Chapter 1

[English text for this chapter is available]

atha prathamo'dhyāyaḥ |
śrīrājovāca |
samaḥ priyaḥ suhṛdbrahmanbhūtānāṃ bhagavānsvayam |
indra syārthe kathaṃ daityānavadhīdviṣamo yathā || 1 ||
[Analyze grammar]

na hyasyārthaḥ suragaṇaiḥ sākṣānniḥśreyasātmanaḥ |
naivāsurebhyo vidveṣo nodvegaścāguṇasya hi || 2 ||
[Analyze grammar]

iti naḥ sumahābhāga nārāyaṇaguṇānprati |
saṃśayaḥ sumahānjātastadbhavāṃśchettumarhati || 3 ||
[Analyze grammar]

śrīṛṣiruvāca |
sādhu pṛṣṭaṃ mahārāja hareścaritamadbhutam |
yadbhāgavatamāhātmyaṃ bhagavadbhaktivardhanam || 4 ||
[Analyze grammar]

gīyate paramaṃ puṇyamṛṣibhirnāradādibhiḥ |
natvā kṛṣṇāya munaye kathayiṣye hareḥ kathām || 5 ||
[Analyze grammar]

nirguṇo'pi hyajo'vyakto bhagavānprakṛteḥ paraḥ |
svamāyāguṇamāviśya bādhyabādhakatāṃ gataḥ || 6 ||
[Analyze grammar]

sattvaṃ rajastama iti prakṛternātmano guṇāḥ |
na teṣāṃ yugapadrājanhrāsa ullāsa eva vā || 7 ||
[Analyze grammar]

jayakāle tu sattvasya devarṣīnrajaso'surān |
tamaso yakṣarakṣāṃsi tatkālānuguṇo'bhajat || 8 ||
[Analyze grammar]

jyotirādirivābhāti saṅghātānna vivicyate |
vidantyātmānamātmasthaṃ mathitvā kavayo'ntataḥ || 9 ||
[Analyze grammar]

yadā sisṛkṣuḥ pura ātmanaḥ paro rajaḥ sṛjatyeṣa pṛthaksvamāyayā |
sattvaṃ vicitrāsu riraṃsurīśvaraḥ śayiṣyamāṇastama īrayatyasau || 10 ||
[Analyze grammar]

kālaṃ carantaṃ sṛjatīśa āśrayaṃ pradhānapumbhyāṃ naradeva satyakṛt |
ya eṣa rājannapi kāla īśitā sattvaṃ surānīkamivaidhayatyataḥ |
tatpratyanīkānasurānsurapriyo rajastamaskānpramiṇotyuruśravāḥ || 11 ||
[Analyze grammar]

atraivodāhṛtaḥ pūrvamitihāsaḥ surarṣiṇā |
prītyā mahākratau rājanpṛcchate'jātaśatrave || 12 ||
[Analyze grammar]

dṛṣṭvā mahādbhutaṃ rājā rājasūye mahākratau |
vāsudeve bhagavati sāyujyaṃ cedibhūbhujaḥ || 13 ||
[Analyze grammar]

tatrāsīnaṃ suraṛṣiṃ rājā pāṇḍusutaḥ kratau |
papraccha vismitamanā munīnāṃ śṛṇvatāmidam || 14 ||
[Analyze grammar]

śrīyudhiṣṭhira uvāca |
aho atyadbhutaṃ hyetaddurlabhaikāntināmapi |
vāsudeve pare tattve prāptiścaidyasya vidviṣaḥ || 15 ||
[Analyze grammar]

etadveditumicchāmaḥ sarva eva vayaṃ mune |
bhagavannindayā veno dvijaistamasi pātitaḥ || 16 ||
[Analyze grammar]

damaghoṣasutaḥ pāpa ārabhya kalabhāṣaṇāt |
sampratyamarṣī govinde dantavakraśca durmatiḥ || 17 ||
[Analyze grammar]

śapatorasakṛdviṣṇuṃ yadbrahma paramavyayam |
śvitro na jāto jihvāyāṃ nāndhaṃ viviśatustamaḥ || 18 ||
[Analyze grammar]

kathaṃ tasminbhagavati duravagrāhyadhāmani |
paśyatāṃ sarvalokānāṃ layamīyaturañjasā || 19 ||
[Analyze grammar]

etadbhrāmyati me buddhirdīpārciriva vāyunā |
brūhyetadadbhutatamaṃ bhagavānhyatra kāraṇam || 20 ||
[Analyze grammar]

śrībādarāyaṇiruvāca |
rājñastadvaca ākarṇya nārado bhagavānṛṣiḥ |
tuṣṭaḥ prāha tamābhāṣya śṛṇvatyāstatsadaḥ kathāḥ || 21 ||
[Analyze grammar]

