Chapter 1

[English text for this chapter is available]

rājovāca |
priyavrato bhāgavata ātmārāmaḥ kathaṃ mune |
gṛhe'ramata yanmūlaḥ karmabandhaḥ parābhavaḥ || 1 ||
[Analyze grammar]

na nūnaṃ muktasaṅgānāṃ tādṛśānāṃ dvijarṣabha |
gṛheṣvabhiniveśo'yaṃ puṃsāṃ bhavitumarhati || 2 ||
[Analyze grammar]

mahatāṃ khalu viprarṣe uttamaślokapādayoḥ |
chāyānirvṛtacittānāṃ na kuṭumbe spṛhāmatiḥ || 3 ||
[Analyze grammar]

saṃśayo'yaṃ mahānbrahmandārāgārasutādiṣu |
saktasya yatsiddhirabhūtkṛṣṇe ca matiracyutā || 4 ||
[Analyze grammar]

śrīśuka uvāca |
bāḍhamuktaṃ bhagavata uttamaślokasya śrīmaccaraṇāravindamakarandarasa āveśitacetaso bhāgavataparamahaṃsadayitakathāṃ kiñcidantarāyavihatāṃ svāṃ śivatamāṃ padavīṃ na prāyeṇa hinvanti || 5 ||
[Analyze grammar]

yarhi vāva ha rājansa rājaputraḥ priyavrataḥ paramabhāgavato nāradasya caraṇopasevayāñjasāvagataparamārthasatattvo brahmasatreṇa dīkṣiṣyamāṇo 'vanitalaparipālanāyāmnāta pravaraguṇagaṇaikāntabhājanatayā svapitropāmantrito bhagavati vāsudeva evāvyavadhānasamādhiyogena samāveśita sakalakārakakriyākalāpo naivābhyanandadyadyapi tadapratyāmnātavyaṃ tadadhikaraṇa ātmano'nyasmādasato'pi parābhavamanvīkṣamāṇaḥ || 6 ||
[Analyze grammar]

atha ha bhagavānādideva etasya guṇavisargasya paribṛṃhaṇānudhyānavyavasitasakalajagad abhiprāya ātmayonirakhilanigamanijagaṇapariveṣṭitaḥ svabhavanādavatatāra || 7 ||
[Analyze grammar]

sa tatra tatra gaganatala uḍupatiriva vimānāvalibhiranupathamamara parivṛḍhairabhipūjyamānaḥ pathi pathi ca varūthaśaḥ siddhagandharvasādhyacāraṇamuni gaṇairupagīyamāno gandhamādanadroṇīmavabhāsayannupasasarpa || 8 ||
[Analyze grammar]

tatra ha vā enaṃ devarṣirhaṃsayānena pitaraṃ bhagavantaṃ hiraṇyagarbhamupalabhamānaḥ sahasaivotthāyārhaṇena saha pitāputrābhyāmavahitāñjalirupatasthe || 9 ||
[Analyze grammar]

bhagavānapi bhārata tadupanītārhaṇaḥ sūktavākenātitarāmuditaguṇagaṇāvatārasujayaḥ priyavratamādipuruṣastaṃ sadayahāsāvaloka iti hovāca || 10 ||
[Analyze grammar]

śrībhagavānuvāca |
nibodha tātedamṛtaṃ bravīmi māsūyituṃ devamarhasyaprameyam |
vayaṃ bhavaste tata eṣa maharṣirvahāma sarve vivaśā yasya diṣṭam || 11 ||
[Analyze grammar]

na tasya kaścittapasā vidyayā vā na yogavīryeṇa manīṣayā vā |
naivārthadharmaiḥ parataḥ svato vā kṛtaṃ vihantuṃ tanubhṛdvibhūyāt || 12 ||
[Analyze grammar]

bhavāya nāśāya ca karma kartuṃ śokāya mohāya sadā bhayāya |
sukhāya duḥkhāya ca dehayogamavyaktadiṣṭaṃ janatāṅga dhatte || 13 ||
[Analyze grammar]

yadvāci tantyāṃ guṇakarmadāmabhiḥ sudustarairvatsa vayaṃ suyojitāḥ |
sarve vahāmo balimīśvarāya protā nasīva dvipade catuṣpadaḥ || 14 ||
[Analyze grammar]

