Chapter 10

[English text for this chapter is available]

atha daśamo'dhyāyaḥ |
śrīśuka uvāca |
iti dānavadaiteyā nāvindannamṛtaṃ nṛpa |
yuktāḥ karmaṇi yattāśca vāsudevaparāṅmukhāḥ || 1 ||
[Analyze grammar]

sādhayitvāmṛtaṃ rājanpāyayitvā svakānsurān |
paśyatāṃ sarvabhūtānāṃ yayau garuḍavāhanaḥ || 2 ||
[Analyze grammar]

sapatnānāṃ parāmṛddhiṃ dṛṣṭvā te ditinandanāḥ |
amṛṣyamāṇā utpeturdevānpratyudyatāyudhāḥ || 3 ||
[Analyze grammar]

tataḥ suragaṇāḥ sarve sudhayā pītayaidhitāḥ |
pratisaṃyuyudhuḥ śastrairnārāyaṇapadāśrayāḥ || 4 ||
[Analyze grammar]

tatra daivāsuro nāma raṇaḥ paramadāruṇaḥ |
rodhasyudanvato rājaṃstumulo romaharṣaṇaḥ || 5 ||
[Analyze grammar]

tatrānyonyaṃ sapatnāste saṃrabdhamanaso raṇe |
samāsādyāsibhirbāṇairnijaghnurvividhāyudhaiḥ || 6 ||
[Analyze grammar]

śaṅkhatūryamṛdaṅgānāṃ bherīḍamariṇāṃ mahān |
hastyaśvarathapattīnāṃ nadatāṃ nisvano'bhavat || 7 ||
[Analyze grammar]

rathino rathibhistatra pattibhiḥ saha pattayaḥ |
hayā hayairibhāścebhaiḥ samasajjanta saṃyuge || 8 ||
[Analyze grammar]

uṣṭraiḥ kecidibhaiḥ kecidapare yuyudhuḥ kharaiḥ |
kecidgauramukhairṛkṣairdvīpibhirharibhirbhaṭāḥ || 9 ||
[Analyze grammar]

gṛdhraiḥ kaṅkairbakairanye śyenabhāsaistimiṅgilaiḥ |
śarabhairmahiṣaiḥ khaḍgairgovṛṣairgavayāruṇaiḥ || 10 ||
[Analyze grammar]

śivābhirākhubhiḥ kecitkṛkalāsaiḥ śaśairnaraiḥ |
bastaireke kṛṣṇasārairhaṃsairanye ca sūkaraiḥ || 11 ||
[Analyze grammar]

anye jalasthalakhagaiḥ sattvairvikṛtavigrahaiḥ |
senayorubhayo rājanviviśuste'grato'grataḥ || 12 ||
[Analyze grammar]

citradhvajapaṭai rājannātapatraiḥ sitāmalaiḥ |
mahādhanairvajradaṇḍairvyajanairbārhacāmaraiḥ || 13 ||
[Analyze grammar]

vātoddhūtottaroṣṇīṣairarcirbhirvarmabhūṣaṇaiḥ |
sphuradbhirviśadaiḥ śastraiḥ sutarāṃ sūryaraśmibhiḥ || 14 ||
[Analyze grammar]

devadānavavīrāṇāṃ dhvajinyau pāṇḍunandana |
rejaturvīramālābhiryādasāmiva sāgarau || 15 ||
[Analyze grammar]

vairocano baliḥ saṅkhye so'surāṇāṃ camūpatiḥ |
yānaṃ vaihāyasaṃ nāma kāmagaṃ mayanirmitam || 16 ||
[Analyze grammar]

sarvasāṅgrāmikopetaṃ sarvāścaryamayaṃ prabho |
apratarkyamanirdeśyaṃ dṛśyamānamadarśanam || 17 ||
[Analyze grammar]

