Chapter 99

śrīkṛṣṇa uvāca |
paurṇamāsī mahārāja somasya dayitā tithiḥ |
pūrṇamāso bhavedyasyāṃ paurṇamāsī tataḥ smṛtā || 1 ||
[Analyze grammar]

paurṇamāsyāṃ ca saṃjātaḥ saṃgrāmo jayalakṣaṇaḥ |
somasyāribudhaiḥ sārddhaṃ sarvasattvabhayaṃkaram || 2 ||
[Analyze grammar]

tārāyāṃ candramāḥ saktastasyā bhartā bṛhaspatiḥ |
tayorabhūnmahāyuddhaṃ bhāryākṛtyeṣu vai purā || 3 ||
[Analyze grammar]

yudhiṣṭhira uvāca |
tārā kasya sutā kasmātsa kruddhaḥ sasurārihā |
somena saha saṃgrāmaṃ cakre cakragadādhara || 4 ||
[Analyze grammar]

śrīkṛṣṇa uvāca |
prajāpaterabhūtkanyā tārā vṛtrasya cānujā |
tāṃ bṛhaspataye prādātpṛthivyāmekasuṃdarīm || 5 ||
[Analyze grammar]

devācāryāya sā bhāryā tvanirdeśyā tathāvidhā |
rūpeṇābhyāṃ rūpavatī sā nirdhūya vyavasthitā || 6 ||
[Analyze grammar]

bṛhaspatiṃ paryacaradyathā cānyāḥ striyaḥ kvacit |
tāṃ dadarśāyatāpāṃgīṃ tanvaṃgīṃ cāruhāsinīm || 7 ||
[Analyze grammar]

śītāṃśurdarśanādeva kāmasya vaśamīyivān |
ābabhāṣe ca madhuraṃ tāre ehyehi mā ciram || 8 ||
[Analyze grammar]

iṃgitākārakuśalā tārā somasya ceṣṭitam |
buddhvā śuddhimatho tanvī prāhedaṃ madhurākṣaram || 9 ||
[Analyze grammar]

muneraṃgirasaḥ putrastvaṃ ca saumyo'si somarāṭ |
aṃgiraso munervīra snuṣāhamucitaṃ na te |
saha saumyena yo yogastava siddho' dbhuto mahān || 10 ||
[Analyze grammar]

aṃgirāstvāṃ kila purā sasurāsurarākṣasaiḥ |
rājatve sthāpayāmāsa naitatsmarasi kiṃ vidho || 11 ||
[Analyze grammar]

kathamadya niśānātha hyanaṃgenāsi pīḍitaḥ |
tasmādbravīmi siddhiṃ te rocaye ghaṭitaṃ kuru |
paravatyasmi bhadraṃ te na gamyāsmi budhottama || 12 ||
[Analyze grammar]

evamuktastathā cāsau na caitatkṛtavāṃstataḥ |
gṛhītvākarṣayāmāsa somo'naṃgavaśīkṛtaḥ || 13 ||
[Analyze grammar]

bṛhaspatistu tāṃ jñātvā sa taṃ somamagarhayat |
preṣayiṣyati me bhāryāṃ svayameva mamāṃtikam || 14 ||
[Analyze grammar]

evaṃ cireṇa vijñāya bṛhaspatirudāradhīḥ |
nāsasāda svakāṃ bhāryāṃ roṣātprasphuritādharaḥ || 15 ||
[Analyze grammar]

ācakhyau sarvamindrāya somasyedaṃ viceṣṭitam |
iṃdraḥ samāhvayāmāsa devānṛṣigaṇāṃstathā || 16 ||
[Analyze grammar]

na somo gaṇayāmāsa tato'budhyata devarāṭ |
ākāryaṃ tridaśānsarvānācakhyau candraceṣṭitam || 17 ||
[Analyze grammar]

tacchrutvā devagaṃdharvāḥ krodhāndhāḥ kṣubdhamānasāḥ |
pragṛhītapraharaṇā rathānāruruhuḥ svakān || 18 ||
[Analyze grammar]

somo'pi devānsodyogāñjñātvā sukṛtaniścayān |
daityadānavarakṣāṃsi samānīya vyavasthitaḥ || 19 ||
[Analyze grammar]

āruhya ca rathaśreṣṭhaṃ yuddhāyaiva mano dadhe |
pravṛttaṃ sumahadyuddhaṃ śaratomarakaṃpanaiḥ || 20 ||
[Analyze grammar]

kauṇapaiḥ kṣmāsuraiḥ śūlairdevadānavadāraṇam |
sa teṣāṃ sumahadyuddhaṃ dattvā tārāgaṇādhipaḥ || |
babhaṃja devānsendrāṃśca hemavṛṣṭyā kṣapākaraḥ || 21 ||
[Analyze grammar]

sa jitvā devagandharvānsomo rājanyasattama |
śriyā paramayā yukto yathā nānyo havirbhujām || 22 ||
[Analyze grammar]

devāśca nirjitāstena somenāmitatejasā |
ājagmuḥ śaraṇaṃ devaṃ śaraṇyaṃ svargavāsinām || 23 ||
[Analyze grammar]

