyze grammar]

māmavocatsa vanditvā prītidāsaḥ punarvasuḥ |
sarvanāgarakaśreṇigrāmaṇīrdṛśyatāmiti || 2 ||
[Analyze grammar]

atha praṇatamadrākṣamanulbaṇavibhūṣaṇam |
yuvānamapi vainītyāl lajjitasthaviraṃ naram || 3 ||
[Analyze grammar]

gomukhākhyātamāhātmyaṃ taṃ cāliṅgitavānaham |
saṃbhāvitaguṇāḥ sadbhirarhantyeva ca satkriyām || 4 ||
[Analyze grammar]

atha yānaṃ samāruhya tatpunarvasuvāhakam |
sāṃyātrika ivāmbhodhiṃ tadāvāsamavātaram || 5 ||
[Analyze grammar]

sevitāhāraparyantaśarīrasthitisādhanaḥ |
dinaśeṣaṃ nayāmi sma gītiśrutivinodanaḥ || 6 ||
[Analyze grammar]

tataḥ suptajane kāle pṛṣṭavānasmi gomukham |
kathameṣa tvayā prāptaḥ suhṛdityatha so'bravīt || 7 ||
[Analyze grammar]

śrūyatāmastyahaṃ yuṣmānvanditvā punarāgataḥ |
na ca kaṃcana paśyāmi yogyamāśrayadāyinam || 8 ||
[Analyze grammar]

tataścintitavānasmi dhanavidyādidāyinām |
saṃbhavaḥ sarvasādhūnāṃ nāsti rājakulādṛte || 9 ||
[Analyze grammar]

yogakṣemaprayuktā hi prāyaḥ sajjanasaṃsadaḥ |
rājadvāraṃ vigāhante samudramiva sindhavaḥ || 10 ||
[Analyze grammar]

rājadvāraṃ tato gatvā yāciṣye kaṃcidāśrayam |
rājadvāraṃ hi kāryāṇāṃ dvāramuktaṃ budhairiti || 11 ||
[Analyze grammar]

nigrahānugrahaprāptalokakolāhalākulam |
tadgatvā smṛtavānasmi pretādhipadhanādhipau || 12 ||
[Analyze grammar]

mahāmanuṣyacaritaḥ puruṣo'yaṃ vibhāvyate |
āśrayaprārthanā tasmānnāsmin saṃpadyate mṛṣā || 13 ||
[Analyze grammar]

ayamanyaḥ suveṣo'pi kīnāśavirasākṛtiḥ |
tena saṃbhāvyate nāsmātprārthanāphalamaṇvapi || 14 ||
[Analyze grammar]

puruṣaṃ puruṣaṃ tatra ciramitthaṃ vicārayan |
abhyantarātpratīhāraṃ dṛṣṭavānasmi nirgatam || 15 ||
[Analyze grammar]

svastikāranamaskārajyotkārān sa ca kāryiṇām |
pratimānitavān sarvān sakṛnnamitamastakaḥ || 16 ||
[Analyze grammar]

atha vijñāpanāmātraṃ paśyadbhiḥ kāryasādhanam |
kāryibhiryugapattatra kāryavijñāpanā kṛtā || 17 ||
[Analyze grammar]

tebhyastenāpi sāmānyamekamevottaraṃ kṛtam |
bhavataḥ sumukho rājā mā tvariṣṭa bhavāniti || 18 ||
[Analyze grammar]

sa pratīhāraveṣaṃ ca vārabāṇādimaṅgataḥ |
avatārya samīpasthe nyastavānparicārake || 19 ||
[Analyze grammar]

taṃ ca dṛṣṭvā samāptaiva samāśrayagaveṣaṇā |
na hi dṛṣṭasuvarṇādriḥ tāmraṃ dhamati vātikaḥ || 20 ||
[Analyze grammar]

svastikṛtvā tatastasmai svagṛhānpratigacchate |
māṃ muhuḥ paśyatā prītyā tenaiva sahito'gamam || 21 ||
[Analyze grammar]

gṛhe ca kṛtasatkāramasau māmanuyuktavān |
āgacchati kutaḥ kiṃ vā madicchati bhavāniti || 22 ||
[Analyze grammar]

