Chapter 28

[English text for this chapter is available]

paramārthanirūpaṇam |
śrībhagavānuvāca |
parasvabhāvakarmāṇi na praśaṃsenna gahayet |
viśvamekātmakaṃ paśyan prakṛtyā puruṣeṇa ca || 1 ||
[Analyze grammar]

parasvabhāvakarmāṇi yaḥ praśaṃsati nindati |
sa āśu bhraśyate svārthād asatyabhiniveśataḥ || 2 ||
[Analyze grammar]

taijase nidrayā'panne piṇḍastho naṣṭacetanaḥ |
māyāṃ prāpnoti mṛtyuṃ vā tadvat nānārthadṛk pumān || 3 ||
[Analyze grammar]

kiṃ bhadraṃ kiṃ abhadraṃ vā dvaitasyāvastunaḥ kiyat |
vācoditaṃ tadanṛtaṃ manasā dhyātameva ca || 4 ||
[Analyze grammar]

chāyāpratyāhvayābhāsā hyasanto'pyarthakāriṇaḥ |
evaṃ dehādayo bhāvā yacchantyāmṛtyuto bhayam || 5 ||
[Analyze grammar]

ātmaiva tadidaṃ viśvaṃ sṛjyate sṛjati prabhuḥ |
trāyate trāti viśvātmā hriyate haratīśvaraḥ || 6 ||
[Analyze grammar]

tasmānna hyātmano'nyasmāt anyo bhāvo nirūpitaḥ |
nirūpite'yaṃ trividhā nirmūla bhātirātmani |
idaṃ guṇamayaṃ viddhi trividhaṃ māyayā kṛtam || 7 ||
[Analyze grammar]

etad vidvān maduditaṃ jñānavijñānanaipuṇam |
na nindati na ca stauti loke carati sūryavat || 8 ||
[Analyze grammar]

pratyakṣeṇānumānena nigamenātmasaṃvidā |
ādyantavat asajjñātvā niḥsaṅgo vicarediha || 9 ||
[Analyze grammar]

śrīuddhava uvāca |
naivātmano na dehasya saṃsṛtirdraṣṭṛdṛśyayoḥ |
anātmasvadṛśorīśa kasya syādupalabhyate || 10 ||
[Analyze grammar]

ātmāvyayo'guṇaḥ śuddhaḥ svayaṃjyotiranāvṛtaḥ |
agnivaddāruvad acid dehaḥ kasyeha saṃsṛtiḥ || 11 ||
[Analyze grammar]

śrībhagavānuvāca |
yāvad dehendriyaprāṇaiḥ ātmanaḥ sannikarṣaṇam |
saṃsāraḥ phalavāṃstāvad apārtho'pyavivekinaḥ || 12 ||
[Analyze grammar]

arthe hi avidyamāne'pi saṃsṛtirna nivartate |
dhyāyato viṣayānasya svapne'narthāgamo yathā || 13 ||
[Analyze grammar]

yathā hyapratibuddhasya prasvāpo bahvanarthabhṛt |
sa eva pratibuddhasya na vai mohāya kalpate || 14 ||
[Analyze grammar]

śokaharṣabhayakrodha lobhamohaspṛhādayaḥ |
ahaṅkārasya dṛśyante janmamṛtyuśca nātmanaḥ || 15 ||
[Analyze grammar]

dehendriyaprāṇamano'bhimāno |
jīvo'ntarātmā guṇakarmamūrtiḥ |
sūtraṃ mahānityurudheva gītaḥ |
saṃsāra ādhāvati kālatantraḥ || 16 ||
[Analyze grammar]

amūlametad bahurūparūpitaṃ |
manovacaḥprāṇaśarīrakarma |
jñānāsinopāsanayā śitena |
cchittvā munirgāṃ vicaratyatṛṣṇaḥ || 17 ||
[Analyze grammar]

jñānaṃ viveko nigamastapaśca |
pratyakṣamaitihyamathānumānam |
ādyantayorasya yadeva kevalaṃ |
kālaśca hetuśca tadeva madhye || 18 ||
[Analyze grammar]

yathā hiraṇyaṃ svakṛtaṃ purastāt |
paścācca sarvasya hiraṇmayasya |
tadeva madhye vyavahāryamāṇaṃ |
nānāpadeśairahamasya tadvat || 19 ||
[Analyze grammar]

vijñānametat triyavasthamaṅga |
guṇatrayaṃ kāraṇakāryakartṛ |
samanvayena vyatirekataśca |
yenaiva turyeṇa tadeva satyam || 20 ||
[Analyze grammar]

na yatpurastād uta yanna paścān |
madhye ca tanna vyapadeśamātram |
bhūtaṃ prasiddhaṃ ca pareṇa yad yat |
tadeva tat syāditi me manīṣā || 21 ||
[Analyze grammar]

avidyamāno'pyavabhāsate yo |
vaikāriko rājasasarga eṣaḥ |
brahma svayaṃ jyotirato vibhāti |
brahmendriyārthātmavikāracitram || 22 ||
[Analyze grammar]

evaṃ sphuṭaṃ brahmavivekahetubhiḥ |
parāpavādena viśāradena |
chittvā'tmasandehamupārameta |
svānandatuṣṭo'khilakāmukebhyaḥ || 23 ||
[Analyze grammar]

