Chapter 38

[English text for this chapter is available]

kaṃsājñayā rāmakṛṣṇau mathurāṃ ānetuṃ akrūrasya nandagokulaṃ prati gamanaṃ tatra rāmakṛṣṇadvārā tasya satkāraśca |
śrīśuka uvāca |
akrūro'pi ca tāṃ rātriṃ madhupuryāṃ mahāmatiḥ |
uṣitvā rathamāsthāya prayayau nandagokulam || 1 ||
[Analyze grammar]

gacchan pathi mahābhāgo bhagavatyambujekṣaṇe |
bhaktiṃ parāmupagata evametadacintayat || 2 ||
[Analyze grammar]

kiṃ mayā'caritaṃ bhadraṃ kiṃ taptaṃ paramaṃ tapaḥ |
kiṃ vāthāpyarhate dattaṃ yad drakṣyāmyadya keśavam || 3 ||
[Analyze grammar]

mamaitad durlabhaṃ manye uttamaḥślokadarśanam |
viṣayātmano yathā brahma kīrtanaṃ śūdrajanmanaḥ || 4 ||
[Analyze grammar]

maivaṃ mamādhamasyāpi syādevācyutadarśanam |
hriyamāṇaḥ kalanadyā kvacittarati kaścana || 5 ||
[Analyze grammar]

mamādyāmaṅgalaṃ naṣṭaṃ phalavāṃścaiva me bhavaḥ |
yannamasye bhagavato yogidhyeyāṃghripaṅkajam || 6 ||
[Analyze grammar]

kaṃso batādyākṛta me'tyanugrahaṃ |
drakṣye'ṅghripadmaṃ prahito'munā hareḥ |
kṛtāvatārasya duratyayaṃ tamaḥ |
pūrve'taran yannakhamaṇḍalatviṣā || 7 ||
[Analyze grammar]

yadarcitaṃ brahmabhavādibhiḥ suraiḥ |
śriyā ca devyā munibhiḥ sasātvataiḥ |
gocāraṇāyānucaraiścaradvane |
yad‍gopikānāṃ kucakuṅkumāṅkitam || 8 ||
[Analyze grammar]

drakṣyāmi nūnaṃ sukapolanāsikaṃ |
smitāvalokāruṇakañjalocanam |
mukhaṃ mukundasya guḍālakāvṛtaṃ |
pradakṣiṇaṃ me pracaranti vai mṛgāḥ || 9 ||
[Analyze grammar]

apyadya viṣṇormanujatvamīyuṣo |
bhārāvatārāya bhuvo nijecchayā |
lāvaṇyadhāmno bhavitopalambhanaṃ |
mahyaṃ na na syāt phalamañjasā dṛśaḥ || 10 ||
[Analyze grammar]

ya īkṣitāhaṃrahito'pyasatsatoḥ |
svatejasāpāstatamobhidābhramaḥ |
svamāyayā'tman racitaistadīkṣayā |
prāṇākṣadhībhiḥ sadaneṣvabhīyate || 11 ||
[Analyze grammar]

yasyākhilāmīvahabhiḥ sumaṅgalaiḥ |
vāco vimiśrā guṇakarmajanmabhiḥ |
prāṇanti śumbhanti punanti vai jagat |
yāstadviraktāḥ śavaśobhanā matāḥ || 12 ||
[Analyze grammar]

sa cāvatīrṇaḥ kila satvatānvaye |
svasetupālāmaravaryaśarmakṛt |
yaśo vitanvan vraja āsta īśvaro |
gāyanti devā yadaśeṣamaṅgalam || 13 ||
[Analyze grammar]

taṃ tvadya nūnaṃ mahatāṃ gatiṃ guruṃ |
trailokyakāntaṃ dṛśimanmahotsavam |
rūpaṃ dadhānaṃ śriya īpsitāspadaṃ |
drakṣye mamāsannuṣasaḥ sudarśanāḥ || 14 ||
[Analyze grammar]

athāvarūḍhaḥ sapadīśayo rathāt |
pradhānapuṃsoścaraṇaṃ svalabdhaye |
dhiyā dhṛtaṃ yogibhirapyahaṃ dhruvaṃ |
namasya ābhyāṃ ca sakhīn vanaukasaḥ || 15 ||
[Analyze grammar]

apyaṅghrimūle patitasya me vibhuḥ |
śirasyadhāsyan nijahastapaṅkajam |
dattābhayaṃ kālabhujāṅgaraṃhasā |
prodvejitānāṃ śaraṇaiṣiṇāṃ ṇṛnām || 16 ||
[Analyze grammar]

samarhaṇaṃ yatra nidhāya kauśikaḥ |
tathā baliścāpa jagattrayendratām |
yadvā vihāre vrajayoṣitāṃ śramaṃ |
sparśena saugandhikagandhyapānudat || 17 ||
[Analyze grammar]

na mayyupaiṣyatyaribuddhimacyutaḥ |
kaṃsasya dūtaḥ prahito'pi viśvadṛk |
yo'ntarbahiścetasa etadīhitaṃ |
kṣetrajña īkṣatyamalena cakṣuṣā || 18 ||
[Analyze grammar]

apyaṅghrimūle'vahitaṃ kṛtāñjaliṃ |
māmīkṣitā sasmitamārdrayā dṛśā |
sapadyapadhvastasamastakilbiṣo |
voḍhā mudaṃ vītaviśaṅka ūrjitām || 19 ||
[Analyze grammar]

