Chapter 10

sūta uvāca |
vaitālastu mahābhāga rājānamidamabravīt |
gauḍadeśe mahārāja vardhanaṃ nāma vai puram || 1 ||
[Analyze grammar]

guṇaśekhara ākhyāto bhūpālastatra dharmavān |
tanmantrī nirbhayānando jainadharmaparā yaṇaḥ || 2 ||
[Analyze grammar]

kadācidbhūpatiryāto mandire girijāpateḥ |
pūjayāmāsa taṃ devaṃ sarvavyāpinamīśvaram || 3 ||
[Analyze grammar]

vṛścikastatra saṃprāpya dadaṃśa nṛpatiṃ ruṣā |
tatkaṣṭena sa bhūpālo mūrchitaḥ patito bhuvi || 4 ||
[Analyze grammar]

tadā tu nirbhayānando viṣamuttārya tasya vai |
bhūpatiṃ varṇayāmāsa jainadharma parāyaṇaḥ || 5 ||
[Analyze grammar]

śṛṇu rājanmahābhāga śatrūnṣaṇmānasādhamān |
kāmaḥ krodhastathā lobho ratirhiṃsā ca tṛṣṇikā |
rajoguṇācca te jātāsteṣāṃ bhedāḥ pṛthakpṛthak || 6 ||
[Analyze grammar]

moho daṃbho madaścaiva mamatāśā ca garhaṇā |
tamoguṇācca te jātāstairidaṃ pūritaṃ jagat || 7 ||
[Analyze grammar]

kāmī viṣṇustathā rudraḥ krodhī lobhī vidhistathā |
daṃbhī śakro yamo mohī madī yakṣapatiḥ svayam || 8 ||
[Analyze grammar]

māyā vaśyāśca te sarve tarhi tatpūjanena kim |
ṣaṭśatrubhirjito yo vai sa jino munibhiḥ smṛtaḥ || 9 ||
[Analyze grammar]

na jitaḥ sa jino jñeyo'dvaitavādī niraṃjanaḥ |
tasya dhyānena bhāvena mokṣavaṃto narāḥ sadā || 10 ||
[Analyze grammar]

tatprasādāya yo dharmaḥ śṛṇu me vasudhādhipa |
gopūjanena te devāstuṣṭiṃ yānti sadaiva hi || 11 ||
[Analyze grammar]

ato gopūjanaṃ śuddhaṃ hiṃsā sarvatra varjitā |
madapānena sarvātmā jinaḥ kleśaṃ samāpnuyāt || 12 ||
[Analyze grammar]

tasmānmāṃsaṃ ca pānaṃ ca varjitaṃ sarvadaiva hi |
nyāyenopārjitaṃ vittaṃ bhojayecca bubhukṣitān || 13 ||
[Analyze grammar]

ravirātmā jinasyaiva tatprakāśe hi bhojayet |
ityevaṃ varṇayitvainaṃ maṃtrī gehamupāyayau || 14 ||
[Analyze grammar]

tathaiva matvā sa nṛpo jinadharmaṃ gṛhītavān |
kiyatā caiva kālena vedamārgo hi laṃghitaḥ || 15 ||
[Analyze grammar]

tadā tu duḥkhitā rājñī śivasya śaraṇaṃ yayau || 16 ||
[Analyze grammar]

varadānena rudrasya putro jāto mahottamaḥ |
dharmarāja iti khyāto vedavrataparāyaṇaḥ || 17 ||
[Analyze grammar]

guṇaśekhara evāsau paṃcatve nirayaṃ yayau |
dharmarājastadā rājyaṃ kṛtavāndharmataḥ svayam || 18 ||
[Analyze grammar]

tasya dharmaprabhāveṇa tatpitā svargamāptavān |
trayaḥ patnyobhavaṃstasyaguṇarūpā mahottamā || 19 ||
[Analyze grammar]

vasaṃtasamaye rājā tābhiḥ saha vanāṃtare |
saṃyāto ramayāmāsa puṣpabhramaranādite || 20 ||
[Analyze grammar]

śramitaḥ sa tu bhūpālo rājñībhiḥ saha moditaḥ |
sarovare snāpitavānmadāghūrṇitalocanaḥ || 21 ||
[Analyze grammar]

gṛhītvā kusumaṃ pādmaṃ kare rājñyai samārpayat |
padi hīnatvamāyātā patatā kusumena vai || 22 ||
[Analyze grammar]

duḥkhitaḥ sa tu bhūpālo rājñīṃ tāmacikitsayat |
rātrau prāpte dvitīyā tu candraśīlena mohitā || 23 ||
[Analyze grammar]

apatadvyākulībhūtvā śuddhaṃ pādamabhūttataḥ |
patitāyāśca śabdena tṛtīyā jvaritā'bhavat || 24 ||
[Analyze grammar]

tasyā mūrcchā tadā kṣīṇā dvitīyāyā ajāyata |
nṛpasparśena sā subhrūrjvaratāpaṃ vihāya ca || 25 ||
[Analyze grammar]

prabhāte suṃdare jāte sa tābhirgṛhamāyayau |
ityuktvā sa tu vaitālo bhūpatiṃ prāha namradhīḥ |
āsāṃ madhye mahārāja kā śreṣṭhā sukumārikā || 26 ||
[Analyze grammar]

rājovāca |
tṛtīyā sukumārī ca tāsāṃ madhye mahottamā |
vāyuprakṛtitaścāsau padmapuṣpeṇa khaṃjitā || 27 ||
[Analyze grammar]

śītāṃśunā dvitīyā tu mūrcchitā kaphabhāvataḥ |
śabdamātreṇa saṃtāpo yasyāṃ jāto hi sottamā || 28 ||
[Analyze grammar]

vihasyāha punardevo bhavabhaktaṃ mahīpatim |
jainadharmaḥ pradhāno hi vedadharmotha vā vada || 29 ||
[Analyze grammar]

sa hovāca pradhāno'sau vedadharmaḥ sanātanaḥ |
aṣṭau śreṇyo hi tasyaiva brahmaṇovyaktarūpiṇaḥ || 30 ||
[Analyze grammar]

śūdro vaiśyastathā kṣatrī brāhmaṇo brahmacaryakṛt |
gehī vanyo yatiścaiva kramācchreṣṭhāḥ prakīrtitāḥ || 31 ||
[Analyze grammar]

yaḥ kṛtvā dārasaṃsargaṃ yativadvartate gṛhī |
sa pāpī narakaṃ yāti yāvadābhūtasaṃplavam || 32 ||
[Analyze grammar]

gṛheṣu yativaddharmo jainaśāstre prakīrtitaḥ |
pākhaṇḍaḥ sa smṛtaḥ prājñairvarjanīyo hi sarvadā || 33 ||
[Analyze grammar]

iti śrībhaviṣye mahāpurāṇe caturyugakhaṃḍāparaparyāye kaliyugī yetihāsasamuccaye daśamo'dhyāyaḥ || 10 ||
[Analyze grammar]