Chapter 140

śrīkṛṣṇa uvāca |
purā vāmanarūpeṇa yācayitvā dharāmimām |
baliyajñe hariḥ sarvaṃ krāṃtavānvikramaistribhiḥ || 1 ||
[Analyze grammar]

indrāya dattavānrājyaṃ baliṃ pātālavāsinam |
kṛtvā daityapatervāsamahorātraṃ punarnṛpa || 2 ||
[Analyze grammar]

ekameva hi bhogārthaṃ balirājyeticihnitam |
sarahasyaṃ tadetatte kathayāmi narottama || 3 ||
[Analyze grammar]

kārttike kṛṣṇapakṣasya pañcadaśyāṃ niśāgame |
yatheṣṭaceṣṭā daityānāṃ rājyaṃ teṣāṃ mahītale || 4 ||
[Analyze grammar]

yudhiṣṭhira uvāca |
niśśeṣeṇa hṛṣīkeśa kaumudīṃ brūhi me prabho |
kimarthaṃ dīyate dānaṃ tasyāṃ kā devatā bhavet || 5 ||
[Analyze grammar]

kiṃsvittasyai bhaveddeyaṃ kebhyo devaṃ janārdana |
praharṣaḥ ko'tra nirdiṣṭaḥ krīḍā kātra prakīrtitā || 6 ||
[Analyze grammar]

śrīkṛṣṇa uvāca |
kārttike kṛṣṇapakṣe ca caturdaśyāṃ dinodaye |
avaśyameva kartavyaṃ snānaṃ narakabhīrubhiḥ || 7 ||
[Analyze grammar]

apāmārgapallavānvā bhrābhayenmastakopari |
sītāloṣṭasamāyuktasakaṃṭakadalānvitān || 8 ||
[Analyze grammar]

hara pāpamapāmārga bhrāmyamāṇaṃ punaḥpunaḥ |
āpadaṃ kilbiṣaṃ cāpi mamāpahara sarvaśaḥ |
apāmārga namastestu śarīraṃ mama śodhaya || 9 ||
[Analyze grammar]

tataśca tarpaṇaṃ kāryaṃ dharmarājasya nāmabhiḥ |
yamāya dharmarājāya mṛtyave cāṃtakāya ca |
vaivasvatāya kālāya sarvabhūtakṣayāya ca || 10 ||
[Analyze grammar]

narakāya pradātavyo dīpaḥ saṃpūjya devatāḥ |
tataḥ pradoṣasamaye dīpāndadyānmanoramān || 11 ||
[Analyze grammar]

brahmaviṣṇuśivādīnāṃ bhavaneṣu maṭheṣu ca |
kūṭāgāreṣu caityeṣu sabhāsu ca nadīṣu ca || 12 ||
[Analyze grammar]

prākārodyānavāpīṣu pratolīniṣkuṭeṣu ca |
siddhārhabuddhacāmuṃḍābhairavāyataneṣu ca |
maṃdurāsu viviktāsu hastiśālāsu caiva hi || 13 ||
[Analyze grammar]

evaṃ prabhātasamaye'māvāsyāyāṃ narādhipa |
snātvā devānpitṝnbhaktyā saṃpūjyātha praṇamya ca || 14 ||
[Analyze grammar]

kṛtvā tu pārvaṇaṃ śrāddhaṃ dadhikṣīraghṛtādibhiḥ |
bhojyairnānāvidhairviprānbhojayitvā kṣamāpya ca || 15 ||
[Analyze grammar]

tato'parāhṇasamaye ghoṣayennagare nṛpaḥ |
adya rājyaṃ balerlokā yatheṣṭaṃ modyatāmiti || 16 ||
[Analyze grammar]

lokaścāpi pare hṛṣyetsudhādhavalitājire |
vṛkṣacandanamālāḍhyaiścarcite ca gṛhegṛhe || 17 ||
[Analyze grammar]

dyūtapānaratodṛptanaranārīmanohare |
nṛtyavāditrasaṃghuṣṭe samprajvalitadīpake || 18 ||
[Analyze grammar]

