Chapter 9

[English text for this chapter is available]

sūta uvāca – |
saṃstuto bhagavānitthaṃ mārkaṇḍeyena dhīmatā |
nārāyaṇo narasakhaḥ prīta āha bhṛgūdvaham || 1 ||
[Analyze grammar]

śrībhagavānuvāca |
bho bho brahmarṣivaryo'si siddha ātmasamādhinā |
mayi bhaktyānapāyinyā tapaḥsvādhyāyasaṃyamaiḥ || 2 ||
[Analyze grammar]

vayaṃ te parituṣṭāḥ sma tvadbṛhadvratacaryayā |
varaṃ pratīccha bhadraṃ te varadeśādabhīpsitam || 3 ||
[Analyze grammar]

śrīṛṣiruvāca |
jitaṃ te devadeveśa prapannārtiharācyuta |
vareṇaitāvatālaṃ no yad bhavān samadṛśyata || 4 ||
[Analyze grammar]

gṛhītvājādayo yasya śrīmat pādābjadarśanam |
manasā yogapakvena sa bhavān me'kṣagocaraḥ || 5 ||
[Analyze grammar]

athāpyambujapatrākṣa puṇyaślokaśikhāmaṇe |
drakṣye māyāṃ yayā lokaḥ sapālo veda sadbhidām || 6 ||
[Analyze grammar]

sūta uvāca |
itīḍito'rcitaḥ kāmam ṛṣiṇā bhagavān mune |
tatheti sa smayan prāgād badaryāśramamīśvaraḥ || 7 ||
[Analyze grammar]

tameva cintayannartham ṛṣiḥ svāśrama eva saḥ |
vasan agnyarkasomāmbu bhūvāyuviyadātmasu || 8 ||
[Analyze grammar]

dhyāyan sarvatra ca hariṃ bhāvadravyairapūjayat |
kvacit pūjāṃ visasmāra premaprasarasamplutaḥ || 9 ||
[Analyze grammar]

tasyaikadā bhṛguśreṣṭha puṣpabhadrātaṭe muneḥ |
upāsīnasya sandhyāyāṃ brahman vāyurabhūnmahān || 10 ||
[Analyze grammar]

taṃ caṇḍaśabdaṃ samudīrayantaṃ |
balāhakā anvabhavan karālāḥ |
akṣasthaviṣṭhā mumucustaḍidbhiḥ |
svananta uccairabhivarṣadhārāḥ || 11 ||
[Analyze grammar]

tato vyadṛśyanta catuḥsamudrāḥ |
samantataḥ kṣmātalamāgrasantaḥ |
samīravegormibhirugranakra |
mahābhayāvartagabhīraghoṣāḥ || 12 ||
[Analyze grammar]

antarbahiścādbhiratidyubhiḥ kharaiḥ |
śatahradābhirupatāpitaṃ jagat |
caturvidhaṃ vīkṣya sahātmanā muniḥ |
jalāplutāṃ kṣmāṃ vimanāḥ samatrasat || 13 ||
[Analyze grammar]

tasyaivamudvīkṣata ūrmibhīṣaṇaḥ |
prabhañjanāghūrṇitavārmahārṇavaḥ |
āpūryamāṇo varaṣadbhirambudaiḥ |
kṣmāmapyadhād dvīpavarṣādribhiḥ samam || 14 ||
[Analyze grammar]

sakṣmāntarikṣaṃ sadivaṃ sabhāgaṇaṃ |
trailokyamāsīt saha digbhirāplutam |
sa eka evorvarito mahāmuniḥ |
babhrāma vikṣipya jaṭā jaḍāndhavat || 15 ||
[Analyze grammar]

kṣuttṛṭparīto makaraistimiṅgilaiḥ |
upadruto vīcinabhasvatāhataḥ |
tamasyapāre patito bhraman diśo |
na veda khaṃ gāṃ ca pariśrameṣitaḥ || 16 ||
[Analyze grammar]

kvacid gato mahāvarte taralaistāḍitaḥ kvacit |
yādobhirbhakṣyate kvāpi svayaṃ anyonyaghātibhiḥ || 17 ||
[Analyze grammar]

