Chapter 10

[English text for this chapter is available]

yamalārjunoddhāraḥ |
śrīrājovāca |
kathyatāṃ bhagavan etat tayoḥ śāpasya kāraṇam |
yattadvigarhitaṃ karma yena vā devarṣestamaḥ || 1 ||
[Analyze grammar]

śrīśuka uvāca |
rudrasyānucarau bhūtvā sudṛptau dhanadātmajau |
kailāsopavane ramye mandākinyāṃ madotkaṭau || 2 ||
[Analyze grammar]

vāruṇīṃ madirāṃ pītvā madāghūrṇitalocanau |
strījanaiḥ anugāyadbhiḥ ceratuḥ puṣpite vane || 3 ||
[Analyze grammar]

antaḥ praviśya gaṅgāyāṃ aṃbhojavanarājini |
cikrīḍaturyuvatibhiḥ gajau iva kareṇubhiḥ || 4 ||
[Analyze grammar]

yadṛcchayā ca devarṣiḥ bhagavāṃstatra kaurava |
apaśyannārado devau kṣībāṇau samabudhyata || 5 ||
[Analyze grammar]

taṃ dṛṣṭvā vrīḍitā devyo vivastrāḥ śāpaśaṅkitāḥ |
vāsāṃsi paryadhuḥ śīghraṃ vivastrau naiva guhyakau || 6 ||
[Analyze grammar]

tau dṛṣṭvā madirāmattau śrīmadāndhau surātmajau |
tayoranugrahārthāya śāpaṃ dāsyan idaṃ jagau || 7 ||
[Analyze grammar]

śrīnārada uvāca |
na hyanyo juṣato joṣyān buddhibhraṃśo rajoguṇaḥ |
śrīmadādābhijātyādiḥ yatra strī dyūtamāsavaḥ || 8 ||
[Analyze grammar]

hanyante paśavo yatra nirdayaiḥ ajitātmabhiḥ |
manyamānairimaṃ dehaḥ ajarāmṛtyu naśvaram || 9 ||
[Analyze grammar]

devasaṃjñitamapyante kṛmiviḍ bhasmasaṃjñitam |
bhūtadhruk tatkṛte svārthaṃ kiṃ veda nirayo yataḥ || 10 ||
[Analyze grammar]

dehaḥ kimannadātuḥ svaṃ niṣekturmātureva ca |
mātuḥ piturvā balinaḥ kreturagneḥ śuno'pi vā || 11 ||
[Analyze grammar]

evaṃ sādhāraṇaṃ dehaṃ avyakta prabhavāpyayam |
ko vidvān ātmasātkṛtvā hanti jantūnṛte'sataḥ || 12 ||
[Analyze grammar]

asataḥ śrīmadāndhasya dāridryaṃ paramañjanam |
ātmaupamyena bhūtāni daridraḥ paramīkṣate || 13 ||
[Analyze grammar]

yathā kaṇṭakaviddhāṅgo jantornecchati tāṃ vyathām |
jīvasāmyaṃ gato liṅgaiḥ na tathāviddhakaṇṭakaḥ || 14 ||
[Analyze grammar]

daridro nirahaṃstambho muktaḥ sarvamadairiha |
kṛcchraṃ yadṛcchayā'pnoti taddhi tasya paraṃ tapaḥ || 15 ||
[Analyze grammar]

nityaṃ kṣutkṣāmadehasya daridrasyānnakāṅkṣiṇaḥ |
indriyāṇi anuśuṣyanti hiṃsāpi vinivartate || 16 ||
[Analyze grammar]

daridrasyaiva yujyante sādhavaḥ samadarśinaḥ |
sad‍bhiḥ kṣiṇoti taṃ tarṣaṃ tata ārādviśuddhyati || 17 ||
[Analyze grammar]

sādhūnāṃ samacittānāṃ mukunda caraṇaiṣiṇām |
upekṣyaiḥ kiṃ dhanastambhaiḥ asadbhiḥ asadāśrayaiḥ || 18 ||
[Analyze grammar]

tadahaṃ mattayormādhvyā vāruṇyā śrīmadāndhayoḥ |
tamomadaṃ hariṣyāmi straiṇayoḥ ajitātmanoḥ || 19 ||
[Analyze grammar]

yadimau lokapālasya putrau bhūtvā tamaḥplutau |
na vivāsasamātmānaṃ vijānītaḥ sudurmadau || 20 ||
[Analyze grammar]

ato'rhataḥ sthāvaratāṃ syātāṃ naivaṃ yathā punaḥ |
smṛtiḥ syāt matprasādena tatrāpi madanugrahāt || 21 ||
[Analyze grammar]

vāsudevasya sānnidhyaṃ labdhvā divyaśaracchate |
vṛtte svarlokatāṃ bhūyo labdhabhaktī bhaviṣyataḥ || 22 ||
[Analyze grammar]