indraḥ sarvaṃ samācakhyau somasyedṛgviceṣṭitam |
śrutvā kruddho hṛṣīkeśa āruhya garuḍaṃ ruṣā |
gṛhītvā cāyudhaṃ śreṣṭhaṃ yuddhāyaiva mano dadhe || 24 ||
[Analyze grammar]

prakartuṃ sumahadyuddhaṃ cakraśārṅgagadā dharaḥ |
jagāma vibudhaiḥ sārdhaṃ somasyopari roṣitaḥ || 25 ||
[Analyze grammar]

viṣṇuṃ viditvā saṃprāptaṃ somo daityagaṇaiḥ saha |
yuddhāya samarāmarṣī sthitaḥ pradhmāya vārijam || 26 ||
[Analyze grammar]

sa jitvā devasaṃghātaṃ seṃdraṃ vāyupurassaram |
viṣṇunā saha saṃyuktaḥ śastrāstrairasubhojanaiḥ || 27 ||
[Analyze grammar]

yadā nāsāvuparamedyuddhāya saha viṣṇunā |
tadā'dade ruṣā viṣṇuścakaṃ krodhasamanvitaḥ || 28 ||
[Analyze grammar]

athāha brahmā deveśamajitaṃ viṣṇumavyayam |
yo'sau meghaprapuṣṭāṃgaṃ yattvāṃ vacmi nibodha tat || 29 ||
[Analyze grammar]

nāsti vadhyaṃ tribhuvane cakrasyāsya tavānagha |
somo dvijādhipatye ca mayā samabhiṣecitaḥ || 30 ||
[Analyze grammar]

tasmādyadyujyate devakārye'smiṃstadvidhīyatām |
athāha bhagavānviṣṇuḥ surabrahmarṣisannidhau || 31 ||
[Analyze grammar]

sinīvālī kuhūrnāma tasyāṃ naṣṭaḥ kṣapākaraḥ |
vinaṣṭo'pi punarjanma prāpsyatīti na saṃśayaḥ || 32 ||
[Analyze grammar]

rākāṃ cānumatiṃ prāpya vṛddhirasya bhaviṣyati |
āpyāyitaśca śrutyuktaiḥ pitṛpiṇḍaiḥ samaṃtrakaiḥ |
brāhmaṇairhavyakavyāni devebhyaḥ prāpayiṣyati || 33 ||
[Analyze grammar]

vṛddhiḥ kṛṣṇena caivāsya na ca jātasya bhūyasī |
evameva vidhirdṛṣṭastasyāpyāya nameva me || 34 ||
[Analyze grammar]

amoghasya na moghatvaṃ bhaviṣyati kadācana |
śaptaśca somo dakṣeṇa sa cāvaśyaṃ bhaviṣyati || 35 ||
[Analyze grammar]

sudarśanasya ca prītirevameva bhaviṣyati |
evamastviti deveśa yadbhavānprabravīti vai || 36 ||
[Analyze grammar]

brahmā provāca somaṃ tu vinītavadupasthitam |
arpayasva gurorbhāryāṃ na kāryaṃ punarīdṛśam || 37 ||
[Analyze grammar]

sa tathoktaḥ samānīya dadau tārāṃ bṛhaspateḥ |
punarūce śaśī spaṣṭaṃ śṛṇvatāṃ tridivaukasām || 38 ||
[Analyze grammar]

asyāṃ garbho madīyo'yaṃ yadapatyaṃ mamaiva tat |
bṛhaspatirathovāca mayā garbhaḥ samāhitaḥ || 39 ||
[Analyze grammar]

kṣetre madīye cotpannastasmātsa mama putrakaḥ |
uktaṃ ca vedaśāstrajñairṣibhirddharmadarśibhiḥ || 40 ||
[Analyze grammar]

uptaṃ vātāhṛtaṃ bījaṃ yasya kṣetre prarohati |
kṣetriṇastasya tadbījaṃ na bījī phalabhāgbhavet || 41 ||
[Analyze grammar]

samyaguktaṃ na bhavatā śaśāṃkaḥ prāha tattvavit |
mātā bhastrā pituḥ putro yena jātaḥ sa eva saḥ |
iti paurāṇikāḥ prāhurmunayo nayacakṣuṣaḥ || 42 ||
[Analyze grammar]

vivadaṃtau nivāryātha brahmā provāca tāṃ vadhūm |
śanairekāṃtamānīya garbhoyaṃ kasya śaṃsa me || 43 ||
[Analyze grammar]

evamuktā tu sā tārā hriyā novāca kiṃcana |
utsasarja kṣaṇādgarbhaṃ bhābhāsitasurālayam || 44 ||
[Analyze grammar]

tamuvāca tato brahmā putra kasya suto bhavān |
somasyāhaṃ suto brahmanniti tathyaṃ mayoditam || 45 ||
[Analyze grammar]

budho'yaṃ vibudhāḥ prāhuḥ sarvajñānavidāṃ varaḥ |
gṛhītvā putrakaṃ somo jagāma svaṃ niveśanam || 46 ||
[Analyze grammar]

