Chapter 106

yudhiṣṭhira uvāca |
sarvakāmānavāpnoti samārādhya janārdanam |
prakārairbahubhiḥ kṛṣṇa yānyānicchati cetasā || 1 ||
[Analyze grammar]

nṛṇāṃ strīṇāṃ ca sarveṣāṃ nānyacchokasya kāraṇam |
apatyādadhikaṃ kiṃcidvidyate hyatra janmani || 2 ||
[Analyze grammar]

aputratā mahāduḥkhamatiduḥkhaṃ kuputratā |
suputraḥ sarvasaukhyānāṃ hetubhūto mato mama || 3 ||
[Analyze grammar]

dhanyāste ye sutaṃ prāptāḥ sarvaduḥkhavivarjitam |
śaktaṃ praśāṃtaṃ balinaṃ parāṃ nirvṛtimāgatam || 4 ||
[Analyze grammar]

svakarmābhirataṃ nityaṃ devadvijaparāyaṇam |
śāstrajñaṃ sarvadharmajñaṃ dīnānāthānukaṃpinam || 5 ||
[Analyze grammar]

vinirjitārisarvasvaṃ manohṛdayanandanam |
devānukūlatāyuktaṃ yuktaṃ samyagguṇena ca || 6 ||
[Analyze grammar]

mitrasvajanasanmānalabdhaṃ nirvāṇamuttamam |
yaḥ prāpnoti sutaṃ tasmānnānyo dhanyataro bhuvi || 7 ||
[Analyze grammar]

so'hamevaṃvidhaṃ śrotuṃ karmecchāmi mahāmate |
yenedṛglakṣaṇaḥ putraḥ prāpyate bhuvi mānavaiḥ || 8 ||
[Analyze grammar]

śrīkṛṣṇa uvāca |
evametanmahābhāga putrāputrasamudbhavam |
duḥkhaṃ prayātyupaśamaṃ tanayānneha kenacit || 9 ||
[Analyze grammar]

atrāpi śrūyatāṃ vṛttaṃ yatpūrvamabhavanmune |
utpattau kārtavīryasya haihayasya mahātmanaḥ || 10 ||
[Analyze grammar]

kṛtavīryo mahīpālo haihayo nāma vai purā |
tasya śīladhanā nāma babhūva varavarṇinī || 11 ||
[Analyze grammar]

patnī sahasrapravarā mahiṣī śīlamaṇḍanā |
sā tvaputrā mahābhāgā maitreyīṃ paryapṛcchata || 12 ||
[Analyze grammar]

guṇavatputralābhāya kṛtāsanaparigraham |
tayā pṛṣṭātha sā samyaṅmaitreyī brahmavādinī || 13 ||
[Analyze grammar]

kathayāmāsa paramaṃ nāmnānantavrataṃ mahat |
sarvakāmaphalāvāptikāraṇaṃ pāpanāśanam |
tasyāḥ suputralābhāya rājaputryāstapasvinī || 14 ||
[Analyze grammar]

maitreyyuvāca |
yo yamicchennaraḥ kāmaṃ nārī vā varavarṇinī || 15 ||
[Analyze grammar]

sa taṃ samārādhya vibhuṃ samāpnoti janārdanāt |
mārgaśīrṣe mṛgaśiro bhīmo yasmindine'bhavat || 16 ||
[Analyze grammar]

tasminsaṃprāśya gomūtraṃ snāto niyatamānasaḥ |
puṣpairdhūpaistathā gandhairupavāsaiśca bhaktitaḥ |
vāmapādamanaṃtasya pūjayedvaravarṇini || 17 ||
[Analyze grammar]

anaṃtaḥ sarvakāmānāmanaṃtaṃ bhagavānphalam |
dadātvanantaṃ ca punastadevānyatra janmani || 18 ||
[Analyze grammar]

anaṃtapuṇyopacayamanantaṃ tu mahāvratam |
yathābhilaṣitāvāptiṃ kuru me puruṣottama || 19 ||
[Analyze grammar]

ityuccāryābhipūjyainaṃ yathāvadvidhinā naraḥ |
samāhitamanā bhūtvā praṇipātapurassaram || 20 ||
[Analyze grammar]

viprāya dakṣiṇāṃ dadyādanaṃtaḥ prīyatāmiti |
samuccārya tato naktaṃ bhuñjītatailavarjitam || 21 ||
[Analyze grammar]

tataśca pauṣe puṣyarkṣe tathaiva bhagavatkaṭim |
vāmāmabhyarccayedbhaktyā gomūtraprāśanaṃ tataḥ || 22 ||
[Analyze grammar]

anaṃtaḥ sarvakāmānā miti coccārayetpunaḥ |
bhojayeta tathā viprānvācayitvā yathāvidhi || 23 ||
[Analyze grammar]