mayoktaṃ bhrātarāvāvāṃ dvijau dvāvāgamārthinau |
vidyāsthānamidaṃ śrutvā avantideśātsamāgatau || 23 ||
[Analyze grammar]

iha vāsitumicchāvo yuṣmatkṛtaparigrahau |
balavattaragupto hi kṛśo'pi balavāniti || 24 ||
[Analyze grammar]

tenoktaṃ tvādṛśāmetadguṇagrahaṇakāṅkṣiṇām |
agrāmyālāparūpāṇāṃ svagṛhaṃ bhavatāmiti || 25 ||
[Analyze grammar]

muhūrtaṃ tatra cāsīnaḥ śrutavānahamutthitam |
kṣubhitāmbhodhikallolakolāhalamiva kṣaṇam || 26 ||
[Analyze grammar]

māṃ tadākarṇanotkarṇamasau sasmitamuktavān |
kiṃ tvametanna vettheti na vedeti mayoditam || 27 ||
[Analyze grammar]

ayaṃ punarvasurnāma dātā vāṇijadārakaḥ |
vṛtaḥ kitavasaṃghena dīvyati dyūtamaṇḍape || 28 ||
[Analyze grammar]

yadā vijayate dyūte sa sarvaṃ draviṇaṃ tadā |
vitaratyarthivargāya tasyaiṣa tumulo dhvaniḥ || 29 ||
[Analyze grammar]

jīyamāne punastasmiñjānumūrdhasthamastakāḥ |
viṣādamuṣitālāpādhyāyanti śivamarthinaḥ || 30 ||
[Analyze grammar]

yadi kautūhalaṃ tatra tato'sau dṛśyatāmiti |
pratīhāreṇa kathite tataścintitavānaham || 31 ||
[Analyze grammar]

nītividyāvayovṛddhairamātyaiḥ kiṃ prayojanam |
yeṣāṃ yantritavākkāyairagrato duḥkhamāsyate || 32 ||
[Analyze grammar]

yaḥ samānavayaḥśīlo muktahastaḥ sakiṃcana |
vyasanī ca svatantraśca so'smākamadhunā suhṛt || 33 ||
[Analyze grammar]

tasmāddyūtasabhāmeva yāmi draṣṭuṃ punarvasum |
nirdhāryeti tamāmantrya dyūtakārasabhāmagām || 34 ||
[Analyze grammar]

sākīrṇā devanavyagraiḥ sabhā kitavacandrakaiḥ |
sarasīvāmiṣāsvādagṛddhairbakakadambakaiḥ || 35 ||
[Analyze grammar]

tatrānyatamayorakṣāndīvyatorakṣadhūrtayoḥ |
akṣaḥ koṇena patitaḥ saṃdigdhapadapañcakaḥ || 36 ||
[Analyze grammar]

pañcako'yaṃ padaṃ nedaṃ padametanna pañcakaḥ |
iti jātā tayoḥ spardhā parasparajayaiṣiṇoḥ || 37 ||
[Analyze grammar]

tayorekatareṇoktaṃ madhyasthaḥ pṛcchyatāmiti |
pratyuktamitareṇāpi yathecchasi tathāstviti || 38 ||
[Analyze grammar]

athaikaḥ puruṣaḥ prāṃśuḥ pṛṣṭastābhyāmanāgaraḥ |
kataratpaśyasi spaṣṭaṃ padapañcakayoriti || 39 ||
[Analyze grammar]

tatra cānyatamenoccairuktamutkṣiptapāṇinā |
dīrghatvādeṣa nirbuddhirato'nyaḥ pṛcchyatāmiti || 40 ||
[Analyze grammar]

tataḥ pṛṣṭo'paro hrasvaḥ so'pi tena nivāritaḥ |
nedṛśāḥ praśnamarhanti bahudoṣā hi khaṭvakāḥ || 41 ||
[Analyze grammar]

atha māṃ dṛṣṭavantau tau pṛṣṭavantau ca sādaram |
sādho yadi na doṣo'sti tato nau chinddhi saṃśayam || 42 ||
[Analyze grammar]

