Chapter 7

[English text for this chapter is available]

maitreya uvāca |
ityajenānunītena bhavena parituṣyatā |
abhyadhāyi mahābāho prahasya śrūyatāmiti || 1 ||
[Analyze grammar]

mahādeva uvāca |
nāghaṃ prajeśa bālānāṃ varṇaye nānucintaye |
devamāyābhibhūtānāṃ daṇḍastatra dhṛto mayā || 2 ||
[Analyze grammar]

prajāpaterdagdhaśīrṣṇo bhavatvajamukhaṃ śiraḥ |
mitrasya cakṣuṣekṣeta bhāgaṃ svaṃ barhiṣo bhagaḥ || 3 ||
[Analyze grammar]

pūṣā tu yajamānasya dadbhirjakṣatu piṣṭabhuk |
devāḥ prakṛtasarvāṅgā ye me uccheṣaṇaṃ daduḥ || 4 ||
[Analyze grammar]

bāhubhyāṃ aśvinoḥ pūṣṇo hastābhyāṃ kṛtabāhavaḥ |
bhavantu adhvaryavaścānye bastaśmaśrurbhṛgurbhavet || 5 ||
[Analyze grammar]

maitreya uvāca |
tadā sarvāṇi bhūtāni śrutvā mīḍhuṣṭamoditam |
parituṣṭātmabhistāta sādhu sādhvityathābruvan || 6 ||
[Analyze grammar]

tato mīḍhvāṃsamāmantrya śunāsīrāḥ saharṣibhiḥ |
bhūyastad devayajanaṃ samīḍhvadvedhaso yayuḥ || 7 ||
[Analyze grammar]

vidhāya kārtsnyena ca tad yadāha bhagavānbhavaḥ |
sandadhuḥ kasya kāyena savanīyapaśoḥ śiraḥ || 8 ||
[Analyze grammar]

sandhīyamāne śirasi dakṣo rudrābhivīkṣitaḥ |
sadyaḥ supta ivottasthau dadṛśe cāgrato mṛḍam || 9 ||
[Analyze grammar]

tadā vṛṣadhvajadveṣa kalilātmā prajāpatiḥ |
śivāvalokād abhavat śaraddhrada ivāmalaḥ || 10 ||
[Analyze grammar]

bhavastavāya kṛtadhīḥ nāśaknot anurāgataḥ |
autkaṇṭhyād bāṣpakalayā saṃparetāṃ sutāṃ smaran || 11 ||
[Analyze grammar]

kṛcchrātsaṃstabhya ca manaḥ premavihvalitaḥ sudhīḥ |
śaśaṃsa nirvyalīkena bhāveneśaṃ prajāpatiḥ || 12 ||
[Analyze grammar]

dakṣa uvāca |
bhūyānanugraha aho bhavatā kṛto me |
daṇḍastvayā mayi bhṛto yadapi pralabdhaḥ |
na brahmabandhuṣu ca vāṃ bhagavan avajñā |
tubhyaṃ hareśca kuta eva dhṛtavrateṣu || 13 ||
[Analyze grammar]

vidyātapo vratadharān mukhataḥ sma viprān |
brahmā'tmatattvamavituṃ prathamaṃ tvamasrāk |
tad‍brāhmaṇān parama sarvavipatsu pāsi |
pālaḥ paśūniva vibho pragṛhītadaṇḍaḥ || 14 ||
[Analyze grammar]

yo'sau mayāviditatattvadṛśā sabhāyāṃ |
kṣipto duruktiviśikhairvigaṇayya tanmām |
arvāk patantamarhattamanindayāpād |
dṛṣṭyā'rdrayā sa bhagavān svakṛtena tuṣyet || 15 ||
[Analyze grammar]

maitreya uvāca |
kṣamāpyaivaṃ sa mīḍhvāṃsaṃ brahmaṇā cānumaṃtritaḥ |
karma santānayāmāsa sopādhyāyartvigādibhiḥ || 16 ||
[Analyze grammar]

vaiṣṇavaṃ yajñasantatyai trikapālaṃ dvijottamāḥ |
puroḍāśaṃ niravapan vīrasaṃsargaśuddhaye || 17 ||
[Analyze grammar]

adhvaryuṇā'tta haviṣā yajamāno viśāmpate |
dhiyā viśuddhayā dadhyau tathā prādurabhūt hariḥ || 18 ||
[Analyze grammar]

tadā svaprabhayā teṣāṃ dyotayantyā diśo daśa |
muṣṇan teja upānītaḥ tārkṣyeṇa stotravājinā || 19 ||
[Analyze grammar]