śrīśuka uvāca |
evamuktvā sa devarṣiḥ gato nārāyaṇāśramam |
nalakūvaramaṇigrīvau āsatuḥ yamalārjunau || 23 ||
[Analyze grammar]

ṛṣerbhāgavata mukhyasya satyaṃ kartuṃ vaco hariḥ |
jagāma śanakaistatra yatrāstāṃ yamalārjunau || 24 ||
[Analyze grammar]

devarṣirme priyatamo yadimau dhanadātmajau |
tattathā sādhayiṣyāmi yad‍gītaṃ tanmahātmanā || 25 ||
[Analyze grammar]

ityantareṇārjunayoḥ kṛṣṇastu yamayoryayau |
ātmanirveśamātreṇa tiryaggataṃ ulūkhalam || 26 ||
[Analyze grammar]

bālena niṣkarṣayatānvagulūkhalaṃ tad |
dāmodareṇa tarasotkalitāṅghribandhau |
niṣpetatuḥ paramavikramitātivepa |
skandhapravālaviṭapau kṛtacaṇḍaśabdau || 27 ||
[Analyze grammar]

tatra śriyā paramayā kakubhaḥ sphurantau |
siddhāvupetya kujayoriva jātavedāḥ |
kṛṣṇaṃ praṇamya śirasākhilalokanāthaṃ |
baddhāñjalī virajasāvidamūcatuḥ sma || 28 ||
[Analyze grammar]

kṛṣṇa kṛṣṇa mahāyogin tvamādyaḥ puruṣaḥ paraḥ |
vyaktāvyaktamidaṃ viśvaṃ rūpaṃ te brāhmaṇā viduḥ || 29 ||
[Analyze grammar]

tvamekaḥ sarvabhūtānāṃ dehāsvātmendriyeśvaraḥ |
tvameva kālo bhagavān viṣṇuravyaya īśvaraḥ || 30 ||
[Analyze grammar]

tvaṃ mahān prakṛtiḥ sūkṣmā rajaḥsattvatamomayī |
tvameva puruṣo'dhyakṣaḥ sarvakṣetravikāravit || 31 ||
[Analyze grammar]

gṛhyamāṇaistvamagrāhyo vikāraiḥ prākṛtairguṇaiḥ |
ko nvihārhati vijñātuṃ prāksiddhaṃ guṇasaṃvṛtaḥ || 32 ||
[Analyze grammar]

tasmai tubhyaṃ bhagavate vāsudevāya vedhase |
ātmadyotaguṇaiśchanna mahimne brahmaṇe namaḥ || 33 ||
[Analyze grammar]

yasyāvatārā jñāyante śarīreṣvaśarīriṇaḥ |
taistairatulyātiśayaiḥ vīryairdehiṣvasaṅgataiḥ || 34 ||
[Analyze grammar]

sa bhavān sarvalokasya bhavāya vibhavāya ca |
avatīrṇoṃ'śabhāgena sāmprataṃ patirāśiṣām || 35 ||
[Analyze grammar]

namaḥ paramakalyāṇa namaḥ paramamaṅgala |
vāsudevāya śāntāya yadūnāṃ pataye namaḥ || 36 ||
[Analyze grammar]

anujānīhi nau bhūman tavānucarakiṅkarau |
darśanaṃ nau bhagavata ṛṣerāsīdanugrahāt || 37 ||
[Analyze grammar]

vāṇī guṇānukathane śravaṇau kathāyāṃ |
hastau ca karmasu manastava pādayornaḥ |
smṛtyāṃ śirastava nivāsajagatpraṇāme |
dṛṣṭiḥ satāṃ darśane'stu bhavattanūnām || 38 ||
[Analyze grammar]

śrīśuka uvāca |
itthaṃ saṅkīrtitastābhyāṃ bhagavān gokuleśvaraḥ |
dāmnā colūkhale baddhaḥ prahasannāha guhyakau || 39 ||
[Analyze grammar]

śrībhagavānuvāca |
jñātaṃ mama puraivaitad ṛṣiṇā karuṇātmanā |
yat śrīmadāndhayorvāgbhiḥ vibhraṃśo'nugrahaḥ kṛtaḥ || 40 ||
[Analyze grammar]

sādhūnāṃ samacittānāṃ sutarāṃ matkṛtātmanām |
darśanānno bhaved‍bandhaḥ puṃso'kṣṇoḥ savituryathā || 41 ||
[Analyze grammar]

tad‍gacchataṃ matparamau nalakūbara sādanam |
sañjāto mayi bhāvo vāṃ īpsitaḥ paramo'bhavaḥ || 42 ||
[Analyze grammar]

śrīśuka uvāca |
ityuktau tau parikramya praṇamya ca punaḥ punaḥ |
baddholūkhalamāmantrya jagmaturdiśamuttarām || 43 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe daśamo'dhyāyaḥ || 10 ||
[Analyze grammar]