Chapter 176

yudhiṣṭhira uvāca |
bhagavansarvabhūteśa sarvabhūtanamaskṛta |
anugrahāya lokānāṃ kathayasva mamāparam || 1 ||
[Analyze grammar]

tvattulyo jāyate yena āyuṣā yaśasā śriyā |
tanme kathaya deveśa dānaṃ vratamathāpi vā || 2 ||
[Analyze grammar]

śrīkṛṣṇa uvāca |
śṛṇu rājanpravakṣyāmi tava lokahitecchayā |
yenopāyena jāyaṃte mattulyā mānavā bhuvi || 3 ||
[Analyze grammar]

na vratainopavāsaiśca na tīrthagamanairapi |
mahāpathādimaraṇairna yajñairna śrutena ca || 4 ||
[Analyze grammar]

prāpyate mama loko'yaṃ duṣprāpyastridaśairapi |
pārthasnehānmahābhāga pravakṣyāmi hitaṃ tava || 5 || |
gobrāhmaṇārthe maraṇaṃ prāptaṃ yena sumedhasā |
prayāge'naśanaṃ vāpi pūjito vātha śaṃkaraḥ || 5 ||
[Analyze grammar]

prayāti brahmasālokyaṃ śrutireṣā sanātanī |
yena matsamatāṃ yāti tatte vakṣyāmyataḥ param || 7 ||
[Analyze grammar]

dānaṃ hiraṇyagarbhākhyaṃ kathyamānaṃ nibodha me |
agnerapatyaṃ prathamaṃ suvarṇamiha paṭhyate || 8 ||
[Analyze grammar]

pavitraṃ sarvabhūtānāṃ pāvanaṃ paramaṃ mahat |
paryāyanāma tasyoktaṃ hiraṇyaṃ sārvalaukikam || 9 ||
[Analyze grammar]

tadapāṃ garbhamāviśya punarjātaṃ tu bhūtale |
yaśca tadbrāhmaṇe dadyānmattulyo jāyate hi saḥ || 10 ||
[Analyze grammar]

yudhiṣṭhira uvāca |
vidhānaṃ tasya deveśa kathayasva sanātana |
yatpramāṇaṃ yathācaitaddātavyaṃ parameśvara || 11 ||
[Analyze grammar]

śrīkṛṣṇa uvāca |
parvakāle pradātavyaṃ dānametanmahāmate |
ayane viṣuve caiva grahaṇe śaśisūryayoḥ || 12 ||
[Analyze grammar]

vyatīpāte'tha kārtikyāṃ janmarkṣe vā narottama |
duḥsvapnadarśane caiva grahapīḍāsu caiva hi || 13 ||
[Analyze grammar]

prayāge naimiṣe caiva kurukṣetre tathārbude |
gaṃgāyāṃ yamunāyāṃ ca siṃdhusāgarasaṃgame || 14 ||
[Analyze grammar]

puṇyanadyaśca dānesminpraśastāḥ syurna saṃśayaḥ |
yatra vā rocate rājangṛhe devakule'thavā || 15 ||
[Analyze grammar]

ārāme vā taḍāge vā śucau deśe vidhānataḥ |
tatra bhūśodhanaṃ kuryātprāgudakpravaṇaṃ śubham || 16 ||
[Analyze grammar]

hastā dvādaśa kartavyaṃ maṃḍapaṃ tu suśobhanam |
staṃbhairmanoharairyuktyārdraśākhābhiranvitam || 17 ||
[Analyze grammar]

tanmadhye vedikāṃ kuryātpaṃcahastāmalakṛtām |
vitānamupariṣṭācca puṣpamālāvalaṃbitum || 18 ||
[Analyze grammar]

hiraṇyagarbhaṃ tanmadhye prathame'hani kalpayet |
tasya pramāṇaṃ vakṣyāmi rūpaṃ vai sthaṃḍilodbhavam || 19 ||
[Analyze grammar]

śilpinaṃ pūjayetpūrvaṃ vāsobhirbhūṣaṇaistathā |
brāhmaṇānvācayetpaścāttataḥ karma samārabhet || 20 ||
[Analyze grammar]

suvarṇena saṃśuddhena śaktitaḥ kārayedbudhaḥ |
aṃgulāni catuḥṣaṣṭirdairghyaṃ ca parikīrtitam || 21 ||
[Analyze grammar]

tribhāgahīnaṃ vadane mūle tasyārddhavistaram |
vartulaṃ karṇikākāraṃ cārugraṃthivivarjitam || 22 ||
[Analyze grammar]

pidhānamupariṣṭācca kartavyaṃ cāṃgulādhikam |
astrāṇi daśa kurvīta nālaṃ sūryaṃ ca kāṃcanam || 23 ||
[Analyze grammar]

dātraṃ sapaṭṭikaṃ caiva sarvopaskaraṇānvitam |
sūcīkṣuraśca haimāni tatsarvaṃ parikalpayet || 24 ||
[Analyze grammar]

