Chapter 25

śrīkṛṣṇa uvāca |
tathaivānyatpravakṣyāmi sarvakāmaphalapradam |
saubhāgyaśayanaṃ nāma yatpurāṇavido viduḥ || 1 ||
[Analyze grammar]

purā dagdheṣu lokeṣu bhūrbhuvaḥsvarmahādiṣu |
saubhāgyaṃ sarvalokānāmekasthamabhavattadā || 2 ||
[Analyze grammar]

tacca vaikuṇṭhamāsādya viṣṇorvakṣasthale sthitam |
tataḥ kālena mahatā punaḥ sargavidhau nṛpa || 3 ||
[Analyze grammar]

ahaṃkārāvṛte loke pradhānapuruṣānvite |
sparddhāyāṃ ca pravṛttāyāṃ kamalāsanakṛṣṇayoḥ || 4 ||
[Analyze grammar]

piṃgākārā samudbhūtā jvālā vakṣasthalī tadā |
tayābhitaptasya harervakṣasastadviniḥsṛtam || 5 ||
[Analyze grammar]

yadvakṣasthalamāśritya viṣṇoḥ saubhāgyamāsthitam |
rasarūpatayā tāvatprāpnoti vasudhātalam || 6 ||
[Analyze grammar]

utkṣiptamantarikṣasthaṃ brahmaputreṇa dhīmatā |
dakṣeṇa pītamātraṃ tu rūpalāvaṇyakāraṇam || 7 ||
[Analyze grammar]

balaṃ tejo mahajjātaṃ dakṣasya parameṣṭhinaḥ |
śeṣaṃ yadapatadbhūmāvaṣṭadhā tadajāyata || 8 ||
[Analyze grammar]

ikṣavastavarājaṃ ca niṣpāvājājidhānyakam |
vikāravacca gokṣīraṃ kusumbhaṃ kuṃkumaṃ tathā |
lavaṇaṃ cāṣṭamaṃ tatra saubhāgyāṣṭakamucyate || 9 ||
[Analyze grammar]

pītaṃ yadbrahmaputreṇa yogajñānavidā tathā |
duhitāsyābhavattasmādyā satītyabhidhīyate |
lokānatītya lālityāllalitā tena cocyate || 10 ||
[Analyze grammar]

trailokyasuṃdarīmenāmupayeme pinākadhṛk |
triviśvasaubhāgyamayī bhukti muktiphalapradā || 11 ||
[Analyze grammar]

ārādhya tāmumāṃ bhaktyā strī rājankinna vindati || 12 ||
[Analyze grammar]

yudhiṣṭhira uvāca |
kathamārādhanaṃ tasyā jagaddhātryā janārdana |
yadvidhānaṃ ca tatsarvaṃ jagannātha vadasva me || 13 ||
[Analyze grammar]

śrīkṛṣṇa uvāca |
vasaṃtamāsamāsādya tṛtīyāyāṃ yudhiṣṭhira |
śuklapakṣasya pūrvāhne tilaiḥ snānaṃ samācaret || 14 ||
[Analyze grammar]

tasminnahani sā devī kila viśvātmanā satī |
pāṇigrahaṇakairmantrairudvāhyā varavarṇinī || 15 ||
[Analyze grammar]

tathā sahaiva deveśaṃ tṛtīyāyāmathārcayet |
phalairnānāvidhairdhūpadīpanaivedyasaṃyutaiḥ || 16 ||
[Analyze grammar]

pañcagavyenānumāsaṃ tathā gaṃdhodakena ca |
snapayitvā rcayedgaurīminduśekharasaṃyutām || 17 ||
[Analyze grammar]

pāṭalāṃ śaṃbhusahitāṃ pādayostu prapūjayet |
triyugāṃ śivasaṃyuktāṃ gulphayorubhayorapi || 18 ||
[Analyze grammar]

bhadreśvareṇa sahitāṃ vijayāṃ jānunoryuge |
īśānīṃ harikeśaṃ ca kaṭyāṃ saṃpūjayedbudhaḥ || 19 ||
[Analyze grammar]

koṭanīṃ śūlinaṃ kukṣau maṃgalāṃ śarvasaṃyutām |
udare pūjayedrāja nnumāṃ rudraṃ kucadvaye || 20 ||
[Analyze grammar]

anaṃtāṃ tripuraghraṃ ca pūjayetkarasaṃpuṭe |
kaṃṭhe bhavaṃ bhavānīṃ ca mukhe gaurīṃ haraṃ tathā || 21 ||
[Analyze grammar]

sarvātmanā ca sahitāṃ lalitāṃ mastakopari |
oṃkārapūrvakairetairnnamaskārāṃtayojitaiḥ |
pūjayedbhaktisahito gandhamālyānulepanaiḥ || 22 ||
[Analyze grammar]

evamabhyarcya vidhivatsaubhāgyāṣṭakamagrataḥ |
sthāpayetsvinnaniṣpāvānkusuṃbhaṃ kṣīrajīrakam || 23 ||
[Analyze grammar]

