Chapter 204

śrīkṛṣṇa uvāca |
athātaḥ saṃpravakṣyāmi śarkarācalamuttamam |
yasya pradānādviṣṇvarkarudrāstuṣyaṃti sarvadā || 1 ||
[Analyze grammar]

aṣṭabhiḥ śarkarābhārairuttamaḥ syānmahācalaḥ |
caturbhirmadhyamaḥ prokto bhārābhyāmadhamaḥ smṛtaḥ || 2 ||
[Analyze grammar]

bhāreṇaivārddhabhāreṇa kuryādyaścālpavittavān |
viṣkaṃbhaparvatānkuryātturīyāṃśena mānavaḥ || 3 ||
[Analyze grammar]

dhānyaparvatavatsarvamāsādya rasasaṃyutam |
meroruparitastadvatsthāpya hematarutrayam || 4 ||
[Analyze grammar]

maṃdāraḥ pārijātaśca tṛtīyaḥ kalpapādapaḥ |
etadvṛkṣatrayaṃ mūrdhni sarveṣvapi nidhāpayet || 5 ||
[Analyze grammar]

haricaṃdanasaṃtānau pūrvapaścimabhāgayoḥ |
niveśyau sarvaśaileṣu viśeṣāccharkarācale || 6 ||
[Analyze grammar]

maṃdare kāmadevaṃ tu kaṃdabasya tale nyaset |
jaṃbūvṛkṣatale kāryo garunmāngaṃdhamādane || 7 ||
[Analyze grammar]

prāṅmukho hemamūrtiśca haṃsaḥ syādvipulācale |
haimī śreyorthibhiḥ kāryā surabhirdakṣiṇāmukhī || 8 ||
[Analyze grammar]

dhānyaparvatavatsarvamāvāhanamakhādikam |
kṛtvātha gurave dadyānmadhyamaṃ parvatottamam || 9 ||
[Analyze grammar]

ṛtvigbhyaścaturaḥ śailānimānmaṃtrānudīrayet |
saubhāgyāmṛtasāro'yaṃ paramaḥ śarkarāyutaḥ || 10 ||
[Analyze grammar]

yasmādānaṃdakārī tvaṃ bhava śaileṃdra sarvadā |
amṛtaṃ pibatāṃ ye tu niṣpeturbhuvi śīkarāḥ || 11 ||
[Analyze grammar]

devānāṃ tatsamuttho'si pāhi naḥ śarkarācala |
manobhavadhanurmadhyādudbhūtā śarkarā yataḥ || 12 ||
[Analyze grammar]

tanmayo'si mahāśaila pāhi saṃsārasāgarāt |
yo dadyāccharkarāśailamanena vidhinā naraḥ || 13 ||
[Analyze grammar]

sarvapāpavinirmuktaḥ sa yāti śivamaṃdiram |
caṃdrādisārcisaṃkāśamadhiruhyānujīvibhiḥ || 14 ||
[Analyze grammar]

sahaiva yānamātiṣṭhetsa tu viṣṇupade divi |
tataḥ kalpa śatāṃte tu saptadvīpādhipo bhavet || 15 ||
[Analyze grammar]

āyurārogyasaṃpanno yāvajjanmāyutatrayam |
bhojanaṃ śaktito dadyātsarvaśaileṣvamatsaraḥ |
svayaṃ vā kṣāra lavaṇamaśnīyāttadanujñayā || 16 ||
[Analyze grammar]

parvatopaskaraṃ sarvaṃ prāpayedbrāhmaṇālayam |
āsītpurā brahmakalpe dharmamūrtirnarādhipaḥ || 17 ||
[Analyze grammar]

suhṛcchakrasya nihatā yena daityāḥ sahasraśaḥ |
somasūryādayo yasya tejasā vigataprabhāḥ || 18 ||
[Analyze grammar]

bhavaṃti śataśo yena rājāno'pi parājitāḥ |
yathecchārūpadhārī ca manuṣyo'pyapavāritaḥ || 19 ||
[Analyze grammar]

