Chapter 55

yudhiṣṭhira uvāca |
janmāṣṭamīvrataṃ brūhi vistareṇa mamācyuta |
kasminkāle samutpannaṃ kiṃ puṇyaṃ ko vidhiḥ smṛtaḥ || 1 ||
[Analyze grammar]

śrīkṛṣṇa uvāca |
hate kaṃsāsure duṣṭe mathurāyāṃ yudhiṣṭhira |
devakī māṃ pariṣvajya kṛtvotsaṃge ruroda ha || 2 ||
[Analyze grammar]

tatraiva raṃgavāḍhena maṃcārūḍhajanotsave |
mallayuddhe purāvṛtte samete kukurā'ndhake || 3 ||
[Analyze grammar]

svajanairbaṃdhubhiḥ snigdhaiḥ sastrībhiḥ samāvṛte |
vasudevo'pi tatraiva vātsalyātpraruroda ha || 4 ||
[Analyze grammar]

samākṛṣya pariṣvajya putraputretyuvāca ha |
sagadgadasvaro dīno vāṣpaparyākulekṣaṇaḥ || 5 ||
[Analyze grammar]

balabhadraṃ ca māṃ caiva pariṣvajya mudā punaḥ |
adya me saphalaṃ janma jīvitaṃ yatsujīvitam || 6 ||
[Analyze grammar]

yadubhābhyāṃ supu trābhyāṃ samudbhūtaḥ samāgamaḥ |
evaṃ varṣeṇa dāṃpatye hṛṣṭaṃ puṣṭaṃ tathā hyabhūt || 7 ||
[Analyze grammar]

praṇipatya janāḥ sarve babhūvuste praharṣitāḥ |
evaṃ mahotsavaṃ dṛṣṭvā māmāha sakalo janaḥ || 8 ||
[Analyze grammar]

prasādaḥ kriyatāṃ nātha lokasyāsya prasādataḥ |
yasmindine jagannātha devakī tvāmajījanat || 9 ||
[Analyze grammar]

taddine dehi vaikuṃṭhaṃ kurmastetra namonamaḥ |
samyagbhaktiprapannānāṃ prasādaṃ kuru keśava || 10 ||
[Analyze grammar]

evamukte janaughena vasudevo'tivismitaḥ |
vilokya balabhadraṃ ca māṃ ca kṛtvā ruroda ha |
evamastviti lokānāṃ kathayasva yathā tathā || 11 ||
[Analyze grammar]

tataśca piturādeśāttathā janmāṣṭamīvratam |
mathurāyāṃ janaughāgre pārtha samyakprakāśitam || 12 ||
[Analyze grammar]

paurajanā janmadinaṃ varṣevarṣe mamoditam |
punarjanmāṣṭamīṃ loke kurvaṃtu brāhmaṇādayaḥ |
kṣatriyā vaiśyajātīyāḥ śūdrā yenye'pi dhārmikāḥ || 13 ||
[Analyze grammar]

siṃharāśigate sūrye gagane jaladākule |
māsi bhādrapade'ṣṭamyāṃ kṛṣṇapakṣe'rdharātrake |
vṛṣarāśisthite candre nakṣatre rohiṇīyute || 14 ||
[Analyze grammar]

vasudevena devakyāmahaṃ jāto janāḥ svayam |
evametatsamākhyātaṃ loke janmāṣṭamīvratam || 15 ||
[Analyze grammar]

bhagavatpārśvato rājanbahurūpaṃ mahotsavam |
mathurāyāstataḥ paścālloke khyātiṃ gamiṣyati |
śāṃtirastu sukhaṃ cāstu lokāḥ santu nirāmayāḥ || 16 ||
[Analyze grammar]

yudhiṣṭhira uvāca |
tatkīdṛśaṃ vrataṃ deva lokaiḥ sarvairanuṣṭhitam |
janmāṣṭamīvrataṃ nāma pavitraṃ puruṣottama || 17 ||
[Analyze grammar]

yena tvaṃ tuṣṭimāyāsi lokānāṃ prabhura vyayaḥ |
etanme bhagavanbrūhi prasādānmadhusūdana || 18 ||
[Analyze grammar]

śrīkṛṣṇa uvāca |
pārtha taddivase prāpte daṃtadhāvanapūrvakam |
upavāsasya niyamaṃ gṛhṇīyādbhaktibhāvitaḥ || 19 ||
[Analyze grammar]

ekenaivopavāsena kṛtena kurunaṃdana |
sarvajanmakṛtaiḥ pāpairmucyate nātra saṃśayaḥ || 20 ||
[Analyze grammar]

upāvṛttasya pāpebhyo yastu vāso guṇaiḥ saha |
upavāsaḥ sa vijñeyaḥ sarvabhogavivarjitaḥ || 21 ||
[Analyze grammar]

tataḥ snātvā ca madhyāhne nadyādau vimale jale |
devyāḥ suśobhanaṃ kuryāddevakyāḥ sūtikāgṛham || 22 ||
[Analyze grammar]

padmarāgaiḥ patranetrairmaṃḍitaṃ carcitaṃ śubhaiḥ |
ramyaṃ tu vanamālābhī rakṣāmaṇivibhūṣitam || 23 ||
[Analyze grammar]