pārśvataḥ sthāpayettasya hemadaṃḍakamaṃḍalū |
chatrikāpādukāyugmaṃ vajravaiḍūryamaṃḍitam || 25 ||
[Analyze grammar]

evaṃ lakṣaṇasaṃyuktaṃ kṛtvā garbhaṃ vicakṣaṇaḥ |
brahmaghoṣeṇa mahatā śaṃkhatūryaraveṇa ca || 26 ||
[Analyze grammar]

hastinā śakaṭenātha rājanbrahmarathena vā |
ānayenmaṃḍapaṃ kṛtvā pradakṣiṇamataṃdritaḥ || 27 ||
[Analyze grammar]

tiladroṇoparigataṃ vedīmadhye'dhivāsayet |
samālabhya punaḥ sarvaṃ kuṃkumena sugaṃdhinā || 28 ||
[Analyze grammar]

kauśeyavāsasī śubhre tatastaṃ paridhāpayet |
samaṃtātpuṣpamālābhiḥ pūjayedbhaktitaḥ sudhīḥ || 29 ||
[Analyze grammar]

dhūpaiḥ sudhūpitaṃ kṛtvā maṃtrametamudīrayet |
bhūrlokapramukhālokāstava garbhe vyavasthitāḥ || 30 ||
[Analyze grammar]

brahmādayastathā devā namaste bhuvanodbhava |
namaste bhuvanādhāra namaste bhuvaneśvara || 31 ||
[Analyze grammar]

namo hiraṇyagarbhāya garbhe yasya pitāmahaḥ |
evaṃ saṃpūjayitvā tu tau rātrimadhivāsayet || 32 ||
[Analyze grammar]

vedyāścaturdiśaṃ caiva kuṃḍāni parikalpayet |
catvāri caturasrāṇi teṣu homo vidhīyate || 33 ||
[Analyze grammar]

catuścāraṇikāstatra brāhmaṇā maṃtrapāragāḥ |
homaṃ kuryurjitātmāno mauninaḥ sarva eva te || 34 ||
[Analyze grammar]

sarvābharaṇasaṃpannāḥ sarve cāhatavāsasaḥ |
tāmrapātradvayopetā gaṃdhapuṣpādipūjitāḥ || 35 ||
[Analyze grammar]

vedyāḥ pūrvottare bhāge grahavediṃ prakalpayet |
tatra grahāṃllokapālānbrahmaviṣṇumaheśvarān || 36 ||
[Analyze grammar]

pūjayetsvarṇaghaṭitānpuṣpadhūpavilepanaiḥ |
patākābhiralaṃkṛtya maṃḍapaṃ toraṇaistathā || 37 ||
[Analyze grammar]

kuṃbhadvayaṃ ca dvāreṣu sthāpayedratnasaṃyutam |
tulāpuruṣamaṃtraiśca lokapālabaliṃ kṣipet || 38 ||
[Analyze grammar]

pālāśyaḥ samidhastatra praśastā homakarmaṇi |
caruścaivendradaivatyastilā gavyaṃ ghṛtaṃ tathā || 39 ||
[Analyze grammar]

svaliṃgairhomayetpūrvaṃ maṃtrairvyāhṛtibhiḥ pumān |
ayute dve ca homasya saṃkhyāmāhurmanīṣiṇaḥ || 40 ||
[Analyze grammar]

yajamānastataḥ snātvā śuklāṃbaradharaḥ śuciḥ |
bhaktyā hiraṇyagarbhaṃ ca parvakāle samarcayet || 41 ||
[Analyze grammar]

namo hiraṇyagarbhāya viśvagarbhāya vai namaḥ |
carācarasya jagato gṛhabhūtāya te namaḥ || 42 ||
[Analyze grammar]

mātrāhaṃ janitaḥ pūrva martyadharmāsurottama |
tvadgarbhasaṃbhavādadya divyadeho bhavāmyaham || 43 ||
[Analyze grammar]

ityuccārya svayaṃ bhaktyā kṛtvā caiva pradakṣiṇām |
kṣīrājyadadhisaṃpūrṇaṃ tadgarbhaṃ praviśedbudhaḥ || 44 ||
[Analyze grammar]

sauvarṇaṃ dharmarājaṃ tu savye kṛtvā kare tataḥ |
bhāskaraṃ dakṣiṇe caiva muṣṭiṃ baddhvā prayatnataḥ || 45 ||
[Analyze grammar]

jānvoraṃtarataścaiva śiraḥ kṛtvā samāhitaḥ |
ucchvāsapaṃcaka tiṣṭheccetasā ciṃtayañchivam || 46 ||
[Analyze grammar]

garbhādhānaṃ puṃsavanaṃ sīmaṃtonnayanaṃ tathā |
kuryurhiraṇyagarbhasya tataste dvijapuṃgavāḥ || 47 ||
[Analyze grammar]