tasya bhānumatīnāma bhāryā trailokyasuṃdarī |
lakṣmīriva ca rūpeṇa nirjitāmarasuṃdarī || 20 ||
[Analyze grammar]

rājñastasyāgramahiṣī prāṇebhyo'pi garīyasī |
daśanārīsahasrāṇāṃ madhye śrīriva rājate || 21 ||
[Analyze grammar]

nṛpakoṭisahasreṇa na kadācitpramucyate |
sa kadācitsthānagataṃ papraccha svaṃ purohitam || 22 ||
[Analyze grammar]

vismayāviṣṭahṛdayo vasiṣṭhamṛṣisattamam |
bhagavankena dharmeṇa mama lakṣmīranuttamā || 23 ||
[Analyze grammar]

kasmācca vipulaṃ tejo maccharīre sadottamam || 24 ||
[Analyze grammar]

vaśiṣṭha uvāca |
purā līlāvatī nāma veśyā śivaparāyaṇā |
tayā dattaścaturdaśyāṃ gurave lavaṇācalaḥ || 25 ||
[Analyze grammar]

hemavṛkṣāmaraiḥ sārddhaṃ yathāvadvidhipūrvakaḥ |
śūdraḥ suvarṇakārastu nāmnā śauṃḍobhavattadā || 26 ||
[Analyze grammar]

bhṛtyo līlāvatīgehe tena haimā vinirmitāḥ |
taravo'maramukhyāśca śraddhāyuktena pārthiva || 27 ||
[Analyze grammar]

atirūpeṇa saṃpannānghaṭayitvā tato hṛdi |
dharmakāryamatiṃ jñātvā nāgṛhīta kathaṃcana || 28 ||
[Analyze grammar]

ujjvālitāstu tatpatnyā sauvarṇāmarapādapāḥ |
līlāvatī gṛhe pārśve paricaryā ca pārthiva || 29 ||
[Analyze grammar]

kṛtaṃ tābhyāṃ praharṣeṇa dvijaśuśrūṣaṇādikam |
sā tu līlāvatī veśyā kālena mahatā nṛpa || 30 ||
[Analyze grammar]

sarvapāpavinirmuktā jagāma śivamaṃdiram |
yo'sau suvarṇakāraśca daridro'pyati sattvavān || 31 ||
[Analyze grammar]

na mūlyamādādveśyātaḥ sa bhavāniha sāṃpratam |
saptadvīpapatirjātaḥ sūryāyutasamaprabhaḥ || 32 ||
[Analyze grammar]

yayā suvarṇa racitāstaravo hemadevatāḥ |
samyagujjvalitāḥ patnī seyaṃ bhānumatī tava || 30 ||
[Analyze grammar]

ujjvālanādujjvalarūpamasyāḥ sujātamasminbhuvanādhipatyam |
tasmātkṛtaṃ tatparikarma rātrāvanuddhatābhyāṃ lavaṇācalasya || 34 ||
[Analyze grammar]

tasmācca lokeṣvaparājitastvamārogyasaubhāgyayutā ca lakṣmīḥ |
tasmāttvamapyatra vidhānapūrvaṃ dhānyācalādīndaśadhā kuruṣva || 35 ||
[Analyze grammar]

tatheti sampūjya ca dharmamūrti vaco vaśiṣṭhasya dadau sa sarvān |
dhānyācalādīnkramaśaḥ purārerlokaṃ jagāmāmarapūjyamānaḥ || 36 ||
[Analyze grammar]

yaścādhanaḥ paśyati dīyamānaṃ meroḥ pradānamiha dharmaparo manuṣyaḥ |
śṛṇoti bhaktyā parayā'pramādī vikalmaṣaḥ so'pi divaṃ prayāti || 37 ||
[Analyze grammar]

duḥsvapnaṃ praśabhamupaiti paṭhyamāne śailendre bhavabhayabhedane narāṇām |
yaḥ kuryātkimu nṛpapuṃgaveha samyakchāṃtātmā hariharapurameti jaṃtuḥ || 38 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde śarkarācaladānavidhi varṇanaṃ nāma caturadhikadviśatatamo'dhyāyaḥ || 204 ||
[Analyze grammar]