nātmā vapuḥ pārthivamindriyāṇi |
devā hyasurvāyurjalam hutāśaḥ |
mano'nnamātraṃ dhiṣaṇā ca sattvam |
ahaṅkṛtiḥ khaṃ kṣitirarthasāmyam || 24 ||
[Analyze grammar]

samāhitaiḥ kaḥ karaṇairguṇātmabhi |
rguṇo bhavenmatsuviviktadhāmnaḥ |
vikṣipyamāṇairuta kiṃ nu dūṣaṇaṃ |
ghanairupetairvigatai raveḥ kim || 25 ||
[Analyze grammar]

yathā nabho vāyvanalāmbubhūguṇai |
rgatāgatairvartuguṇairna sajjate |
tathākṣaraṃ sattvarajastamomalai |
rahaṃmateḥ saṃsṛtihetubhiḥ param || 26 ||
[Analyze grammar]

tathāpi saṅgaḥ parivarjanīyo |
guṇeṣu māyāraciteṣu tāvat |
mad‍bhaktiyogena dṛḍhena yāvad |
rajo nirasyeta manaḥkaṣāyaḥ || 27 ||
[Analyze grammar]

yathā'mayo'sādhu cikitsito nṛṇāṃ |
punaḥ punaḥ santudati prarohan |
evaṃ mano'pakvakaṣāyakarma |
kuyoginaṃ vidhyati sarvasaṅgam || 28 ||
[Analyze grammar]

kuyogino ye vihitāntarāyai |
rmanuṣyabhūtaistridaśopasṛṣṭaiḥ |
te prāktanābhyāsabalena bhūyo |
yuñjanti yogaṃ na tu karmatantram || 29 ||
[Analyze grammar]

karoti karma kriyate ca jantuḥ |
kenāpyasau codita ānipatāt |
na tatra vidvān prakṛtau sthito'pi |
nivṛttatṛṣṇaḥ svasukhānubhūtyā || 30 ||
[Analyze grammar]

tiṣṭhantamāsīnamuta vrajantaṃ |
śayānamukṣantamadantamannam |
svabhāvamanyat kimapīhamānaṃ |
ātmānamātmasthamatirna veda || 31 ||
[Analyze grammar]

yadi sma paśyatyasadindriyārthaṃ |
nānānumānena viruddhamanyat |
na manyate vastutayā manīṣī |
svāpnaṃ yathotthāya tirodadhānam || 32 ||
[Analyze grammar]

pūrvaṃ gṛhītaṃ guṇakarmacitram |
ajñānamātmanyaviviktamaṅga |
nivartate tatpunarīkṣayaiva |
na gṛhyate nāpi visṛjya ātmā || 33 ||
[Analyze grammar]

yathā hi bhānorudayo nṛcakṣuṣāṃ |
tamo nihanyānna tu sad vidhatte |
evaṃ samīkṣā nipuṇā satī me |
hanyāttamisraṃ puruṣasya buddheḥ || 34 ||
[Analyze grammar]

eṣa svayaṃjyotirajo'prameyo |
mahānubhūtiḥ sakalānubhūtiḥ |
eko'dvitīyo vacasāṃ virāme |
yeneṣitā vāgasavaścaranti || 35 ||
[Analyze grammar]

etāvān ātmasammoho yad vikalpastu kevale |
ātmannṛte svamātmānaṃ avalambo na yasya hi || 36 ||
[Analyze grammar]

yannāmākṛtibhirgrāhyaṃ pañcavarṇamabādhitam |
vyarthenāpyarthavādo'yaṃ dvayaṃ paṇḍitamāninām || 37 ||
[Analyze grammar]

yogino'pakvayogasya yuñjataḥ kāya utthitaiḥ |
upasargairvihanyeta tatrāyaṃ vihito vidhiḥ || 38 ||
[Analyze grammar]

yogadhāraṇayā kāṃścid āsanairdhāraṇānvitaiḥ |
tapomantrauṣadhaiḥ kāṃścid upasargān vinirdahet || 39 ||
[Analyze grammar]

kāṃścit mamānudhyānena nāmasaṅkīrtanādibhiḥ |
yogeśvarānuvṛttyā vā hanyād aśubhadānchanaiḥ || 40 ||
[Analyze grammar]

kecid dehamimaṃ dhīrāḥ sukalpaṃ vayasi sthiram |
vidhāya vividhopāyaiḥ atha yuñjanti siddhaye || 41 ||
[Analyze grammar]

na hi tat kuśalādṛtyaṃ tadāyāso hyapārthakaḥ |
antavattvāt śarīrasya phalasyeva vanaspateḥ || 42 ||
[Analyze grammar]

yogaṃ niṣevato nityaṃ kāyaścet kalpatāmiyāt |
tat śraddadhyānna matimān yogamutsṛjya matparaḥ || 43 ||
[Analyze grammar]

yogacaryāmimāṃ yogī vicaran madapāśrayaḥ |
nāntarāyairvihanyeta niḥspṛhaḥ svasukhānubhūḥ || 44 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ ekādaśaskandhe aṣṭāviṃśo'dhyāyaḥ || 28 ||
[Analyze grammar]