āsthitastadvimānāgryaṃ sarvānīkādhipairvṛtaḥ |
bālavyajanachatrāgryai reje candra ivodaye || 18 ||
[Analyze grammar]

tasyāsansarvato yānairyūthānāṃ patayo'surāḥ |
namuciḥ śambaro bāṇo vipracittirayomukhaḥ || 19 ||
[Analyze grammar]

dvimūrdhā kālanābho'tha prahetirhetirilvalaḥ |
śakunirbhūtasantāpo vajradaṃṣṭro virocanaḥ || 20 ||
[Analyze grammar]

hayagrīvaḥ śaṅkuśirāḥ kapilo meghadundubhiḥ |
tārakaścakradṛkśumbho niśumbho jambha utkalaḥ || 21 ||
[Analyze grammar]

ariṣṭo'riṣṭanemiśca mayaśca tripurādhipaḥ |
anye paulomakāleyā nivātakavacādayaḥ || 22 ||
[Analyze grammar]

alabdhabhāgāḥ somasya kevalaṃ kleśabhāginaḥ |
sarva ete raṇamukhe bahuśo nirjitāmarāḥ || 23 ||
[Analyze grammar]

siṃhanādānvimuñcantaḥ śaṅkhāndadhmurmahāravān |
dṛṣṭvā sapatnānutsiktānbalabhitkupito bhṛśam || 24 ||
[Analyze grammar]

airāvataṃ dikkariṇamārūḍhaḥ śuśubhe svarāṭ |
yathā sravatprasravaṇamudayādri maharpatiḥ || 25 ||
[Analyze grammar]

tasyāsansarvato devā nānāvāhadhvajāyudhāḥ |
lokapālāḥ sahagaṇairvāyvagnivaruṇādayaḥ || 26 ||
[Analyze grammar]

te'nyonyamabhisaṃsṛtya kṣipanto marmabhirmithaḥ |
āhvayanto viśanto'gre yuyudhurdvandvayodhinaḥ || 27 ||
[Analyze grammar]

yuyodha balirindreṇa tārakeṇa guho'syata |
varuṇo hetināyudhyanmitro rājanprahetinā || 28 ||
[Analyze grammar]

yamastu kālanābhena viśvakarmā mayena vai |
śambaro yuyudhe tvaṣṭrā savitrā tu virocanaḥ || 29 ||
[Analyze grammar]

aparājitena namuciraśvinau vṛṣaparvaṇā |
sūryo balisutairdevo bāṇajyeṣṭhaiḥ śatena ca || 30 ||
[Analyze grammar]

rāhuṇā ca tathā somaḥ pulomnā yuyudhe'nilaḥ |
niśumbhaśumbhayordevī bhadra kālī tarasvinī || 31 ||
[Analyze grammar]

vṛṣākapistu jambhena mahiṣeṇa vibhāvasuḥ |
ilvalaḥ saha vātāpirbrahmaputrairarindama || 32 ||
[Analyze grammar]

kāmadevena durmarṣa utkalo mātṛbhiḥ saha |
bṛhaspatiścośanasā narakeṇa śanaiścaraḥ || 33 ||
[Analyze grammar]

maruto nivātakavacaiḥ kāleyairvasavo'marāḥ |
viśvedevāstu paulomai rudrāḥ krodhavaśaiḥ saha || 34 ||
[Analyze grammar]

ta evamājāvasurāḥ surendrā dvandvena saṃhatya ca yudhyamānāḥ |
anyonyamāsādya nijaghnurojasā jigīṣavastīkṣṇaśarāsitomaraiḥ || 35 ||
[Analyze grammar]

bhuśuṇḍibhiścakragadarṣṭipaṭṭiśaiḥ śaktyulmukaiḥ prāsaparaśvadhairapi |
nistriṃśabhallaiḥ parighaiḥ samudgaraiḥ sabhindipālaiśca śirāṃsi cicchiduḥ || 36 ||
[Analyze grammar]

gajāsturaṅgāḥ sarathāḥ padātayaḥ sārohavāhā vividhā vikhaṇḍitāḥ |
nikṛttabāhūruśirodharāṅghrayaśchinnadhvajeṣvāsatanutrabhūṣaṇāḥ || 37 ||
[Analyze grammar]

teṣāṃ padāghātarathāṅgacūrṇitādāyodhanādulbaṇa utthitastadā |
reṇurdiśaḥ khaṃ dyumaṇiṃ ca chādayannyavartatāsṛksrutibhiḥ pariplutāt || 38 ||
[Analyze grammar]