anyonyaprītisaṃhṛṣṭadattalābhena vai jane |
tāṃbūlahṛṣṭa vadane kuṅkumakṣodacarcite || 19 ||
[Analyze grammar]

dukūlapaṭṭanepathye svarṇamāṇikyabhūṣite |
adbhutodbhaṭaśṛṃgārapradarśitakutūhale || 20 ||
[Analyze grammar]

yuvatījanasaṃkīrṇavastrojjvalavihāriṇi |
dīpamālākule ramye vidhvastadhvāṃtasañcaye |
pradoṣe doṣarahite śastadoṣāgame śubhe || 21 ||
[Analyze grammar]

śaśipūrṇamukhābhiśca kanyābhiḥ kṣiptataṇḍulam |
nīrājanaṃ prakartavyaṃ vṛkṣaśākhāsu dīpakaiḥ || 22 ||
[Analyze grammar]

bhrāmyamāṇo nato mūrghni manujānāṃ janādhipaḥ |
vṛkṣaśākhāṃtadīpānāṃ nirastāddarśanādvrajet |
nīrājanaṃ tu teneha procyate vijayapradam || 23 ||
[Analyze grammar]

tasmājjanena kartavyaṃ rakṣodoṣabhayāpaham |
yātrāvihārasañcāre jayajīveti vādinā || 24 ||
[Analyze grammar]

kṣudropasargarahite rājacaurabhayojjhite |
mitrasvajanasambandhisuhatpremānuraṃjite || 25 ||
[Analyze grammar]

tato'rddharātrasamaye svayaṃ rājā vrajetpuram |
avalokayituṃ ramyaṃ padbhyāmeva śanaiḥśanaiḥ || 26 ||
[Analyze grammar]

mahatā tūryaghoṣeṇa jvaladbhirhastadīpakaiḥ |
kṛtaśobhāṃ purīṃ paśyetkṛtarakṣāṃ svakairnaraiḥ || 27 ||
[Analyze grammar]

taṃ dṛṣṭvā mahadāścaryamṛddhiṃ caivātmanaḥ śubhām |
balirājyapramodaṃ ca tataḥ svagṛhamāvrajet || 28 ||
[Analyze grammar]

evaṃ gate niśārdhe tu jane nidrārdralocane |
tāvannagaranārībhiḥ śūrpaḍiṃḍimavādanaiḥ |
niṣkrāmyate prahṛṣṭābhiralakṣmīḥ svagṛhāṃgaṇāt || 29 ||
[Analyze grammar]

tataḥ prabuddhe sakale jane jātamahotsave |
mālyadīpakahaste ca snehanirbharalocane || 30 ||
[Analyze grammar]

veśyā vilāsinī sārdhaṃ svasti maṃgalakāriṇī |
gṛhādgṛhaṃ vrajantī ca pādābhyaṃgapradāyinī || 31 ||
[Analyze grammar]

piṣṭakodvartanapare guruśuśrūṣaṇākule |
dvijābhivādanapare sukharājyābhivīkṣaṇe || 32 ||
[Analyze grammar]

suvāsinībhyo dāne ca dīyamāne yadṛcchayā |
yathāprabhātasamaye rājārhamānayejjanam || 33 ||
[Analyze grammar]

sadbhāvenaiva santoṣyā devāḥ satpuruṣā dvijāḥ |
itare cānnapānena vākpradānena paṃḍitāḥ || 34 ||
[Analyze grammar]

vastraistāṃbūladānaiśca puṣpakarpūrakuṃkumaiḥ |
bhakṣyairuccāvacairbhojyairantaḥpuravilāsinīḥ || 35 ||
[Analyze grammar]

grāmairviṣayadānaiśca sāmaṃtanṛpatīndhanaiḥ |
padātīnaṅgasaṃlagnāngraiveyakaṭakaiḥ svakān || 36 ||
[Analyze grammar]

