Chapter 53

yudhiṣṭhira uvāca |
adhruveṇa śarīreṇa supakvenāpi kiṃ phalam |
māghasnānavihīnena yattyaktaṃ yadunandana || 1 ||
[Analyze grammar]

prātaḥsnānāsamarthānāṃ śarīraṃ paśya dehinām |
kiṃ tena vada kartavyaṃ māghe saṃsārabhīruṇā || 2 ||
[Analyze grammar]

kāyakleśasahā nāryo na bhavaṃti yadūttama |
saukumāryaṃ śarīrasya acalatvāttathaiva ca || 3 ||
[Analyze grammar]

kathaṃ ca tāḥ surūpāḥ syuḥ subhagāḥ suprajāstathā |
sukṛtasyeha puṇyasya sarvametatphalaṃ yataḥ || 4 ||
[Analyze grammar]

alpāyāsena sumahadyena puṇyamavāpyate |
strībhirmāghe mama brūhi snānaṃ tattvaṃ ramādhava || 5 ||
[Analyze grammar]

śrīkṛṣṇa uvāca |
śrūyatāṃ pāṃḍavaśreṣṭha rahasyamṛṣibhāṣitam |
yanmayā kasyacinnoktamacalāsaptamīvratam || 6 ||
[Analyze grammar]

veśyā cendumatī nāma rūpaudāryaguṇānvitā |
āsītkurukulaśreṣṭha magadhasya vilāsinī || 7 ||
[Analyze grammar]

tanumadhyā sujaghanā pīnonnatapayodharā |
samyagvibhaktāvayavā pūrṇacandranibhānanā || 8 ||
[Analyze grammar]

sauṃdaryaṃ saukumāryaṃ ca tasyāḥ kāmena gīyate |
yasyāḥ saṃdarśanādeva kāmaḥ kāmāturo bhavet || 9 ||
[Analyze grammar]

mūrtiḥ śaśadharasyeva nayanānandakāriṇī |
vaśīkaraṇavidyeva sarvalokamanoharā || 10 ||
[Analyze grammar]

ekasmindivase prātaḥ sumukhasthitayā tayā |
ciṃtitā hṛdaye rājantsaṃsārasyānavasthitiḥ || 11 ||
[Analyze grammar]

sannimajya jagadidaṃ viṣaye kāyasāgare |
janmamṛtyujarāgrāhaṃ na kaścidavabuddhyate || 13 ||
[Analyze grammar]

apāko bhūtabhāṇḍānāṃ dhātṛśilpivinirmitam |
svakarmeṃdhanasaṃvītaṃ pacyate bālavahninā || 13 ||
[Analyze grammar]

ye yāṃti divasāḥ puṃsāṃ dharmakāmārthavarjitāḥ |
na te punarihāyāṃti harabhaktā narā yathā || 14 ||
[Analyze grammar]

snānaṃ dānaṃ tapo homaḥ svādhyāyaḥ pitṛtarpaṇam |
yasmindine na kriyate vṛthā sa divaso nṛṇām || 15 ||
[Analyze grammar]

putrāṇāṃ dāragṛhakasamāsaktaṃ hi mānasam |
vṛkīvoraṇamāsādya mṛtyurdvārāya gacchati || 16 ||
[Analyze grammar]

ityevaṃ ciṃtayitvā tu veśyā cendumatī tataḥ |
vaśiṣṭhasyāśramaṃ puṇyaṃ jagāma gajagāminī || 17 ||
[Analyze grammar]

vaśiṣṭhamṛṣimāsīnaṃ praṇamya vinayāttataḥ |
kṛtāñjalipuṭā bhūtvā idaṃ vacanamabravīt || 1 |
indumatyuvāca |
daśasūnāsamaścakrī daśacakrisamo dhvajaḥ |
daśadhvajasamā veśyā daśaveśyāsamo nṛpaḥ || 19 ||
[Analyze grammar]

mayā na dattaṃ na hutaṃ nopavāso vrataṃ kṛtam |
bhaktyā na pūjitaḥ śambhuḥ śrito naiko dhanī naraḥ || 20 ||
[Analyze grammar]

sāṃprataṃ vartamānāyā vrataṃ kiṃcidvadasva me |
yena duḥkhāṃbupāpaughāduttarāmi bhavārṇavāt || 21 ||
[Analyze grammar]

etadasyāḥ subahuśaḥ śrutvā dharmaṃ paraṃtapaḥ |
vaśiṣṭhaḥ kathayāmāsa mahākāruṇiko muniḥ || 22 ||
[Analyze grammar]

vaśiṣṭha uvāca |
māghasya sitasaptamyāṃ sarvakāmaphalapradam |
tapaḥsaubhāgyajananaṃ snānaṃ tava varānane || 23 ||
[Analyze grammar]

kṛtvā ṣaṣṭhyāmekabhaktaṃ saptamyāṃ niścalaṃ jalam |
rātryaṃte cālayethāstvaṃ dattvā śirasi dīpakam || 24 ||
[Analyze grammar]