śirobhiruddhūtakirīṭakuṇḍalaiḥ saṃrambhadṛgbhiḥ paridaṣṭadacchadaiḥ |
mahābhujaiḥ sābharaṇaiḥ sahāyudhaiḥ sā prāstṛtā bhūḥ karabhorubhirbabhau || 39 ||
[Analyze grammar]

kabandhāstatra cotpetuḥ patitasvaśiro'kṣibhiḥ |
udyatāyudhadordaṇḍairādhāvanto bhaṭānmṛdhe || 40 ||
[Analyze grammar]

balirmahendraṃ daśabhistribhirairāvataṃ śaraiḥ |
caturbhiścaturo vāhānekenārohamārcchayat || 41 ||
[Analyze grammar]

sa tānāpatataḥ śakrastāvadbhiḥ śīghravikramaḥ |
ciccheda niśitairbhallairasamprāptānhasanniva || 42 ||
[Analyze grammar]

tasya karmottamaṃ vīkṣya durmarṣaḥ śaktimādade |
tāṃ jvalantīṃ maholkābhāṃ hastasthāmacchinaddhariḥ || 43 ||
[Analyze grammar]

tataḥ śūlaṃ tataḥ prāsaṃ tatastomaramṛṣṭayaḥ |
yadyacchastraṃ samādadyātsarvaṃ tadacchinadvibhuḥ || 44 ||
[Analyze grammar]

sasarjāthāsurīṃ māyāmantardhānagato'suraḥ |
tataḥ prādurabhūcchailaḥ surānīkopari prabho || 45 ||
[Analyze grammar]

tato nipetustaravo dahyamānā davāgninā |
śilāḥ saṭaṅkaśikharāścūrṇayantyo dviṣadbalam || 46 ||
[Analyze grammar]

mahoragāḥ samutpeturdandaśūkāḥ savṛścikāḥ |
siṃhavyāghravarāhāśca mardayanto mahāgajāḥ || 47 ||
[Analyze grammar]

yātudhānyaśca śataśaḥ śūlahastā vivāsasaḥ |
chindhi bhindhīti vādinyastathā rakṣogaṇāḥ prabho || 48 ||
[Analyze grammar]

tato mahāghanā vyomni gambhīraparuṣasvanāḥ |
aṅgārānmumucurvātairāhatāḥ stanayitnavaḥ || 49 ||
[Analyze grammar]

sṛṣṭo daityena sumahānvahniḥ śvasanasārathiḥ |
sāṃvartaka ivātyugro vibudhadhvajinīmadhāk || 50 ||
[Analyze grammar]

tataḥ samudra udvelaḥ sarvataḥ pratyadṛśyata |
pracaṇḍavātairuddhūta taraṅgāvartabhīṣaṇaḥ || 51 ||
[Analyze grammar]

evaṃ daityairmahāmāyairalakṣyagatibhī raṇe |
sṛjyamānāsu māyāsu viṣeduḥ surasainikāḥ || 52 ||
[Analyze grammar]

na tatpratividhiṃ yatra vidurindrādayo nṛpa |
dhyātaḥ prādurabhūttatra bhagavānviśvabhāvanaḥ || 53 ||
[Analyze grammar]

tataḥ suparṇāṃsakṛtāṅghripallavaḥ piśaṅgavāsā navakañjalocanaḥ |
adṛśyatāṣṭāyudhabāhurullasacchrīkaustubhānarghyakirīṭakuṇḍalaḥ || 54 ||
[Analyze grammar]

tasminpraviṣṭe'surakūṭakarmajā māyā vineśurmahinā mahīyasaḥ |
svapno yathā hi pratibodha āgate harismṛtiḥ sarvavipadvimokṣaṇam || 55 ||
[Analyze grammar]

dṛṣṭvā mṛdhe garuḍavāhamibhārivāha āvidhya śūlamahinodatha kālanemiḥ |
tallīlayā garuḍamūrdhni patadgṛhītvā tenāhanannṛpa savāhamariṃ tr yadhīśaḥ || 56 ||
[Analyze grammar]

mālī sumālyatibalau yudhi petaturyaccakreṇa kṛttaśirasāvatha mālyavāṃstam |
āhatya tigmagadayāhanadaṇḍajendraṃ tāvacchiro'cchinadarernadato'riṇādyaḥ || 57 ||
[Analyze grammar]