Chapter 28

sūta uvāca |
atha te varṇayiṣyāmi kathāṃ sādhūpacāritām |
nṛpopadeśataḥ sādhuḥ kṛtārtho'bhūdvaṇigyathā || 1 ||
[Analyze grammar]

maṇipūrapatī rājā candracūḍo mahāyaśāḥ |
saha prajābhirānarca satyanārāyaṇaṃ prabhum || 2 ||
[Analyze grammar]

atha ratnapurasthāyī sādhurlakṣapatirvaṇik |
dhanairāpūrya taraṇīḥ saha gacchannadītaṭe || 3 ||
[Analyze grammar]

dadarśa bahulaṃ lokaṃ nānāgrāmavilāsinam |
maṇimuktāviracitairvitānaissamalaṃkṛtam || 4 ||
[Analyze grammar]

vedavādāṃśca śuśrāva gītavāditrasaṃgatān |
ramyaṃ sthānaṃ samālokya karṇadhāraṃ samādiśat || 5 ||
[Analyze grammar]

viśrāmayātra taraṇīriti paśyāmi kautukam |
bhartrādiṣṭastathā cakre karṇadhāraḥ sabhṛtyakaiḥ || 6 ||
[Analyze grammar]

taṭasīmnaḥ samuttīrya mallalīlāvilāsinaḥ |
karṇadhārā nagā vīrā yuyudhurmallalīlayā || 7 ||
[Analyze grammar]

svayamuttīrya sāmātyo lokānpapraccha sādaram |
yajñasthānaṃ samālokya praśastaṃ samudo yayau || 8 ||
[Analyze grammar]

kimatra kriyate sabhyā bhavadbhirlokapūjitaiḥ |
sabhyā ūcuśca te sarve satyanārāyaṇo vibhuḥ || 9 ||
[Analyze grammar]

pūjyate baṃdhubhiḥ sārdhaṃ rājñā lokānukaṃpinā |
prāptaṃ niṣkaṭakaṃ rājyaṃ satyanārāyaṇārcanāt || 10 ||
[Analyze grammar]

dhanārthī labhate dravyaṃ putrārthī sutamuttamam |
jñānārthī labhate cakṣurnirbhayaḥ syādbhayāturaḥ || 11 ||
[Analyze grammar]

sarvānkāmānavāpnoti naraḥ satyasurārca nāt |
vidhānaṃ tu tataḥ śrutvā cailaṃ baddhvā gale'sakṛt || 12 ||
[Analyze grammar]

daṃḍavatpraṇipatyāha kāmaṃ sabhyānamodayat |
anapatyo'smi bhagavanvṛthaiśvaryo vṛthodyamaḥ || 13 ||
[Analyze grammar]

putraṃ vā yadi vā kanyāṃ labheyaṃ tvatprasādataḥ |
patākāṃ kāṃcanīṃ kṛtvā pūjayiṣye kṛpānidhim || 14 ||
[Analyze grammar]

śrutvā sabhyā abruvaṃste kāmanāsiddhirastu te |
hariṃ praṇamya sabhyāśca prasādaṃ bhuktavāṃstadā || 15 ||
[Analyze grammar]

jagāma svālayaṃ sādhurmanasā ciṃtayanharim |
svagṛhe hyāgate tasminnāryo maṃgalapāṇayaḥ || 16 ||
[Analyze grammar]

maṃgalāni vicitrāṇi yathocitamakārayan |
viveśāṃtaḥpure sādhurmahākautukamaṃgalaḥ || 17 ||
[Analyze grammar]

ṛtusnātā satī līlāvatī paryacaratpatim |
garbhaṃ dhṛtavatī sādhvī samaye suṣuve tu sā || 18 ||
[Analyze grammar]

kanyāṃ kamalalolākṣīṃ bāṃdhavāmodakāriṇīm |
sādhuḥ parāṃ mudaṃ lebhe vitatāra dhanaṃ bahu || 19 ||
[Analyze grammar]

viprānāhūya vedajñānkārayāmāsa maṃgalam |
lekhayitvā janmapatrīṃ nāma cakre kalāvatīm || 20 ||
[Analyze grammar]

kalānidhikale vāsau vavṛdhe sā kalāvatī |
aṣṭavarṣā bhavedgaurī navavarṣā ca rohiṇī || 21 ||
[Analyze grammar]

daśavarṣā bhavetkanyā tataḥ prauḍhā rajasvalā |
prauḍhāṃ kālena tāṃ dṛṣṭvā vivāhārthamacintayat || 22 ||
[Analyze grammar]

nagare kāṃcanapure vaṇikchaṃkhapatiḥ śrutaḥ |
kulīno rūpasaṃpattiśīlaudāryaguṇānvitaḥ || 23 ||
[Analyze grammar]

varayāmāsa taṃ sādhurduhituḥ sadṛśaṃ varam |
śubhe lagne bahuvidhairmaṃgalairagnisannidhau || 24 ||
[Analyze grammar]

vedavāditraninadairdadau kanyāṃ yathāvidhi |
maṇimuktāpravālāni vasanaṃ bhūṣaṇāni ca || 25 ||
[Analyze grammar]