sarvaṃ gokulavatkāryaṃ gopījanasamākulam |
ghaṇṭāmardalasaṅgītamāṅgalyakalaśānvitam || 24 ||
[Analyze grammar]

yavārdhaṃ svastikā kuḍyaiḥ śaṃkhavāditrasaṃkulam |
vaddhvāsurā lohakhaḍgaiḥ priyacchāgasamanvitam || 25 ||
[Analyze grammar]

dhānye vinyasya musalaṃ rakṣitaṃ rakṣapālakaiḥ |
ṣaṣṭhyā devyā ca saṃpūrṇairnaivedyairvividhaiḥ kṛtaiḥ || 26 ||
[Analyze grammar]

evamādi yathāśeṣaṃ kartavyaṃ sūtikāgṛham |
etanmadhye pratiṣṭhāpyā sā cāpyaṣṭavidhā smṛtā || 27 ||
[Analyze grammar]

kāṃcanī rājatī tāmrī paittalī mṛnmayī tathā |
dārvī maṇimayī caiva karṇikā likhitātha vā || 28 ||
[Analyze grammar]

sarvalakṣaṇasampannā paryaṃke cārddhasuptikā |
prataptakāṃcanābhāsā mayā saha tapasvinī || 29 ||
[Analyze grammar]

prastutā ca prasūtā ca tatkṣaṇācca praharṣitā |
māṃ cāpi bālakaṃ suptaṃ paryaṃke stanapāyinam || 30 ||
[Analyze grammar]

śrīvatsavakṣasaṃ pūrṇaṃ nīlotpaladala cchavim |
yaśodā cāpi tatraiva prasūtā varakanyakām || 31 ||
[Analyze grammar]

tatra devagṛhaṃ nāgā yakṣavidyādharā narāḥ |
praṇatāḥ puṣpamālāgravyagrahastāḥ surāsurāḥ || 32 ||
[Analyze grammar]

saṃcaraṃta ivākāśe prākārairuditoditaiḥ |
vasudevo'pi tatraiva khaḍgacarmadharaḥ sthitaḥ || 33 ||
[Analyze grammar]

kaśyapo vasudevoyamaditi ścāpi devakī |
balabhadraḥ śeṣanāgo yaśodādityajāyata || 34 ||
[Analyze grammar]

nandaḥ prajāpatirdakṣo gargaścāpi caturmukhaḥ |
eṣovatāro rājendra kaṃso'yaṃ kālanemijaḥ || 35 ||
[Analyze grammar]

tatra kaṃsaniyuktā ye dānavā vividhāyudhāḥ |
te ca prāhārikāḥ sarve suptā nidrāvimohitāḥ || 36 ||
[Analyze grammar]

godhenukuñjarāścāsya dānavāḥ śastrapāṇayaḥ |
nṛtyaṃtyapsaraso hṛṣṭā gaṃdharvā gītatatparāḥ || 37 ||
[Analyze grammar]

lekhanīyaśca tatraiva kāliyo yamunāhrade |
ramyamevaṃ vidhiṃ kṛtvā devakīṃ navasūtikām || 38 ||
[Analyze grammar]

tāṃ pārtha pūjayedbhaktyā gandhapuṣpākṣataiḥ phalaiḥ |
kūṣmāṇḍairnālikeraiśca kharjūrairdāḍimīphalaiḥ || 39 ||
[Analyze grammar]

bījapūraiḥ pūgaphalairllakucaistrapusaistathā |
kāladeśodbhavairmuṣṭaiḥ puṣpaiścāpi yudhiṣṭhira || 40 ||
[Analyze grammar]

dhyātvāvatāraṃ prāguktaṃ maṃtreṇānena pūjayet || 41 ||
[Analyze grammar]

gāyadbhiḥ kinnarādyaiḥ satataparivṛtā veṇuvīṇāninādairbhṛṅgārādarśakumbhapramarakṛtakaraiḥ sevyamānā munīndraiḥ |
paryaṃke svāstṛte yā muditataramanāḥ putriṇī samyagāste sā devī devamātā jayati suvadanā devakī kāṃtarūpā || 42 ||
[Analyze grammar]

pādāvabhyaṃjayaṃtīṃ śrīrdevakyāścaraṇāṃtike |
niṣaṇṇā paṅkaje pūjyā namo devyai ca maṃtrataḥ || 43 ||
[Analyze grammar]

oṃ devakyai namaḥ || oṃ vasudevāya namaḥ |
oṃ balabhadrāya namaḥ || oṃ śrīkṛṣṇāya namaḥ |
oṃ subhadrāyai namaḥ || oṃ nandāya namaḥ|| oṃ yaśodāyai namaḥ |
evamādīni nāmāni samuccārya pṛthakpṛthak |
pūjayeyurdvijāḥ sarve strīśūdrāṇāmamaṃtrakam || 44 ||
[Analyze grammar]

vidhyaṃtaramapīcchaṃti kecidatra dvijottamāḥ |
candrodaye śaśāṅkāya arghyaṃ dadyāddhariṃ smaret || 45 ||
[Analyze grammar]