svayaṃ rājā toṣayetsa janānbhṛtyānpṛthakpṛthak |
yathārhaṃ toṣayitvā tu tato mallanaṭānbhaṭān || 37 ||
[Analyze grammar]

vṛṣabhānmahiṣāṃścaiva yudhyamānānparaiḥ saha |
gajānaśvāṃśca yodhāṃśca padātīnsamalaṃkṛtān || 38 ||
[Analyze grammar]

maṃcārūḍhaḥ svayaṃ paśyennaṭanartakacāraṇān |
kruddhāpayedānayecca gomahiṣyādikaṃ tataḥ || 39 ||
[Analyze grammar]

diṣṭyā kāryaṃ payojyotiruktipratyuktikā vadet |
tatoparāhnasamaye pūrvasyāṃ diśi bhārata || 40 ||
[Analyze grammar]

mārgapālīṃ prabadhnīyāttuṃgastaṃbhe'tha pādape |
kuśakāśamayīṃ divyāṃ saṃbhave bahubhirvṛtām || 41 ||
[Analyze grammar]

pūjayitvā gajānvājīnsārdhe yāmatraye gate |
gāvo vṛṣāḥ samahiṣā maṃḍitā ghaṭikotkaṭāḥ || 42 ||
[Analyze grammar]

kṛte home dvijendraistu gṛhṇīyānmārgapālikām |
rāṣṭrabhojyena dhārābhiḥ sahasreṇa śatena vā || 43 ||
[Analyze grammar]

svaśaktyapekṣayā vāpi gṛhṇīyādvāmabhojanaiḥ |
mātuḥ kulaṃ pitṛkulamātmānaṃ sahabaṃdhubhiḥ || 44 ||
[Analyze grammar]

saṃtārayetsa sakalaṃ mārgapālīṃ dadāti yaḥ |
nīrājanaṃ ca tatraiva kāryaṃ rājñe jayapradam || 45 ||
[Analyze grammar]

mārgapālītalenetthaṃ hayā gāvo gajā vṛṣāḥ |
rājāno rājaputrāśca brāhmaṇā śūdrajātayaḥ || 46 ||
[Analyze grammar]

mārgapālīṃ samullaṃghya nīrujaḥ syātsukhī sadā |
kṛtvaitatsarvameveha rātrau daityapaterbaleḥ || 47 ||
[Analyze grammar]

pūjāṃ kuryānnaraḥ sākṣādbhūmau maṃḍalake kṛte |
balimālikhya daityendraṃ varṇakaiḥ paṃcaraṃgakaiḥ || 48 ||
[Analyze grammar]

sarvābharaṇasaṃpūrṇaṃ viṃdhyāvalyā sahāsitam |
kūṣmāṃḍabāṇajaṃghorumuradānavasaṃvṛtam || 49 ||
[Analyze grammar]

saṃpūrṇahṛṣṭavadanaṃ kirīṭotkaṭakuṇḍalam |
dvibhujaṃ daityarājānaṃ kārayitvā nṛpaḥ svayam || 50 ||
[Analyze grammar]

gṛhasya madhye śālāyāṃ viśālāyāṃ tato'rcayet |
bhrātṛmaṃtrijanaiḥ sārddhaṃ saṃtuṣṭo vaṃdibhiḥ stutaḥ || 51 ||
[Analyze grammar]

kamalaiḥ kumudaiḥ puṣpaiḥ kahlārai raktakotpalaiḥ |
gandhadhūpānnanaivedyairakṣatairguḍapūpakaiḥ || 52 ||
[Analyze grammar]

madyamāṃsasurālehyadīpavartyupahārakaiḥ |
maṃtreṇānena rājendra samaṃtrī sapurohitaḥ || 53 ||
[Analyze grammar]

balirāja namastubhyaṃ virocanasuta prabho |
bhaviṣyendrasurārāte pūjeyaṃ pratigṛhyatām || 54 ||
[Analyze grammar]

evaṃ pūjāṃ nṛpaḥ kṛtvā rātrau jāgaraṇaṃ tataḥ |
kārayetprekṣaṇīyādi naṭakṣatrakathānakaiḥ || 55 ||
[Analyze grammar]