mahāmodamanāḥ sādhurmaṃgalārthaṃ dadau ca ha |
premṇā nivāsayāmāsa gṛhe jāmātaraṃ tataḥ || 26 ||
[Analyze grammar]

taṃ mene putravatsādhuḥ sa ca taṃ pitṛvatsudhīḥ |
atīte bhūyasaḥ kāle satyanārāyaṇārcanam || 27 ||
[Analyze grammar]

vismṛtya saha jāmātrā vāṇijyāya yayau punaḥ |
sūta uvāca |
atha sādhuḥ samādāya ratnāni vividhāni ca || 28 ||
[Analyze grammar]

naukāḥ saṃsthāpya sa yayau deśāddeśāntaraṃ prati |
nagaraṃ narmadātīre tatra vāsaṃ cakāra saḥ || 29 ||
[Analyze grammar]

kurvankrayaṃ vikrayaṃ ca ciraṃ tasthau mahāmanāḥ |
karmaṇā manasā vācā na kṛtaṃ satyasevanam || 30 ||
[Analyze grammar]

tataḥ karmavipākena tāpamāpācirādvaṇik |
kasmiṃściddivase rātrau rājño gehe tamovṛteḥ || 31 ||
[Analyze grammar]

jñātvā nidrāgatānsarvānhṛtaṃ caurairmahādhanam |
prabhāte vācito rājā sūtamāgadhabaṃdibhiḥ || 32 ||
[Analyze grammar]

prātaḥkṛtyaṃ nṛpaḥ kṛtvā sadaḥ saṃprāviśacca saḥ |
tatastatra samāyātaḥ kiṃkaro rājavallabhaḥ || 33 ||
[Analyze grammar]

uvāca sa tadā vākyaṃ śṛṇuṣva tvaṃ dharā pate |
muktāmālāśca bahudhā ratnāni vividhāni ca || 34 ||
[Analyze grammar]

mumuṣuścaurā gatāssarve na jānīmo vayaṃ nṛpa |
iti vijñāpito rājā puṇyaśloka śikhāmaṇiḥ || 35 ||
[Analyze grammar]

uvāca krodhatāmrākṣo yūyaṃ saṃyāta mā ciram |
sacauraṃ dravyamādāya matpārśvaṃ tvamupānaya || 36 ||
[Analyze grammar]

no ceddhaniṣye sagaṇāniti dūtānsamādiśat |
nṛpavākyaṃ samākarṇya prajagmuste ca kiṃkarāḥ || 37 ||
[Analyze grammar]

bahuyatnairna saṃśodhya dravyaṃ corasamanvitam |
ekībhūtvā niśi tadā mahāciṃtāturo'bhavat || 38 ||
[Analyze grammar]

hantā māṃ sagaṇaṃ rājā kiṃ karomi kutaḥ sukham |
nṛpadaṃḍācca me mṛtyuḥ pretatvāya bhavediha || 39 ||
[Analyze grammar]

narmadāyāṃ ca maraṇaṃ śivalokapradāyakam |
ityevaṃ saṃmataṃ kṛtvā narmadāyāstaṭaṃ yayuḥ || 40 ||
[Analyze grammar]

videśino'sya vaṇijo dadarśa vipulaṃ dhanam |
muktāhāraṃ gale tasya luṃṭhitaṃ vaṇijo'sya ca || 41 ||
[Analyze grammar]

cauro'yamiti niścitya tau babaṃdhātmarakṣaṇāt |
sadhanaṃ saha jāmātrā nṛpāntikamupānayat || 42 ||
[Analyze grammar]

pratikūle harau tasminrājñāpi na vicāritam |
dhanāgāre dhanaṃ nītvā badhnīta tau sudurmatī || 43 ||
[Analyze grammar]

kārāgāre lohamayaiḥ śṛṃkhalairaṃgapādayoḥ |
iti rājājñayā dūtāstathā cakrurnibaṃdhanam || 44 ||
[Analyze grammar]

jāmātrā sahitaḥ sādhurvilalāpa bhṛśaṃ muhuḥ |
hā putra tāta tāteti jāmātaḥ kva dhanaṃ gatam || 45 ||
[Analyze grammar]

kva sthitā ca sutā bhāryā paśya dhāturviparyayam |
nimagnau duḥkhajaladhau ko vāṃ pāsyati saṃkaṭāt || 46 ||
[Analyze grammar]

mayā bahutaraṃ dhāturvipriyaṃ hi purākṛtam |
tatkarmaṇaḥ prabhāvo'yaṃ na jāne kasya vā phalam || 47 ||
[Analyze grammar]

samaṃ śvaśurajāmātrau dvādaśeṣu viṣādinau || 48 ||
[Analyze grammar]

iti śrībhaviṣye mahāpurāṇe pratisargaparvaṇi caturyugakhaṃḍāparaparyāye kaliyugīyetihāsasamuccaye'ṣṭāviṃśo 'dhyāyaḥ || 28 ||
[Analyze grammar]