suhṛttamaṃ jñātimananyadaivataṃ |
dorbhyāṃ bṛhad‍bhyāṃ parirapsyate'tha mām |
ātmā hi tīrthīkriyate tadaiva me |
bandhaśca karmātmaka ucchvasityataḥ || 20 ||
[Analyze grammar]

labdhvāṅgasaṅgaṃ praṇataṃ kṛtāñjaliṃ |
māṃ vakṣyate'krūra tatetyuruśravāḥ |
tadā vayaṃ janmabhṛto mahīyasā |
naivādṛto yo dhigamuṣya janma tat || 21 ||
[Analyze grammar]

na tasya kaścid dayitaḥ suhṛttamo |
na cāpriyo dveṣya upekṣya eva vā |
tathāpi bhaktān bhajate yathā tathā |
suradrumo yadvadupāśrito'rthadaḥ || 22 ||
[Analyze grammar]

kiṃ cāgrajo māvanataṃ yadūttamaḥ |
smayan pariṣvajya gṛhītamañjalau |
gṛhaṃ praveṣyāptasamastasatkṛtaṃ |
samprakṣyate kaṃsakṛtaṃ svabandhuṣu || 23 ||
[Analyze grammar]

śrīśuka uvāca |
iti sañcintayankṛṣṇaṃ śvaphalkatanayo'dhvani |
rathena gokulaṃ prāptaḥ sūryaścāstagiriṃ nṛpa || 24 ||
[Analyze grammar]

padāni tasyākhilalokapāla |
kirīṭajuṣṭāmalapādareṇoḥ |
dadarśa goṣṭhe kṣitikautukāni |
vilakṣitānyabjayavāṅkuśādyaiḥ || 25 ||
[Analyze grammar]

taddarśanāhlādavivṛddhasambhramaḥ |
premṇordhvaromāśrukalākulekṣaṇaḥ |
rathādavaskandya sa teṣvaceṣṭata |
prabhoramūnyaṅghrirajāṃsyaho iti || 26 ||
[Analyze grammar]

dehaṃbhṛtāmiyānartho hitvā dambhaṃ bhiyaṃ śucam |
sandeśādyo harerliṅga darśanaśravaṇādibhiḥ || 27 ||
[Analyze grammar]

dadarśa kṛṣṇaṃ rāmaṃ ca vraje godohanaṃ gatau |
pītanīlāmbaradharau śaradamburahekṣaṇau || 28 ||
[Analyze grammar]

kiśorau śyāmalaśvetau śrīniketau bṛhad‍bhujau |
sumukhau sundaravarau baladviradavikramau || 29 ||
[Analyze grammar]

dhvajavajrāṅkuśāmbhojaiḥ cihnitairaṅghribhirvrajam |
śobhayantau mahātmānau sānukrośasmitekṣaṇau || 30 ||
[Analyze grammar]

udārarucirakrīḍau sragviṇau vanamālinau |
puṇyagandhānuliptāṅgau snātau virajavāsasau || 31 ||
[Analyze grammar]

pradhānapuruṣāvādyau jagaddhetū jagatpatī |
avatīrṇau jagatyarthe svāṃśena balakeśavau || 32 ||
[Analyze grammar]

diśo vitimirā rājan kurvāṇau prabhayā svayā |
yathā mārakataḥ śailo raupyaśca kanakācitau || 33 ||
[Analyze grammar]

rathāt tūrṇaṃ avaplutya so'krūraḥ snehavihvalaḥ |
papāta caraṇopānte daṇḍavat rāmakṛṣṇayoḥ || 34 ||
[Analyze grammar]

bhagavaddarśanāhlāda bāṣpaparyākulekṣaṇaḥ |
pulakacitāṅga autkaṇṭhyāt svākhyāne nāśakan nṛpa || 35 ||
[Analyze grammar]

bhagavān tamabhipretya rathāṅgāṅkitapāṇinā |
parirebhe'bhyupākṛṣya prītaḥ praṇatavatsalaḥ || 36 ||
[Analyze grammar]

saṅkarṣaṇaśca praṇataṃ upaguhya mahāmanāḥ |
gṛhītvā pāṇinā pāṇī anayat sānujo gṛham || 37 ||
[Analyze grammar]

pṛṣṭvātha svāgataṃ tasmai nivedya ca varāsanam |
prakṣālya vidhivat pādau madhuparkārhaṇamāharat || 38 ||
[Analyze grammar]

nivedya gāṃ cātithaye saṃvāhya śrāntamādṛtaḥ |
annaṃ bahuguṇaṃ medhyaṃ śraddhayopāharad vibhuḥ || 39 ||
[Analyze grammar]

tasmai bhuktavate prītyā rāmaḥ paramadharmavit |
makhavāsairgandhamālyaiḥ parāṃ prītiṃ vyadhāt punaḥ || 40 ||
[Analyze grammar]

papraccha satkṛtaṃ nandaḥ kathaṃ stha niranugrahe |
kaṃse jīvati dāśārha saunapālā ivāvayaḥ || 41 ||
[Analyze grammar]

yo'vadhīt svasvasustokān krośantyā asutṛp khalaḥ |
kiṃ nu svittatprajānāṃ vaḥ kuśalaṃ vimṛśāmahe || 42 ||
[Analyze grammar]

itthaṃ sūnṛtayā vācā nandena susabhājitaḥ |
akrūraḥ paripṛṣṭena jahāvadhvapariśramam || 43 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe akrūrāgamanaṃ nāma aṣṭatriṃśo'dhyāyaḥ || 38 ||
[Analyze grammar]