Chapter 166

śrīkṛṣṇa uvāca |
ataḥ paraṃ pravakṣyāmi dānamatyadbhutaṃ tava |
yena dattena rājendra sarvadānaprado bhavet || 1 ||
[Analyze grammar]

sarvapāpapraśamanaṃ sarvasaukhyapradāyakam |
prayuktaṃ halapaṃktyā ca sarvadānaphalapradam || 2 ||
[Analyze grammar]

paṃktirdaśahalā proktā halaṃ syāttu caturgavam |
sāradārumayānyāhurhalāni daśa paṃḍitāḥ || 3 ||
[Analyze grammar]

sauvarṇapaṭṭasaṃnaddha ratnavaṃti śubhāni ca |
yūnaśca balino bhavyānvyaṃgahīnānsvalaṃkṛtān || 4 ||
[Analyze grammar]

vastrakāṃcanapuṣpaiśca caṃdanairdigdhamastakān |
abhagnānyojayetteṣu lāṃgaleṣu vṛṣāñchubhān || 5 ||
[Analyze grammar]

yoktrāṇi yugalagnāni savṛṣāṇi ca kārayet |
pratodakīlakābaṃdhasarvopakaraṇānvitām || 6 ||
[Analyze grammar]

evaṃvidha halaiḥ kuryāttaṃ yuktāṃ halapaṃktikām |
karkaṭaṃ kheṭakaṃ cāpi grāmaṃ vā sasyamālinam || 7 ||
[Analyze grammar]

nivartanaśataṃ vāpi tadarddhaṃ vā prakalpayet |
evaṃvidhāṃ parvakāle dadyātprayatamānasaḥ || 8 ||
[Analyze grammar]

kārtikyāṃ cātha vaiśākhyāmuttare vā'yane tathā |
janmarkṣe grahaṇe vāpi viṣuve vā pradāpayet || 9 ||
[Analyze grammar]

brāhmaṇānvedasaṃpannānvyaṃgahīnānalaṃkṛtān |
śrotriyāṃśca vinītāṃśca halasaṃkhyānnimaṃtrayet || 10 ||
[Analyze grammar]

daśahastapramāṇena maṃḍapaṃ kārayedbudhaḥ |
pūrve dvikuḍamekaṃ vā hastamātraṃ suśobhanam || 11 ||
[Analyze grammar]

tatra vyāhṛtibhirhomaṃ kuryuste dvijasattamāḥ |
parjanyādityarudrebhyaḥ pāyasena yajedbudhaḥ || 12 ||
[Analyze grammar]

pālāśyaḥ samidhastatra sājyaṃ kṛṣṇāstilāstathā |
adhivāsya ca tāṃ paṃktiṃ dhānyamadhyagatāṃ śubhām || 13 ||
[Analyze grammar]

tataḥ sarvasamīpe tu snātaḥ śuklāṃbaraḥ śuciḥ |
halapaṃktiṃ yojayitvā yajamānaḥ samāhitaḥ || 14 ||
[Analyze grammar]

tūryaśaṃkhaninādaiśca brahmaghoṣaiḥ supuṣkalaiḥ |
imamuccārayenmaṃtraṃ gṛhītakusumāṃjaliḥ || 15 ||
[Analyze grammar]

yasmāddevagaṇāḥ sarve hale tiṣṭhaṃti sarvadā |
vṛṣaskaṃdhe saṃnihitāstasmādbhaktiḥ śivestu me || 16 ||
[Analyze grammar]

yasmācca bhūmidānasya kalāṃ nārhaṃti ṣoḍaśīm |
dānānyanyāni me bhaktirdharme cāstu dṛḍhā sadā || 17 ||
[Analyze grammar]

evamukte tataḥ paṃktiṃ prerayeyurdvijottamāḥ |
bījāni sarvaratnāni suvarṇaṃ rajataṃ tathā || 18 ||
[Analyze grammar]

svayaṃ paścāddhale lagno viprahasteṣu nirvapet |
yāyānnivartanaṃ yāvattatastu viramedbudhaḥ || 19 ||
[Analyze grammar]

pradakṣiṇaṃ tataḥ kṛtvā viprāṇāṃ pratipādya ca |
sadakṣiṇāṃ vidhānena praṇipatya visarjayet || 20 ||
[Analyze grammar]

anena vidhinā yastu dānametatprayacchati |
ekaviṃśatkulopetaḥ svargaloke mahīyate || 21 ||
[Analyze grammar]

saptajanmasu dāridryaṃ daurbhāgyaṃ vyādhayastathā |
na paśyati ca bhūmestu tathaivādhipatirbhavet || 22 ||
[Analyze grammar]

dṛṣṭvā taddīyamānaṃ tu dānametadyudhiṣṭhira |
ājanmanaḥ kṛtātpāpānmucyate nātra saṃśayaḥ || 23 ||
[Analyze grammar]

dānametatpradattaṃ hi dilīpena yayātinā |
śibinā niminā caiva bharatena ca dhīmatā || 24 ||
[Analyze grammar]

te'dyāpi divi modaṃte dānasyāsya prabhāvataḥ |
tasmātsarvaprayatnena dānametannṛpottama || 25 ||
[Analyze grammar]

dātavyaṃ bhaktiyuktena striyā vā puruṣeṇa vā |
yadi paṃktirna vidyeta paṃca vā caturo'tha vā || 26 ||
[Analyze grammar]

ekamapyuktavidhinā halaṃ deyaṃ vicakṣaṇaiḥ || 27 ||
[Analyze grammar]

ye saṃti lāṃgalamukhottharajovikārā yāvaṃti tadgatadhuraṃdhara romakāṇi |
tāvaṃti śaṃkarapure triyugāni tiṣṭhetpaṃktipradānamiha yatkurute manuṣyaḥ || 28 ||
[Analyze grammar]

yuktāṃ vṛṣairatibalairhalapaṃktimetāṃ puṇyehni bhaktisahitāndvijapuṃgavebhyaḥ |
yacchaṃti ye sukṛtino vasudhāsametāṃ te bhūbhujo bhuvamupetya bhavaṃti bhavyāḥ || 29 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇa yudhiṣṭhirasaṃvāde halapaṃktidānavidhivarṇanaṃnāma ṣaṭṣaṣṭyuttaraśatatamo'dhyāyaḥ || 166 ||
[Analyze grammar]