jātakarmādikāḥ kuryuḥ kriyāḥ ṣoḍaśa cāparāḥ |
tata utthāya niḥsṛtya punaḥ kuryātpradakṣiṇām || 48 ||
[Analyze grammar]

tāvanmukhaṃ na paśyeta kasyacinnṛpasattama |
sauvarṇā pṛthivī yāvanna dṛṣṭā spaṣṭacakṣuṣā || 49 ||
[Analyze grammar]

tataḥ snānaṃ prakurvīta brahmaghoṣapuraḥsaram |
aṣṭau dvijāḥ suvarṇāṃgā sauvarṇaiḥ kalaśaiḥ śubhaiḥ || 50 ||
[Analyze grammar]

raupyairauduṃbarairvāpi mṛṇmayairvā suśobhanaiḥ |
dadhyakṣatavicitrāṃgairāmrapallavaśobhitaiḥ || 51 ||
[Analyze grammar]

puṣpairāveṣṭitagrīvairavraṇaiḥ kalaśairdṛḍhaiḥ |
catuṣkamadhye saṃsthāpya pīṭhamavraṇamuttamam || 52 ||
[Analyze grammar]

tatra sthāpya mahābhāga yajamānaṃ dvijottamāḥ |
devasya tveti maṃtreṇa kuryurasyābhiṣecanam || 53 ||
[Analyze grammar]

adya jātasya teṃ'gāni abhiṣekṣyāmahe vayam |
divyenānena vapuṣā ciraṃjīvamukhī bhava || 54 ||
[Analyze grammar]

evaṃ kṛtābhiṣekastu yajamānaḥ samāhitaḥ |
dadyāddhiraṇyagarbhaṃ taṃ sodakenaiva pāṇinā || 55 ||
[Analyze grammar]

tānsaṃpūjya ca bhāvena bahubhyo vā tadājñayā |
yajñopakaraṇaṃ sarvaṃ gurave vinivedayet || 56 ||
[Analyze grammar]

pādukopānahau caiva cchatracāmarabhājanam |
anyeṣāṃ caiva viprāṇāṃ ye ca tatra sabhāsadaḥ || 57 ||
[Analyze grammar]

teṣāṃ caiva pradātavyaṃ dānaṃ cātra viśeṣataḥ |
dīnāṃdhakṛpaṇānāṃ ca dātavyaṃ sārvakāmikam || 58 ||
[Analyze grammar]

annasatraṃ ca kartavyaṃ yāvaddānaparigrahaḥ |
anena vidhinā yastu dānametatprayacchati || 59 ||
[Analyze grammar]

sa kulaṃ tārayetsarvaṃ devalokaṃ sa gacchati |
vimānavaramāruhya pañcayojanavistṛtam || 60 ||
[Analyze grammar]

vāpīkūpataḍāgādyairjalasthānairalaṃkṛtam |
udyānaśatasaṃsthānaṃ padmākaraniṣevitam || 61 ||
[Analyze grammar]

prāsādaśatasaṃkīrṇaṃ varastrīśatasevitam |
vīṇāveṇumṛdaṃgānāṃ śabdairāpūritaṃ mahat || 62 ||
[Analyze grammar]

bhūmayo yatra rājendra divyā maṇimayāḥ śubhāḥ |
vedikābhirvicitrābhiḥ śobhitaṃ bhāskaraprabham || 63 ||
[Analyze grammar]

dhṛtaṃ stambhasahasreṇa sukṛtaṃ viśvakarmaṇā |
patākābhirvicitrābhirvajraiśca samalaṃkṛtam || 64 ||
[Analyze grammar]

tadāruhya vimānāgryaṃ vidyādharagaṇairyutam |
sa yāti lokaṃ śakrasya śakreṇa saha modate || 65 ||
[Analyze grammar]

manvantaraśate jāte karmabhūmau prajāyate |
jaṃbūdvīpamaśeṣaṃ tu bhuṃkte divyaparākramaḥ || 66 ||
[Analyze grammar]

dhārmikaḥ satyaśīlaśca brahmaṇyo guruvatsalaḥ |
daśa janmrānyasau rājā jāyate rogavarjitaḥ || 67 ||
[Analyze grammar]

yastvidaṃ śṛṇuyādbhaktyā rahasyaṃ pāpanāśanam |
so'pi varṣaśataṃ sāgraṃ suraloke mahīyate || 68 ||
[Analyze grammar]

garbhaṃ hiraṇyaracitaṃ vidhivatpraviśya saṃskārasaṃskṛtatanuḥ punareva tasmāt |
niḥsṛtya taddvijavarāya nivedya bhaktyā mārtaṇḍavaddivi virājati divyadehaḥ || 69 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde hiraṇyagarbhadānavidhivarṇanaṃ nāma ṣaṭsaptatyuttaraśatata tamo'dhyāyaḥ || 176 ||
[Analyze grammar]