Chapter 14

[English text for this chapter is available]

brahmaṇā kṛtā bhagavataḥ stutirvatsavatsapālānayanaṃca |
śrībrahmovāca |
naumīḍya te'bhravapuṣe taḍidambarāya |
guñjāvataṃsaparipicchalasanmukhāya |
vanyasraje kavalavetraviṣāṇaveṇu |
lakṣmaśriye mṛdupade paśupāṅgajāya || 1 ||
[Analyze grammar]

asyāpi deva vapuṣo madanugrahasya |
svecchāmayasya na tu bhūtamayasya ko'pi |
neśe mahi tvavasituṃ manasā'ntareṇa |
sākṣāttavaiva kimutātmasukhānubhūteḥ || 2 ||
[Analyze grammar]

jñāne prayāsamudapāsya namanta eva |
jīvanti sanmukharitāṃ bhavadīyavārtām |
sthāne sthitāḥ śrutigatāṃ tanuvāṅmanobhiḥ |
ye prāyaśo'jita jito'pyasi taistrilokyām || 3 ||
[Analyze grammar]

śreyaḥsṛtiṃ bhaktimudasya te vibho |
kliśyanti ye kevalabodhalabdhaye |
teṣāmasau kleśala eva śiṣyate |
nānyad yathā sthūlatuṣāvaghātinām || 4 ||
[Analyze grammar]

pureha bhūman bahavo'pi yoginaḥ |
tvadarpitehā nijakarmalabdhayā |
vibudhya bhaktyaiva kathopanītayā |
prapedire'ñjo'cyuta te gatiṃ parām || 5 ||
[Analyze grammar]

tathāpi bhūman mahimāguṇasya te |
viboddhumarhatyamalāntarātmabhiḥ |
avikriyāt svānubhavādarūpato |
hyananyabodhyātmatayā na cānyathā || 6 ||
[Analyze grammar]

guṇātmanaste'pi guṇān vimātuṃ |
hitāvatīrṇasya ka īśire'sya |
kālena yairvā vimitāḥ sukalpaiḥ |
bhūpāṃśavaḥ khe mihikā dyubhāsaḥ || 7 ||
[Analyze grammar]

tatte'nukampāṃ susamīkṣamāṇo |
bhuñjāna evātmakṛtaṃ vipākam |
hṛdvāgvapurbhirvidadhannamaste |
jīveta yo muktipade sa dāyabhāk || 8 ||
[Analyze grammar]

paśyeśa me'nāryamananta ādye |
parātmani tvayyapi māyimāyini |
māyāṃ vitatyekṣitumātmavaibhavaṃ |
hyahaṃ kiyānaicchamivārciragnau || 9 ||
[Analyze grammar]

ataḥ kṣamasvācyuta me rajobhuvo |
hyajānatastvat pṛthagīśamāninaḥ |
ajāvalepāndhatamo'ndhacakṣuṣa |
eṣo'nukampyo mayi nāthavāniti || 10 ||
[Analyze grammar]

kvāhaṃ tamomahadahaṃkhacarāgnivārbhū |
saṃveṣṭitāṇḍaghaṭasaptavitastikāyaḥ |
kvedṛgvidhāvigaṇitāṇḍaparāṇucaryā |
vātādhvaromavivarasya ca te mahitvam || 11 ||
[Analyze grammar]

utkṣepaṇaṃ garbhagatasya pādayoḥ |
kiṃ kalpate māturadhokṣajāgase |
kimastināstivyapadeśabhūṣitaṃ |
tavāsti kukṣeḥ kiyadapyanantaḥ || 12 ||
[Analyze grammar]

jagattrayāntodadhisamplavode |
nārāyaṇasyodaranābhinālāt |
vinirgato'jastviti vāṅ na vai mṛṣā |
kiṃ tvīśvara tvanna vinirgato'smi || 13 ||
[Analyze grammar]

nārāyaṇastvaṃ na hi sarvadehināṃ |
ātmāsyadhīśākhilalokasākṣī |
nārāyaṇo'ṅgaṃ narabhūjalāyanāt |
taccāpi satyaṃ na tavaiva māyā || 14 ||
[Analyze grammar]

