Chapter 43

[English text for this chapter is available]

kuvalayāpīḍavadhaḥ bhagavato mallaśākhāyāṃ praveśaḥ cāṇūreṇasaha saṃvādaśca |
śrīśuka uvāca |
atha kṛṣṇaśca rāmaśca kṛtaśaucau parantapa |
malladundubhinirghoṣaṃ śrutvā draṣṭumupeyatuḥ || 1 ||
[Analyze grammar]

raṅgadvāraṃ samāsādya tasmin nāgamavasthitam |
apaśyatkuvalayāpīḍaṃ kṛṣṇo'mbaṣṭhapracoditam || 2 ||
[Analyze grammar]

baddhvā parikaraṃ śauriḥ samuhya kuṭilālakān |
uvāca hastipaṃ vācā meghanādagabhīrayā || 3 ||
[Analyze grammar]

ambaṣṭhāmbaṣṭha mārgaṃ nau dehyapakrama mā ciram |
no cetsakuñjaraṃ tvādya nayāmi yamasādanam || 4 ||
[Analyze grammar]

evaṃ nirbhartsito'mbaṣṭhaḥ kupitaḥ kopitaṃ gajam |
codayāmāsa kṛṣṇāya kālāntaka yamopamam || 5 ||
[Analyze grammar]

karīndrastamabhidrutya kareṇa tarasāgrahīt |
karād vigalitaḥ so'muṃ nihatyāṅghriṣvalīyata || 6 ||
[Analyze grammar]

saṅkruddhastamacakṣāṇo ghrāṇadṛṣṭiḥ sa keśavam |
parāmṛśat puṣkareṇa sa prasahya vinirgataḥ || 7 ||
[Analyze grammar]

pucche pragṛhyātibalaṃ dhanuṣaḥ pañcaviṃśatim |
vicakarṣa yathā nāgaṃ suparṇa iva līlayā || 8 ||
[Analyze grammar]

sa paryāvartamānena savyadakṣiṇato'cyutaḥ |
babhrāma bhrāmyamāṇena govatseneva bālakaḥ || 9 ||
[Analyze grammar]

tato'bhimakhamabhyetya pāṇinā'hatya vāraṇam |
prādravan pātayāmāsa spṛśyamānaḥ pade pade || 10 ||
[Analyze grammar]

sa dhāvan krīḍayā bhūmau patitvā sahasotthitaḥ |
taṃ matvā patitaṃ kruddho dantābhyāṃ so'hanat kṣitim || 11 ||
[Analyze grammar]

svavikrame pratihate kuṃjarendro'tyamarṣitaḥ |
codyamāno mahāmātraiḥ kṛṣṇamabhyadravad ruṣā || 12 ||
[Analyze grammar]

tamāpatantamāsādya bhagavān madhusūdanaḥ |
nigṛhya pāṇinā hastaṃ pātayāmāsa bhūtale || 13 ||
[Analyze grammar]

patitasya padā'kramya mṛgendra iva līlayā |
dantamutpāṭya tenebhaṃ hastipāṃścāhanaddhariḥ || 14 ||
[Analyze grammar]

mṛtakaṃ dvipamutsṛjya dantapāṇiḥ samāviśat |
aṃsanyastaviṣāṇo'sṛṅ madabindubhiraṅkitaḥ |
virūḍhasvedakaṇikā vadanāmburuho babhau || 15 ||
[Analyze grammar]

vṛtau gopaiḥ katipayaiḥ baladevajanārdanau |
raṅgaṃ viviśatū rājan gajadantavarāyudhau || 16 ||
[Analyze grammar]

mallānāmaśanirnṛṇāṃ naravaraḥ |
strīṇāṃ smaro mūrtimān |
gopānāṃ svajano'satāṃ kṣitibhujāṃ |
śāstā svapitroḥ śiśuḥ |
mṛtyurbhojapatervirāḍaviduṣāṃ |
tattvaṃ paraṃ yogināṃ |
vṛṣṇīnāṃ paradevateti vidito |
raṅgaṃ gataḥ sāgrajaḥ || 17 ||
[Analyze grammar]

hataṃ kuvalayāpīḍaṃ dṛṣṭvā tāvapi durjayau |
kaṃso manasvyapi tadā bhṛśamudvivije nṛpa || 18 ||
[Analyze grammar]

tau rejatū raṅgagatau mahābhujau |
vicitraveṣābharaṇasragambarau |
yathā naṭāvuttamaveṣadhāriṇau |
manaḥ kṣipantau prabhayā nirīkṣatām || 19 ||
[Analyze grammar]

nirīkṣya tāvuttamapūruṣau janā |
mañcasthitā nāgararāṣṭrakā nṛpa |
praharṣavegotkalitekṣaṇānanāḥ |
papurna tṛptā nayanaistadānanam || 20 ||
[Analyze grammar]

pibanta iva cakṣurbhyāṃ lihanta iva jihvayā |
jighranta iva nāsābhyāṃ śliṣyanta iva bāhubhiḥ || 21 ||
[Analyze grammar]