tvaṃ na dīrgho na ca hrasvastasmātprājño na duṣṭadhīḥ |
tena madhyapramāṇatvādgaccha madhyasthatāmiti || 43 ||
[Analyze grammar]

cintitaṃ ca mayā kaṣṭaḥ khalasaṃdigdhanirṇayaḥ |
pāradraviṇagṛddheṣu kitaveṣu viśeṣataḥ || 44 ||
[Analyze grammar]

avaśyaṃ tu kalājñānaṃ khyāpanīyaṃ kalāvidā |
aprakāśaṃ hi vijñānaṃ kṛpaṇārthanirarthakam || 45 ||
[Analyze grammar]

na ca dyūtakalānyatra kitavebhyaḥ prakāśyate |
na hi prayuñjate prājñāḥ veśādanyatra vaiśikam || 46 ||
[Analyze grammar]

dyūte jeṣyati yaścātra sa me mitraṃ bhaviṣyati |
dhanavanmitralābhaṃ hi nidhilābhādikaṃ viduḥ || 47 ||
[Analyze grammar]

ityādi bahu niścitya purasteṣāṃ savistaram |
akṣāṣṭāpadaśārīṇāmākhyaṃ bhūmeśca lakṣaṇam || 48 ||
[Analyze grammar]

tataḥ saṃdigdhapātasya tasyāhaṃ koṇapātinaḥ |
supiṣṭamiṣṭakākṣodamakṣasyopari dattavān || 49 ||
[Analyze grammar]

athāsāviṣṭakākṣodaḥ padasyopari yo'patat |
so'patatsakalo bhūmau pañcakasyopari sthitaḥ || 50 ||
[Analyze grammar]

tatastānuktavānasmi yo bhāgaḥ pañcakāṅkitaḥ |
tasyottānatvamutkṛṣṭaṃ kṣodastatra yataḥ sthitaḥ || 51 ||
[Analyze grammar]

etāvanmama vijñānamityuktvāvasthite mayi |
aho sādhviti nirghoṣaḥ samantātsahasotthitaḥ || 52 ||
[Analyze grammar]

tatastatroditaṃ kaiścidayamakṣaviśāradau |
dhruvaṃ vijayate dūrānnalakuntīsutāviti || 53 ||
[Analyze grammar]

te'paraiḥ kupitairuktājitau nalayudhiṣṭhirau |
ayaṃ jayati jetārāvapi puṣakarasaubalau || 54 ||
[Analyze grammar]

iti praśasyamānaṃ māṃ tiryagdṛṣṭvā samatsaraḥ |
padavādī jito yo'sāvasau mantharamuktavān || 55 ||
[Analyze grammar]

yeṣāṃ dyūtapaṇābhāvaste kimarthamihāsate |
dyūtasthāne hi kiṃ kṛtyaṃ pravīṇaiḥ prāśnikairiti || 56 ||
[Analyze grammar]

āsīcca mama kasmānmāṃ kaulaṭeyaḥ kṣipatyayam |
yo'haṃ trailokyasāreṇa paṇena paṇavāniti || 57 ||
[Analyze grammar]

atha nikṣipya sakrodhaṃ yauṣmākaṃ bhūṣaṇaṃ bhuvi |
ehi dīvyāva mitreti tamahaṃ dhūrtamuktavān || 58 ||
[Analyze grammar]

sa ca dhūrtairalaṃkāraḥ prasarpadbahalaprabhaḥ |
dṛṣṭastṛṣṇāviśālākṣaiḥ pataṃgairiva pāvakaḥ || 59 ||
[Analyze grammar]

athāsau krodhalobhābhyāmakṣadhūrtaḥ pratāritaḥ |
mayā saha sasaṃrambhamakṣānārabdha devitum || 60 ||
[Analyze grammar]

tena cāhaṃ tribhiḥ pātairanakṣakuśalaḥ kila |
prabuddhairgardhagṛddhena sahasratritayaṃ jitaḥ || 61 ||
[Analyze grammar]

tatastatsakṛdunmocya sahasratritayaṃ mayā |
lakṣamekena pātena jitaḥ sa kitavādhamaḥ || 62 ||
[Analyze grammar]

vijayājjṛmbhitotsāhaḥ śaṅkitaśca parājayāt |
na virantuṃ na vā rantumasāvaśakadākulaḥ || 63 ||
[Analyze grammar]