anaghaṃ vāmanaṃ śauriṃ vaikuṃṭhaṃ puruṣottamam |
vāsudevaṃ hṛṣīkeśaṃ mādhavaṃ madhusūdanam || 46 ||
[Analyze grammar]

vārāhaṃ puṇḍarīkākṣaṃ nṛsiṃhaṃ brāhmaṇapriyam |
dāmodaraṃ padmanābhaṃ keśavaṃ garuḍadhvajam || 47 ||
[Analyze grammar]

govindamacyutaṃ kṛṣṇamanaṃtamaparājitam |
adhokṣajaṃ jagadbījaṃ sargasthityaṃtakāraṇam || 48 ||
[Analyze grammar]

anādinidhanaṃ viṣṇuṃ trailokyeśaṃ trivikramam |
nārāyaṇaṃ caturbāhuṃ śaṃkha cakragadādharam || 49 ||
[Analyze grammar]

pītāṃbaradharaṃ nityaṃ vanamālāvibhūṣitam |
śrīvatsāṅkaṃ jagatsetuṃ śrīdharaṃ śrīpatiṃ harim || 50 ||
[Analyze grammar]

yogeśvarāya yogeśabhavāya yogapataye govindāya namonamaḥ |
yajñeśvarāya yajñasaṃbhavāya yajñapataye govindāya namonamaḥ || 51 ||
[Analyze grammar]

ityanulepanārghyādyarcanadhūpamaṃtraḥ |
viśvāya viśveśvarāya viśvasaṃbhavāya viśvapataye govindāya namonamaḥ || 52 ||
[Analyze grammar]

dharmeśvarāya dharmapataye dharmasaṃbhavāya govindāya namonamaḥ || 53 ||
[Analyze grammar]

kṣīrodārṇavasaṃbhūta atrinetrasamudbhava |
gṛhāṇārghyaṃ śaśāṃkendo rohiṇyā sahito mama || 54 ||
[Analyze grammar]

sthaṃḍile sthāpayeddevaṃ sacandrāṃ rohiṇīṃ tathā |
devakīṃ vasudevaṃ ca yaśodāṃ nandameva ca || 55 ||
[Analyze grammar]

baladevaṃ tathā pūjya sarvapāpaiḥ pramucyate |
arddharātre vasorddhārāṃ pātayedguḍasarpiṣā || 56 ||
[Analyze grammar]

tato varddhāpanaṃ ṣaṣṭhīnāmādikaraṇaṃ mama |
kartavyaṃ tatkṣaṇādrātrau prabhāte navamīdine || 57 ||
[Analyze grammar]

yathā mama tathā kāryo bhagavatyā mahotsavaḥ |
brāhmaṇānbhojayecchaktyā tebhyo dadyācca dakṣiṇām || 58 ||
[Analyze grammar]

hiraṇyaṃ kāñcanaṃ gāvo vāsāṃsi kusumāni ca |
yadyadiṣṭatamaṃ tattatkṛṣṇo me prīyatāmiti || 59 ||
[Analyze grammar]

yamevaṃ devakī devī vasudevādajījanat |
bhaumasya brahmaṇo guptyai tasmai brahmātmane namaḥ || 60 ||
[Analyze grammar]

sujanmavāsudevāya gobrāhmaṇahitāya ca |
śāntirastu śivaṃ cāstu ityuktvā tu visarjayet || 61 ||
[Analyze grammar]

evaṃ yaḥ kurute devyā devakyāḥ sumahotsavam |
varṣevarṣe bhagavato madbhakto dharmanandana || 62 ||
[Analyze grammar]

naro vā yadi vā nārī yathoktaphalamāpnuyāt || 63 ||
[Analyze grammar]

putrasaṃtānamārogyaṃ dhanadhānyādisadgṛham |
śālīkṣuyavasaṃpūrṇamaṇḍalaṃ sumanoharam || 64 ||
[Analyze grammar]

tasminrāṣṭre prabhurbhuṃkte dīrghāyurmanasepsitān |
paracakrabhayaṃ nāsti tasmi nrājye'pi pāṇḍava || 65 ||
[Analyze grammar]

parjanyaḥ kāmavarṣī syādītibhyo na bhayaṃ bhavet |
yasmingṛhe pāṃḍuputra kriyate devakīvratam || 66 ||
[Analyze grammar]

na tatra mṛta niṣkrāṃtirna garbhapatanaṃ tathā |
na ca vyādhibhayaṃ tatra bhavediti matirmama || 67 ||
[Analyze grammar]

na vaidyajanasaṃyogo na cāpi kalaho gṛhe |
saṃparkeṇāpi yaḥ kaścitkuryājjanmāṣṭamīvratam |
viṣṇulokamavāpnoti so'pi pārtha na saṃśayaḥ || 68 ||
[Analyze grammar]

janmāṣṭamī janamanonayanābhirāmā pāpāpahā sapadi naṃditanaṃdagopā |
yo devakīṃ sadayitāṃ yajatīha tasyāṃ putrānavāpya samupaiti padaṃ sa viṣṇoḥ || 69 ||
[Analyze grammar]