Chapter 23

[English text for this chapter is available]

maitreya uvāca |
dṛṣṭvātmānaṃ pravayasaṃ ekadā vainya ātmavān |
ātmanā vardhitāśeṣa svānusargaḥ prajāpatiḥ || 1 ||
[Analyze grammar]

jagatastasthuṣaścāpi vṛttido dharmabhṛtsatām |
niṣpāditeśvarādeśo yadarthamiha jajñivān || 2 ||
[Analyze grammar]

ātmajeṣvātmajāṃ nyasya virahād rudatīmiva |
prajāsu vimanaḥsvekaḥ sadāro'gāttapovanam || 3 ||
[Analyze grammar]

tatrāpyadābhyaniyamo vaikhānasasusammate |
ārabdha ugratapasi yathā svavijaye purā || 4 ||
[Analyze grammar]

kandamūlaphalāhāraḥ śuṣkaparṇāśanaḥ kvacit |
abbhakṣaḥ katicitpakṣān vāyubhakṣastataḥ param || 5 ||
[Analyze grammar]

grīṣme pañcatapā vīro varṣāsvāsāraṣāṇmuniḥ |
ākaṇṭhamagnaḥ śiśire udake sthaṇḍileśayaḥ || 6 ||
[Analyze grammar]

titikṣuryatavāgdānta ūrdhvaretā jitānilaḥ |
ārirādhayiṣuḥ kṛṣṇaṃ acarat tapa uttamam || 7 ||
[Analyze grammar]

tena kramānusiddhena dhvastakarmamalāśayaḥ |
prāṇāyāmaiḥ sanniruddha ṣaḍvargaśchinnabandhanaḥ || 8 ||
[Analyze grammar]

sanatkumāro bhagavān yadāhādhyātmikaṃ param |
yogaṃ tenaiva puruṣaṃ abhajat puruṣarṣabhaḥ || 9 ||
[Analyze grammar]

bhagavaddharmiṇaḥ sādhoḥ śraddhayā yatataḥ sadā |
bhaktirbhagavati brahmaṇi ananyaviṣayābhavat || 10 ||
[Analyze grammar]

tasyānayā bhagavataḥ parikarmaśuddha |
sattvātmanastadanu saṃsmaraṇānupūrtyā |
jñānaṃ viraktimadabhūt niśitena yena |
ciccheda saṃśayapadaṃ nijajīvakośam || 11 ||
[Analyze grammar]

chinnānyadhīradhigatātmagatirnirīhaḥ |
tattatyaje'cchinadidaṃ vayunena yena |
tāvanna yogagatibhiryatirapramatto |
yāvad‍gadāgrajakathāsu ratiṃ na kuryāt || 12 ||
[Analyze grammar]

evaṃ sa vīrapravaraḥ saṃyojyātmānamātmani |
brahmabhūto dṛḍhaṃ kāle tatyāja svaṃ kalevaram || 13 ||
[Analyze grammar]

sampīḍya pāyuṃ pārṣṇibhyāṃ vāyumutsārayan śanaiḥ |
nābhyāṃ koṣṭheṣvavasthāpya hṛduraḥkaṇṭhaśīrṣaṇi || 14 ||
[Analyze grammar]

utsarpayaṃstu taṃ mūrdhni krameṇāveśya niḥspṛhaḥ |
vāyuṃ vāyau kṣitau kāyaṃ tejastejasyayūyujat || 15 ||
[Analyze grammar]

khānyākāśe dravaṃ toye yathāsthānaṃ vibhāgaśaḥ |
kṣitimambhasi tattejasi ado vāyau nabhasyamum || 16 ||
[Analyze grammar]

indriyeṣu manastāni tanmātreṣu yathod‍bhavam |
bhūtādināmūnyutkṛṣya mahatyātmani sandadhe || 17 ||
[Analyze grammar]

taṃ sarvaguṇavinyāsaṃ jīve māyāmaye nyadhāt |
taṃ cānuśayamātmasthaṃ asāvanuśayī pumān |
jñānavairāgyavīryeṇa svarūpastho'jahātprabhuḥ || 18 ||
[Analyze grammar]

arcirnāma mahārājñī tatpat‍nyanugatā vanam |
sukumāryatadarhā ca yatpad‍bhyāṃ sparśanaṃ bhuvaḥ || 19 ||
[Analyze grammar]

atīva bharturvratadharmaniṣṭhayā |
śuśrūṣayā cāraṣadehayātrayā |
nāvindatārtiṃ parikarśitāpi sā |
preyaskarasparśanamānanirvṛtiḥ || 20 ||
[Analyze grammar]

