Chapter 135

śrīkṛṣṇa uvāca |
gaurīṃ vivāhya jagrāha haraḥ pāśupataṃ vratam |
umāpatiḥ paśupatirdhyānāsakto babhūva ha || 1 ||
[Analyze grammar]

brahmādibhiḥ samāmaṃtrya vibudhaiḥ putralabdhaye |
gauryā manobhilaṣitapūraṇāya praharṣitaiḥ || 2 ||
[Analyze grammar]

prahitaḥ kṣobhaṇārthāya samartha iti manmathaḥ |
tato māraḥ smaraḥ kāmopyājagāma tamāśramam || 3 ||
[Analyze grammar]

ratiprītimadonmādavasaṃtaśrīsahāyavān |
nidhānavāruṇīdarpaśṛṃgāraiḥ parivāritaḥ || 4 ||
[Analyze grammar]

āmrāśokavanottaṃso mālatīkṛtaśekharaḥ |
vīṇāmṛdaṃgasaṃgītakokilāśṛṃgadūtakaḥ || 5 ||
[Analyze grammar]

jhallarīvādyasaṃghuṣṭabhāṃḍāgārikalekhakaḥ |
pānamattāṅganārūḍho hindolāścaryamaṃtrimān || 6 ||
[Analyze grammar]

dakṣiṇānilagaṃdhāḍhyaḥ kaṭākṣekṣitavarṣavān |
mahārājādhirājo vā smaraḥ prāpto harāṃtikam || 7 ||
[Analyze grammar]

sa puṣpacāpamākṛṣya madanonmādanaṃ śaram |
cikṣepa tripuraghnāya samādherbhaṃgahetave || 8 ||
[Analyze grammar]

buddhvā taṃ tasya saṃkalpaṃ rudraḥ krodhājjvalanruṣā |
lalāṭādvahnimasṛjattṛtīya nayanāddharaḥ || 9 ||
[Analyze grammar]

kāmo vilokitastena bhasmībhūtaśca tatkṣaṇāt |
dagdhaṃ dṛṣṭvā smaraṃ śokādratiprītī sthite sadā || 10 ||
[Analyze grammar]

karuṇaṃ vilapaṃtyau te sarvamanyaddiśaṃ gatam |
tataḥ śokārtahṛdayā gaurī rudramuvāca ha || 11 ||
[Analyze grammar]

bhagavannasmadarthe taṃ kāmaṃ nirdagdhavānasi |
tenaite paśya nāryau te kāmasya ruditaḥ katham || 12 ||
[Analyze grammar]

kuru prasādaṃ deveśa ratiprītye vṛṣadhvaja |
saṃjīvaya smaraṃ śaṃbho mūrtimaṃtaṃ punaḥ kuru || 13 ||
[Analyze grammar]

tacchrutvā tu mahādevo hṛṣṭaḥ provāca pārvatīm |
upaplutaṃ jagatsarvaṃ manmathena śarīriṇā || 14 ||
[Analyze grammar]

mayā dagdhasya kāmasya punarāgamanaṃ kutaḥ |
kiṃ tu te mānayanvākyaṃ karomi saphalaṃ priye || 15 ||
[Analyze grammar]

asminvasaṃtasamaye śuklapakṣe trayodaśī |
asyāṃ manobhavo devi bhaviṣyati śarīravān || 16 ||
[Analyze grammar]

etena bījabhūtena jagadvarṇiṣyate'khilam |
evaṃ varamimaṃ dattvā manmathāya yudhiṣṭhira || 17 ||
[Analyze grammar]

jagāma himavacchṛṃgaṃ kailāsaṃ pārvatīpriyaḥ |
tadetatsarvamākhyātaṃ smarasya caritaṃ nṛpa || 18 ||
[Analyze grammar]

pūjāvidhānamaparaṃ kathayāmi śṛṇuṇva tat |
asyāṃ snātvā trayodaśyāmaśokākhyaṃ nagaṃ likhet || 19 ||
[Analyze grammar]

sindūrajanitairaṃgairatiprīti samanvitam |
kāmadevaṃ vasaṃtaṃ ca vājivaktraṃ jhaṣadhvajam || 20 ||
[Analyze grammar]

sauvarṇaṃ vā mahārāja vārkṣaṃ citramathāpi vā |
līlāvilāsagamanaṃ garvitaṃ sāpsa rogaṇam || 21 ||
[Analyze grammar]

gandharvagītavāditraprekṣaṇīyasamākulam |
naṃdyāvartiratikrīḍāprītividyādharairyutam || 22 ||
[Analyze grammar]

madhyāhne bhojayedbhaktyā bhakṣyairdhūpaiḥsragaṃbaraiḥ |
maṃtreṇānena kauṃteya naro nāryā samanvitaḥ || 23 ||
[Analyze grammar]

namo vāmāya kāmāya devadevāya mūrtaye |
brahmaviṣṇuśivendrāṇāṃ manaḥkṣobhakarāya vai || 24 ||
[Analyze grammar]

kṛtvaivamarcayitvā tu devadevamanobhavam |
tatastasyāgrato deyā modakā mukhamodakāḥ || 25 ||
[Analyze grammar]

nānāprakārānbhakṣyāṃśca kāmo me prīyatāmiti |
tato visarjayedviprāndattvā yugmaṃ sadakṣiṇam || 26 ||
[Analyze grammar]

svapatiṃ pūjayennārī vastramālāvibhūṣaṇaiḥ |
kāmo'yamiti saṃciṃtya prahṛṣṭenāṃtarātmanā || 27 ||
[Analyze grammar]

manmathāyatane tasminyajamānaḥ suhṛdvṛtaḥ |
rātrau jāgaraṇaṃ kuryātsukharātriryathā bhavet || 28 ||
[Analyze grammar]

karpūrakuṃkumakṣodagaṃdhatāṃbūlasarjanaiḥ |
nānāprakārairbhakṣyaiśca kuryādrātrau mahotsavam || 29 ||
[Analyze grammar]

dīpaprajvālanairnṛtyaiḥ prekṣaṇaiḥ prekṣaṇotsavaiḥ |
evaṃ yaḥ kurute pārtha varṣevarṣe mahotsavam || 30 ||
[Analyze grammar]

vasaṃtasamaye prāpte hṛṣṭastuṣṭo nṛpaḥ pure |
tasya saṃvatsaraṃ yāvalloko rogairvimucyate || 31 ||
[Analyze grammar]

subhikṣaṃ kṣemamārogyaṃ yaśaḥ śrīḥ saukhyamuttamam |
kāmavarṣī ca parjanyastasminrāṣṭre prajāyate || 32 ||
[Analyze grammar]

tuṣyate tu bhṛśaṃ devo dvādaśārddhārddhalocanaḥ |
tathā kāmaśca viṣṇuśca vasaṃtaśca prajāpatiḥ || 33 ||
[Analyze grammar]

candrasūryādikā sarve grahā brahmarṣayastathā |
sarve'pi tasya tuṣyaṃti yakṣagaṃdharvadānavāḥ || 34 ||
[Analyze grammar]

asurā yātudhānāśca suparṇāḥ patagā nagāḥ |
tuṣṭāḥ prayacchaṃti sukhaṃ tasya karturna saṃśayaḥ || 35 ||
[Analyze grammar]

caitrotsave sakalalokamanonivāsaṃ kāmaṃ vasaṃtamalayādrimarutsahāyam |
ratyā sahārcya puruṣaḥ pravarā ca yoṣitsaubhāgyarūpasutasaukhyayutā sadā syāt || 36 ||
[Analyze grammar]