śrīnārada uvāca |
nindanastavasatkāra nyakkārārthaṃ kalevaram |
pradhānaparayo rājannavivekena kalpitam || 22 ||
[Analyze grammar]

hiṃsā tadabhimānena daṇḍapāruṣyayoryathā |
vaiṣamyamiha bhūtānāṃ mamāhamiti pārthiva || 23 ||
[Analyze grammar]

yannibaddho'bhimāno'yaṃ tadvadhātprāṇināṃ vadhaḥ |
tathā na yasya kaivalyādabhimāno'khilātmanaḥ |
parasya damakarturhi hiṃsā kenāsya kalpyate || 24 ||
[Analyze grammar]

tasmādvairānubandhena nirvaireṇa bhayena vā |
snehātkāmena vā yuñjyātkathañcinnekṣate pṛthak || 25 ||
[Analyze grammar]

yathā vairānubandhena martyastanmayatāmiyāt |
na tathā bhaktiyogena iti me niścitā matiḥ || 26 ||
[Analyze grammar]

kīṭaḥ peśaskṛtā ruddhaḥ kuḍyāyāṃ tamanusmaran |
saṃrambhabhayayogena vindate tatsvarūpatām || 27 ||
[Analyze grammar]

evaṃ kṛṣṇe bhagavati māyāmanuja īśvare |
vaireṇa pūtapāpmānastamāpuranucintayā || 28 ||
[Analyze grammar]

kāmāddveṣādbhayātsnehādyathā bhaktyeśvare manaḥ |
āveśya tadaghaṃ hitvā bahavastadgatiṃ gatāḥ || 29 ||
[Analyze grammar]

gopyaḥ kāmādbhayātkaṃso dveṣāccaidyādayo nṛpāḥ |
sambandhādvṛṣṇayaḥ snehādyūyaṃ bhaktyā vayaṃ vibho || 30 ||
[Analyze grammar]

katamo'pi na venaḥ syātpañcānāṃ puruṣaṃ prati |
tasmātkenāpyupāyena manaḥ kṛṣṇe niveśayet || 31 ||
[Analyze grammar]

mātṛṣvasreyo vaścaidyo dantavakraśca pāṇḍava |
pārṣadapravarau viṣṇorvipraśāpātpadacyutau || 32 ||
[Analyze grammar]

śrīyudhiṣṭhira uvāca |
kīdṛśaḥ kasya vā śāpo haridāsābhimarśanaḥ |
aśraddheya ivābhāti harerekāntināṃ bhavaḥ || 33 ||
[Analyze grammar]

dehendri yāsuhīnānāṃ vaikuṇṭhapuravāsinām |
dehasambandhasambaddhametadākhyātumarhasi || 34 ||
[Analyze grammar]

śrīnārada uvāca |
ekadā brahmaṇaḥ putrā viṣṇulokaṃ yadṛcchayā |
sanandanādayo jagmuścaranto bhuvanatrayam || 35 ||
[Analyze grammar]

pañcaṣaḍḍhāyanārbhābhāḥ pūrveṣāmapi pūrvajāḥ |
digvāsasaḥ śiśūnmatvā dvāḥsthau tānpratyaṣedhatām || 36 ||
[Analyze grammar]

aśapankupitā evaṃ yuvāṃ vāsaṃ na cārhathaḥ |
rajastamobhyāṃ rahite pādamūle madhudviṣaḥ |
pāpiṣṭhāmāsurīṃ yoniṃ bāliśau yātamāśvataḥ || 37 ||
[Analyze grammar]

evaṃ śaptau svabhavanātpatantau tau kṛpālubhiḥ |
proktau punarjanmabhirvāṃ tribhirlokāya kalpatām || 38 ||
[Analyze grammar]

jajñāte tau diteḥ putrau daityadānavavanditau |
hiraṇyakaśipurjyeṣṭho hiraṇyākṣo'nujastataḥ || 39 ||
[Analyze grammar]

hato hiraṇyakaśipurhariṇā siṃharūpiṇā |
hiraṇyākṣo dharoddhāre bibhratā śaukaraṃ vapuḥ || 40 ||
[Analyze grammar]

hiraṇyakaśipuḥ putraṃ prahlādaṃ keśavapriyam |
jighāṃsurakaronnānā yātanā mṛtyuhetave || 41 ||
[Analyze grammar]

taṃ sarvabhūtātmabhūtaṃ praśāntaṃ samadarśanam |
bhagavattejasā spṛṣṭaṃ nāśaknoddhantumudyamaiḥ || 42 ||
[Analyze grammar]

tatastau rākṣasau jātau keśinyāṃ viśravaḥsutau |
rāvaṇaḥ kumbhakarṇaśca sarvalokopatāpanau || 43 ||
[Analyze grammar]

tatrāpi rāghavo bhūtvā nyahanacchāpamuktaye |
rāmavīryaṃ śroṣyasi tvaṃ mārkaṇḍeyamukhātprabho || 44 ||
[Analyze grammar]

tāvatra kṣatriyau jātau mātṛṣvasrātmajau tava |
adhunā śāpanirmuktau kṛṣṇacakrahatāṃhasau || 45 ||
[Analyze grammar]

vairānubandhatīvreṇa dhyānenācyutasātmatām |
nītau punarhareḥ pārśvaṃ jagmaturviṣṇupārṣadau || 46 ||
[Analyze grammar]

śrīyudhiṣṭhira uvāca |
vidveṣo dayite putre kathamāsīnmahātmani |
brūhi me bhagavanyena prahlādasyācyutātmatā || 47 ||
[Analyze grammar]