kvacicchokaṃ kvacinmohaṃ kvacid dukhaṃ sukhaṃ bhayam |
kvacit mṛtyumavāpnoti vyādhyādibhirutārditaḥ || 18 ||
[Analyze grammar]

ayutāyatavarṣāṇāṃ sahasrāṇi śatāni ca |
vyatīyurbhramataḥ tasmin viṣṇumāyāvṛtātmanaḥ || 19 ||
[Analyze grammar]

sa kadācid bhraman tasmin pṛthivyāḥ kakudi dvijaḥ |
nyāgrodhapotaṃ dadṛśe phalapallavaśobhitam || 20 ||
[Analyze grammar]

prāguttarasyāṃ śākhāyāṃ tasyāpi dadṛśe śiśum |
śayānaṃ parṇapuṭake grasantaṃ prabhayā tamaḥ || 21 ||
[Analyze grammar]

mahāmarakataśyāmaṃ śrīmadvadanapaṅkajam |
kambugrīvaṃ mahoraskaṃ sunāsaṃ sundarabhruvam || 22 ||
[Analyze grammar]

śvāsaijadalakābhātaṃ kambuśrīkarṇadāḍimam |
vidrumādharabhāseṣat śoṇāyita sudhāsmitam || 23 ||
[Analyze grammar]

padmagarbhāruṇāpāṅgaṃ hṛdyahāsāvalokanam |
śvāsaijadbalisaṃvignanimnanābhidalodaram || 24 ||
[Analyze grammar]

cārvaṅgulibhyāṃ pāṇibhyām unnīya caraṇāmbujam |
mukhe nidhāya viprendro dhayantaṃ vīkṣya vismitaḥ || 25 ||
[Analyze grammar]

taddarśanād vītapariśramo mudā |
protphullahṛtpadmavilocanāmbujaḥ |
prahṛṣṭaromādbhutabhāvaśaṅkitaḥ |
praṣṭuṃ purastaṃ prasasāra bālakam || 26 ||
[Analyze grammar]

tāvacchiśorvai śvasitena bhārgavaḥ |
so'ntaḥ śarīraṃ maśako yathāviśat |
tatrāpyado nyastamacaṣṭa kṛtsnaśo |
yathā purāmuhyadatīva vismitaḥ || 27 ||
[Analyze grammar]

khaṃ rodasī bhāgaṇānadrisāgarān |
dvīpān savarṣān kakubhaḥ surāsurān |
vanāni deśān saritaḥ purākarān |
kheṭān vrajānāśramavarṇavṛttayaḥ || 28 ||
[Analyze grammar]

mahānti bhūtānyatha bhautikānyasau |
kālaṃ ca nānāyuga kalpakalpanam |
yatkiñcidanyad vyavahārakāraṇaṃ |
dadarśa viśvaṃ sadivāvabhāsitam || 29 ||
[Analyze grammar]

himālayaṃ puṣpavahāṃ ca tāṃ nadīṃ |
nijāśramaṃ tatra ṛṣīn apaśyata |
viśvaṃ vipaśyañchvasitācchiśorvai |
bahirnirasto nyapatallayābdhau || 30 ||
[Analyze grammar]

tasmin pṛthivyāḥ kakudi prarūḍhaṃ |
vaṭaṃ ca tatparṇapuṭe śayānam |
tokaṃ ca tatpremasudhāsmitena |
nirīkṣito'pāṅganirīkṣaṇena || 31 ||
[Analyze grammar]

atha taṃ bālakaṃ vīkṣya netrābhyāṃ dhiṣṭhitaṃ hṛdi |
abhyayādatisaṅkliṣṭaḥ pariṣvaktuṃ adhokṣajam || 32 ||
[Analyze grammar]

tāvatsa bhagavān sākṣāt yogādhīśo guhāśayaḥ |
antardadhe ṛṣeḥ sadyo yathehānīśanirmitā || 33 ||
[Analyze grammar]

tamanvatha vaṭo brahman salilaṃ lokasamplavaḥ |
tirodhāyi kṣaṇādasya svāśrame pūrvavan sthitaḥ || 34 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ dvādaśaskandhe māyādarśanaṃ nāma navamo'dhyāyaḥ || 9 ||
[Analyze grammar]