māghasya sitasaptamyāmacalaṃ cālitaṃ mayā |
jalāmalānāṃ sarveṣāṃ kṛtaṃ na calanaṃ tathā || 25 ||
[Analyze grammar]

vaśiṣṭhavacanaṃ śrutvā tasminnahani bhūpate |
sarvaṃ cakārendumatī snānaṃ dānaṃ yathāvidhi || 26 ||
[Analyze grammar]

tryahasnānaprabhāveṇa bhuktvā bhogyānyathepsitān |
indralokepsaraḥsaṃghe nāyikātvamavāpa sā || 27 ||
[Analyze grammar]

acalāsaptamīsnānaṃ kathitaṃ ca viśāṃpate |
sarvapāpapraśamanaṃ sukhasaubhāgyavarddhanam || 28 ||
[Analyze grammar]

yudhiṣṭhira uvāca |
saptamīsnānamāhātmyaṃ śrutaṃ na ca viśeṣataḥ |
sāṃprataṃ śrotumicchāmi vidhimaṃtrasamanvitam || 29 ||
[Analyze grammar]

śrīkṛṣṇa uvāca |
ekabhaktena saṃtiṣṭhetṣaṣṭhyāṃ saṃpūjya bhāskaram |
saptamyāṃ tu vrajetprātaḥ sugaṃbhīraṃ jalāśayam || 30 ||
[Analyze grammar]

saritsaṃgaṃ taḍāgaṃ ca devakhātamathāpi vā |
sukhāvagāhasalilaṃ duṣṭasattvairadūṣitam || 31 ||
[Analyze grammar]

paśubhiḥ pakṣibhiścaiva jalajairmatsyakacchapaiḥ |
na jalaṃ cālyate yāvattāvatsnānaṃ samācaret || 32 ||
[Analyze grammar]

namaste rudrarūpāya rasānāṃ pataye namaḥ |
varuṇāya namaste'stu harivāsa namo'stu te || 33 ||
[Analyze grammar]

yāvajjanma kṛtaṃ pāpaṃ mayā janmasu saptasu |
tanme rogaṃ ca śokaṃ ca mākarī haṃtu saptamī || 34 ||
[Analyze grammar]

jananī sarvabhūtānāṃ saptamī saptasaptike |
sarvavyādhihare devi namaste ravimaṃḍale || 35 ||
[Analyze grammar]

jaloparitaraṃ dīpaṃ snātvā saṃtarpya devatāḥ |
caṃdanena likhetpadmamaṣṭapatraṃ sakarṇikam || 36 ||
[Analyze grammar]

madhye śarvaṃ sapatnīkaṃ praṇavena tu pūjayet |
bhānuṃ śakre dale pūjya raviṃ vaiśvānare dale || 37 ||
[Analyze grammar]

yāmye vivasvānnairṛtye bhāskarasyeti pūjayet |
paścime savitā pūjyaḥ pūjyorko vāyunā jale || 38 ||
[Analyze grammar]

saumye sahasrakiraṇaḥ śeṣe sarvātmaneti ca |
pūjyāḥ praṇavapūrvāstu namaskārāṃtayojitāḥ || 39 ||
[Analyze grammar]

puṣpaiḥ sugandhadhūpaiśca vastreṇācchādya bhāskaram |
visarjayettataḥ paścātsvasthānaṃ gamyatāmiti || 40 ||
[Analyze grammar]

tāmrapātre suvistīrṇe mṛnmaye vā yudhiṣṭhira |
sthāpayettilacūrṇaṃ ca saghṛtaṃ saguḍaṃ tathā || 41 ||
[Analyze grammar]

kāñcanaṃ tālakaṃ kṛtvā hyasiktastilacūrṇakam |
saṃsthāpya raktavastraistu puṣpairdhūpaistathārcayet || 42 ||
[Analyze grammar]

tatastaṃ brāhmaṇe dadyāddattvā maṃtreṇa tālakam |
ādityasya prasādena prātaḥ snānaphalaṃ bhajet || 43 ||
[Analyze grammar]

duṣṭadaurbhāgyaduḥkhebhyo mayā dattaṃ tu tālakam |
tatastattālakaṃ kṛtvā brāhmaṇāyopapādayet || 44 ||
[Analyze grammar]

saputrapaśubhṛtyāya me'rkoyaṃ prīyatāmiti |
tato vratopadeṣṭāraṃ pūjayedvastragotilaiḥ || 45 ||
[Analyze grammar]

viprānanyānyathāśaktyā pūjayitvā gṛhaṃ vrajet |
etatte kathitaṃ kāryaṃ rūpasaubhāgyakārakam || 46 ||
[Analyze grammar]

acalāsaptamīsnānaṃ sarvakāmaphalapradam || 47 ||
[Analyze grammar]

iti paṭhati ya itthaṃ yaḥ śṛṇoti prasaṃgātkalikaluṣaharaṃ vai sapta mīsnānametat |
matimapi nayanānāṃ yo dadāti prasaṃgātsurabhavanagato'sau pūjyate devasaṃghaiḥ || 48 ||
[Analyze grammar]