Chapter 47

śrīkṛṣṇa uvāca |
ata ūrdhvaṃ pravakṣyāmi saptamīkalpamuttamam |
māghamāsātsamārabhya śuklapakṣe yudhiṣṭhira || 1 ||
[Analyze grammar]

saptamyāṃ kuru saṃkalpamahorātre vrate nṛpa |
varuṇetyarcayitvā tu brahmakūrcaṃ tu kārayet || 2 ||
[Analyze grammar]

aṣṭamyāṃ bhojayedviprāṃstilapiṣṭaṃ guḍaudanam |
agniṣṭomasya yajñasya phalaṃ prāpnoti mānavaḥ || 3 ||
[Analyze grammar]

saptamyāṃ phālgune māsi sūryamityabhipūjayet |
vājapeyasya yajñasya yathoktaṃ labhate phalam || 4 ||
[Analyze grammar]

saptamyāṃ caitramāse tu vedāṃśumabhipūjayet |
ukthādhvarasamaṃ puṇyaṃ naraḥ prāpnoti bhaktimān || 5 ||
[Analyze grammar]

vaiśākhasya tu saptamyāṃ dhātāramabhipūjayet |
paśubaṃdhvadhvare puṇyaṃ samyakprāpnoti mānavaḥ || 6 ||
[Analyze grammar]

saptamyāṃ jyeṣṭhamāsasya indra ityabhipūjayet |
vājapeyasya yajñasya phalaṃ prāpnoti durllabham || 7 ||
[Analyze grammar]

āṣāḍhamāse saptamyāṃ pūjayitvā divākaram |
bahuvarṇasya yajñasya phalaṃ prāpnoti puṣkalam || 8 ||
[Analyze grammar]

saptamyāṃ śrāvaṇe māsi mātāpi nāma pūjayet |
sautrāmaṇiphalaṃ samyakprāpnoti puruṣaḥ śubham || 9 ||
[Analyze grammar]

raviṃ prauṣṭhapade māse saptamyāmarcayecchuciḥ |
tulāpuruṣadānasya phalaṃ prāpnoti mānavaḥ || 10 ||
[Analyze grammar]

āśvayukchuklasaptamyāṃ savitāraṃ prapūjya ca |
gosahasrapradānasya phalaṃ prāpnoti mānavaḥ || 11 ||
[Analyze grammar]

kārtike śuklasaptamyāṃ dineśaṃ saptavāha nam |
yo'bhyarcayati puṇyātmā pauṃḍarīkaṃ sa vindati || 12 ||
[Analyze grammar]

bhānuṃ mārgasite pakṣe pūjayitvā vidhānataḥ |
rājasūyasya yajñasya phalaṃ daśaguṇaṃ bhajet || 13 ||
[Analyze grammar]

bhāskaraṃ pauṣamāse tu pūjayitvā yathāvidhi |
narameghasya yajñasya phalaṃ prāpnoti puṣkalam || 14 ||
[Analyze grammar]

tadeva kṛṣṇasaptamyāṃ nāma saṃpūjayedbudhaḥ |
sopavāsaḥ prayatnena varṣamekaṃ yudhiṣṭhira |
paścātsamāpte niyame sūryayāgaṃ samācaret || 15 ||
[Analyze grammar]

śucirbhūmau same deśe lepayedraktaca ndanaiḥ |
ekahastaṃ dvihastaṃ vā caturhastamathāpi vā || 16 ||
[Analyze grammar]

siṃdūragairikābhyāṃ ca sūryamaṇḍalamālikhet |
raktapuṣpaiḥ sapadmaiśca dhūpaiḥ kundurakādibhiḥ |
sampūjya dadyānnaivedyaṃ vicitraṃ ghṛtapācitam || 17 ||
[Analyze grammar]

purataḥ sthāpayetkumbhānsahiṇyānnasaṃyutān |
agnikāryaṃ tataḥ kuryātsamabhyukṣya hutāśanam || 18 ||
[Analyze grammar]

ākṛṣṇeneti maṃtreṇa samidbhiścārkasaṃbhavaiḥ |
tilairājyaguḍopeterdadyāddaśaśatāhutīḥ || 19 ||
[Analyze grammar]

tatastu dakṣiṇā deyā brāhmaṇānāṃ yudhiṣṭhira |
bhojayitvā raktavastraiḥ śuklānyapi pidhāpayet || 20 ||
[Analyze grammar]

dvādaśātra praśaṃsaṃti gāvo vastrānvitāḥ śubhāḥ |
chatropānahayugmaṃ ca ekaikāya pradāpayet |
evaṃ visṛjya tānviprānsvayaṃ bhuñjīta vāgyataḥ || 21 ||
[Analyze grammar]

ya evaṃ kurute pārtha saptamīvratamuttamam |
nīrujo rūpavānvāggmī dīrghāyuścaiva jāyate || 22 ||
[Analyze grammar]

saptamyāṃ sopavāsastu bhānoḥ paśyaṃti ye mukham |
sarvapāpavinirmuktāḥ sūryalokamavāpnuyuḥ || 23 ||
[Analyze grammar]

vratametanmahārāja sarvāśubhavināśanam |
sarvaduṣṭapraśamanaṃ śarīrārogyakārakam |
sūryalokapradaṃ cāṃte prāhaivaṃ nārado muniḥ || 24 ||
[Analyze grammar]

ye saptamīmupavasaṃti sitāsitāṃ ca nāmākṣarairahimadīdhitimarcayaṃti |
te sarvarogarahitāḥ sukhinaḥ sadaiva bhūtvā raveranucarāḥ suciraṃ bhavaṃti || 25 ||
[Analyze grammar]