ūcuḥ parasparaṃ te vai yathādṛṣṭaṃ yathāśrutam |
tad rūpaguṇamādhurya prāgalbhyasmāritā iva || 22 ||
[Analyze grammar]

etau bhagavataḥ sākṣāt harernārāyaṇasya hi |
avatīrṇāvihāṃśena vasudevasya veśmani || 23 ||
[Analyze grammar]

eṣa vai kila devakyāṃ jāto nītaśca gokulam |
kālametaṃ vasan gūḍho vavṛdhe nandaveśmani || 24 ||
[Analyze grammar]

pūtanānena nītāntaṃ cakravātaśca dānavaḥ |
arjunau guhyakaḥ keśī dhenuko'nye ca tadvidhāḥ || 25 ||
[Analyze grammar]

gāvaḥ sapālā etena dāvāgneḥ parimocitāḥ |
kāliyo damitaḥ sarpa indraśca vimadaḥ kṛtaḥ || 26 ||
[Analyze grammar]

saptāhamekahastena dhṛto'dripravaro'munā |
varṣavātāśanibhyaśca paritrātaṃ ca gokulam || 27 ||
[Analyze grammar]

gopyo'sya nityamudita hasitaprekṣaṇaṃ mukham |
paśyantyo vividhāṃstāpān taranti smāśramaṃ mudā || 28 ||
[Analyze grammar]

vadantyanena vaṃśo'yaṃ yadoḥ subahuviśrutaḥ |
śriyaṃ yaśo mahatvaṃ ca lapsyate parirakṣitaḥ || 29 ||
[Analyze grammar]

ayaṃ cāsyāgrajaḥ śrīmān rāmaḥ kamalalocanaḥ |
pralambo nihato yena vatsako ye bakādayaḥ || 30 ||
[Analyze grammar]

janeṣvevaṃ bruvāṇeṣu tūryeṣu ninadatsu ca |
kṛṣṇarāmau samābhāṣya cāṇūro vākyamabravīt || 31 ||
[Analyze grammar]

he nandasūno he rāma bhavantau vīrasaṃmatau |
niyuddhakuśalau śrutvā rājñā'hūtau didṛkṣuṇā || 32 ||
[Analyze grammar]

priyaṃ rājñaḥ prakurvatyaḥ śreyo vindanti vai prajāḥ |
manasā karmaṇā vācā viparīta mato'nyathā || 33 ||
[Analyze grammar]

nityaṃ pramuditā gopā vatsapālā yathā sphuṭam |
vaneṣu mallayuddhena krīḍantaścārayanti gāḥ || 34 ||
[Analyze grammar]

tasmād rājñaḥ priyaṃ yūyaṃ vayaṃ ca karavāma he |
bhūtāni naḥ prasīdanti sarvabhūtamayo nṛpaḥ || 35 ||
[Analyze grammar]

tanniśamyābravīt kṛṣṇo deśakālocitaṃ vacaḥ |
niyuddhamātmano'bhīṣṭaṃ manyamāno'bhinandya ca || 36 ||
[Analyze grammar]

prajā bhojapaterasya vayaṃ cāpi vanecarāḥ |
karavāma priyaṃ nityaṃ tannaḥ paramanugrahaḥ || 37 ||
[Analyze grammar]

bālā vayaṃ tulyabalaiḥ krīḍiṣyāmo yathocitam |
bhavenniyuddhaṃ mādharmaḥ spṛśenmalla sabhāsadaḥ || 38 ||
[Analyze grammar]

cāṇūra uvāca |
na bālo na kiśorastvaṃ balaśca balināṃ varaḥ |
līlayebho hato yena sahasradvipasattvabhṛt || 39 ||
[Analyze grammar]

tasmād bhavad‍bhyāṃ balibhiḥ yoddhavyaṃ nānayo'tra vai |
mayi vikrama vārṣṇeya balena saha muṣṭikaḥ || 40 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe kuvalayāpīḍavadho nāma tricatvāriṃśo'dhyāyaḥ || 43 ||
[Analyze grammar]