taccejjalasthaṃ tava sajjagadvapuḥ |
kiṃ me na dṛṣṭaṃ bhagavaṃstadaiva |
kiṃ vā sudṛṣṭaṃ hṛdi me tadaiva |
kiṃ no sapadyeva punarvyadarśi || 15 ||
[Analyze grammar]

atraiva māyādhamanāvatāre |
hyasya prapañcasya bahiḥ sphuṭasya |
kṛtsnasya cāntarjaṭhare jananyā |
māyātvameva prakaṭīkṛtaṃ te || 16 ||
[Analyze grammar]

yasya kukṣāvidaṃ sarvaṃ sātmaṃ bhāti yathā tathā |
tattvayyapīha tat sarvaṃ kimidaṃ māyayā vinā || 17 ||
[Analyze grammar]

adyaiva tvadṛte'sya kiṃ mama na te |
māyātvamādarśitam |
eko'si prathamaṃ tato vrajasuhṛd |
vatsāḥ samastā api |
tāvanto'si caturbhujāstadakhilaiḥ |
sākaṃ mayopāsitāḥ |
tāvantyeva jagantyabhūstadamitaṃ |
brahmādvayaṃ śiṣyate || 18 ||
[Analyze grammar]

ajānatāṃ tvatpadavīmanātman |
yātmā'tmanā bhāsi vitatya māyām |
sṛṣṭāvivāhaṃ jagato vidhāna |
iva tvameṣo'nta iva trinetraḥ || 19 ||
[Analyze grammar]

sureṣvṛṣiṣvīśa tathaiva nṛṣvapi |
tiryakṣu yādaḥsvapi te'janasya |
janmāsatāṃ durmadanigrahāya |
prabho vidhātaḥ sadanugrahāya ca || 20 ||
[Analyze grammar]

ko vetti bhūman bhagavan parātman |
yogeśvarotīrbhavatastrilokyām |
kva vā kathaṃ vā kati vā kadeti |
vistārayan krīḍasi yogamāyām || 21 ||
[Analyze grammar]

tasmādidaṃ jagadaśeṣamasatsvarūpaṃ |
svapnābhamastadhiṣaṇaṃ puruduḥkhaduḥkham |
tvayyeva nityasukhabodhatanāvanante |
māyāta udyadapi yat sadivāvabhāti || 22 ||
[Analyze grammar]

ekastvamātmā puruṣaḥ purāṇaḥ |
satyaḥ svayaṃjyotirananta ādyaḥ |
nityo'kṣaro'jasrasukho nirañjanaḥ |
pūrṇādvayo mukta upādhito'mṛtaḥ || 23 ||
[Analyze grammar]

evaṃvidhaṃ tvāṃ sakalātmanāmapi |
svātmānamātmātmatayā vicakṣate |
gurvarkalabdhopaniṣat sucakṣuṣā |
ye te tarantīva bhavānṛtāmbudhim || 24 ||
[Analyze grammar]

ātmānamevātmatayāvijānatāṃ |
tenaiva jātaṃ nikhilaṃ prapañcitam |
jñānena bhūyo'pi ca tatpralīyate |
rajjvāmaherbhogabhavābhavau yathā || 25 ||
[Analyze grammar]

ajñānasaṃjñau bhavabandhamokṣau |
dvau nāma nānyau sta ṛtajñabhāvāt |
ajasracityātmani kevale pare |
vicāryamāṇe taraṇāvivāhanī || 26 ||
[Analyze grammar]

tvāmātmānaṃ paraṃ matvā paramātmānameva ca |
ātmā punarbahirmṛgya aho'jñajanatājñatā || 27 ||
[Analyze grammar]

antarbhave'nanta bhavantameva |
hyatattyajanto mṛgayanti santaḥ |
asantamapyantyahimantareṇa |
santaṃ guṇaṃ taṃ kimu yanti santaḥ || 28 ||
[Analyze grammar]