gururgṛhītvā svāṃ bhāryāṃ jagāma bhavanaṃ śanaiḥ |
somo'pi tanayaṃ labdhvā harṣavyākulamānasaḥ || 47 ||
[Analyze grammar]

paurṇamāsī samākhyātā prāptapūrṇamanorathā |
prāptaḥ putro mayā hyasyāṃ labdhaśca vi jayastathā || 48 ||
[Analyze grammar]

tasmādenāmupāsiṣye vidhinā vratatatparaḥ |
evamanyo'pi pūrṇārthaḥ pūrṇāṃśaḥ pūrṇalakṣaṇaḥ || 49 ||
[Analyze grammar]

yo māmakyāṃ tithau bhaktyā vidhivatpūjayiṣyati |
tasya prasādābhimukhaḥ sarvakāmaprado hyaham || 50 ||
[Analyze grammar]

evameṣā tithiḥ pārtha somasya dayitā śubhā |
paurṇamāsī samākhyātā pūrṇo māso bhavedyathā || 51 ||
[Analyze grammar]

tadasyāṃ srotasi snātvā saṃtarpya pitṛdevatāḥ |
ālikhya maṃḍale somaṃ nakṣatraiḥ sahitaṃ vibhum || 52 ||
[Analyze grammar]

pūjayetkusumairhṛdyairnaivedyairghṛtapācitaiḥ |
śuklākṣataiḥ śuklavastraiḥ pūjayitvā kṣamāpayet |
śākāharaṇamunyannairnaktaṃ bhuñjīta vāgyataḥ || 53 ||
[Analyze grammar]

vasaṃtabāṃdhava vidho śītāṃśo svasti naḥ kuru |
gaganārṇavamāṇikya candra dākṣāyaṇīpate || 54 ||
[Analyze grammar]

pakṣepakṣe paurṇamāsyāṃ vidhireṣa prakīrtitaḥ |
kṛṣṇapakṣe'pi yaḥ kaścicchraddhāvānvai vratī bhavet || 55 ||
[Analyze grammar]

tasyāpyeṣa vidhiḥ proktaḥ sarvasaukhyapradāyakaḥ |
āmāvāsyā tithiriyaṃ pitṝṇāṃ dayitā sadā |
asyāṃ dattaṃ tapastaptaṃ pitṝṇāmakṣayaṃ bhavet || 56 ||
[Analyze grammar]

amāvāsyā mahārāja prayatnairyairupoṣitā |
tairakṣayyaṃ bhaveddattaṃ pitṛbhyastīrthamuttamam || 57 ||
[Analyze grammar]

yaḥ kaścitkurute tasminpitṛpiṇḍodakakriyām |
sa tārayati puṇyātmā puruṣānekaviṃśatim || 58 ||
[Analyze grammar]

bhaveyurakṣayāstasya lokāḥ pitṛniṣevitāḥ |
yadā tu iha kālāṃte tasyātrāgamanaṃ bhavet || 59 ||
[Analyze grammar]

brāhmaṇaḥ pitṛbhaktaśca sarvavidyāviśāradaḥ |
evaṃ janmani rājendra bhaveddhanasamanvitaḥ || 60 ||
[Analyze grammar]

evaṃ saṃvatsarasyāṃte haimaṃ kṛtvā suśobhanam |
somaṃ nakṣatrasahitaṃ viprāya pratipādayet || 61 ||
[Analyze grammar]

upadeśaṃ prayacchedyastasmai vratakṛte naraḥ |
saṃpūjya vastrābharaṇairmaṃtreṇetthaṃ nivedayet |
māsemāse vidhirayaṃ vratasyāsya narādhipa || 62 ||
[Analyze grammar]

yo na śaknoti vā kartuṃ pakṣaṃ vātha niraṃtaram |
sa ekāmapyupoṣyaiva kuryādudyāpanaṃ sudhīḥ || 63 ||
[Analyze grammar]

yaścaitatkurute pārtha paurṇamāsīvrataṃ naraḥ |
sarvapāpavinirmuktaścandravaddivi rājate || 64 ||
[Analyze grammar]

putrapautradhanopeto yajvā dātā priyaṃvadaḥ |
saṃtatiṃ vipulāṃ prāpya prayāge maraṇaṃ bhajet || 65 ||
[Analyze grammar]

tataścaivākṣayāṃllokānprāpnoti surasevitān |
sevyamānaḥ sa gandharvaiḥ stūyamānaḥ surāsuraiḥ |
āste saṃpūrṇasarvāṃgo yāvatkalpāyutatrayam || 66 ||
[Analyze grammar]

abhyarcayaṃti sitapañcadaśīṣu somaṃ kṛṣṇāsu ye pitṛgaṇaṃ jalapiṃḍadānaiḥ |
teṣāṃ gṛhāṇi dhana dhānyasutādisaṃpatpūrṇāni pārthiva bhavaṃti vidhervidhānāt || 67 ||
[Analyze grammar]