śyāmo hiraṇyaraśano'rkakirīṭajuṣṭo |
nīlālaka bhramaramaṇḍitakuṇḍalāsyaḥ |
śaṅkhābjacakraśaracāpagadāsicarma |
vyagrairhiraṇmayabhujaiḥ iva karṇikāraḥ || 20 ||
[Analyze grammar]

vakṣasyadhiśritavadhūrvanamālyudāra |
hāsāvalokakalayā ramayaṃśca viśvam |
pārśvabhramadvyajana cāmararājahaṃsaḥ |
śvetātapatraśaśinopari rajyamānaḥ || 21 ||
[Analyze grammar]

tamupāgatamālakṣya sarve suragaṇādayaḥ |
praṇemuḥ sahasotthāya brahmendratryakṣanāyakāḥ || 22 ||
[Analyze grammar]

tattejasā hatarucaḥ sannajihvāḥ sasādhvasāḥ |
mūrdhnā dhṛtāñjalipuṭā upatasthuradhokṣajam || 23 ||
[Analyze grammar]

apyarvāgvṛttayo yasya mahi tvātmabhuvādayaḥ |
yathāmati gṛṇanti sma kṛtānugrahavigraham || 24 ||
[Analyze grammar]

dakṣo gṛhītārhaṇasādanottamaṃ |
yajñeśvaraṃ viśvasṛjāṃ paraṃ gurum |
sunandanandādyanugairvṛtaṃ mudā |
gṛṇanprapede prayataḥ kṛtāñjaliḥ || 25 ||
[Analyze grammar]

dakṣa uvāca |
śuddhaṃ svadhāmnyuparatākhilabuddhyavasthaṃ |
cinmātramekamabhayaṃ pratiṣidhya māyām |
tiṣṭhan tayaiva puruṣatvamupetya tasyām |
āste bhavānapariśuddha ivātmataṃtra || 26 ||
[Analyze grammar]

ṛtvija ūcuḥ |
tattvaṃ na te vayamanañjana rudraśāpāt |
karmaṇyavagrahadhiyo bhagavan vidāmaḥ |
dharmopalakṣaṇamidaṃ trivṛdadhvarākhyaṃ |
jñātaṃ yadarthamadhidaivamado vyavasthāḥ || 27 ||
[Analyze grammar]

sadasyā ūcuḥ |
utpattyadhvanyaśaraṇa urukleśadurge'ntakogra |
vyālānviṣṭe viṣayamṛgatṛṣyātmagehorubhāraḥ |
dvandvaśvabhre khalamṛgabhaye śokadāve'jñasārthaḥ |
pādaukaste śaraṇada kadā yāti kāmopasṛṣṭaḥ || 28 ||
[Analyze grammar]

rudra uvāca |
tava varada varāṅghrāvāśiṣehākhilārthe |
hyapi munibhirasaktairādareṇārhaṇīye |
yadi racitadhiyaṃ māvidyaloko'paviddhaṃ |
japati na gaṇaye tattvatparānugraheṇa || 29 ||
[Analyze grammar]

bhṛguruvāca |
yanmāyayā gahanayāpahṛtātmabodhā |
brahmādayastanubhṛtastamasi svapantaḥ |
nātmanśritaṃ tava vidantyadhunāpi tattvaṃ |
so'yaṃ prasīdatu bhavānpraṇatātmabandhuḥ || 30 ||
[Analyze grammar]

brahmovāca |
naitatsvarūpaṃ bhavato'sau padārtha |
bhedagrahaiḥ puruṣo yāvadīkṣet |
jñānasya cārthasya guṇasya cāśrayo |
māyāmayād vyatirikto matastvam || 31 ||
[Analyze grammar]

indra uvāca |
idamapyacyuta viśvabhāvanaṃ |
vapurānandakaraṃ manodṛśām |
suravidviṭkṣapaṇairudāyudhaiḥ |
bhujadaṇḍairupapannamaṣṭabhiḥ || 32 ||
[Analyze grammar]

pat‍nya ūcuḥ |
yajño'yaṃ tava yajanāya kena sṛṣṭo |
vidhvastaḥ paśupatinādya dakṣakopāt |
taṃ nastvaṃ śavaśayanābhaśāntamedhaṃ |
yajñātmannalinarucā dṛśā punīhi || 33 ||
[Analyze grammar]