tavarājekṣulavaṇaṃ kuṃkumaṃ ca tathāṣṭamam |
dattaṃ saubhāgyakaṃ yasmātsaubhāgyāṣṭa kamucyate || 24 ||
[Analyze grammar]

evaṃ nivedya tatsarvaṃ śivayoḥ prīyatāmiti |
caitre śṛṃgodakaṃ prāśya svapyādbhūmāvariṃdama || 25 ||
[Analyze grammar]

tataḥ prātaḥ samutthāya kṛtaprāṇa jayaḥ śuciḥ |
saṃpūjya dvijadāṃpatyaṃ mālyavastravibhūṣaṇaiḥ |
saubhāgyāṣṭakasaṃyuktaṃ sauvarṇacaraṇadvayam || 26 ||
[Analyze grammar]

prīyatāmatra lalitā brāhmaṇāya nive dayet |
evaṃ saṃvatsaraṃ yāvattṛtīyāyāṃ sadā nṛpa || 27 ||
[Analyze grammar]

prāśane nāmamaṃtre ca viśeṣo'yaṃ nibodha me |
gośṛṃgodakamādye syādvaiśākhe gomayaṃ punaḥ || 28 ||
[Analyze grammar]

jyeṣṭhe maṃdārapuṣpaṃ ca bilvapatraṃ śucau smṛṃtam |
śrāvaṇe dadhi saṃprāśyaṃ nabhasye ca kuśodakam || 29 ||
[Analyze grammar]

kṣīramāśvayuje tadvatkārtike pṛṣa dājyakam |
mṛgottamāṃge gomūtraṃ pauṣe saṃprāśayedghṛtam || 30 ||
[Analyze grammar]

māghe kṛṣṇatilāṃstadvatpañcagavyaṃ ca phālgune |
lalitā vijayā bhadrā bhavānī kumudā śritā || 31 ||
[Analyze grammar]

vāsudevī tathā gaurī maṅgalā kamalā satī |
umā ca dānakāle tu prīyatāmiti kīrtayet || 32 ||
[Analyze grammar]

mallikāśokakamalakadaṃbotpalamālati |
kuḍmalaṃ karavīraṃ ca bāṇamamlānakuṃkumam |
siṃduvāraṃ ca māseṣu sarveṣu kramaśaḥ smṛtam || 33 ||
[Analyze grammar]

japākusuṃbhakusumaṃ mālatī śatapatrikā |
yathālābhaṃ pradeyāni karavīraṃ ca sarvadā || 34 ||
[Analyze grammar]

evaṃ saṃvatsaraṃ yāvadupoṣya vidhivannaraḥ |
strī nakte tu kumārī vā śivāmabhyarcya śaktitaḥ |
vratāṃte śayanaṃ dadyātsarvopaskarasaṃyutam || 35 ||
[Analyze grammar]

umāmaheśvaraṃ haimaṃ vṛṣabhaṃ ca gavā saha |
sthāpayitvā tu śayane brāhmaṇāya nivedayet || 36 ||
[Analyze grammar]

anyānyapi yathāśakti midhunānyaṃbarādibhiḥ |
dhānyālaṃkaraṇairdānairanyaiśca dhanasaṃcayaiḥ |
vittaśāṭhyena rahitaḥ pūjayedgatavismayaḥ || 37 ||
[Analyze grammar]

evaṃ karoti yaḥ samyaksaubhāmyaśayanavratam |
sarvānkāmānavāpnoti padaṃ cānantyamaśnute || 38 ||
[Analyze grammar]

saubhāgyārogyarūpāyurvastrālaṃkārabhūṣaṇaiḥ |
na viyukto bhavedrājanvarṣāyutaśatatrayam || 39 ||
[Analyze grammar]

yastu dvādaśa varṣāṇi saubhāgyaśayanaṃ vratam |
karoti sapta cāṣṭau vā śrīkaṇṭhabhuvaneśvaraiḥ |
pūjyamāno bhavetsamya gyāvatkalpāyutatrayam || 40 ||
[Analyze grammar]

nārī vā kurute yā tu kumārī vā nareśvara |
sāpi tatphalamāpnoti devyanugrahalālitā || 41 ||
[Analyze grammar]

śṛṇuyādapi yaścaitatpradadyādatha vā matim |
so'pi vidyādharo bhūtvā svargaloke ciraṃ vaset || 42 ||
[Analyze grammar]

idamiha madanena pūrvamiṣṭaṃ caritamidaṃ śaśabiṃdunā vrataṃ vai |
surapatidhanadeśavāyusomaiścaritadidaṃ karuṇena baṃdinā ca || 43 ||
[Analyze grammar]

yānīha dattāni purā nareṃdrairdānāni dharmārthayaśaskarāṇi |
nirmālyavaṃti pratimāni tāni sa nāma sādhuḥ punarādadānaḥ || 44 ||
[Analyze grammar]