māghe maghāsu tadvacca bāhuṃ devasya pūjayet |
skandhau ca mama phālgunyoḥ phālgune māsi bhāmini || 24 ||
[Analyze grammar]

caturṣveteṣu gomūtraṃ prāśayennṛpanaṃdini |
brāhmaṇāya tathā dadyāttilānkanakameva ca || 25 ||
[Analyze grammar]

devasya dakṣiṇaṃ skandhaṃ caitre citrāsu pūjayet |
tathaiva prāśanaṃ cātra pañcagavyamudāhṛtam |
vipre pravācake dadyādyavānmāsacatuṣṭayam || 26 ||
[Analyze grammar]

vaiśākhe ca viśākhāsu bāhuṃ sampūjya dakṣiṇam |
tathaivoktānyavāndadyānnaktaṃ kuryādbhujikriyām || 27 ||
[Analyze grammar]

jyeṣṭhāsu kaṭipūjāṃ ca jyeṣṭhamāsi śubhavrate |
āṣāḍhāsu tathāṣāḍhe kuryātpādārcanaṃ śubhe || 28 ||
[Analyze grammar]

pādadvayaṃ tu śravaṇe śrāvaṇe māsi pūjayet |
ghṛtaṃ viprāya dātavyaṃ prāśanīyaṃ yathāvidhi || 29 ||
[Analyze grammar]

śrāvaṇādiṣu māseṣu prāśanaṃ dānameva ca |
etadevaṃ samākhyātaṃ devāṃstadvacca pūjayet || 30 ||
[Analyze grammar]

guhyaṃ proṣṭhapadāyoge māsi bhādrapade'rcayet |
tadvadāśvayuje pūjyaṃ hṛdayaṃ cāśvinīṣu ca || 31 ||
[Analyze grammar]

kuryātsamāhitamanāḥ snānaṃ prāśanamarcanam |
anantaśirasaḥ pūjāṃ kārttike kṛttikāsu ca || 32 ||
[Analyze grammar]

yasminyasmindine pūjā tatratatra tadā dine |
nāmānaṃtasya japtavyaṃ kṣutapraskhalitādiṣu || 33 ||
[Analyze grammar]

ghṛtenānaṃtamuddiśya pūrvaṃ māsacatuṣṭayam |
kurvīta homaṃ caitrādau śālinā kulanaṃdini || 34 ||
[Analyze grammar]

kṣīreṇa śrāvaṇādau ca homo māsacatuṣṭayam |
praśastaṃ sarvamāseṣu haviṣyānnena bhojanam || 35 ||
[Analyze grammar]

evaṃ dvādaśabhirmāsaiḥ pāraṇātritayaṃ śubhe |
vratāvasāne cānantaṃ sauvarṇaṃ kārayecchubham || 36 ||
[Analyze grammar]

rājataṃ musalaṃ caiva halaṃ pārśveṣu vinyaset |
puṣpadhūpādinaivedyaiḥ pūjā kāryā yathāvidhi || 37 ||
[Analyze grammar]

tāmrapīṭhopari harermantrairebhiryathākramam |
namo'stvanaṃtāya śiraḥ pādau sarvātmane namaḥ || 38 ||
[Analyze grammar]

śeṣāya jānuyugalaṃ kāmāyeti kaṭiṃ namaḥ |
namostu vāsudevāya pārśvaṃ saṃpūjayeddhareḥ || 39 ||
[Analyze grammar]

saṃkarṣaṇāyetyudaraṃ bhujaṃ sarvāsudhāriṇe |
kaṇṭhaṃ śrīkaṇṭhanāthāya mukhamiṃdumukhāya ca || 40 ||
[Analyze grammar]

halaṃ ca musalaṃ caiva svanāmnā pūjayedbudhaḥ |
evaṃ sampūjya govindaṃ sitavastravibhūṣitam || 41 ||
[Analyze grammar]

chatropānatsusaṃyuktaṃ sragdāmālaṃkṛtaṃ tathā |
nakṣatradevatāḥ pūjyā nakṣatrāṇi ca sarvaśaḥ || 42 ||
[Analyze grammar]

somo nakṣatrarājaśca māsaḥ saṃvatsaraṃ tathā |
dvādaśātra ghaṭānkuryātsa toyāṃścānnasaṃyutān || 43 ||
[Analyze grammar]

evaṃ saṃpūjya vidhivaddevadevaṃ janārdanam |
brāhmaṇaṃ pūjayitvā ca vastrairābharaṇaistathā || 44 ||
[Analyze grammar]

karṇāṃgulaiḥ pavitraiśca śāṃtaṃ dāṃtaṃ jitendriyam |
purāṇajñaṃ dharmanityamavyaṃgaṃ supriyaṃvadam || 45 ||
[Analyze grammar]

