Chapter 190

śrīkṛṣṇa uvāca |
punareva pravakṣyāmi dānamatyadbhutaṃ tava |
viśvacakramiti khyātaṃ sarvapāpavināśanam || 1 ||
[Analyze grammar]

tapanīyasya śuddhasya viśuddhātmātha kārayet |
śreṣṭhaṃ palasahasreṇa tadardhena tu madhyamam || 2 ||
[Analyze grammar]

tasyāpyarddhaṃ kaniṣṭhaṃ syādviśvacakramudāhṛtam |
tathā viṃśatpalādūrdhvamaśakto'pi nivedayet || 3 ||
[Analyze grammar]

ṣoḍaśāraṃ tataścakraṃ bhramannemyaṣṭakāvṛtam |
nābhipadmesthitaṃ viṣṇuṃ yogārūḍhaṃ caturbhujam || 4 ||
[Analyze grammar]

śaṃkhacakre'sya pārśvasthe devyaṣṭakasamāvṛtam |
dvitīyāvaraṇe tadvatpūrvato jalaśāyinam || 5 ||
[Analyze grammar]

atrirbhṛgurvaśiṣṭhaśca brahmā kaśyapa eva ca |
matsyaḥ kūrmo varāhaśca nārasiṃhotha vāmanaḥ || 6 ||
[Analyze grammar]

rāmo rāmaśca kṛṣṇaśca buddhaḥ kalkī ca te daśa |
tṛtīyāvaraṇe gaurī manubhirvasurbhiryutā || 7 ||
[Analyze grammar]

caturthe dvādaśādityā vedāścatvāra eva ca |
pañcame pañca bhūtāni rudrāścaikādaśaiva tu || 8 ||
[Analyze grammar]

lokapālāṣṭakaṃ ṣaṣṭhe diṅmātaṃgāstathaiva ca |
saptame'strāṇi sarvāṇi maṃgalāni ca kārayet || 9 ||
[Analyze grammar]

antarāṃtarato devānvinyasedaṣṭame punaḥ |
daśahastaṃ tataḥ kṛtvā patākātoraṇānvitam || 10 ||
[Analyze grammar]

maṃḍapaṃ kuṇḍamekaṃ ca kārayedvastrasaṃyutam |
caturhastā bhavedvedī madhye tasyāstato nyaset || 11 ||
[Analyze grammar]

kṛṣṇājinoparigataṃ viśvacakraṃ vidhānataḥ |
tathāṣṭādaśadhānyāni rasāśca lavaṇādayaḥ || 12 ||
[Analyze grammar]

pūrṇakumbhāṣṭakaṃ tadvadvastramālyavibhūṣitam |
phalāni dāpayetpārśve pañcavarṇavitānakam || 13 ||
[Analyze grammar]

adhivāsya tataścakraṃ paścāddhomaṃ samācaret |
cātuścaraṇikāṃstatra brāhmaṇāṃścaturotha vā || 14 ||
[Analyze grammar]

homaṃ kuryurjitātmāno vastrābharaṇabhūṣitāḥ |
homadravyasamopetāḥ sruksruvaistāmrabhājanaiḥ || 15 ||
[Analyze grammar]

cakrapratiṣṭhitānāṃ tu surāṇāṃ homa iṣyate |
talliṃgairjuhuyānmantraiḥ sarvopadravaśāṃtaye || 16 ||
[Analyze grammar]

tato maṃgalaśabdena snātaḥ śuklāṃbaro gṛhī |
homādhivāsanāṃte tu gṛhītakusumāṃjaliḥ || 17 ||
[Analyze grammar]

imamuccārayanmaṃtraṃ kṛtvā tattriḥpradakṣiṇam |
namo viśvaṃbharāyeti viśvacakrātmane namaḥ |
paramānaṃdarūpī tvaṃ pāhi naḥ pāpakardamāt || 18 ||
[Analyze grammar]

tejomayamidaṃ yasmātsadā paśyaṃti sūrayaḥ |
hṛdi tatra guṇātītaṃ viśvacakraṃ namāmyaham || 19 ||
[Analyze grammar]

vāsudeve sthitaṃ cakraṃ tasya madhye tu mādhavaḥ |
anyonyādhārarūpeṇa praṇamāmi sthitāviha || 20 ||
[Analyze grammar]

viśvacakramidaṃ yasmātsarvapāpaharaṃ hareḥ |
āyudhaṃ cādhivāsaśca tasmācchāntiṃ dadātu me || 21 ||
[Analyze grammar]

ityāmaṃtrya ca yo dadyādviśvacakraṃ vimatsaraḥ |
vimuktaḥ sarvapāpebhyo viṣṇuloke mahīyate || 22 ||
[Analyze grammar]

vaikuṇṭhalokamāsādya caturbāhunarāvṛtam |
sevyate'psarasāṃ saṃghaistiṣṭhetkalpaśatatrayam || 23 ||
[Analyze grammar]

praṇamedvātha yaḥ kṛtvā viśvacakraṃ dinedine |
tasyāyurvarddhate dīrghaṃ lakṣmīstu vipulā bhavet || 24 ||
[Analyze grammar]

tasmāccakraṃ sadā kāryaṃ dhāryaṃ ca svagṛhe naraiḥ |
kāṃcanaṃ vātha raupyaṃ vā tadabhāve'tha tāmrajam || 25 ||
[Analyze grammar]

iti sakalajagatsurādhivāsaṃ vitarati yastapanīyaṣoḍaśāram |
haribhuvanagataḥ sa siddhasaṃghaiściramadhigamya namasyate'psarobhiḥ || 26 ||
[Analyze grammar]

atha sudarśanatāṃ prayāti śatrormadanasudarśanatāṃ ca kāminībhyaḥ |
sa sudarśanakeśavānurūpaḥ kanakasudarśanadānadagdhapāpaḥ || 27 ||
[Analyze grammar]

kṛtagurudurito'pi ṣoḍaśārapravitaraṇātpravarākṛtirmurāreḥ |
abhibhavati bhavodbhavāni bhittvā bhavamabhito bhavane bhavāni bhūyaḥ || 28 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde viśvacakradānavidhivarṇanaṃ nāma navatyuttaraśatatamo'dhyāyaḥ || 190 ||
[Analyze grammar]