dīvya vā dehi vā lakṣaṃ saumyeti ca mayoditaḥ |
vailakṣyādghaṭṭayannakṣānna kiṃcitpratipannavān || 64 ||
[Analyze grammar]

etasminnantare bhṛtyaṃ svamavocatpunarvasuḥ |
kitavo'yamidaṃ lakṣamacalaṃ dāpyatāmiti || 65 ||
[Analyze grammar]

māṃ cāyaṃ svaṃ gṛhaṃ nītvā harṣādṛjutanūruhaḥ |
tathā pūjitavāndevaṃ haraṃ dattavaraṃ yathā || 66 ||
[Analyze grammar]

māṃ cāvocaddhanaṃ yattadbhavadbhiḥ kitavārjitam |
tadudgrāhyedamānītaṃ lakṣaṃ te gṛhyatāmiti || 67 ||
[Analyze grammar]

mayāpyuktamupānte yaddraviṇaṃ tvatparigrahāt |
sādhitaṃ bhavatā yacca tasya svāmī bhavāniti || 68 ||
[Analyze grammar]

uktaṃ cānena yannāma yuṣmābhiḥ svayamarjitam |
svāmino yūyamevāsya dhanasyetyatra kā kathā || 69 ||
[Analyze grammar]

yadapīdaṃ mayāvāptaṃ yuṣmatsvāmikameva tat |
adhigacchati yaddāso bhartureva hi taddhanam || 70 ||
[Analyze grammar]

yacca pṛcchāmi tanmahyaṃ prasāde sati kathyatām |
bhūtalaṃ yūyamāyātāḥ kiṃ nimittaṃ tripiṣṭapāt || 71 ||
[Analyze grammar]

manye satyapi devatve bhavadbhiḥ krīḍayāhṛtaiḥ |
ākārāntaranirmāṇaṃ nātyantamanuśīlitam || 72 ||
[Analyze grammar]

tathā ca varṇasaṃsthānakalāvijñānasaṃpadaḥ |
dṛṣṭāḥ kena manuṣyeṣu yādṛśo bhavatāmiti || 73 ||
[Analyze grammar]

tena yatsatyamityukte duḥkhamāśitavānaham |
dūreṇa hyatinindāyāduḥkhaheturatistutiḥ || 74 ||
[Analyze grammar]

vārāṇasīpraveśeṣu pratīhārāya pṛcchate |
yanmayā kāryamākhyātaṃ tadevāsmai niveditam || 75 ||
[Analyze grammar]

athānenoktamāścaryaṃ jyeṣṭhasya jagatāṃ guṇaiḥ |
tvādṛśasyāpi yo jyeṣṭhaḥ kīdṛśaḥ sa bhaviṣyati || 76 ||
[Analyze grammar]

kiṃ vānena vimardena jyeṣṭhastiṣṭhati yatra saḥ |
sarvatīrthādhike deśe taṃ prāpayata māmiti || 77 ||
[Analyze grammar]

athainamahamādāya gatavānbhavadantikam |
yaccottaramatastatra pratyakṣaṃ bhavatāmapi || 78 ||
[Analyze grammar]

iti kṣipramayaṃ labdho mayā vaḥ paricārakaḥ |
na hiṃsanti na sarvatra śriyaḥ puṇyavatāmiti || 79 ||
[Analyze grammar]

tatastamuktavānasmi vipadastena durlabhāḥ |
phalaṃ sucaritasyaiva hṛdayaṃ yasya gomukhaḥ || 80 ||
[Analyze grammar]

kiṃ tu saṃśrayamātreṇa pīḍanīyaḥ punarvasuḥ |
parānnaṃ hi vṛthābhuktaṃ duḥkhāyaiva satāmiti || 81 ||
[Analyze grammar]

evamādibhirālāpairardhamardhaṃ ca nidrayā |
nītavānasmi yāminyāḥ prātaścāgātpunarvasuḥ || 82 ||
[Analyze grammar]

taṃ ca vanditamatpādamavocaditi gomukhaḥ |
ballavaḥ kuśalaḥ kaścitkutaścana gaveṣyatām || 83 ||
[Analyze grammar]

tvadanyasya gṛhe nānnamaryajyeṣṭhena sevitam |
parapākanivṛttā hi sādhuvṛttā dvijātayaḥ || 84 ||
[Analyze grammar]

