Chapter 34

[English text for this chapter is available]

ajagaramukhāt anandasya mocanamajagarasya pūrvavidyādharaprāpti śaṃkhacūḍa vadhaḥ |
śrīśuka uvāca |
ekadā devayātrāyāṃ gopālā jātakautukāḥ |
anobhiranaḍudyuktaiḥ prayayuste'mbikāvanam || 1 ||
[Analyze grammar]

tatra snātvā sarasvatyāṃ devaṃ paśupatiṃ vibhum |
ānarcurarhaṇairbhaktyā devīṃ ca ṇṛpate'mbikām || 2 ||
[Analyze grammar]

gāvo hiraṇyaṃ vāsāṃsi madhu madhvannamādṛtāḥ |
brāhmaṇebhyo daduḥ sarve devo naḥ prīyatāmiti || 3 ||
[Analyze grammar]

ūṣuḥ sarasvatītīre jalaṃ prāśya yatavratāḥ |
rajanīṃ tāṃ mahābhāgā nandasunandakādayaḥ || 4 ||
[Analyze grammar]

kaścinmahānahistasminvipine'tibubhukṣitaḥ |
yadṛcchayāgato nandaṃ śayānamurago'grasīt || 5 ||
[Analyze grammar]

sa cukrośāhinā grastaḥ kṛṣṇa kṛṣṇa mahānayam |
sarpo māṃ grasate tāta prapannaṃ parimocaya || 6 ||
[Analyze grammar]

tasya cākranditaṃ śrutvā gopālāḥ sahasotthitāḥ |
grastaṃ ca dṛṣṭvā vibhrāntāḥ sarpaṃ vivyadhurulmukaiḥ || 7 ||
[Analyze grammar]

alātairdahyamāno'pi nāmuñcattamuraṅgamaḥ |
tamaspṛśatpadābhyetya bhagavānsātvatāṃ patiḥ || 8 ||
[Analyze grammar]

sa vai bhagavataḥ śrīmatpādasparśahatāśubhaḥ |
bheje sarpavapurhitvā rūpaṃ vidyādharārcitam || 9 ||
[Analyze grammar]

tamapṛcchaddhṛṣīkeśaḥ praṇataṃ samavasthitam |
dīpyamānena vapuṣā puruṣaṃ hemamālinam || 10 ||
[Analyze grammar]

ko bhavānparayā lakṣmyā rocate'dbhutadarśanaḥ |
kathaṃ jugupsitāmetāṃ gatiṃ vā prāpito'vaśaḥ || 11 ||
[Analyze grammar]

sarpa uvāca |
ahaṃ vidyādharaḥ kaścitsudarśana iti śrutaḥ |
śriyā svarūpasampattyā vimānenācarandiśaḥ || 12 ||
[Analyze grammar]

ṛṣīnvirūpāṅgirasaḥ prāhasaṃ rūpadarpitaḥ |
tairimāṃ prāpito yoniṃ pralabdhaiḥ svena pāpmanā || 13 ||
[Analyze grammar]

śāpo me'nugrahāyaiva kṛtastaiḥ karuṇātmabhiḥ |
yadahaṃ lokaguruṇā padā spṛṣṭo hatāśubhaḥ || 14 ||
[Analyze grammar]

taṃ tvāhaṃ bhavabhītānāṃ prapannānāṃ bhayāpaham |
āpṛcche śāpanirmuktaḥ pādasparśādamīvahan || 15 ||
[Analyze grammar]

prapanno'smi mahāyoginmahāpuruṣa satpate |
anujānīhi māṃ deva sarvalokeśvareśvara || 16 ||
[Analyze grammar]

brahmadaṇḍādvimukto'haṃ sadyaste'cyuta darśanāt |
yannāma gṛhṇannakhilānśrotṝnātmānameva ca |
sadyaḥ punāti kiṃ bhūyastasya spṛṣṭaḥ padā hi te || 17 ||
[Analyze grammar]

ityanujñāpya dāśārhaṃ parikramyābhivandya ca |
sudarśano divaṃ yātaḥ kṛcchrānnandaśca mocitaḥ || 18 ||
[Analyze grammar]

niśāmya kṛṣṇasya tadātmavaibhavaṃ |
vrajaukaso vismitacetasastataḥ |
samāpya tasminniyamaṃ punarvrajaṃ |
nṛpāyayustatkathayanta ādṛtāḥ || 19 ||
[Analyze grammar]

kadācidatha govindo rāmaścādbhutavikramaḥ |
vijahraturvane rātryāṃ madhyagau vrajayoṣitām || 20 ||
[Analyze grammar]

upagīyamānau lalitaṃ strījanairbaddhasauhṛdaiḥ |
svalaṅkṛtānuliptāṅgau sragvinau virajo'mbarau || 21 ||
[Analyze grammar]

niśāmukhaṃ mānayantāvuditoḍupatārakam |
mallikāgandhamattāli juṣṭaṃ kumudavāyunā || 22 ||
[Analyze grammar]

jagatuḥ sarvabhūtānāṃ manaḥśravaṇamaṅgalam |
tau kalpayantau yugapatsvaramaṇḍalamūrcchitam || 23 ||
[Analyze grammar]

gopyastadgītamākarṇya mūrcchitā nāvidannṛpa |
sraṃsaddukūlamātmānaṃ srastakeśasrajaṃ tataḥ || 24 ||
[Analyze grammar]

evaṃ vikrīḍatoḥ svairaṃ gāyatoḥ sampramattavat |
śaṅkhacūḍa iti khyāto dhanadānucaro'bhyagāt || 25 ||
[Analyze grammar]

tayornirīkṣato rājaṃstannāthaṃ pramadājanam |
krośantaṃ kālayāmāsa diśyudīcyāmaśaṅkitaḥ || 26 ||
[Analyze grammar]

krośantaṃ kṛṣṇa rāmeti vilokya svaparigraham |
yathā gā dasyunā grastā bhrātarāvanvadhāvatām || 27 ||
[Analyze grammar]

mā bhaiṣṭetyabhayārāvau śālahastau tarasvinau |
āsedatustaṃ tarasā tvaritaṃ guhyakādhamam || 28 ||
[Analyze grammar]

sa vīkṣya tāvanuprāptau kālamṛtyū ivodvijan |
visṛjya strījanaṃ mūḍhaḥ prādravajjīvitecchayā || 29 ||
[Analyze grammar]

tamanvadhāvadgovindo yatra yatra sa dhāvati |
jihīrṣustacchiroratnaṃ tasthau rakṣanstriyo balaḥ || 30 ||
[Analyze grammar]

avidūra ivābhyetya śirastasya durātmanaḥ |
jahāra muṣṭinaivāṅga sahacūḍamaṇiṃ vibhuḥ || 31 ||
[Analyze grammar]

śaṅkhacūḍaṃ nihatyaivaṃ maṇimādāya bhāsvaram |
agrajāyādadātprītyā paśyantīnāṃ ca yoṣitām || 32 ||
[Analyze grammar]