ṛṣaya ūcuḥ |
ananvitaṃ te bhagavan viceṣṭitaṃ |
yadātmanā carasi hi karma nājyase |
vibhūtaye yata upasedurīśvarīṃ |
na manyate svayamanuvartatīṃ bhavān || 34 ||
[Analyze grammar]

siddhā ūcuḥ |
ayaṃ tvatkathāmṛṣṭapīyūṣanadyāṃ |
manovāraṇaḥ kleśadāvāgnidagdhaḥ |
tṛṣārto'vagāḍho na sasmāra dāvaṃ |
na niṣkrāmati brahmasampannavannaḥ || 35 ||
[Analyze grammar]

yajamānyuvāca |
svāgataṃ te prasīdeśa tubhyaṃ namaḥ |
śrīnivāsa śriyā kāntayā trāhi naḥ |
tvāmṛte'dhīśa nāṅgairmakhaḥ śobhate |
śīrṣahīnaḥ kabandho yathā puruṣaḥ || 36 ||
[Analyze grammar]

lokapālā ūcuḥ |
dṛṣṭaḥ kiṃ no dṛgbhirasad‍grahaistvaṃ |
pratyagdraṣṭā dṛśyate yena viśvam |
māyā hyeṣā bhavadīyā hi bhūman |
yastvaṃ ṣaṣṭhaḥ pañcabhirbhāsi bhūtaiḥ || 37 ||
[Analyze grammar]

yogeśvarā ūcuḥ |
preyānna te'nyo'styamutastvayi prabho |
viśvātmanīkṣenna pṛthagya ātmanaḥ |
athāpi bhaktyeśa tayopadhāvatāṃ |
ananyavṛttyānugṛhāṇa vatsala || 38 ||
[Analyze grammar]

jagadud‍bhavasthitilayeṣu daivato |
bahubhidyamānaguṇayā'tmamāyayā |
racitātmabhedamataye svasaṃsthayā |
vinivartitabhramaguṇātmane namaḥ || 39 ||
[Analyze grammar]

brahmovāca |
namaste śritasattvāya dharmādīnāṃ ca sūtaye |
nirguṇāya ca yatkāṣṭhāṃ nāhaṃ vedāpare'pi ca || 40 ||
[Analyze grammar]

agniruvāca |
yattejasāhaṃ susamiddhatejā |
havyaṃ vahe svadhvara ājyasiktam |
taṃ yajñiyaṃ pañcavidhaṃ ca pañcabhiḥ |
sviṣṭaṃ yajurbhiḥ praṇato'smi yajñam || 41 ||
[Analyze grammar]

devā ūcuḥ |
purā kalpāpāye svakṛtamudarīkṛtya vikṛtaṃ |
tvamevādyastasmin salila uragendrādhiśayane |
pumān śeṣe siddhairhṛdi vimṛśitādhyātmapadaviḥ |
sa evādyākṣṇoryaḥ pathi carasi bhṛtyānavasi naḥ || 42 ||
[Analyze grammar]

gandharvā ūcuḥ |
aṃśāṃśāste deva marīcyādaya ete |
brahmendrādyā devagaṇā rudrapurogāḥ |
krīḍābhāṇḍaṃ viśvamidaṃ yasya vibhūman |
tasmai nityaṃ nātha namaste karavāma || 43 ||
[Analyze grammar]

vidyādharā ūcuḥ |
tvanmāyayārthamabhipadya kalevare'smin |
kṛtvā mamāhamiti durmatirutpathaiḥ svaiḥ |
kṣipto'pyasadviṣayalālasa ātmamohaṃ |
yuṣmatkathāmṛtaniṣevaka udvyudasyet || 44 ||
[Analyze grammar]

