Chapter 188

yudhiṣṭhira uvāca |
kṛṣṇājinapradānasya vidhikālaṃ mamānagha |
brāhmaṇaṃ ca samācakṣva tatra me saṃśayo mahān || 1 ||
[Analyze grammar]

śrīkṛṣṇa uvāca |
yugādiṣūparāgeṣu saṃkrāṃtau dinasaṃkṣaye |
māghyāṃ vā grahapīḍāsu duḥsvapnādbhutadarśane || 2 ||
[Analyze grammar]

deyametanmahādānaṃ dravyamātrāgame tathā |
āhitāgnirdvijo yaśca vedavedāṃgapāragaḥ || 3 ||
[Analyze grammar]

purāṇābhirato dakṣo deyaṃ tasmai ca pārthiva |
yathā yena vidhānena tanme nigadataḥ śṛṇu || 4 ||
[Analyze grammar]

gomayenopalipte tu śucau deśe narādhipa |
ādāveva samāstīrya śobhitaṃ vastramāvikam || 5 ||
[Analyze grammar]

kartavyaṃ rukmaśṛṃgaṃ tadraupyadaṃtaṃ tathaiva ca |
muktādāmnā tu lāṃgūlaṃ tilacchannaṃ tathaiva ca || 6 ||
[Analyze grammar]

tilaiḥ kṛtvā śiro rājanvāsasācchādayedbudhaḥ |
suvarṇenābhitaḥ kuryādalaṃkuryādviśeṣataḥ || 7 ||
[Analyze grammar]

puṣpairgaṃdhaiḥ phalaiścaiva naivedyena ca pūjayet |
ratnairevaṃ yathāśaktyā tasya dikṣu ca vinyaset || 8 ||
[Analyze grammar]

kāṃsyapātrāṇi catvāri teṣu dadyādyathākramam |
ghṛtaṃ kṣīraṃ dadhi kṣaudramevaṃ dattvā yathāvidhi || 9 ||
[Analyze grammar]

tataḥ sarvasamīpe tu maṃtrametamudīrayet |
kṛṣṇaḥ kṛṣṇamalo deva kṛṣṇājinavarastathā || 10 ||
[Analyze grammar]

tvaddānāpāstapāpasya prīyatāṃ me namonamaḥ |
trayastriṃśatsurāṇāṃ ca ādhāre tvaṃ vyavasthitaḥ || 11 ||
[Analyze grammar]

kṛṣṇo'si mūrtimānsākṣātkṛṣṇājina namo'stu te |
evaṃ pradakṣiṇīkṛtya praṇipatya punaḥ punaḥ || 12 ||
[Analyze grammar]

tatpratigrāhakaṃ vipraṃ vedavedāṃgapāragam |
snātaṃ vastrayugācchannaṃ svaśaktyā vāpyalaṃkṛtam || 13 ||
[Analyze grammar]

pratigrahaśca tasyoktaḥ puccha deśe svayaṃbhuvā |
pratigrahapradagdhasya viprasya ca sa bhārata || 14 ||
[Analyze grammar]

na paśyedvadanaṃ paścānna cainamabhibhāṣayet |
anena vidhinā dattvā yathāvatkṛṣṇamārgaṇam || 15 ||
[Analyze grammar]

samagraṃ bhūmidānasya phalaṃ prāpnoti mānavaḥ |
kṛṣṇājinatilānkṛtvā hiraṇyaṃ madhusarpiṣī || 16 ||
[Analyze grammar]

ye prayacchaṃti viprāya na te śocyā bhavaṃti vai |
sarvāṃllokāṃścaraṃtyeva kāmacārā viyadgatāḥ || 17 ||
[Analyze grammar]

ābhūtasaṃplavaṃ yāvatsvargaṃ prāptā na saṃśayaḥ |
kṛṣṇājinasamaṃ dānaṃ na cāsti bhuvanatraye || 18 ||
[Analyze grammar]

pratigrahopi pāpīyāniti vedavido viduḥ |
avasthātritaye yacca tridhā yatsamupārjitam || 19 ||
[Analyze grammar]

tatsarvaṃ nāśamāyāti dattvā kṛṣṇājinaṃ kṣaṇāt || 20 ||
[Analyze grammar]

kṛṣṇekṣaṇaṃ kṛṣṇamṛgasya carma dattvā dvijedrāya samāhitātmā |
yathoktametanmaraṇaṃ na śocetprāpnotyabhīṣṭaṃ manasaḥ phalaṃ yat || 21 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde kṛṣṇājinadānavidhivratavarṇanaṃ nāmāṣṭāśī tyuttaraśatatamo'dhyāyaḥ || 188 ||
[Analyze grammar]