īśābhisṛṣṭaṃ hyavarundhmahe'ṅga duḥkhaṃ sukhaṃ vā guṇakarmasaṅgāt |
āsthāya tattadyadayuṅkta nāthaścakṣuṣmatāndhā iva nīyamānāḥ || 15 ||
[Analyze grammar]

mukto'pi tāvadbibhṛyātsvadehamārabdhamaśnannabhimānaśūnyaḥ |
yathānubhūtaṃ pratiyātanidraḥ kiṃ tvanyadehāya guṇānna vṛṅkte || 16 ||
[Analyze grammar]

bhayaṃ pramattasya vaneṣvapi syādyataḥ sa āste sahaṣaṭsapatnaḥ |
jitendriyasyātmaraterbudhasya gṛhāśramaḥ kiṃ nu karotyavadyam || 17 ||
[Analyze grammar]

yaḥ ṣaṭsapatnānvijigīṣamāṇo gṛheṣu nirviśya yateta pūrvam |
atyeti durgāśrita ūrjitārīnkṣīṇeṣu kāmaṃ vicaredvipaścit || 18 ||
[Analyze grammar]

tvaṃ tvabjanābhāṅghrisarojakośa durgāśrito nirjitaṣaṭsapatnaḥ |
bhuṅkṣveha bhogānpuruṣātidiṣṭānvimuktasaṅgaḥ prakṛtiṃ bhajasva || 19 ||
[Analyze grammar]

śrīśuka uvāca |
iti samabhihito mahābhāgavato bhagavatastribhuvanaguroranuśāsanamātmano laghutayāvanata śirodharo bāḍhamiti sabahumānamuvāha || 20 ||
[Analyze grammar]

bhagavānapi manunā yathāvadupakalpitāpacitiḥ priyavrata nāradayoraviṣamamabhisamīkṣamāṇayorātmasamavasthānamavāṅmanasaṃ kṣayamavyavahṛtaṃ pravartayannagamat || 21 ||
[Analyze grammar]

manurapi pareṇaivaṃ pratisandhitamanorathaḥ surarṣivarānumatenātmajamakhila dharāmaṇḍalasthitiguptaya āsthāpya svayamativiṣamaviṣayaviṣajalāśayāśāyā upararāma || 22 ||
[Analyze grammar]

iti ha vāva sa jagatīpatirīśvarecchayādhiniveśitakarmādhikāro'khilajagadbandhadhvaṃsana parānubhāvasya bhagavata ādipuruṣasyāṅghriyugalānavaratadhyānānubhāvena parirandhitakaṣāyāśayo 'vadāto'pi mānavardhano mahatāṃ mahītalamanuśaśāsa || 23 ||
[Analyze grammar]

atha ca duhitaraṃ prajāpaterviśvakarmaṇa upayeme barhiṣmatīṃ nāma tasyāmu ha vāva ātmajānātmasamānaśīlaguṇakarmarūpavīryodārāndaśa bhāvayāmbabhūva kanyāṃ ca yavīyasīmūrjasvatīṃ nāma || 24 ||
[Analyze grammar]

āgnīdhredhmajihvayajñabāhumahāvīrahiraṇyaretoghṛtapṛṣṭhasavanamedhātithivītihotrakavaya iti sarva evāgnināmānaḥ || 25 ||
[Analyze grammar]

eteṣāṃ kavirmahāvīraḥ savana iti traya āsannūrdhvaretasasta ātmavidyāyāmarbhabhāvādārabhya kṛtaparicayāḥ pāramahaṃsyamevāśramamabhajan || 26 ||
[Analyze grammar]

tasminnu ha vā upaśamaśīlāḥ paramarṣayaḥ sakalajīvanikāyāvāsasya bhagavato vāsudevasya bhītānāṃ śaraṇabhūtasya śrīmaccaraṇāravindāviratasmaraṇāvigalitaparamabhaktiyogānubhāvena paribhāvitāntarhṛdayādhigate bhagavati sarveṣāṃ bhūtānāmātmabhūte pratyag ātmanyevātmanastādātmyamaviśeṣeṇa samīyuḥ || 27 ||
[Analyze grammar]

anyasyāmapi jāyāyāṃ trayaḥ putrā āsannuttamastāmaso raivata iti manvantarādhipatayaḥ || 28 ||
[Analyze grammar]

evamupaśamāyaneṣu svatanayeṣvatha jagatīpatirjagatīmarbudānyekādaśa parivatsarāṇāmavyāhatākhilapuruṣakārasārasambhṛtadordaṇḍayugalāpīḍitamaurvīguṇastanitaviramita dharmapratipakṣo barhiṣmatyāścānudinamedhamānapramodaprasaraṇayauṣiṇyavrīḍāpramuṣita hāsāvalokarucirakṣvelyādibhiḥ parābhūyamānaviveka ivānavabudhyamāna iva mahāmanā bubhuje || 29 ||
[Analyze grammar]

1 yāvadavabhāsayati suragirimanuparikrāmanbhagavānādityo vasudhātalamardhenaiva pratapatyardhenāvacchādayati tadā hi bhagavadupāsanopacitātipuruṣa prabhāvastadanabhinandansamajavena rathena jyotirmayena rajanīmapi dinaṃ kariṣyāmīti sapta kṛtvastaraṇimanuparyakrāmaddvitīya iva pataṅgaḥ || 30 ||
[Analyze grammar]