dehaṃ vipannākhilacetanādikaṃ |
patyuḥ pṛthivyā dayitasya cātmanaḥ |
ālakṣya kiñcicca vilapya sā satī |
citāmathāropayadadrisānuni || 21 ||
[Analyze grammar]

vidhāya kṛtyaṃ hradinījalāplutā |
dattvodakaṃ bharturudārakarmaṇaḥ |
natvā divisthāṃstridaśāṃstriḥ parītya |
viveśa vahniṃ dhyāyatī bhartṛpādau || 22 ||
[Analyze grammar]

vilokyānugatāṃ sādhvīṃ pṛthuṃ vīravaraṃ patim |
tuṣṭuvurvaradā devaiḥ devapat‍nyaḥ sahasraśaḥ || 23 ||
[Analyze grammar]

kurvatyaḥ kusumāsāraṃ tasmin mandarasānuni |
nadatsvamaratūryeṣu gṛṇanti sma parasparam || 24 ||
[Analyze grammar]

devya ūcuḥ |
aho iyaṃ vadhūrdhanyā yā caivaṃ bhūbhujāṃ patim |
sarvātmanā patiṃ bheje yajñeśaṃ śrīrvadhūriva || 25 ||
[Analyze grammar]

saiṣā nūnaṃ vrajatyūrdhvamanu vainyaṃ patiṃ satī |
paśyatāsmānatītyārciḥ durvibhāvyena karmaṇā || 26 ||
[Analyze grammar]

teṣāṃ durāpaṃ kiṃ tvanyan martyānāṃ bhagavatpadam |
bhuvi lolāyuṣo ye vai naiṣkarmyaṃ sādhayantyuta || 27 ||
[Analyze grammar]

sa vañcito batātmadhruk kṛcchreṇa mahatā bhuvi |
labdhvāpavargyaṃ mānuṣyaṃ viṣayeṣu viṣajjate || 28 ||
[Analyze grammar]

maitreya uvāca |
stuvatīṣvamarastrīṣu patilokaṃ gatā vadhūḥ |
yaṃ vā ātmavidāṃ dhuryo vainyaḥ prāpācyutāśrayaḥ || 29 ||
[Analyze grammar]

itthambhūtānubhāvo'sau pṛthuḥ sa bhagavattamaḥ |
kīrtitaṃ tasya caritaṃ uddāmacaritasya te || 30 ||
[Analyze grammar]

ya idaṃ sumahatpuṇyaṃ śraddhayāvahitaḥ paṭhet |
śrāvayet śruṇuyādvāpi sa pṛthoḥ padavīmiyāt || 31 ||
[Analyze grammar]

brāhmaṇo brahmavarcasvī rājanyo jagatīpatiḥ |
vaiśyaḥ paṭhan viṭpatiḥ syāt śūdraḥ sattamatāmiyāt || 32 ||
[Analyze grammar]

trikṛtva idamākarṇya naro nāryathavā'dṛtā |
aprajaḥ suprajatamo nirdhano dhanavattamaḥ || 33 ||
[Analyze grammar]

aspaṣṭakīrtiḥ suyaśā mūrkho bhavati paṇḍitaḥ |
idaṃ svastyayanaṃ puṃsāṃ amaṅgalyanivāraṇam || 34 ||
[Analyze grammar]

dhanyaṃ yaśasyamāyuṣyaṃ svargyaṃ kalimalāpaham |
dharmārthakāmamokṣāṇāṃ samyak siddhimabhīpsubhiḥ || 35 ||
[Analyze grammar]

śraddhayaitadanuśrāvyaṃ caturṇāṃ kāraṇaṃ param || 35 ||
[Analyze grammar]

vijayābhimukho rājā śrutvaitadabhiyāti yān |
baliṃ tasmai harantyagre rājānaḥ pṛthave yathā || 36 ||
[Analyze grammar]

muktānyasaṅgo bhagavati amalāṃ bhaktimudvahan |
vainyasya caritaṃ puṇyaṃ śrṛṇuyāt śrāvayetpaṭhet || 37 ||
[Analyze grammar]

vaicitravīryābhihitaṃ mahanmāhātmyasūcakam |
asminkṛtamatimartyaṃ pārthavīṃ gatimāpnuyāt || 38 ||
[Analyze grammar]

anudinamidamādareṇa śrṛṇvan |
pṛthucaritaṃ prathayan vimuktasaṅgaḥ |
bhagavati bhavasindhupotapāde |
sa ca nipuṇāṃ labhate ratiṃ manuṣyaḥ || 39 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe pṛthucarite trayoviṃśo'dhyāyaḥ || 23 ||
[Analyze grammar]