athāpi te deva padāmbujadvaya |
prasādaleśānugṛhīta eva hi |
jānāti tattvaṃ bhagavan mahimno |
na cānya eko'pi ciraṃ vicinvan || 29 ||
[Analyze grammar]

tadastu me nātha sa bhūribhāgo |
bhave'tra vānyatra tu vā tiraścām |
yenāhameko'pi bhavajjanānāṃ |
bhūtvā niṣeve tava pādapallavam || 30 ||
[Analyze grammar]

aho'tidhanyā vrajagoramaṇyaḥ |
stanyāmṛtaṃ pītamatīva te mudā |
yāsāṃ vibho vatsatarātmajātmanā |
yattṛptaye'dyāpi na cālamadhvarāḥ || 31 ||
[Analyze grammar]

aho bhāgyamaho bhāgyaṃ nandagopavrajaukasām |
yanmitraṃ paramānandaṃ pūrṇaṃ brahma sanātanam || 32 ||
[Analyze grammar]

eṣāṃ tu bhāgyamahimācyuta tāvadāstām |
ekādaśaiva hi vayaṃ bata bhūribhāgāḥ |
etaddhṛṣīkacaṣakairasakṛt pibāmaḥ |
śarvādayo'ṅghryudajamadhvamṛtāsavaṃ te || 33 ||
[Analyze grammar]

tad‍bhūribhāgyamiha janma kimapyaṭavyāṃ |
yad‍gokule'pi katamāṅghrirajo'bhiṣekam |
yajjīvitaṃ tu nikhilaṃ bhagavān mukundaḥ |
tvadyāpi yatpadarajaḥ śrutimṛgyameva || 34 ||
[Analyze grammar]

eṣāṃ ghoṣanivāsināmuta bhavān |
kiṃ deva rāteti naḥ |
ceto viśvaphalāt phalaṃ tvadaparaṃ |
kutrāpyayanmuhyati |
sadveṣādiva pūtanāpi sakulā |
tvāmeva devāpitā |
yaddhāmārthasuhṛt priyātmatanaya |
prāṇāśayāstvatkṛte || 35 ||
[Analyze grammar]

tāvad rāgādayaḥ stenāḥ tāvat kārāgṛhaṃ gṛham |
tāvanmoho'ṅghrinigaḍo yāvat kṛṣṇa na te janāḥ || 36 ||
[Analyze grammar]

prapañcaṃ niṣprapañco'pi viḍambayasi bhūtale |
prapannajanatānanda sandohaṃ prathituṃ prabho || 37 ||
[Analyze grammar]

jānanta eva jānantu kiṃ bahūktyā na me prabho |
manaso vapuṣo vāco vaibhavaṃ tava gocaraḥ || 38 ||
[Analyze grammar]

anujānīhi māṃ kṛṣṇa sarvaṃ tvaṃ vetsi sarvadṛk |
tvameva jagatāṃ nātho jagad etat tavārpitam || 39 ||
[Analyze grammar]

śrīkṛṣṇa vṛṣṇikulapuṣkarajoṣadāyin |
kṣmānirjaradvijapaśūdadhivṛddhikārin |
uddharmaśārvarahara kṣitirākṣasadhrug |
ākalpamārkamarhan bhagavan namaste || 40 ||
[Analyze grammar]

śrīśuka uvāca |
ityabhiṣṭūya bhūmānaṃ triḥ parikramya pādayoḥ |
natvābhīṣṭaṃ jagaddhātā svadhāma pratyapadyata || 41 ||
[Analyze grammar]

tato'nujñāpya bhagavān svabhuvaṃ prāgavasthitān |
vatsān pulinamāninye yathāpūrvasakhaṃ svakam || 42 ||
[Analyze grammar]

ekasminnapi yāte'bde prāṇeśaṃ cāntarā'tmanaḥ |
kṛṣṇamāyāhatā rājan kṣaṇārdhaṃ menire'rbhakāḥ || 43 ||
[Analyze grammar]

kiṃ kiṃ na vismarantīha māyāmohitacetasaḥ |
yanmohitaṃ jagatsarvaṃ abhīkṣṇaṃ vismṛtātmakam || 44 ||
[Analyze grammar]