lokaścāpi gṛhasyāṃte śayyāyāṃ śuklataṃḍulaiḥ |
saṃsthāpya balirājānaṃ phalaiḥ puṣpaiśca pūjayet || 56 ||
[Analyze grammar]

balimuddiśya dīyaṃte dānāni kurunandana |
yāni tānyakṣayāṇyāhurmayaivaṃ saṃpradarśitam || 57 ||
[Analyze grammar]

yadasyāṃ dīyate dānaṃ svalpaṃ vā yadi vā bahu |
tadakṣayaṃ bhavetsarvaṃ viṣṇoḥ prītikaraṃ param || 58 ||
[Analyze grammar]

viṣṇunā vasudhā labdhā prītena balaye punaḥ |
upakārakaro dattaścāsurāṇāṃ mahotsavaḥ || 59 ||
[Analyze grammar]

tataḥ prabhṛti rājendra pravṛttā kaumudī punaḥ |
sarvopadravavidrāvi sarvavighnavināśinī || 60 ||
[Analyze grammar]

lokaśokaharī kāmyā dhanapuṣṭisukhāvahā |
kuśabdena mahī jñeyā mudī harṣe tataḥ param || 61 ||
[Analyze grammar]

dhātujñairnaigamajñaiśca tenaiṣā kaumudī smṛtā |
kau modante janā yasyāṃ nānābhāvaiḥ parasparā || 62 ||
[Analyze grammar]

hṛṣṭāstuṣṭāḥ sukhāyattāstenaiṣā kaumudī smṛtā |
kumudāni baleryasmāddīyante'syāṃ yudhiṣṭhira || 63 ||
[Analyze grammar]

arthārthe pārtha bhūmau ca tenaiṣā kaumudī smṛtā |
ekamevamahorātraṃ varṣe varṣe viśāṃpate || 64 ||
[Analyze grammar]

dattaṃ dānavarājasya ādarśamiva bhūtale |
yaḥ karoti nṛpo rāṣṭraṃ tasya vyādhibhayaṃ kutaḥ || 65 ||
[Analyze grammar]

kuta īti bhayaṃ tatra nāsti mṛtyukṛtaṃ bhayam |
subhikṣaṃ kṣemamārogyaṃ sarvasampada uttamāḥ || 66 ||
[Analyze grammar]

nīrujaśca janāḥ sarve sarvopadravavarjitāḥ |
kaumudīkaraṇādrājanbhavatīha mahītale || 67 ||
[Analyze grammar]

yo yādṛśena bhāvena tiṣṭhatyasyāṃ yudhiṣṭhira |
harṣadainyādirūpeṇa tasya varṣaṃ prayāti hi || 68 ||
[Analyze grammar]

rudite roditi varṣaṃ hṛṣṭo varṣaṃ prahṛṣyati |
bhuktau bhoktā bhavedvarṣaṃ svasthaḥ svastho bhavediti || 69 ||
[Analyze grammar]

tasmātprahṛṣṭaistuṣṭaiśca kartavyā kaumudī naraiḥ |
vaiṣṇavī dānavī ceyaṃ tithiḥ paitrī yudhiṣṭhira || 70 ||
[Analyze grammar]

upaśamitameghanādaṃ prajvalitadaśānanaṃ ramitarāmam |
rāmāyaṇamiva subhagaṃ dīpadinaṃ haratu vo duritam || 71 ||
[Analyze grammar]

kūṣmāṇḍādānaramyaṃ kuvalayakhaṇḍaiśca dhātukābhadram |
śaradiva harigatanidraṃ dīpadinaṃ haratu vo duritam || 72 ||
[Analyze grammar]

dīpotsave janitasarvajanapramodāṃ kurvaṃti ye sumanaso balirājapūjām |
dānopabhogasukhavṛddhiśatākulānāṃ harṣeṇa varṣamiha pārthiva yāti teṣām || 73 ||
[Analyze grammar]