brāhmaṇā ūcuḥ |
tvaṃ kratustvaṃ havistvaṃ hutāśaḥ svayaṃ |
tvaṃ hi maṃtraḥ samid darbhapātrāṇi ca |
tvaṃ sadasyartvijo dampatī devatā |
agnihotraṃ svadhā soma ājyaṃ paśuḥ || 45 ||
[Analyze grammar]

tvaṃ purā gāṃ rasāyā mahāsūkaro |
daṃṣṭrayā padminīṃ vāraṇendro yathā |
stūyamāno nadan līlayā yogibhiḥ |
vyujjahartha trayīgātra yajñakratuḥ || 46 ||
[Analyze grammar]

sa prasīda tvamasmākaṃ ākāṅkṣatāṃ |
darśanaṃ te paribhraṣṭasatkarmaṇām |
kīrtyamāne nṛbhirnāmni yajñeśa te |
yajñavighnāḥ kṣayaṃ yānti tasmai namaḥ || 47 ||
[Analyze grammar]

maitreya uvāca |
iti dakṣaḥ kaviryajñaṃ bhadra rudrābhimarśitam |
kīrtyamāne hṛṣīkeśe sanninye yajñabhāvane || 48 ||
[Analyze grammar]

bhagavān svena bhāgena sarvātmā sarvabhāgabhuk |
dakṣaṃ babhāṣa ābhāṣya prīyamāṇa ivānagha || 49 ||
[Analyze grammar]

śrībhagavānuvāca |
ahaṃ brahmā ca śarvaśca jagataḥ kāraṇaṃ param |
ātmeśvara upadraṣṭā svayaṃ dṛgaviśeṣaṇaḥ || 50 ||
[Analyze grammar]

ātmamāyāṃ samāviśya so'haṃ guṇamayīṃ dvija |
sṛjan rakṣan haran viśvaṃ dadhre saṃjñāṃ kriyocitām || 51 ||
[Analyze grammar]

tasmin brahmaṇyadvitīye kevale paramātmani |
brahmarudrau ca bhūtāni bhedenājño'nupaśyati || 52 ||
[Analyze grammar]

yathā pumānna svāṅgeṣu śiraḥpāṇyādiṣu kvacit |
pārakyabuddhiṃ kurute evaṃ bhūteṣu matparaḥ || 53 ||
[Analyze grammar]

trayāṇāṃ ekabhāvānāṃ yo na paśyati vai bhidām |
sarvabhūtātmanāṃ brahman sa śāntiṃ adhigacchati || 54 ||
[Analyze grammar]

maitreya uvāca |
evaṃ bhagavatādiṣṭaḥ prajāpatipatirharim |
arcitvā kratunā svena devān ubhayato'yajat || 55 ||
[Analyze grammar]

rudraṃ ca svena bhāgena hyupādhāvatsamāhitaḥ |
karmaṇodavasānena somapānitarānapi |
udavasya sahartvigbhiḥ sasnāvavabhṛthaṃ tataḥ || 56 ||
[Analyze grammar]

tasmā apyanubhāvena svenaivāvāptarādhase |
dharma eva matiṃ dattvā tridaśāste divaṃ yayuḥ || 57 ||
[Analyze grammar]

evaṃ dākṣāyaṇī hitvā satī pūrvakalevaram |
jajñe himavataḥ kṣetre menāyāmiti śuśruma || 58 ||
[Analyze grammar]

tameva dayitaṃ bhūya āvṛṅkte patimambikā |
ananyabhāvaikagatiṃ śaktiḥ supteva pūruṣam || 59 ||
[Analyze grammar]

etad‍bhagavataḥ śambhoḥ karma dakṣādhvaradruhaḥ |
śrutaṃ bhāgavatāt śiṣyād uddhavānme bṛhaspateḥ || 60 ||
[Analyze grammar]

idaṃ pavitraṃ paramīśaceṣṭitaṃ |
yaśasyamāyuṣyamaghaughamarṣaṇam |
yo nityadā'karṇya naro'nukīrtayed |
dhunotyaghaṃ kaurava bhaktibhāvataḥ || 61 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe dakṣayajñasaṃdhāna saptamo'dhyāyaḥ || 7 ||
[Analyze grammar]