ūcuśca suhṛdaḥ kṛṣṇaṃ svāgataṃ te'tiraṃhasā |
naiko'pyabhoji kavala ehītaḥ sādhu bhujyatām || 45 ||
[Analyze grammar]

tato hasan hṛṣīkeśo'bhyavahṛtya sahārbhakaiḥ |
darśayaṃścarmājagaraṃ nyavartata vanād vrajam || 46 ||
[Analyze grammar]

barhaprasūna navadhātuvicitritāṅgaḥ |
proddāmaveṇudalaśṛṅgaravotsavāḍhyaḥ |
vatsān gṛṇannanugagīta pavitrakīrtiḥ |
gopīdṛgutsavadṛśiḥ praviveśa goṣṭham || 47 ||
[Analyze grammar]

adyānena mahāvyālo yaśodānandasūnunā |
hato'vitā vayaṃ cāsmād iti bālā vraje jaguḥ || 48 ||
[Analyze grammar]

śrīrājovāca |
brahman parod‍bhave kṛṣṇe iyānpremā kathaṃ bhavet |
yo'bhūtapūrvastokeṣu svod‍bhaveṣvapi kathyatām || 49 ||
[Analyze grammar]

śrīśuka uvāca |
sarveṣāmapi bhūtānāṃ nṛpa svātmaiva vallabhaḥ |
itare'patyavittādyāḥ tadvallabhatayaiva hi || 50 ||
[Analyze grammar]

tad rājendra yathā snehaḥ svasvakātmani dehinām |
na tathā mamatālambi putravittagṛhādiṣu || 51 ||
[Analyze grammar]

dehātmavādināṃ puṃsāṃ api rājanyasattama |
yathā dehaḥ priyatamaḥ tathā na hyanu ye ca tam || 52 ||
[Analyze grammar]

deho'pi mamatābhāk cet tarhyasau nātmavat priyaḥ |
yajjīryatyapi dehe'smin jīvitāśā balīyasī || 53 ||
[Analyze grammar]

tasmāt priyatamaḥ svātmā sarveṣāmapi dehinām |
tadarthameva sakalaṃ jagad etat carācaram || 54 ||
[Analyze grammar]

kṛṣṇamenamavehi tvaṃ ātmānaṃ akhilātmanām |
jagaddhitāya so'pyatra dehīvābhāti māyayā || 55 ||
[Analyze grammar]

vastuto jānatāmatra kṛṣṇaṃ sthāsnu cariṣṇu ca |
bhagavad rūpamakhilaṃ nānyad vastviha kiñcana || 56 ||
[Analyze grammar]

sarveṣāmapi vastūnāṃ bhāvārtho bhavati sthitaḥ |
tasyāpi bhagavānkṛṣṇaḥ kiṃ atadvastu rūpyatām || 57 ||
[Analyze grammar]

samāśritā ye padapallavaplavaṃ |
mahatpadaṃ puṇyayaśo murāreḥ |
bhavāmbudhirvatsapadaṃ paraṃ padaṃ |
padaṃ padaṃ yad vipadāṃ na teṣām || 58 ||
[Analyze grammar]

etatte sarvamākhyātaṃ yat pṛṣṭo'hamiha tvayā |
yat kaumāre harikṛtaṃ paugaṇḍe parikīrtitam || 59 ||
[Analyze grammar]

etatsuhṛdbhiścaritaṃ murāreḥ |
aghārdanaṃ śādvalajemanaṃ ca |
vyaktetarad rūpamajorvabhiṣṭavaṃ |
śṛṇvan gṛṇanneti naro'khilārthān || 60 ||
[Analyze grammar]

evaṃ vihāraiḥ kaumāraiḥ kaumāraṃ jahaturvraje |
nilāyanaiḥ setubandhaiḥ markaṭotplavanādibhiḥ || 61 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe caturdaśo'dhyāyaḥ || 14 ||
[Analyze grammar]