ādarārādhitaścāyaṃ tvadīyaṃ paribhuktavān |
ārādhanānurodho hi caritaṃ mahatāmiti || 85 ||
[Analyze grammar]

pratyākhyānavicittastu tamāha sma punarvasuḥ |
yadyevaṃ jagadīśānāṃ kiṃ nāsti bhavatāmiti || 86 ||
[Analyze grammar]

acirācca tadānītau saṃbhāvyaguṇasaṃpadau |
ākārakṣiptanāsatyāvapaśyaṃ puruṣau puraḥ || 87 ||
[Analyze grammar]

tau ca māṃ ciramālokya vadanaṃ ca parasparam |
prasārya sabhujānpādāñjayetyuktvā bhuvaṃ gatau || 88 ||
[Analyze grammar]

tau cāhūya mayāyātau spṛṣṭapṛṣṭhau sabhājitau |
vanditvā punarabrūtāṃ brūta kiṃ kriyatāmiti || 89 ||
[Analyze grammar]

tatastau gomukhenoktau bhavantau kila ballavau |
satyaṃ cedidamāryasya pākaḥ saṃsādhyatāmiti || 90 ||
[Analyze grammar]

tau ca prītau pratijñāya nikartya nakhamūrdhajān |
snātau soṣṇīṣamūrdhānau mahānasamagacchatām || 91 ||
[Analyze grammar]

atha vā tiṣṭhati vyāsaḥ samāsaḥ śrūyatāmayam |
sarvā tābhyāmapūrveva prakriyā saṃprasāritā || 92 ||
[Analyze grammar]

yāvatyā cāparaḥ sthālīmadhiśrayati ballavaḥ |
tāvatyā velayā tābhyāṃ pāka eva samāpitaḥ || 93 ||
[Analyze grammar]

tato nirvartitasnānadevatānalatarpaṇaḥ |
āhārasthānamadhyāsi viprapaṅktinirantaram || 94 ||
[Analyze grammar]

pañca tittirayaḥ pakvāścatvāraḥ kukkuṭā iti |
āhāro yaiḥ praśastastairaśitaṃ prākṛtāśanam || 95 ||
[Analyze grammar]

āhāraṃ yadi severan sakṛttamamṛtāśanam |
samutsṛṣṭāmṛtāhārābhaveyurnāmarāstadā || 96 ||
[Analyze grammar]

tataḥ samāpitāhāraḥ karṇe gomukhamabravam |
sūdābhyāṃ bhuktabhaktābhyāmayutaṃ dīyatāmiti || 97 ||
[Analyze grammar]

sa gatvā sahitastābhyāṃ cirāccāgatya kevalaḥ |
smitasaṃsūcitaprītirupākramata bhāṣitum || 98 ||
[Analyze grammar]

mayā yāv uditāvetau na yūvāmetadarhatha |
avasthāsādṛśaṃ kiṃ tu yatkiṃcidgṛhyatāmiti || 99 ||
[Analyze grammar]

tayorekatareṇātha bharturdauḥsthityavartinaḥ |
na yuktaṃ dhanamādātumāvābhyāmiti bhāṣitam || 100 ||
[Analyze grammar]

sa kruddhenetareṇokto dhiktvāṃ dīnatarāśayam |
jitatrailokyavitteśaṃ vitteśaṃ yo'nukampase || 101 ||
[Analyze grammar]

mahāpadmasahasrāṇi yatprasādādvimāninām |
susthitāni bhaviṣyanti dauḥsthityaṃ tasya kīdṛśam || 102 ||
[Analyze grammar]

prayacchatyayutaṃ yaśca pākasyaikasya niṣkrayam |
duḥsthitastādṛśo yasya susthitastasya kīdṛśaḥ || 103 ||
[Analyze grammar]

evamādi bruvanneva sa mālyamiva taddhanam |
dhārayitvā kṣaṇaṃ mūrdhnā prasthāya prāptavān gṛham || 104 ||
[Analyze grammar]

athainaṃ pṛṣṭavānasmi paṭukautūhalākulaḥ |
divyamaiśvaryamāgāmi kathaṃ veda bhavāniti || 105 ||
[Analyze grammar]

tatastenoktamasyaiva brahmadattasya bhūpateḥ |
śatayajñādhikaśrīkaḥ pañcayajñaḥ pitābhavat || 106 ||
[Analyze grammar]

cikitsāsūdaśāstrajñaḥ śilpitve'pyaśaṭho'bhavat |
dvitīya iva tasyātmā devavāniti ballavaḥ || 107 ||
[Analyze grammar]