tasmai deyaṃ samastaṃ tadanantaḥ prīyatāmiti |
anyeṣāṃ brāhmaṇānāṃ ca deyaṃ śaktyā yathepsitam || 46 ||
[Analyze grammar]

anena vidhinā pārtha vrataṃ caitatsamāpyate |
pārite ca samāpnoti sarvāneva manorathān || 47 ||
[Analyze grammar]

putrārthibhirvittakāmairbhṛtyadārānabhīpsubhiḥ |
prārthayadbhiśca martye'sminnārogyaphalasampadaḥ || 48 ||
[Analyze grammar]

etadvrataṃ mahābhāge puṇyaṃ svastyayanapradam |
anaṃtavratasaṃjñaṃ vai sarva pāpapraṇāśanam || 49 ||
[Analyze grammar]

tatkuruṣvaiva devi tvaṃ vrataṃ śīladhane param |
variṣṭhaṃ sarvalokasya yadi putramabhīpsasi || 50 ||
[Analyze grammar]

śrīkṛṣṇa uvāca |
iti śīladhanā śrutvā maitreyīvacanaṃ śubham |
cakāraitadvratavaraṃ sā viṣṇvāhitamānasā || 51 ||
[Analyze grammar]

putrārthinyāstatastasmādvratenānena suvrata |
viṣṇustutoṣa tuṣṭe ca viṣṇau sā suṣuve sutam || 52 ||
[Analyze grammar]

tasya vai jātamātrasya pravavau cānilaḥ śubham |
nīrajaskamabhūdvyoma mudaṃ prāpākhilaṃ jagat || 53 ||
[Analyze grammar]

devadundubhayo neduḥ puṣpavṛṣṭiḥ papāta ca |
prajagurdevagaṃdharvā nanṛtuścāpsarogaṇāḥ || 54 ||
[Analyze grammar]

dharme manaḥ samastasya pārtha lokasya cābhavat |
tasya nāma pitā cakre tanayasyārjuneti vai || 55 ||
[Analyze grammar]

kṛtavīryasutatvācca kārtavīryo babhūva saḥ |
tenāpi bhagavānviṣṇurdattātreyasvarūpavān |
ārādhito'timahatā tapasā pārtha bhūbhṛtā || 56 ||
[Analyze grammar]

tasya tuṣṭo jagannāthaścakravartitvamuttamam |
dadau śauryadhane cāpi sakalānyāyudhāni ca |
sa vavre ca vadho deva mama tvatto bhavediti || 57 ||
[Analyze grammar]

paraṃ tu smaraṇaṃ jñānaṃ bhītānāmārtināśanam |
smaraṇādupakārittvaṃ jagato'sya jagatpate || 58 ||
[Analyze grammar]

tamāha devadeveśaḥ puṇḍarīkanibhekṣaṇaḥ |
sarvametanmahābhāga tava bhūyo bhaviṣyati || 59 ||
[Analyze grammar]

yaśca prabhāte rātrau ca tvāṃ naraḥ kīrtayiṣyati |
namo'stu kārtavīryāyetyabhidhāsyati caiva yaḥ |
tilaprasthapradānasya naraḥ puṇyamavāpsyati || 60 ||
[Analyze grammar]

anaṣṭadravyatā caiva tava nāmānukīrtane |
bhaviṣyati mahīpāletyuktvā taṃ prayayau hariḥ || 61 ||
[Analyze grammar]

sa cāpi varamāsādya prasannādgaruḍadhvajāt |
pālayāmāsa bhūpālaḥ saptadvīpāṃ vasuṃdharām || 62 ||
[Analyze grammar]

teneṣṭaṃ vividhairyajñaiḥ samāptavaradakṣiṇaiḥ |
jitvārivargamakhilaṃ dharmataḥ pālitāḥ prajāḥ || 63 ||
[Analyze grammar]

anaṃtavratamāhātmyādāsādya tanayaṃ ca tam |
pituḥ putrodbhavaṃ duḥkhaṃ nāsītsvalpamapi prabho || 64 ||
[Analyze grammar]

evametatsamākhyātamanaṃtākhyaṃ vrataṃ tava |
yatkṛtvā rājapatnī sā kārtavīryamasūyata || 65 ||
[Analyze grammar]

yaścaitacchṛṇuyājjanma kārtavīryasya mānavaḥ |
strī vā duḥkhamapatyotthaṃ saptajanmasu nāśnute || 66 ||
[Analyze grammar]

aiśvaryamapratihataṃ paramaṃ vivekaṃ putrānamitrahṛdayārtikarānbahūṃśca |
kṛtvā tvanaṃta iti yadvrata nāmadheyaṃ prāpnotyanaṃtavibhavasya vibhoḥ prasādāt || 67 ||
[Analyze grammar]