śarīrametadāyattaṃ mameti kṛtabuddhinā |
rājñā tasmai svarājyasya daśamo'ṃśaḥ prakalpitaḥ || 108 ||
[Analyze grammar]

nandopanandanāmānau tasya sūdapateḥ sutau |
īdṛśākāravijñānāvāvāmeva ca viddhi tau || 109 ||
[Analyze grammar]

bālābhyāmeva cāvābhyāṃ sūdaśāstracikitsite |
sahajñānaprayogābhyāṃ kulavidyeti śikṣite || 110 ||
[Analyze grammar]

ekadā nau pitāvocatputrakau śṛṇutaṃ hitam |
śrotāraṃ guruvākyānāṃ na spṛśanti vipattayaḥ || 111 ||
[Analyze grammar]

padavākyapramāṇāni kāvyāni vividhāni ca |
bhavadbhyāṃ śikṣitavyāni citrādiśca kalāgaṇaḥ || 112 ||
[Analyze grammar]

kadācidajitaṃ jetuṃ yāto yātavyamaṇḍalam |
śāstrakāvyakathālāpairvinodaṃ prabhuricchati || 113 ||
[Analyze grammar]

vijñāya tu tadāsthānamasaṃnihitapaṇḍitam |
vinodaṃ tasya kuryātaṃ śāstrālāpādibhiryuvām || 114 ||
[Analyze grammar]

pragalbhāḥ pratibhāvanto bahuvṛttāntapaṇḍitāḥ |
prakāśitamanovṛttairbhṛtyāḥ krīḍanti bhartṛbhiḥ || 115 ||
[Analyze grammar]

ekavidyaḥ punastatra pragalbho'pi tapasvikaḥ |
svavidyālāpaparyāyakhinnaściramudīkṣate || 116 ||
[Analyze grammar]

abhyastabahuvidyaśca nirviparyāyamānasaḥ |
gatasaṃśayaduḥkhatvātsukhināṃ parameśvaraḥ || 117 ||
[Analyze grammar]

utsāhena ca śikṣethāmāyuraiśvaryalakṣaṇam |
dīrghāyurvittavanto hi saṃsevyāḥ sevakairiti || 118 ||
[Analyze grammar]

tacca pitrājñayāśeṣamāvābhyāmanuśīlitam |
ramyāsvādaṃ ca pathyaṃ ca ko'vamanyeta bheṣajam || 119 ||
[Analyze grammar]

tadvidyādharacakrasya cakravartī bhaviṣyati |
jyaiṣṭhacandrasahasrāṃśudīrghāyuśceti nau matiḥ || 120 ||
[Analyze grammar]

tena prasāritāṅgābhyāmāvābhyāmeṣa vanditaḥ |
na hi vandanasāmānyamarhanti bahuvanditāḥ || 121 ||
[Analyze grammar]

bahavo hīha tiṣṭhanti brāhmaṇāstīrthakukkuṭāḥ |
śiraḥspandanamātreṇa tānāvāṃ pūjayāvahe || 122 ||
[Analyze grammar]

tasmād yasmādasaṅgena sarvatrāgamacakṣuṣā |
jyeṣṭhasya dṛṣṭamaiśvaryamataḥ śraddhīyatāmiti || 123 ||
[Analyze grammar]

prajñaptikauśikasutapramukhairuktaṃ nandasya niścitataraṃ vacanāttadāsīt |
bhāvaṃ hi saṃśayatamaḥ paṭalāpinaddhamudbhāvayantyavitathā vacanapradīpāḥ || 124 ||
[Analyze grammar]